Read Chipaya MARCOS 10 Bible Online

MARCOS 10 - Chipaya bible

MARCOS 10

¹Jesusaki Cafarnaúm wathkiśtan ulanźku Judea yoqkin oqhchićha, niźaśa Jordán pujkiśtan tüna oqhchićha. Niźaśa Jesusiźkiś wilta tama źoñinaka akhsićha, neqhśtan Jesusaki wilta ni źoñinaka thaxni qallantichićha nïź thaxinś nuźu.

²Neqhśtan yaqhap fariseo źoñinakaki Jesusiźkiś makhatchićha, Jesusa ujkiś thxotśxapa pewkśićha, tuź khikan; tshi luktaqa perśun thunatan jalhtasaya.

³Jesusaki ninakźkiś qhäśićha: — ¿Moisés, xaqhnuź mantichitaxo?

⁴Ninakaki khichićha: — Moiseski wakiśsqatchićha tshi luktaqaki thunakiś jalhtiś papila thäsaćha, nätan jalhtiśxapaki.

⁵Neqhśtan Jesusaki ninakźkiś khichićha: — Moiseski anćhuk choxru quśśiś khen ni lï nuź khjirchićha.

⁶Niźaśa qallantiś kiśtanpacha, ‘Yöśki luktaqa niźaśa mätaqa pächićha,

⁷Xalla niźtikiśtan źoñiki perśun mä ephźkiśtan saraqakićha thunatan qamśxapa,

⁸niźaśa ni pukultanaki tshi źoñiźtaqaś khekićha.’ Niźaśa anaćha piśk, ans tshiqaśśa.

⁹Xalla niźtikiśtan ni Yöś uchśta tshi źoñiki anaź jaljasaćha.

¹⁰Neqhśtan qhuykiś khikanaki nïź thaxintanakaki, Jesusa wilta pewkśićha ti ćhhultaqkiśtan.

¹¹Neqhśtan Jesusaki ninakźkiś khichićha: — Xaqhsilta źoñit thunatan jalhtiźku yaqha mätaqźtan śalźax nïki, ujź päćha, tukita thuna moq'u;

¹²niźaśa xaqhsilta mätaqat perśun luktaqźtan jalhtiźku yaqha luktaqźtan śalźax nïki, uj śaqaśl päćha, tukita lukź moq'u.

¹³Neqhśtan Jesusiźkin okhalanaka śhikchićha qharźtan lanźinaxu; Jesusiź thaxintanakaki ni okhala śhikñi źoñinaka ujśićha.

¹⁴Neqhśtan Jesusaki niźta ćhhaxwñi nayźku źaxwchićha, neqhśtan thaxintanakźkiś chïźinchićha: — Ana khe, ni okhalanaka wethkin thonax khe ana ćhhaxwa, Yöś irpiś wathaki ti okhalanakź quś irataćha.

¹⁵Cheqpachal chiyućha, jëkit ana tanźnaćhax ni Yöś irpiś watha tshi okhalaźtaqaś nïki, anaź wira ni Yöś irpiś wathkiśiki luśhasaćha.

¹⁶Neqhśtan Jesusaki okhalanaka źkorźku q'ayachichićha, śapa mayniźkiś qharźtan lanźku.

¹⁷Neqhśtan Jesusaź saraqtan tshi źoñi śatipuru thonchićha nïź tukkiś killślaqi, ni źoñiki Jesusiźkiś pewkśićha: — Śuma thaxiñi, ¿werhki ćhhulu päśt wali khesaxo, ni wiñay źetchiś khiśxapa?

¹⁸Jesusaki nïźkiś qhäśićha: — ¿Amki qhaźtikiśtan śumamćha khexo? Anaź jëkhmi śumaki, Yöśpanqaśśa śumaki.

¹⁹Amki Yöś lï śiśśa: ‘Anaćha źoñź mätaqźtan źelhśki, niźaśa ana źoñi kona, ana thañiśä, ana toskara chiya źoñźta inapachkiśtan, niźaśa am mä eph kaśa.’

²⁰Ni źoñiki Jesusiźkiś qhäśićha: — Thaxiñi, qoltallkiśtanpacha thapa tinaka kaśśinćha.

