Read Chipaya MARCOS 11 Bible Online

MARCOS 11 - Chipaya bible

MARCOS 11

¹Ni Jerusalén wath keźu khen, Betfagé, tshïki Betania khita xochinaka keźu khistan, Jesusaki nïź pukultan thaxintanaka kuchanchićha ni Olivu khita kurkin,

²tuź khikan: — Ućhhun tukkin qolta athaź źelhćha xalla nikhuź oqa, xalla neqhśi irantiźku tshi aśnu moqta źelakićha, ni aśnukiś anaćha jëkhmi yawchiki. Neqhśtan jerźkuź śhikakićha.

³Niźaśa xaqhsilta źoñimiź pewkźnasaćha, qhaźtikiśtan niźta päxo khikan, Yöś tataź pekćha, niźaśa upakhiźkul anćhukakiś śhiknaćha.

⁴Neqhśtan ni pukultan thaxintanakaki oqhchićha, neqhśtan ni aśnu śalchićha uy śankiś moqta, neqhśtan jerhśićha.

⁵Niźaśa tshi qhaźultan neqhś źelhñi źoñinakaki pewkśićha: — ¿Ćhhuluź anćhuk päxo? ¿Qhaźtikiśtan anćhuk ni aśnu jerhźxo?

⁶Neqhśtan ninakaki Jesusiź chïtakama qhäśićha; nuźkiś ni źoñinakaki oqhqatchićha.

⁷Neqhśtan Jesusiźkin ni aśnu akhźkichićha, neqhśtan ninakź irśnaka karunźinćha, neqhśtan Jesusaki ni aśnukiś yawśićha.

⁸Tama źoñinakaki ninakź irś jikhśkiś chhinchićha, yaqhapanakaśti ni munti thaśnanaka murchićha, neqhśtan jikhśkiś chhinchićha.

⁹Jesusiź tukkin, oqhñi źoñinakaki niźaśa wirkin thonñi źoñinakami, qhawi qallantichićha: — ¡Xallalla! ¡Añcha walix khila ni Yöś thükiś thonñiki!

¹⁰¡Ni irpiś thonñiki añcha walićha, ni ućhum Davidź irpiś wathaki! ¡Xallalla, ni tsewkta Yöś wathkinaki!

¹¹Neqhśtan Jesusaki, Jerusalén watha luśhśićha niźaśa timluqhutñi oqhchićha, neqhśtan thapa qhutñi chercherśićha ni ćhhultaqinakź qhutñi, xalla neqhśtan thuñi śeśiźkhen Betania khita watha nïź qhalu piśkchiś thaxintanakźtan oqhchićha.

¹²Neqhśtan xaqataźuki, Jesusaki Betania wathkiśtan ulanźkan ćhheri eksqatchićha.

¹³Niźaśa aźkiśtan jiwus munti chhañchiś cherchićha, neqhśtan ni munti cherśñi oqhchićha jiwusichkä khikan, niźaśa ni munti irantiźku ana ćhhulumi wathchićha chhañiqaś źelatćha, anataćha jiwus ćhherś pacha.

¹⁴Neqhśtan Jesusaki ni jiwusiźkiś, khichićha: — ¡Anax jëkhmi iya am ćhherkiśtan lulhla! Nïź thaxintanakaki nïź chïta nonśićha.

¹⁵Neqhśtan Jerusalén watha irantiźku Jesusaki timlukiś luśhśićha, neqhśtan śawnkchuk thapa ni tuyñi niźaśa qhayñi źoñinaka thirqatchićha. Päś turkiñi źoñinakź miśha thoqźinchićha, niźaśa paloma tuyñiź śillami;

¹⁶ana jëkhmi chhichqatñitaćha ćhhul ćhhultaqinakami ni Timlukin.

¹⁷Xalla neqhśtan thaxinchićha, tuź khikan: — Ni khjirtikiśiki tuź khićha: ‘Weth qhuyaki khekićha mayiśiś qhuya thapa wathchiś źoñinakźta’, anćhukki pächinćhukćha thañź qhuyaźtaqaś.

