Read Chipaya LUCAS 14 Bible Online

LUCAS 14 - Chipaya bible

LUCAS 14

¹Tshi śawatu jejś thuñkiś, Jesusaki fariseo chawkh jilirź qhuya luli oqhchićha, niźaśa yaqha fariseonakaki ni muśatćha.

²Niźaśa neqhśi, Jesusiź tukkiś tshi xañchikiś qhaśśiś lä źoñi źelatćha.

³Jesusaki ni judiu lï thaxiñinakźkiś niźaśa ni fariseonakźkiś pewkśićha: — ¿Śawatu jejś thuñkiś lä źoñi ćhhetnasay uśh ana ćhhetnasaxa?

⁴Xalla ni źoñinakaki ch'ujuqaś khissićha. Neqhśtan Jesusaki ni lä źoñźkiś makhatźku ćhhetinchićha, xalla neqhśtan kuchanchićha.

⁵Niźaśa ni fariseonakźkiś khichićha: — ¿Xaqhsilta anćhukakiśtan, am aśnu uśh am waka tshi tujkiś thxotsnasaź nïki, anam ni orpacha xöźnasaya, śawatu jejś thuñi khenami?

⁶Neqhśtan ninakaki ana xaqnuźkin qhäśñi atchićha.

⁷Jesusaki ni maśintanaka tukkin miśkiś julśnaka illśñi cherźku, ninakźkiś tshi kintu kint'ichićha:

⁸— Xaqhsilta źoñimiź am śalś phiśtikiś maśnasaź nïki, anam tukkin julźnasaćha, yaqha amkiśtan tshan cheqan maśinta źoñiź thonasaćha;

⁹Niźaśa ni phiśta päñi źoñi anćhuk maśiñiki amkiś chï thonasaćha: ‘Am julś tïźkiś thä.’ Neqhśtan amki aśañpanti wirkin julśñim oqasaćha.

¹⁰Am niźta maśinta khenaki, wiri thiyallkin julźna xalla ni am maśiñiki amkiś chiyasaćha: ‘Weth maśi, tukkin miśkin watźka.’ Xalla neqhśtan ampacham quśkiś näśnakićha śuma źoñi khita ni amtan chika miśkiś julśinakźtan.

¹¹Xaqhsilta źoñit perśunpacha śiśñi khïkhićhaxa; xalla nïki t'oqhźtaź khekićha, niźaśa ni amu quśśiś źoñiki śuma źoñi khitaź khekićha.

¹²Ni maśiñi źoñźkiś khichiśaqaśśa: — Ćhhul ora ćhheri qiskuki, ana am maśinaka qhawźna niźaśa ana am jilanakami niźaśaqaś ana am qhuy źoñinakami, niźaśa ana am qhuy źkati źelhñi źelinchiś źoñinakami; ninakaki am śaqaś maśnasaćha, neqhśtan amki thepuntam khesaćha.

¹³Ćhhul oram śuma ćhheri qisasaź nïki, amki t'akhirillanaka, śuchullanaka, kojullanaka, śurallanakam maśnakićha;

¹⁴Niźaśa amki añcha walim khekićha. Xalla ninakaki anaź amkiś thepñi atasaćha, xalla neqhśtan amki thepuntam khekićha, ni źkayi quśśiś źoñinaka jakatatan ni nöxiki.

¹⁵Xalla ti nonźku, tshi neqhś miśkiś julśi źelhñi źoñinakźkiśtan Jesusiźkiś khichićha: — ¡Añcha walićha ni Yöś irpiś wathkiś śuma ćhherkiś tomśñiki!

¹⁶Jesusaki khichićha: — Tshi źoñiki tshi chawkh ćhheri lulhś thakśićha, niźaśa wakchi źoñinaka maśñi kuchanchićha.

¹⁷Ćhheri lulhś oraki nïź uywitanaka kuchanchićha ni maśintanakźkin chïźkaxu: ‘Thonax khe, ćhheriki welhchi liśhtućha.’