²¹Jesusaki ni źoñź qhutñi śuma quśtan cherśićha, neqhśtan nïźkiś khichićha: — Amtaki tshi päś phalhtićha: Thappacha am qinasinaka tuyśka, t'aqhir źoñinakźkiś ni päś ona, neqhśtan am tsewkta yoqkin tshanti źelinchiśam khekićha. Nuź päźku wethkin thona, niźaśa werh apźka, wethtan oqhlayñi khe.

²²Neqhśtan niźta chïñi nonźku ni źoñiki upaquśhśićha, neqhśtan llakita oqhchićha niźaśa ni źoñiki walxa źelinchiśtaćha.

²³Neqhśtan Jesusaki thapa qhutñi chercherśićha, ni thaxintanakaźkiś palxaychićha, tuź khikan: — ¡Añcha ch'amaź khekićha ni Yöś irpiś wathkiś luśhki, tshi źelinchiś źoñźlaki!

²⁴Neqhśtan nïź thaxintanakaki Jesusaź chïtikiśtan añcha tsukhchićha, xalla neqhśtan Jesusaki wilta ninakźkiś chïchićha: — Jilanaka, ¡ni Yöś irpiś wathkiś luśhki, ch'amaź khekićha ti yoq päśnakkiś quś thäñi źoñinakźtaki!

²⁵Niźaśa tshan phaśilaćha tshi kamillu akuj khuñkiś watśki, tshi źelinchiś źoñiźtaki ch'amaź khekićha ni Yöś irpiś wathkiś luśhki.

²⁶Xalla ni nonźku ni thaxintanakaki tshanti iśpantichićha, neqhśtan ninakpora pewksasatćha: — ¿Jëkhpan liwrïta khesaxo?

²⁷Jesusaki ninaka cherźku, qhäśićha: — Źoñinakźtaki ana atchukaćha, ans ni Yöśtaki anaź ana atchukaki źelhćha.

²⁸Neqhśtan Piruki Jesusiźkiś khichićha: — Tata, werhnakki thappacha wethnaka qamanaka ekchinćha, niźaśa werhnakki am apźkichinćha.

²⁹Jesusaki qhäśićha: — Cheqpachal chiyućha, xaqhsiltat qhuyami, niźaśa jilanaka, kullakinakami, niźaśa mä ephmi, mätaqami, matinakami, yoqami, weth layku ekćhaxa niźaśa liwrïñi Yöś śuma kintuź khen,

³⁰xalla nïki tshiwatha wilta ti yoqkiś iyaź tanźnakićha; niźaśa qhuyanaka, jilanaka, kullakinaka, mänaka, matinaka, yoqanaka, qhaźta ćhhaxwtami; neqhśtan tikhźkuki Yöśtan wiñayaź qamakićha.

³¹Niźaśa anś wakchi tukkin khiñinakaki wirkinź khisnakićha, niźaśa anś wakchi wirkin khiñinakaśti tukkinź khisnakićha.

³²Neqhśtan ninakaki Jerusalén wathqhutñi oqatćha, Jesusaki nïź thaxintanakź tukkin oqatćha, niźaśa ninakaki tsukhchi apźnatćha. Neqhśtan Jesusaki wilta yaqhalla qhawśićha ni qhalu piśkchiś thaxintanaka, xalla neqhś ninakźkiś chïchićha ćhhulunakat wataćhaxa:

³³“Qhaźtaź anćhuk nay, xaśiki Jerusalén wathaź oqhćha, ni źoñź Matiki thätaź khekićha ni timlu chawkh jilirinakźkiś niźaśa ni lï utt'ayñinakźkiśimi, neqhśtan konqatśxapa thätaź khekićha niźaśa yaqha wathchiś źoñinakźkiś thätaź khekićha.

³⁴Niźaśa nïki iñartaź khekićha niźaśa qichtaź khekićha niźaśa llawsiźtan thjuttaź khekićha, neqhśtan kontaź khekićha; neqhśtan chheph maxkiśtan tikhśikiśtan jakatatakićha.”

³⁵Neqhśtan Santiaguźtan Juanźtan, Zebedeoź Machhnakaki, Jesusiźkiś makhatźku khichićha: — Thaxiñi, ćhhulut amkiśtan pekućhax ni thälla.

