Read Chipaya LUCAS 2 Bible Online

LUCAS 2 - Chipaya bible

LUCAS 2

¹Xalla ni thuñiran tshi chawkh jiliri Romkiśtan źelatćha Augusto César khita, ti jiliriki mantichićha thappacha ni yoqkiś źelhñi źoñinaka qanśxapa.

²Nïź tuki źoñinaka qantaki, tshi chawkh jiliri Quirinio khitaź khen qantaćha, xalla ni jiliriki Siria yoqkiś irpiñitaćha.

³Niźaśa thappacha ni źoñinakaki perśun watha oqśpantaćha, ni perśun thü katoqsqati.

⁴Niźtikiśtan Joseki Nazaret wathkiśtan ulanźkichićha Galilea khita yoqkiśtan, neqhśtan oqhchićha Judea khita yoqa ni Belén watha, niźaśa Davidki ni wathkiś mathtataćha, niźaśa Joseki Davidźkiśtan oqhñitaćha.

⁵Neqhśtan Joseki Mariyatampacha Belén watha thü katoqsqati oqhchićha, niźaśa Joseki palt'itataćha Mariyatan śalśxapa niźaśa na Marïki iktaćha.

⁶Neqhśtan Belén wathkiś źelan, María źethś thuñi irantiźkichićha.

⁷Xalla nikhu Marïki tayna wawa mathchinćha, niźaśa awallźtan kapśinćha neqhśtan patillkiś t'apśinćha, ni uywanaka chawkhś qaqkiś, ninakaki ninakźta ana thxaś qhuya wathźqalćha.

⁸Niźaśa Belén wath źkati üśa awatirinaka źelatćha, ni yoqkiś wëntiźtan üśa ichatćha.

⁹Neqhśtan jejapachkiśtanalla Yöś anjilaki jekźkichićha Yöś aśśiś, niźaśa ninakź muytata qhanchićha; neqhśtan ninakaki añcha eqhsićha.

¹⁰Xalla neqhśtan ni anjilaki ninakźkiś khichićha: “Anćhukki anaź eqhsna, thapa źoñinakźta śuma kintul śhikućha, niźaśa ti wathchiś źoñinakaki añchaź chipakićha.

¹¹Niźaśa töxiki ti Davidź wathkiśiki liwrïñi mathtaćha, xalla nïki Mesías Tataćha.

¹²Niźaśa xalla tïki tshi chimpuźtaqaś khekićha, anćhukki ni wawaź śalakićha ni uywa chawkhś qaqkiś, awallźtan kapźta niźaśa patillkiś t'apźta.”

¹³Ni orapacha ni anjilźtan chika, jekźkichićha tsewktan tama anjilanaka, Yöśkin itskan, ninakaki tuź khetćha:

¹⁴“¡Tsewkta pach Yöśki aśśiśx khila! ¡Niźaśa ti yoqkiś źelhñi źoñinakźta añcha śumax khila, niźaśa amiź oqśñiź khen añcha kuntintuź khila!”

¹⁵Neqhśtan ni anjilanakaź tsewkta pacha kephtanaki, ni awatirinakaki porapat parli qallantichićha: — Belén wathaź oqhla, ćhhulu wathchita xalla ni cheri, niźaśa Yöśki ućhumnakakiś maśśila.

¹⁶Neqhśtan ni awatirinakaki phexwa oqhchićha Belén watha, xalla nikhu śalchićha Mariyatan Joseźtan tshi patillkiś wawa t'apśi, ni uywanaka chawkhś qaqkiś.

¹⁷Neqhśtan ninakźtan śalźku, thappacha Yöś anjilaź chïtanaka ni wawźkiśtan kint'ichićha,

¹⁸neqhśtan thappacha ni nonśñi źoñinakaki niźta chïtikiśtan iśpantichićha.

¹⁹Niźaśa Mariyki perśun quśkiś ni maśta taqunaka śhoxwatćhaxa, niźaśa näki ni taqunakkiśtan pinsatćha.

²⁰Neqhśtan ni awatirinakaki Yöśkin itskan niźaśa Yöś thü aynaqkan kephchićha, thapa ti ućhumź chertanakami niźaśa ni nonźtanakami, thappacha tinakaki wathchićha chïtakama.

²¹Ocho thuñkiśtan ni wawa chimpisqati oqhchićha, xalla neqhśtan thüsqachinćha JESÚS khikan, Marïki ni anjilaź chïta thü thüsqatchinćha ima näź ika khen chïtataćha.

²²Ni źkayi quś khisqaś thuñiź irantiźkitan, Jesusiź mä epki chhichchićha Jerusalén timlukin Yöśkin thëśxapa ni Moisés lïxaru, paqhpik qhalu thuñkiśtan wawaki timlu chhichśpantaćha.

²³Yöś lïki tuź khjirtaćha: “Thapa jilir lukmach wawaki, Yöśkinpan thäśtaćha.”

²⁴Niźaśa Joseki Mariyatampacha Yöśkin wilana thxoti oqhchićha, ni Yöś lïki nuźupan khićha: Piśk kullkuta, ananax piśk paloma.

²⁵Ni pachaki Jerusalén wathkiś tshi źoñi źelatćha Simeón khita. Ni źoñiki źkayi quśśiśtaćha niźaśa Yöś manta päñipantaćha, ti źoñiki Israel watha liwrïta khiśxapa thewźnatćha. Niźaśa ni Espíritu Santuki Simeonźtantaćha,

²⁶Xalla ni Espíritu Santuki nïźkiś śiśqatchićha, anam tikhźnakićha ima Mesías paxkanaki, Yöśki Mesías khita mantiźkakićha.

