Read Chipaya LUCAS 13 Bible Online

LUCAS 13 - Chipaya bible

LUCAS 13

¹Ni orapacha yaqhap źoñinakaki Jesusiźkiś ni Galileo źoñinaka konta kint'ichićha, Pilatuki źoñinaka konqatqalćha ni timlukiś ninakź uywi lhokhźtan źoñź lhokhźtan t'axśićha wilanxapa.

²Jesusaki ni źoñinakźkiś khichićha: “¿Anćhukki ni Galileo źoñinakźkiś ni konta watchi pinsiqay, ni galileo wathchiś źoñinakźkiśtan tshanti ujchiś khen konta?

³Werhki anaź khiwćha; niźaśa anćhukpacha anaź Yöśkin quś turkakiź nïki, anćhukki śaqaś tikhźnakićha.

⁴¿Uśh anćhukki kirïqay ni qhalu qonquchiś źoñinaka tikhśi ni Siloé turiź t'oqhta, niźtikiśtan anćhukki pinsiqay ni Jerusalén wathchiś źoñinakźkiśtan tshanti ujchiś khen tikhśi?

⁵Werhki anaź khiwćha; niźaśa anćhukpacha ana Yöśkin quś turkakiź nïki, anćhukki śaqaś tikhźnakićha.”

⁶Jesusaki ti kintukiśtan kint'ichićha: “Tshi źoñiki nïź uw śqal yoqkiś tshi jiwusa ćhhakhchitaćha, neqhśtan cherśñi oqhchićha ni jiwuskin ćhherchiźkä khikan, xalla neqhśi ana tshïmi waćhi atchićha.

⁷Neqhśtan ni uwa ichñi źoñźkiś khichićha: ‘Chheph wata tira thonchinćha ti jiwuskin tïź ćhheri qhuru ana śinta wathchinćha. Q'achśna; ¿qhaźtikiśtan inapanqaś yoqa tanasaxo?’

⁸Xalla neqhśtan ni yoqa kuytiñiki qhäśićha: ‘Tata, ti watallźtan ekalla; ni munti muytatal qhullśnaćha niźaśa jiral uchantaćha.

⁹Xalla tïźtan ćhherśmiź atćha; anapanź poqakiź nïki amkim q'achśnaćhani.’ ”

¹⁰Tshi śawatu jejś thuñkiś Jesusaki akhs qhuykiś thaxnatćha;

¹¹xalla neqhśi tsha mätaq źonki qhalu qowquchiś wata läkhichiñ źelatćha. Tshi ñexw yenqhaki na źon tax chutunsiñ ektqalćha, neqhśtan na źonki wira ana ts'iru khisñi atatćha.

¹²Neqhśtan Jesusaki na cherźku, qhawźku niźaśa khichićha: — Kullaka, am konkiśtan liwrimćha.

¹³Neqhśtan Jesusaki na źon qharźtan lanśićha, niźaśa ni orapacha ts'iru khissinćha neqhśtan Yöś thü aynaqi qallantichinćha.

¹⁴Xalla Neqhśtan ni akhs qhuy chawkh jiliriki źaxwchićha, Jesusa śawatnöx ćhhetintikiśtan, niźaśa ni źoñinakźkiś khichićha: — Taqchuku thuñi źelhćha lanqśxapaki; ni thuñiran anćhukki thona ćhhetinta khiśxapaki niźaśa ana śawatu jejś thuñkiśiki.

¹⁵Ni Jesusaki qhäśićha: — Toskaranaka, ¿ana anćhuka wakami niźaśa aśnumi ana jerhśninćhukpanqay ni uywa chawkhś qaqkiśtan qhaś likaxu, ni śawatu jejś thuñ nöxi?

¹⁶Na źonki Abrahamźkiśtan oqiñtaćha, niźaśa ni Saxraki qhalu qonqućhiś wata na źon konźtan ćhelhchi źelatćha, ¿anapantaqay jerhśuka ni śawatu jejś thuñkiśimi?

¹⁷Neqhśtan Jesusiź nuź chïtikiśtan, nïźtan moq'uśñinakaki aśi eklichićha; xalla neqhśtan thappacha ni źoñinakaki niźta paqhi päta ćhhultaqinaka cherźku chipatćha.

¹⁸Jesusaki wilta khichićha: “¿Yöś irpiś wathaki ćhhulu iratat khesaxo, niźaśa ćhhulźtan tupasaxo?

