Read Chipaya LUCAS 1 Bible Online

LUCAS 1 - Chipaya bible

LUCAS 1

¹Añcha śuma Teófilumćha amki śiśśa, wakchi źoñinakaki śuma khjirś pekatćha, ućhumź Jesusiźtan qamkan watta,

²xaqhnuź ućhunkiś thaxintaźlaxa, ni źoñinakaki perśun źhukźtan cherchićha qallantikiśtanpacha, xalla ninakaki Yöś śuma kintu parli yanapchiśaqaśśa.

³Niźaśa werhki Jesusa mathta śumpacha thapaqhutñi pewk pewkśinćha qallantikśtanpacha, ti päyinaka śumpacha amkin khjirźkiś waliźtaqal nayućha, añcha śuma Teófilumćha,

⁴amkiś thaxinta śumpacha werara am śiśaxu.

⁵Xalla ni, Herodes judiuź reyź khen, źelatćha tshi timlu jiliri Zacarías khita, nïki Abías khita t'aqkiśtantaćha. Nïź thunki Elisabet khititaćha, Aarón khita tukita achchi timlu jiliriźkiśtan oqintaćha.

⁶Ni pukultan lukuthiñ źoñiki źkayi quśśiś qamañchiśtaćha niźaśa Yöś lï kuchanźkitakama kaśñitaćha, xalla niźtikiśtan ana jëkhmi ninakźkiś ujchiśamćha chï atñitaćha.

⁷Niźaśa ninakaki ana okhalchiśtaćha, Elisabetki machuritaćha ninakaki pukultanpacha chawk źoñinakataćha.

⁸Neqhśtan tshi nöx, Zacarías t'aqkiśtan ira thonatćha, Yöś tukkiś śirwiśxapa.

⁹Ni timlu jilirinakź us xaru, Zacariźkiś kaychićha ni illśtaki, xalla neqhśtan luśhśićha Yöś Timlu qhanawitkiś inśinśu thäśñi.

¹⁰Xalla ni inśinśu thäźnan, thappacha ni wathchiś źoñinakaki Yöśkin śanku mayiśatćha.

¹¹Neqhśtan tshi Yöś anjilaki Zacariźkiś tshithchi thensićha, ni inśinśu thäś altar źewqhuttan.

¹²Zacariaki anjila cherźku, ana qhaźkhiy atchićha, neqhśtan añcha eqhsićha.

¹³Xalla ni anjilaki nïźkiś khichićha: — Zacarías, ana eqhsna, Yöśki amiź mayiśita nonśićha, am thun Elisabetki tshi machhchiś khekićha, nïkim thüsqatakićha Juan.

¹⁴Am quś phiyaź khekićha, niźaśa añchaź chipakićha ni tama źoñinakaki mathtikiśtan,

¹⁵am matiki Yöś tukkiś paqhiź khekićha. Niźaśa nïki anaź likakićha winumi, awarintimi, niźaśa ima mä phuchhkiśtan ulnan Espíritu Santu śhipiź khekićha.

¹⁶Am machhki, Yöś Ephźkin ni Israel wathchiś źoñinaka quś qhutsqatakićha.

¹⁷Niźaśa ni Juanki Mesías tukkiś oqakićha, Elías Yöś kuchanźkita chïñiź aśtan, niźaśa nïź animuźtan, neqhśtan machhtan ephźtan źkayi quśśiś khisqatakićha, ni ana śum źoñinakaki kaś katoqaxu. Xalla nuź źoñinakaki thakśnakićha, Mesías thewśxapa.

¹⁸Neqhśtan Zacariyaki anjilźkiś pewkśićha: — ¿Xaqnuźt werh ti śiśasaxo? Werhki chawk źonćha niźaśa weth mätaqami.

¹⁹Ni anjilaki nïźkiś qhäśićha: — Werhki Gabriel khititćha, niźaśa Yöś tukkiśtćha; nïćha werh kuchanźkichiki amkin palxayaxu ti śuma ew kintu.

²⁰Xaśiki amki weriź chïta ana kirïñiź khen, upam eklakićha anam chï atakićha am mati mathśkama. Tïkiź watakićha chïta kama.

²¹Xalla ni kama, ni źoñinakaki Zacarías śanku thewźnatćha, ni źoñinakaki iya thewśi llakiśhatćha, niźaśa qhaźtikiśtan qatxo ana ulanźkila ni qhanawitkiśtan khetćha.

²²Neqhśtan Zacariaki ulanźku anaź parli atatćha; ni źoñinakaki näśićha, tïki qhanan cherchiźlani ni timlu qhulltan. Neqhśtan Zacariyaki ni źoñinakźkiś qharźtan palxayatćha, nïki upa kiraśśitaćha.

²³Neqhśtan tshi qhaź maxkiśtan timlukiś śirwikan iraśiś thuñi źeranchićha, neqhśtan Zacariyaki qhuya oqhchićha.

²⁴Neqhśtan wiruñ, nïź thun Elisabetki ikchinćha, neqhśtan ana ulanchinćha taxśnuku jïś, xalla tuź pinsikan:

²⁵“Xaśiki Yöśśa werh tuź ikqatchiki, neqhśtan źoñinakaki anaź iya werh iñarasaćha.”