¹⁸Xalla ninakaki thappacha qallantichićha taqu thakni. Ni tukkin khiñiki khichićha: ‘Anśqaś tshi yoqa qhaychinćha, ni cherśñil oqhś pekućha. Amki iyawqaź khella.’

¹⁹Tshi yaqhaki khichićha: ‘Werhki taxśnuku talźta wak turu qhaychinćha, niźaśa ni yanśñil oqaćha. Amki iyawqaź khella.’

²⁰Niźaśa ni tshïsuñaki khichićha: ‘Anśiqaś śalźnućha, anal oqi atasaćha.’

²¹Ni uywita źoñiki kuttichićha niźaśa nïź uywiñiźkiś thappacha kint'ichićha. Neqhśtan ni kuchañi źoñiki źaxwchićha niźaśa ni uywitiźkiś khichićha: ‘Uri wath mora oqhlayźka niźaśa ni t'aqhir źoñinaka śhikźka niźaśa ni śuchunaka ni śuranaka niźaśaqaś ni kojunakami.’

²²Kuttiźku ni uywitaki khichićha: ‘Tata, amiź kuchantakama oqhlayźkichinćha, niźaśa iya julś źelhxo.’

²³Neqhśtan ni tuyñuki ni uywitiźkiś khichićha: ‘Ni jikhś qhutñi oqhlayźka niźaśa ni uyunakqhutñi, niźaśa simitu yaqhanaka luśhqatźka xalla ti weth qhuya śhipsnaxu.

²⁴Niźtikiśtan werhki khiwćha, ana xaqhsiltami ni tuki maśinta źoñinakźkiśtan weth ćhheri lulasaćha.’

²⁵Tama źoñinakaki Jesusa apźnatćha; niźaśa Jesusaki wirqhutñi qhutźku neqhśtan khichićha:

²⁶“Xaqhsilta anćhukakiśtan werh apśpekćhax nïki, nïź perśun ephmi, mämi, thunakiśtanami, okhalźkiśtanami, nïź jilanakźkiśtanami, kullakinakźkiśtanami tshan werh pekśtanćha, anćhuk perśunpacha oqśniñćhuklax nïki, anaź werh apśñi atasaćha.

²⁷Niźaśa xaqhsilta źoñit perśun uj ana thxotku werh apźnaćhaxa, xalla nïki anaź weth apśñi khesaćha.

²⁸Xaqhsilta anćhukakiśtan tshi turi chukś pekćhaxa, ¿ima qallantikan perśun źelinś cherśtanćha, nïź päś tshakatax uśh ana tshakataxa?

²⁹Xalla ni śuylu chukźku neqhśtan anaź tshaki atasaź nïki, thapa ni cherñi źoñinakaki nïźkiś iñarasaćha,

³⁰tuź khikan: ‘Xalla ti źoñiki śuylu chukśićha, xalla neqhśtan ana tshaki atchićha.’

³¹Uśh tshi rey kira oqhśtantaźlax nïki yaqha moq'u reyźkin, ¿anax ima oqhkan perśun quśkiś cherśtantaxo, tshi qhalu watha śultatuźtan, ni piśk qhaluqhalu watha śultatunaka thonñinakźtan śhikt'aśxapaxo?

³²Niźaśa ana śhikt'aśi atchukaźlax nïki, xalla ni moq'u rey iya aźkin khen, śali kuchnakićha nïź taqu xoxoñi śuman palt'iśxapa.

³³Xalla niźtaśaqaś xaqhsilta anćhukakiśtan ana anćhuka źelinś ekakiź nïki, anaź werh apśñi khesaćha.

³⁴“Niźaśa yakuki añcha walićha; ni yakuź laq'ansnasaź nïki, ¿xaqhnuź wilta wakiśqatasaxo?

³⁵Anapanź wakiśićha yoqxapami niźaśa anapan wakiśićha ni ćhhakhś yoqkiś t'axśxapami, nuźqaś thawqśa. Xaqsiltaźlax khuñchiś nïki nonźla.”