¹⁸Xalla ni nonźku ni timlu chawkh jilirinakaki, niźaśa judiu lï thaxiñinaka nonśićha, neqhśtan qallantichićha xaqhnuź ni konas ninakaki eqhsnatćha, thappacha źoñinaka iśpantichitaćha nïź thaxinta.

¹⁹Thuñiź qattan śeślaqa, Jesusaki nïź thaxintanakźtan ni wathkiśtan ulanchićha.

²⁰Neqhśtan xaqawenśtaźu ni nuź wathkan ninakaki cherchićha, ni jiwus munti śep'ikiśtanpacha qhonchi.

²¹Neqhśtan Piruki Jesusiź chïtanaka khuñśicha, neqhśtan Jesusiźkiś khichićha: — Thaxiñi, cherźna, amiź ni jiwusiź moq'u chïta qhonchićha.

²²Neqhśtan Jesusaki qhäśićha: — Yöśkiś thapa quśtanpan khe.

²³Niźaśa cheqpachal chiyućha, xaqhsiltameqaś ti kurkiś chiyasaćha: ‘¡Teqhśtan saraqa, qotkiś thxotsna!’, niźaśa anam am quśkiś payśnaqćhaxniki, kiriya ni amiź chïta, nïki kumlisnakićha, neqhśtan nuźupan khekićha.

²⁴Niźtikiśtan anćhukakiś chiyućha, thapa anćhukaź mayiśikan maytanakaki, anćhuk tanśiźtaqaś kiriyakiź nïki, thätaź khekićha.

²⁵Niźaśa anćhukki mayiśikanaki, śumans pekakićha anćhuka moq'u chïñinakźtan, niźaśa am tsewkta yoqkin źelhñi Yöś Ephki anćhuka ujkiśtan pertunakićha.

²⁶Niźaśa anćhuk anaź pertunakź nïki, am tsewkta yoqkin źelhñi Yöś Ephki anaśaqaś anćhuka ujkiśtan pertunakićha.

²⁷Xalla neqhśtan ninakaki Jerusalén watha kephchićha. Neqhśtan Jesusaki timlukiś oqhlayatćha, neqhśtan ni timlu chawkh jiliriki nïźkiś makhatźkichićha, niźaśa ni lï thaxiñinaka, ni wath jilirinakami,

²⁸neqhśtan Jesusiźkiś pewkśićha: — ¿Ćhhul jilir achśtanam ti ćhhultaqinaka päxo? ¿Jëkht am uchchi jiliri ti ćhhultaqinaka päśxapa?

²⁹Jesusaki ninakźkiś qhäśićha: — Werh xaśiki anćhukakiś tshi śaqaś pewkźnaćha; anćhuk qhäśnakiź nïki, neqhśtan werhki chiyaćha ćhhul jilirź achśtan tiźtanaka pawućhaxa.

³⁰¿Jëkht Juan mantichi, wawtisaxu? ¿Yöś qaya, uśh źoñex mantichi? Xaśikiź qhäśna.

³¹Neqhśtan ninakpora ch'ärasi qallantichićha, tuź khikan: “Ućhumki Yöś kuchanźkitaćha khikanź chiyakź nïki, tïki qhäśnaćhan: ‘Neqhśtan, ¿qhaźtikiśtan ana kirïchinćhuktaxo?’

³²¿Qhaźtikiśtan ućhum chiyasaxo, źoñiź mantiźkitaćha khikan?” Niźaśa ninakaki źoñinaka eqhsnatćha, niźaśa thappacha ti źoñinakaki Juan Yöśkiśtan chïñi kiriyatćha.

³³Niźtikiśtan Jesusiźkiś khichićha: — Werhnakki anal śiśućha. Neqhśtan Jesusaki ninakźkiś qhäśićha: — Werhmi ana śaqal anćhukakiś chiyasaćha, ćhhul jilir achchiś ti ćhhultaqi pawućhaxa.