²⁶Neqhśtan taqchuku jïśkiśtan, Yöśki Gabriel khita anjila kuchanźkichićha Galilea khita yoqkin Nazaret khita watha,

²⁷Neqhśtan thonśñi thonchićha tsha ana mati yanśniñ turakiś na turki María khititaćha. Na turki José khita źoñźtan śalś palt'itataćha, niźaśa ni Joseki rey Davidźkiśtan oqhñitaćha.

²⁸Ni anjilaki luśhśićha, xaqhsikin na María źelatćhaxa xalla nikhu, neqhśtan näkiś tuź khichićha: — ¡Kullaka am tsänźkućha, Yöś yanapźkićha amkiś! Yöśki amtanćha; Yöś amkiś thäźkićha, tshanti yaqha mätaqanakźkiśtan.

²⁹Xalla na Marïki ni anjila cherźku, niźaśa nïź taqu nonźku inaqaś khissinćha, perśun quśkiś pinsatćha qhaźtikiśtan nuź tsänźkixo.

³⁰Neqhśtan ni anjilaki näkiś khichićha: — María, ana eqhsna, amki Yöś yanapiñi wathchamćha.

³¹Xaśiki, ikam eklakićha niźaśa tshi machhchiśśam khekićha, nïkim thüsqatakićha JESÚS khikan.

³²Niźaśa ni Jesusaki paqhiź khekićha; tsewkta Yöś Mati khitaź khekićha, ni Yöś Ephki reyź khisqatakićha nïź achchi Davidźtaqaś,

³³Niźaśa ni Israel watha wiñaya pacha irpiśxapa; nïź irpiśki anaź tukuśiñiź khekićha.

³⁴Neqhśtan Mariyki anjilźkiś pewkśinćha: — ¿Xaqnuźt ti watasaxo, werhki ana luktaqa paxućha?

³⁵Ni anjilaki näkiś qhäśićha: — Ni Espíritu Santuki amkiś thonakićha, tsewkta aśśiś Yöśki tshiriźtaqaś amkiś wëskakićha. Neqhśtan ni wawaki Yöśkin quśśiśpan paqakićha, niźaśa nïki Yöś Mati khitaź khekićha.

³⁶Niźtaśaqaś am xamillkiśtan Elisabet khitiki machhchiś khekićha, qhaźta chawk źonmi; näki machuri khititaćha xaśiki näźa iktaki tirśućha.

³⁷Yöśtaki anaź ćhhulumi ana atchuka źelasaćha.

³⁸Neqhśtan Mariyiki khichinćha: — Werhki Yöś mantitakama qaminćha; amiź chïta kama Yöś wethkiś watqatla. Xalla neqhśtan, ni anjilaki oqhchićha.

³⁹Tshi nöxiran Mariyiki phexwa oqhchinćha Judea khita watha, ni wathaki kurkintaćha.

⁴⁰Zacariyź qhuykiś luśhku, Elisabetakiś tsänchinćha.

⁴¹Nuź Mariy tsänźkiñi nonźku, Elisabeta wawaki phuchh qhulltan qissićha, neqhśtan Elisabetki ni Espíritu Santuźtan śhipsinćha.

⁴²Xalla neqhśtan näki kalaru khichinćha: — Yöśki amkiś thäźkićha tshanti yaqha mätaqanakźkiśtan, niźaśa am Machhkiśimi thäźkićha.

⁴³¿Jëkhqaśt werhki, ta Yöś mä wethkin thonśñi thonśxo?

⁴⁴Ni orapacha amiź tsänźkita nonźku, weth wawaki phuchhkiś añcha chipa qisqisićha.

⁴⁵Niźaśa amki añcha wali kirïchamćha, ni Yöś chïta taquki kumlisnakićha.

⁴⁶Neqhśtan Mariyki chïchïnćha: “Weth animuki Yöśkin ittsa;

⁴⁷weth animuki werh liwrïñi Yöśtan añchaź chipćha.

⁴⁸Yöśki weth t'aqhir quś cherśićha, niźaśa werhki Yöś kuchanźkitakama qaminćha, niźaśa teqhśtanpacha thapa źoñinakź matź matiki, añcha walimćha khekićha;

⁴⁹niźaśa ni aśśiś Yöśki, wethkiś añcha paqh ćhhultaqinaka pächićha; niźaśa ¡nïź thüki źkayićha niźaśa ana ćhhul ujchiśśa!

⁵⁰Yöśki añcha oqśñipanćha Yöśkin eqhsñinakź matź mati, niźaśa ninakaki tirapanź oqźta khekićha.

⁵¹Niźaśa Yöśki nïź aśtan thëśićha; atipchićha ni mit quśśiś źoñinakaki.

⁵²Niźaśa ni aśśiś źoñinakaź irpiśkiśtan śhujqatchićha, ni amu quśśiś źoñinakaki waytitaź khekićha.

