Read Chipaya LUCAS 15 Bible Online

LUCAS 15 - Chipaya bible

LUCAS 15

¹Thappacha ni Romźta taśa mayñinaka, niźaśa yaqha ñexw źoñinaka Jesusiź taqu nonśxapa makhatź khichićha.

²Ni fariseonakaki niźaśa ni judiuź lï thaxiñinakaki Jesusiźxapa chuchchićha, tuź khikan: — Ti źoñiki ujchiś źoñinakami tanśñipanqaśśa, niźaśa ninakźtan chika lulhñićha.

³Neqhśtan Jesusaki ti kintukiśtan khichićha:

⁴“¿Xaqhsilta anćhukakiśtan tshi watha üśitś khesaź nïki, neqhśtan tsha üśil qatasaź nïki, anam ni sanqhuqhalu sanquchiś tama ekasaya ni üśi ilaqś yoqkiś, neqhśtan ni qatchi üśi qhurim oqasaćha na üśi waćhañkama?

⁵Niźaśa qatchi üśi wathźku, añcha chipa aśqarkiś tewśićha,

⁶Niźaśa qhuya irantiźku nïź maśinaka niźaśa nïź qhuy źkati źelhñi źoñinaka akhśićha, neqhśtan tuź khichićha: ‘Wethtanź chipa, ta qatchiñ üśiki waxa watchinćha.’

⁷Anćhukakiś śaqal chiyućha, tshi ujchiś źoñi Yöśkin makhatanaki tsewkta yoqkin añchaź chipasaćha, xalla ni sanquqhalu sanquchiś źkayi quś źoñinakaki anaź Yöśkin quś thutś wakiśićha.

⁸“Añcha walimćha, ¿ta mätaqki qhalu päśiśśa, neqhśtan tshi päś paśśinćha, ana micha thëśku, niźaśa śumallat qhuya pewkan qhurchinćha waćhañkama?

⁹Ni päś wathźkuki, näźa maśinaka niźaśa näźa źkati źelhñinaka akhśinćha, ninakźkiś tuź khichinćha: ‘Wethtan chipa, ni paśta päśki waxa wathchinćha.’

¹⁰Niźtaśaqaś anćhukakiś chiyućha tshi źoñiź Yöśkin makhatanaki, tsewkta pach anjilanakaki añcha śaqaś chipakićha.”

¹¹Jesusaki ti kint'ichiśaqaśśa: “Tshi źoñi pukultan machh wichtchiśtaćha,

¹²Ni upañaźtaki ephźkiś khichićha: ‘Tata, wethkiś wakiśiñi źelinś thälla.’ Neqhśtan ninakź ephki nïź źelinś t'aqźinchićha ni pukultanźkiś.

¹³Tshi qhaź maxkiśtan ni upañaźtaki nïź źelinśnaka lijw pacha tuyśićha, neqhśtan ni päśtan aźkin oqhchićha yaqha chawkh watha, xalla nikhu nïź päśnaka thappacha mirśićha ana t'iraśiźku.

¹⁴Xalla neqhśtan nïź päś thappacha mirźtan, ni chawkh wathkiśki mach'a watchićha, niźaśa nïki ćhherźqhara passićha.

¹⁵Neqhśtan nïki oqhchićha tshi wath źoñźkin lanqśñi qhuri, xalla ni źoñiki nïź xochi kuch ichi kuchanchićha.

¹⁶Niźaśa ni thowaki añcha nïź phuchh śhipś pekatćha ni algarrobźtan, xalla ni algarrobaki kuch lulitaćha, xalla nïźkiśiki ana jëkhmi thäñitaćha.

¹⁷Neqhśtan pinsichićha: ‘¡Weth ephź qhuykiś wakchi lanqśñinakaki ćhheri ćhhetinćhani, werhxay teqhśi ćhherźqharal pasnućha!

¹⁸Weth ephź qhuyal kuttaćha, niźaśa nïźkiś chiyaćha: Tatay, Yöśkin uj pächinćha niźaśa amkiś uj pächinćha;

¹⁹Anal am mati khiś wakiśućha; am lanqśinakaźtaqaś werh nayalla.’

²⁰Neqhśtan nïź ephź qhuya kuttichićha. “Niźaśa keźuźkhen, nïź ephki cherchićha neqhśtan nïź machh thonan añcha quśkiś oqśićha. Neqhśtan nïź machh śali śathchićha, niźaśa źkorźku niźaśa chhulźku anśićha.

²¹Nïź machhki nïźkiś khichićha: ‘Tatay, werhki Yöśkin uj pächinćha niźaśa amkiś uj pächinćha; werhki am mati khiś anal wakiśućha.’

²²Xalla nïź ephki nïź uywitanaka kuchanchićha: ‘Uri jeska śuma śkiti niźaśa thutźina; niźaśa tshi surtija lok'ankiś makhźina niźaśa ćhhata thutźina.

²³Niźaśa tshi wali khew wak turu śhikźka niźaśa konźnakićha. ¡Tshi chawkh phiśtaź päkićha niźaśa śuma ćhheriź lulakićha!

²⁴Ti weth machhki tikhśitaćha niźaśa xaśiki źetchiś khissićha; qatchitaqalćha niźaśa xaśiki wathźtaćha ućhumnakki.’

²⁵“Neqhśtan ni jilir machhki xochkintaćha. Qaqhźkikan qhuy keźu khen wirsu itsñi niźaśa tsathñi nonśićha.

²⁶Neqhśtan tshi tshi uywita qhawśićha niźaśa pewkśićha ćhhulut watxo.

²⁷Ni uywitaki khichićha: ‘Am laqhćha kuttiźkichiki; am ephki tshi paqh khew wak turu konqatchićha, am ephki am laqh wiwu niźaśa ana qhaźkhissi śalchićha.’

²⁸Neqhśtan niźta śiśku ni jilirź machhki muspa źaxwchićha, ana luśh pekatćha neqhśtan nïź ephćha ulanźkichiki nïź machh rokt'i qhuya luśhaxu.

²⁹Ephźkiś khichićha: ‘Amim śiśa qhaź wata am manta pächinta amiź chïtakama kaśśinćha, niźaśa amki ana śinta tshi chul turullami wethkiś onanchamćha weth maśinakźtan lulhśxapa.

³⁰Xalla ti am machh thontanaki niźaśa tshi paqh khew wak turum konźinćha, ti am machhki am päś mirśićha ni iźiwir mätaqanakźkiś.’

³¹“Ni ephki qhäśićha: ‘Weth mati, amki wethtan chikam qamćha, niźaśa thappacha ti weth źelinśnakaki amta kamaćha.

³²Xalla tïki phiśta niźaśa śuma ćhheri lulhchukaćha niźaśa añcha chipchukaćha, ni am laqhki tikhśiźtaqaśtaćha xaśiki źetchiś khissićha; niźaśa tïki qatchitaćha xaśiki wathchinćhumćha.’ ”