³⁶Neqhśtan Jesusaki ninakźkiś pewkśićha: — ¿Ćhhuluź päñi pekxo?

³⁷Ninakaki qhäśićha: — Am aśśiś watha irpiśkiś rokt'ućha, werhnak julsqatalla tshïki źew qhuttan, tshïki śqar qhuttan.

³⁸Neqhśtan Jesusaki ninakźkiś qhäśićha: — Anćhukki anaź śiśśa ćhhuluź mayćhaxa. ¿Anćhukki weth likhś taskiśtanź ni xar qhaś likasaxo, uśh wawtistaź khexä, werh wawtistaź ni wawtismuźtan?

³⁹Ninakaki qhäśićha: — Atasaćha. Neqhśtan Jesusaki ninakźkiś khichićha: — Cheqpachkiśtan, anćhukki likakićha ti xar qhaś, niźaśa anćhukki tanźnakićha ni weriź tanźta wawtismu.

⁴⁰Niźaśa ni weth źew qhuttan niźaśa śqar qhuttan julśki anaź werh ni thäś wakiśićha, ans thätaź khekićha jëkhnakźtaqaś weth eph thakśiźlani xalla ninakźkiś.

⁴¹Neqhśtan xalla ti nonźku ni qhalu thaxintanakaki źaxwchićha, ni Santiaguźxapa niźaśa Juanźxapa.

⁴²Neqhśtan Jesusaki thaxintanaka qhawśićha, neqhśtan ninakźkiś tuź khichićha: — Niźaśa anćhukki śiśśa, ni ana Yöś kirïchi źoñinakźkiśtan źelhćha walxa nïź aśtan nïź munañpikiś ni źoñinaka irpiś pekñi, niźaśa ninakporaqaś jiliri khissa.

⁴³Niźaśa anćhukakiś ana niźta khiśtanćha. Xalla ni anćhukakiśtan irpiś pekñiki, thapatiź manta päśtanćha,

⁴⁴niźaśa xaqhsiltat anćhukakiśtan tukkin khiś pekćhax nïki, thapa źoñinakź manta päñi khiśtanćha.

⁴⁵Niźaśa ni źoñź Matiki, ana manta päźinta khiśxapa thonchićha, ans manta päśxapa thonchićha, niźaśa nïź źeti thäśxapa paka kunta, thapa źoñinaka liwrïśxapa ninakź ujkiśtan.

⁴⁶Neqhśtan Jesusaki nïź thaxintanakźtanpacha Jericó watha irantichićha. Neqhśtan Jesusaź ni wathkiśtan nïź thaxintanakźtan niźaśa tama źoñinakźtan ulnan, tshi Bartimeo khita śura Timeoź Machh, jikhś atkiś julśi tomanźkan źelatćha.

⁴⁷Xalla ni Jesús Nazaret wathchiś źkatźinkiñi nonźku, ni śuraki qhawi qallantichićha: — ¡Jesusa Davidź Mati, werh oqźnalla!

⁴⁸Neqhśtan wakchi źoñinaka ni śur źoñi ch'uj khexo ujśićha, xalla neqhśtan ni śuraki tshan qhawchićha: — ¡Davidź Mati, werhpanź oqźnalla!

⁴⁹Neqhśtan Jesusaki tshithsku, khichićha: — Ni źoñi qhawźka. Ni śura qhawśićha, tuź khikan: — Ana eqhsna, tshitsna amź qhawźa.

⁵⁰Neqhśtan ni śuraki nïź irś śhoqźku thxotchićha, tshi layśku Jesusiźkin makhatchićha,

⁵¹neqhśtan Jesusaki ni źoñi pewkśićha: — ¿Ćhhulu päñim werh pekxo? Ni śur źoñiki qhäśićha: — Thaxiñi, werhki cherś pekućha.

⁵²Jesusaki nïźkiś khichićha: — Amiź thapa quśśiś khen amki ćhhetintamćha, xaśiki oqa. Xalla ni orapacha ni źoñiki cherchićha, neqhśtan Jesusiźtan chika ni jikhśkiś oqhchićha.