Read Chipaya MARCOS 5 Bible Online

MARCOS 5 - Chipaya bible

MARCOS 5

¹Neqhśtan qotź nawkhtuñtan irantichićha, Gerasa khita yoqkin.

²Jesusaź walsikiśtan ulantan, kampu santukiśtan Jesusiźkin tshi yenqhaź tanta źoñi thonchićha,

³ni źoñiki kampu santukiś qamñitaćha, ana jëkhmi ni tani atñitaćha niźaśa anapan karinźtanami.

⁴Qhaź wilta qhxochami qharami karinźtan ćhelhtataćha, neqhśtan nïki qhoqśñi panqaśtaćha, ni karina t'una päñitaćha niźaśa ana jëkhmi ni atipi atñitaćha.

⁵Niźaśa wënami maxiñami oqhlayñitaćha qhawkan kururan kampu santuran, ni maśran nïź xañchi śhoxrichkan.

⁶Neqhśtan Jesusa cherźku ni źoñiki aźkiśtanpacha śathźkichićha, Jesusiź tukkiś killślaqi

⁷neqhśtan Jesusiźkiś qhawi chïchićha: — ¡Amki ana wethkiś mitiśxa, Jesusa tsewkta yoqchiś Yöś Mati, Yöś thükiś amkiś rokt'aśućha anaź werh llaki thälla!

⁸Ni yenqhichiś źoñiki chiyatćha, Jesusaki nïźkiś khichićha: — ¡Yanqha, ti źoñźkiśtan ulna!

⁹Neqhśtan Jesusaki ni źoñi pewkśićha: — ¿Ćhhul thüchiśśam amxo? Ni yenqhaki qhäśićha: — Weth thüki tama khitaćha, niźtikiśtan werhnakki tamćha.

¹⁰Ni yenqhanakaki Jesusiźkiś añcha rokaśśićha, ni yoqkiśtan ana nawkhuñ chhetqataxu.

¹¹Ni kurź keźu tama kuchinaka lulhkan źelatćha,

¹²ni anaśum yenqhanakaki Jesusiźkiś rokaśśićha: — Kuchinakźkin werhnak kuchnalla; niźaśa ninakźkiś werhnak luśhqatalla.

¹³Neqhśtan Jesusaki khichićha amtaqaśa, neqhśtan ni yenqhanakaki ni źoñźkiśtan ulanźku ni kuchinakźkiś luśhśićha. Xalla neqhśi tshi piśk watha kuchinaka źelatćha, ni kuchinakaki iśpanta qot qhutñi śhukhuntichićha, niźaśa aqharanqhutñi thxotsićha neqhśtan ni qotkiś thxotsku tikhśićha.

¹⁴Neqhśtan ni kuchinaka ichñi źoñinakaki tsukaña śathchićha, niźaśa ni wathkiśimi xochkinami maśmaśśićha. Neqhśtan ni źoñinakaki thonchićha ćhhulu wathchiźlaxa ni cheri.

¹⁵Neqhśtan ni źoñinakaki xaqsikintaźlaxa Jesusa xalla nikhu irantiźku, ni tama anaśum yenqhaź tanta źoñi neqhś julśi cherchićha, niźaśa śuma źoñi śkitimi kuthchi; xalla nuź cherźku ni źoñinakaki añcha eqhsićha.

¹⁶Neqhśtan ni cherñi źoñinakaki, ni źoñinakźkiś maśśićha xaqnuźt ni anaśum yenqhaź tanta źoñi watćhaxa, niźaśa xaqnuźt ni kuchinakami watćhaxa.

¹⁷Neqhśtan ni źoñinakaki Jesusa roki qallantichićha, ni yoqanakźkiśtan oqaxu.

¹⁸Neqhśtan Jesusaź walsikiś luśhan, ni źethchi źoñiki Jesusiźkiś rokchićha, amtanl oqhś pekućha.

¹⁹Jesusaki ana munchićha, tuź khichićha: — Am qhuya oqa, am xamillanakźkiś maśka thappacha, Yöś xaqnuźt am ćhhetinćhaxa niźaśa xaqnuźt am oqśiźlaxa.

²⁰Neqhśtan ni źoñiki oqhchićha, Decápolis khita yoqaran parli qallantichićha, thappacha Jesusaź oqźtanaka niźaśa ćhhetintanaka; ni maśtikiśtan ni źoñinakaki tsukhchi eklichićha.

²¹Jesusaki kephchićha walsikiś qotź nawkhchaqtan, ni qot atkiś irantichiźkhen tama źoñinaka nïź muytata akhskichićha.

²²Neqhśtan thonchićha tshi judiunakź akhs qhuy chawkh jiliri, niźaśa ni źoñiki Jairo khitataćha; neqhśtan ni źoñiki Jesusa cherźku nïź tukkiś killśićha

²³neqhśtan Jesusiźkiś añcha rokt'ichićha, tuź khikan: — Weth uśhkil tikhźa; amki thonźkalla niźaśa am perśun qharźtan lanźinalla, weth uśh ćhhetinśapa niźaśa źetaxu.

