Read Chipaya MARCOS 2 Bible Online

MARCOS 2 - Chipaya bible

MARCOS 2

¹Tshi qhaź maxkiśtan Jesusaki Cafarnaúm watha kephźku luśhśićha; niźaśa Jesusa qhuykiś źelhñi śiśśićha ni wathchiś źoñinakaki.

²Oralla tama źoñinakaki akhsićha ni qhuya śhipsićha, anaź śankiśimi luśh kampu źelatćha; ni Jesusaki Yöś śuma kintu thaxni qallantichićha.

³Nuź Jesusaź thaxnan, paqhpaltan źoñinakaki thonchićha tshi śuch źoñi kallchi, ni źoñiki ana oqhlayi atñitaćha.

⁴Tama źoñi akhsiź khen, Jesusiźkin ana makhati atchićha, qhuya yawźku tsewktan phetźku Jesusiź qhutñik ni phetkiśtan ni śuch źoñi pirsatkiś śhujunchićha.

⁵Jesusaki ninaka thapa quśtan nayźku ni śuch źoñźkiś palxaychićha, tuź khikan: — Weth mati, xaśiki am ujnakaki pertuntaź khekićha.

⁶Ni śuch źoñkiś Jesusa chïñi nonźku, yaqhap judiuź lï thaxiñi źoñinaka źelatćha, ninakaki julśi quśkiś pinsatćha:

⁷“¿Qhaźtikiśtan ti źoñi niźta chïxo? Tïki Yöś ar arćha, anaź jëkhmi uj śumansqatasaćha, Yöś panqaś ujnaka śumansqatñiki.”

⁸Jesusaki perśun quśkiś ninakź pinsita śiśatćha, neqhśtan khichićha: — ¿Qhaźtikiśtan anćhuka quś niźta pinsexo?

⁹¿Xaqsiltat tshan phaśila chïś khesaxo, ti śuch źoñźkiś chïźinśxo: ‘Am ujnaka śumachita’, uśh tuź chiyasax: ‘Źäźna, am pirsata waytiźku oqa’?

¹⁰Xaśiki anćhukakiś thëźnaćha werhki źoñź Matćha, werhki ti yoqkiś jiliritćha ujnaka śumansqatśxapa. Neqhśtan śuch źoñźkiś khichićha:

¹¹— Amkiś khiwćha tshitsna, am pirsata waytiźku oqa am qhuya.

¹²Neqhśtan ni śuch źoñiki źäśićha; nïź pirsata waytiźku ulanź oqhchićha, ni qhuykiśtan, thapa ni źoñinakaź cheran. Xalla niźta cherźku thapa źoñinakaki iśpantichićha, neqhśtan Yöśkin kanti qallantichićha, tuź khikan: — Ana wira tiźta päñi cherinćhumćha.

¹³Neqhśtan Jesusaki wilta Galilea qot ata kephchićha; niźaśa thapa qhuttan źoñinakaki akhskichićha neqhśtan Jesusaki ninakźkiś thaxinchićha.

¹⁴Jesusaki nuź oqhkan tshi źoñi Leví khita cherchićha Alfeoź Machh, nïki Romźta taśa mayś julśkiś julśi źelatćha, neqhśtan Jesusaki nïźkiś palxaychićha, tuź khikan: — Werh apźka. Neqhśtan Leviki tshithsku Jesusa apśićha.

¹⁵Neqhśtan ni nöxpacha Jesusaki nïź thaxinta źoñinakźtan Leviź qhuya luli oqhchićha, niźaśa ni Romźta taśa mayñinakźtan, ujchiś źoñinakźtan thappacha źelatćha qotupacha miśkiś julśi Jesusiźtan lulatćha nïź thaxintanakźtanpacha; niźaśa tamataćha ni Jesusa apśñi źoñinakaki.

¹⁶Neqhśtan ni judiuź lï utt'ayñi źoñinakźtan fariseonakźtan, thappacha nuź lulhñi cherźku, nïź thaxintanakźkiś pewkśićha: — ¿Qhaźtikiśtan ti am Jesusa taśa mayñinakźtan niźaśa ujchiś źoñinakźtan lulhxo?

¹⁷Jesusaki ninaka chïñi nonźku, ninakźkiś tuź khichićha: — Ni wiw źoñinakaki anaź qullñi źoñi pekasaćha, lä źoñinakaź qullñiki pekćha, niźaśa werhki anaź ni źkayi quśśiś źoñinaka qhawśñi thonchinki, ans werhki ni ujchiś źoñinakźkin thonchinćha.

¹⁸Juan wawtistiź thaxintanakźtan fariseoź źoñinakźtan, xalla ninakaki ayunaśatćha, yaqhap źoñinakaki Jesusiźkiś pewkśñi thonchićha: — ¿Qhaźtikiśtan Juanź thaxintanakźtan ni fariseoź źoñinakźtan ayunaśñipanxo, ni am thaxintanakaśti ana ayunaśñipanla?

¹⁹Jesusaki ninakźkiś qhäśićha: — ¿Qhaźt śalś phiśtikiś maśintaśt ayunaśasaxo? Śalśñi źoñi źelanpacha anaź ayunaśasaćha.

²⁰Ti xarkin ni śalñi źoñi qhañś thuñiź irantiźkakićha, xalla neqhśtan anćhukki ayunaśakićha.

²¹Niźaśa anaź xaqhsiltami achś śkitkiś ew śkitźtan rimintasaćha; ni ew śkiti rimintitaki tsatñićha, neqhśtan ni achś śkitiki xwarsnasaćha, ni xwarsiki tshan paqhiź khisnasaćha.

²²Anaź xaqśiltami achś śqiś kewkiś ew winu alźnasaćha; ni ew winuki achś śqiś kewi xwarźnasaćha, neqhśtanaki śqiś kewimi ni winumi apt'akićha. Xalla niźtikiśtan ew śqiś kewkiśpanź ni ew winuki alśki.”

²³Tshi śawatu Jesusaki śqal taypiran oqatćha; nïź thaxintanakaki oqhkanpacha tiriku k'uti qallantichićha.

²⁴Ni k'utñi cherźku ni fariseonakaki Jesusiźkiś palxaychićha: — Cherźna, ¿qhaźtikiśtan ni amiź thaxintanaka niźta päxo? Jejś thuñkiśiki ana lanqś khita panla.

²⁵Neqhśtan Jesusaki ninakźkiś qhäśićha: — ¿Anapan ni Davidź päta lïchinćhuk qhaźtataxo? Tshi wilta nïki nïź maśinakźtan añcha ćhheri eksqatchila, niźaśa ninakźta añchaź phaltiźinatćha.

²⁶Yöś quykiś luśhśićha Davidki, Abiatarki chawkh jiliritaćha ni timlu jilirinakźtiśtan, neqhśtan Davidki nïź maśinakźtanpacha ana ina źoñź lulhś t'anta lulhchićha, ni t'antaki timlu jilirinakź lulhśxapa qaśtaćha.

²⁷Neqhśtan Jesusaki khichićha: — Źoñinakźta jejś thuñiki uchśtaćha, ana źoñinaka ni jejś thuñxapa.

²⁸Niźaśa ni źoñź Matiki ni śawatu jejś thuñkiśtan jiliriśaqasśa; ćhhulu päś khenami ana päś khenami weril irpasaćha.