¹⁹Ni mostas mujuźtaqaśśa, tshi źoñi nïź ćhhakhś yoqkin ćhhakhchićha niźaśa paqchićha tshi muntiźtaqaś paqhi, ni weźlanakamiź nïź itsaran jejźa.”

²⁰Jesusaki śaqaś khichićha: “¿Ćhhulźtanpan ni Yöś irpiś watha tupasaya?

²¹Tsha mätaq źonki chheph tupu jak'uźtan liwaturźtan ćhhuwćha ni ćhhuwta t'amqatśxapa, xalla niźta irataćha, xalla ti irataćha ti yoq qamañaki.”

²²Ni Jerusalén jikhśkiś oqhkan, Jesusaki ni watharan niźaśa ni xochiran thaxinźku watñitaćha.

²³Niźaśa tshi źoñiki pewkśićha: — Yöś tata, ¿qolukulla qaśqay ni liwrïsñinaka? Niźaśa Jesusaki qhäśićha:

²⁴— Anćhukki ni ow śankiśtan luśhpan peka; anćhukakiś khiwćha tama źoñinakaki luśh pekakićha, niźaśa anapanź luśhi atakićha.

²⁵Neqhśtan ni qhuychiś źoñiki źäźku śana chawkhźnakićha, anćhuk śawnkhiñi nakaśti śankiśtan qhawśñi qallantakićha tuź khikan: ‘Yöś tata, khetźinalla.’ Xalla ni Yöśki qhäśnakićha: ‘Anćhukki xaqhsiktićhukqaślani anal śiśućha’

²⁶Neqhśtan anćhukki chïź qallantaćhan: ‘Amtan lulhchinla niźaśa likhchinla, niźaśa amki wethnaka wath mora thaxinchamćha.’

²⁷Xalla ni Yöśki qhäśnakićha: ‘Anćhukki xaqhsikti ćhukqaślani anal śiśućha. ¡Wethkiśtan uj päñinaka saraqa!’

²⁸Neqhśtan ni qäyi niźaśa ni iźqi qhxoxśmi thonakićha, xalla ni Abraham, Isaac, niźaśa Jacob niźaśa ni thappacha ni Yöś kuchanźkita chïñinaka cherźku, tinakaki Yöś irpiś wathkin khen, niźaśa anćhukki śawnku t'aqźtaź khekićha.

²⁹Xalla neqhśtan źoñinaka thonakićha, uźatan niźaśa waruttan niźaśa tuwantan niźaśaqaś taxatanami, Yöś irpiś wath miśkiś julhśxapa.

³⁰Neqhśtan yaqhap źoñinaka anś wirkin khiñinakaki tukkin khekićha, niźaśa ni yaqhap źoñinakaki anś tukkin khiñinakaki wirkinź khekićha.

³¹Ni nöx pacha tshi qhaźu fariseonakaki thonchićha Jesusiźkin tuź khikan: — Ulna, niźaśa teqhśtan oqa, xalla ni Herodeski am konśpekćha.

³²Jesusaki ninakźkiś qhäśićha: — Anćhukki oqa niźaśa ni qitźkiś maśnakićha: ‘Cherźna töxi niźaśa xaqaki ni anaśum yenqhanakal chhetqataćha niźaśa länakal ćhhetnaćha, niźaśa qattanaki źerźnaćha weth lanqśnakaki.’

³³Töximi, xaqami, qatmi weth jikhśkiśpan oqśtanćha, anaź wali khesaćha tshi Yöś kuchanźkita chïñi Jerusalén wathź śawntan tikhśñi.

³⁴“¡Jerusalén, Jerusalén, anćhukki Yöś kuchanźkita chïñinaka koninćhukćha, niźaśa ni Yöś śuma kintu xoxoñinaka maśtan ćhakinćhukćha! ¡Qhaźwilta anćhuka okhala akhś pekchinćha, tsha wallpi irata näźa ośmachanaka näźa qharź qostan źkorinla, xalla neqhśtan anćhukki ana munchinćhukćha!

³⁵Xalla ni cherźna, anćhuka qhuyaki xaytitaź eklakićha; niźaśa cheqpachal chiyućha anaź iya werh cherakićha, ćhhul ora ni thonśpacha anćhukki khećhan: ‘¡Añcha walix khila ni Yöś thükiś thonñiki!’ ”