²⁴Neqhśtan Jesusaki ni Jairuźtan oqhchićha, xalla nuź oqan tama źoñinakaki ni Jesusiź muytata ts'akaskan apśićha.

²⁵Niźaśa ni źoñinakź taypikiś tsha lä źon źelatćha qhalu piśkchiś watha lhokh thawqs konchiś.

²⁶Niźaśa na źonki añcha t'aqhiśśinćha niźaśa wakchi qullñi źoñinakźkin oqhlaychinćha, neqhśtan näźa źelinś thappacha mirchinćha; niźaśa inapanqaś näźa źelinś mirchinćha niźaśa na źonki tshanti lä khissinćha.

²⁷Niźaśa na źonki Jesusiź päta kintunaka śiśku, neqhśtan ta źonki ni źoñinakź taypikiśtan Jesusiź wirkiśtan makhatźku nïź irś lanśinćha.

²⁸Na źonki pinsatćha: “Nïź śkiti lanźkuqaś, werhki źetchil kheqa.”

²⁹Ni orapacha ni lhokh thawqsñiki ćhawqhchićha; neqhśtan näźa xañchikiś ni konkiśtan źethchi naychinćha.

³⁰Neqhśtan Jesusaki perśun quśkiś naychićha nïź aśi ulanchi, neqhśtan wirqhutñi cherźku ni źonakźqhutñi pewkśićha: — ¿Jëkht weth irś lanźkichixo?

³¹Neqhśtan nïź thaxintanakaki nïźkiś khichićha: — Cherźna ti źoñinaka añchaź amkiś ts'akaskila, amśti werhnak pewkźa: ‘¿Jëkht werh lanźkichi khikanxo?’

³²Neqhśtan Jesusaki thapa źoñinakź qhutñi chercherśićha, jëkhćhalax ni lanśi ni paxśxapa.

³³Neqhśtan na źonki näźa xañchi źethchi nayźku, näki añcha eqh eqhskan niźaśa phutinkan Jesusiź tukkiś killślaqi makhatchinćha, neqhśtan na źonki thappacha werara maśśinćha.

³⁴Jesusaki näkiś khichićha: — Kullaka, am Yöśkin thapa quśśiś khen ćhhetintamćha. Ni am konkiśtanaki źetchipanim khekićha xaśiki kuntintu oqa.

³⁵Jesusaź na źonakź nuź chiyan, ni Jairo khita judiu jilirź qhuykiśtan źoñinakaki thonchićha, na uśha ephźkin chï: — Am uśhki tikhśinćha, ¿qhaźtikśtanam tira ti thaxiñi źoñźtan parlasaxo?

³⁶Jesusaki ni źoñinakaź niźta maśnan ana nonśićha, neqhśtan ni chawkh timlu jilirźkiś khichićha: — Amki ana tsuka; Yöśkin thapa quśtanqaś khe.

³⁷Neqhśtan Jesusaki ana jëkhmi apśñi pekatćha, ans Piruźtan Santiaguźtan Juanźtan jilaśullka ninakaqaś apsqatchićha.

³⁸Neqhśtan ni judiu jilirź qhuya irantiźku, Jesusaki xalla ni qhuykiś ni źoñinaka añcha qäñi, niźaśa qhawñi niźaśa ch'axmiñi cherchićha,

³⁹neqhśtan Jesusaki ni qhuya luśhku ninakźkiś khichićha: — ¿Qhaźtikiśtan añcha aranxo, niźaśa qäxo? Ta uśhki anaćha tikhśiñ, ans ta uśhkil thxaxćha.

⁴⁰Ni źoñinakaki Jesusa thassićha, neqhśtan Jesusaki ni źoñinaka śanku kuchanchićha, niźaśa na uśha mä ephźtanpacha, neqhśtan nïź chhepultan thaxintanakźtan luśhśićha, xaqhsi qhuykiś na uśh źelatćhaxa nikhu.

⁴¹Neqhśtan Jesusaki na uśha qhara tanźinźku chïchićha: — Talita cum, (ni taquki tuź khićha: “Amkiśl chiyućha, uśhalli źäźna”).

⁴²Ni orapacha na uśhki źäśinćha, neqhśtan oqhlayi qallantichinćha, na uśhki qhalu piśkchiś watchiśtaćha. Xalla niźta cherźku ni źoñinakaki añcha iśpantichićha.

⁴³Xalla neqhśtan Jesusaki ninakźkiś śuma iwxt'ichićha, ana jëkhźkiśimi ti ćhhetinta chïchiyaxu, neqhśtan na uśhakiś ćhheri liwantax khichićha.