Read Chipaya MARCOS 16 Bible Online

MARCOS 16 - Chipaya bible

MARCOS 16

¹Jejś thuñiź wathtan, María Magdalenatan Santiaguź mä Mariyatan Salumatan, tinakaki perfumi qhaychićha, Jesusiź xañchikin thxalhśxapa.

²Wentan tumink wenś śiman qallantiñi thuñikiś, ninakaki Jesusiź puyi cherśñi oqhchićha, thuñiź thewźkanalla.

³Niźaśa ni puyi oqhkan ninakpora parlassićha: — ¿Jëkit ni maś qisqatźinakexo, ni puy śankiśtan?

⁴Xalla neqhśtan ni paqh maśtan śipultura chawkhta cherźku, ni śipultura qisqatta cherśićha.

⁵Neqhśtan ninakaki śipulturkiś luśhku neqhśi tshi thowa źew qhuttan julśi cherchićha, chiw tol śkitchiś; neqhśtan ninakaki añcha tsukhchićha.

⁶Ni thowaki ninakźkiś khichićha: — Anaź tsuka; anćhukki ni kuruśhkiś ch'awkta Nasaret Jesusaź qhurya. Nïki jakatatchićha; anaćha teqśi. Cherźna ti puykiś nïź xañchi ana źelhćha.

⁷Niźaśa anćhukki oqa nïź thaxinta źoñinakźkin maśka, niźaśa Piruźkin: ‘Nïki anćhuka tukiź oqhćha Galilea; xalla nikhuki cherakićha, xaqhnuź khichiźlax nuźu.’

⁸Neqhśtan ni mätaqanakaki śipulturźkiśtan ulanźku tsukaña oqhchićha, ninakaki tsukhchi cheqhnatćha. Xalla ninakaki eqhsku ana jëkhźkiśimi chïchićha.

⁹[Xalla neqhśtan Jesusaki jakatatźku qhantatilla tuminku wenś śiman qallantiñi thuñi qallantikiś, María Magdalenakiś tuki thensićha, niźaśa tuki näkiśtan towqu yenqhanaka chhetqatchitaćha.

¹⁰Na źonki oqhchinćha Jesusiźtan oqhlaychinakźkin maśñi, ninakaki qäkan llakita źelatćha.

¹¹Niźaśa näki Jesusa źethñi cherźku ninakźkiś maśśinćha, neqhśtan ninakaki ni nonźku ana kirïchićha.

¹²Xalla neqhśtan Jesusaki tshemata thensićha, nïź pukultan thaxintanakaźkiś, xochqhutñi oqan.

¹³Xalla tinakaki tira oqhchićha, neqhśtan ninakaki yaqhanakźkiś maśśićha; niźaśa ninakaki anaśaqaś kirïchićha.

¹⁴Niźaśa ni wënpacha Jesusaki nïź qhalu tshichiś thaxintanakźkiś thensićha, ninakaź miśkiś julśi źelan; Jesusaki ana kirïñi quśśiś khen niźaśa choxru quśśiś khen niźaśa jakatatchi cherchi maśta ana kirïñiź khen ujśićha.

¹⁵Neqhśtan Jesusaki ninakźkiś khichićha: “Anćhukki oqakićha thapa ti yoq źoñinakźkin, ti Yöś śuma kintu palxayźkakićha thapa źoñinakźkin.

¹⁶Ti taqu kirïñiki wawtistaź khekićha, niźaśa liwrïtaź khekićha; xalla ni ana kirïñiśti, kaśtiktaź khekićha.

¹⁷Yöś śuma kintu kirïchinakaki chimpunakaź päsaćha. Weth thükiś anaśum yenqhanakamiź chhetqatakićha; yaqha ew taqunakamiź chiyakićha.

¹⁸Niźaśa śqoramiź qharkiś tanźnasaćha, tshi tikhś qulla likhźkumi anaź qhaźkhisnasaćha; niźaśa länakźkiś qharźtan lanźnakićha, neqhśtan ni länakaśti źetakićha.”

¹⁹Neqhśtan ni taqunaka palxayźku, Jesusaki tsekchuk pachqhutñi waytitaćha, nikhu Yöś źewqhuttan julśićha.

²⁰Neqhśtan ulanźku ni thaxintanakaki, thapa qhutñi Yöś liwrïñi taqu palxaychićha. Niźaśa ni Jesusa pacha yanapatćha, ninakaź thaxinta taqumiź kumlisqatatćha, niźaśa chimpunakamiź thëźnatćha, milajrunakamiź pätćha. Nuźu panx khila.]