⁵³Niźaśa ni t'aqhir źoñinakźkiśiki qinasinaka thächićha, niźaśa ni źelinchiś źoñinakźkiśiki lächi qharchiś kuchanchićha.

⁵⁴Niźaśa Israel źoñinakźkiśiki yanapchićha, niźaśa Yöś manta päñi źoñinakźkiśimi, ana ninaka oqś thatśićha,

⁵⁵xalla nuź ućhumnaka achchi ephnakźkiś chïchipanćha, ni Abrahamźkiś, niźaśa nïź matźmatinakźkiśimi.”

⁵⁶Neqhśtan Mariyiki tshi chheph jïś Elisabetatan eklichinćha, neqhśtan näźa qhuya kephchinćha.

⁵⁷Neqhśtan na Elisabet źethś thuñi irantiźkichićha, neqhśtan luk mach wawa machhinćha.

⁵⁸Ni źkati źelhñinakami, niźaśa xamillanakami q'ächi oqhchićha, ni Yöś añcha śuma nätan päta śiśku.

⁵⁹Neqhśtan ocho thuñkiśtan, ninakaki oqhchićha ni wawa chimpisqati, niźaśa ni wawźkiś ephź thü thüsqatś pekatćha Zacariyas khikan.

⁶⁰Niźaśa ni wawź mäki khichinćha: — Anaćha. Weth wawaki Juan khita thüchiś khekićha.

⁶¹Ni źoñinakaki khichićha: — ¿Qhaźtikiśtan? Am xamillanakźkiśtan anaź jëkhmi niźta thüchiś źelhćha.

⁶²Neqhśtan wawź ephźkiś qharźtan pewkśićha, Zacarías am ćhhul thüm pekya.

⁶³Neqhśtan Zacariyaki tawla maychićha khjirśxapa, ni tawlikiś tuź khjirchićha: ‘Tïź thüki Juanćha.’ Neqhśtan thappacha niźtikiśtan iśpantichićha.

⁶⁴Ni orapacha Zacariyaki wilta chïñi khissićha, niźaśa Yöś thü aynaqi qallantichićha.

⁶⁵Xalla niźtikiśtan, nïź źkati źelhñinakaki iśpantichi khissićha, niźaśa thappacha ni judea kur yoqkin kintu oqhchićha.

⁶⁶Neqhśtan thappacha ni kintu śiśśi źoñinakaki quśkiś pinsatćha, niźaśa porapat pewksasatćha: “¿Ti wawa paqtan qhaźtapan khekixo?” Cheqpacha Yöśki nïźtantaćha.

⁶⁷Neqhśtan ni wawź eph Zacariyaki, Espíritu Santu śhipitaćha, Yöś thäta taqunaka chiyatćha, tuź khikan:

⁶⁸“¡Añcha śumax khila ni Israel źoñinakź Yöśki, xalla nïki ućhumnak liwrïi thonchićha!

⁶⁹Niźaśa nïki ućhumnakakiś tshi aśśiś Liwrïñi kuchanźkichićha, niźaśa David Yöś manta päñi, nïź oqhñinakźkiśtan.

⁷⁰Xalla nuźupan chïchićha nïź źkayi quśśiś Yöśkiśtan chïñinakźkiś:

⁷¹Niźaśa nïki ućhum ćhhaxwñi źoñinakźkiśtan liwriyasaćha, niźaśa thappacha ućhum iñarñi źoñinakźkiśtanami,

⁷²niźaśa ućhum achchi ephnakźkiś tirapan oqśićha, niźaśa nïź źkayi quśtan palt'ita anaź thatźnasaćha.

⁷³Xalla tićha nïź thurt'itaki ućhumnaka Abraham ephźtan: Xalla nïź ućhunnak oqźnasaćha

⁷⁴ni ućhumnak ćhhaxwñi źoñinakźkiśtanaki, xalla nuź ućhumnakki ana eqhsku qamasaćha, niźaśa nïź manta päsaćha

⁷⁵niźaśa śumapan qamkan, niźaśa thappacha ućhum źetkiś śuma qamaña thëźkan.

⁷⁶Niźaśa am weth machh, tsewkta pachkiśtan Yöś kuchanźkita chïñi khitam khekićha, niźaśa amki ni Yöś tukkiś oqhñim khekićha nïź jikhś thakśinkan,

⁷⁷niźaśa ti am źoñinakźkiś śiśqatśxapa, niźaśa ni Yöśki ninakź ujmix pertunla niźaśa nïki liwrïñi taqu thäkićha.

⁷⁸Xalla ni ućhumnaka Yöśki añcha oqśñićha, niźaśa tsewkta pachkiśtan ućhumnakakiś tshi ew thuñiź thäźkićha,

⁷⁹niźaśa ni źethñi źoñinakźkiś qhana thäśxapa, niźaśa ni sumchi laqhkiś qamñinakźkiśimi, niźaśa ućhum oqi śuma jikhśkiś irpiśxapa.”

⁸⁰Niźaśa ni uśhaki paqatćha, niźaśa muspa aśśiś khisnatćha, niźaśa ch'eqti yoqkin qamchićha, ni Israel źoñinakźkiś paxqatś thuñi kama.