²⁷Neqhśtan ni źoñiki Espíritu Santuź irpita timlu oqhchićha; niźaśa ni Jesusiź mä epki ni timlukin śhikchićha, xalla neqhśiki ni lïxaru pächićha.

²⁸Neqhśtan Simeonki ni wawa qharźtan qäźku Yöśkin thächićha, tuź khikan:

²⁹“Xaśiki Tata, amiź chïta taquki kumlissićha: Niźaśa am manta päñi liwrim tikhsqatasaćha.

³⁰Niźaśa werhki perśun źhukźtan amiź kuchanźkita liwriñi cherchinćha.

³¹Niźaśa thappacha ti yoqkiś źelhñi źoñinakź tukkiś uchchamćha,

³²tïź qhanakićha, thappacha chawkh wathchiś źoñinakźkin, niźaśa Israel źoñinakźtan añćha śuma qhanaź khekićha.”

³³Neqhśtan ni Simeón chïtikiśtan Josemi ni wawź mämi añcha iśpantichićha, ni Jesusiźkiśtan chiyan.

³⁴Neqhśtan Simeonaki Yöśkin thäźku Jesusiź mäkiś Mariyakiś khichićha: — Cherźna, ti wawaź khen wakchi Israel wathchiś źoñinakaki liwrïtaź khekićha, niźaśa yaqhap Israel wathchiś źoñinakaśti ujkin thxotsnakićha. Tïki chimpuźtaqaś khekićha, niźaśa tama źoñinakaki tïź ćhhaxwakićha,

³⁵xalla nuź śiśakićha śapa mayni źoñź quśkiś pinsitanakaki. Xalla tïki am animukiś tshi paqh kuchillźtan ćhhaphtaźtaqaś khekićha.

³⁶Niźaśa nikhu Ana khiti źon źelatćha, täki Yöśkiśtan chïñśaqaśtaćha, täki Penuelź mathtaćha niźaśa Aser khita t'aqkiśtan oqiñtaćha. Täki chawk źonallitaćha niźaśa waw turalli śalźqalćha, perśun luktaqźtan towqu watallaqaś qamtqalćha;

³⁷xaśiki täki ochenta paqhpik watchiś źewtaćha. Täki timlukiśtan ana ulniñtaćha, ayunaśkan niźaśa mayiśikan Yöś manta päyintaćha wënmi maxiñami.

³⁸Neqhśtan Simeonź chï źerźtan, Anki ni wawźkiś thonchinćha, neqhśtan Yöśkin sparakiź khichinćha, neqhśtan Jesúsiźkiśtan chï qallantichinćha, niźaśa thappacha Jerusalén liwrïñi thewśñi źoñinakźkinami.

³⁹Neqhśtan thappacha Yöś kuchanźkita lï patxparu źerźku, Galilea khita yoqkin niźaśa ninakź Nazaret watha kephchićha.

⁴⁰Neqhśtan ni uśhaki paqatćha, tshan thupi niźaśa tshan ćhhultaqi śiśñi khissićha, Yöś ni kuytatćha niźaśa yanapatćha.

⁴¹Ni Jesusiź mä ephki śapa wata Paśku phiśta päyi Jerusalén watha oqhñitaćha.

⁴²Ni pacha ni Jesusaki qhalu piśkchiś watchiśtaćha, niźaśa ninakaki thappacha Jerusalén watha oqhchićha Paśku phiśta usa päyi.

⁴³Xalla neqhśtan phiśtaź wattan ninakaki kephchićha, niźaśa nïź mä epiź ana nayan ni uśha Jesúsaki Jerusalén wathkiś eklichićha.

⁴⁴Neqhśtan Jesusiź mä ephki pinsichićha thapa ni źoñinakźtan thonźkä khikan, xalla nuź khen tshi nöx watchićha, neqhśtan ninakaki ni uśha qhurchićha xamillanakźkin niźaśa ninakź paxinakźkin,

⁴⁵niźaśa ninakaki ana wathchićha, neqhśtan Jerusalén watha kephchićha xalla nikhu qhurśxapa.

⁴⁶Neqhśtan ninakaki chheph maxkiśtan Jesusa timlukiś wathchićha, ni lï thaxiñinakźtan julśi, ninaka nonźkan niźaśa ninaka pekunkan.

⁴⁷Thapa ni źoñinakaki ni uśha śiśñi chïñi nonźku iśpantichićha, niźaśa nïź qhäśta taqunakźkiśtanami.

⁴⁸Xalla neqhśtan ni uśha cherźku nïź mä ephki iśpantichićha; neqhśtan nïź mäki nïźkiś khichinćha: — Weth Mati, ¿qhaźtikiśtan am werhnak tiźta pächamtaxo? Werhnakki am añcha llakita qhurchinćha.

⁴⁹Jesusaki näkiś qhäśićha: — ¿Qhaźtikiśtan werh qhurchinćhuktaxo? ¿Anaź śiśatqhaźtataxo werhki weth ephź qhuykiś źelhśtanpantaćha?

⁵⁰Niźaśa nïź mä ephki ni chïñi anaź näśnatćha.

⁵¹Neqhśtan Jesusaki mä ephźtan Nazaret watha kephchićha, nikhu mä ephź manta kama qamchićha. Nïź mäki thapa ni perśun quśkiś śhoxwatćha.

⁵²Neqhśtan Jesusaki tshan śiśñi khisnatćha niźaśa paqatćha, Yöś Ephmi niźaśa thapa źoñinakami añchaź chipatćha nïźtan.