Read Chipaya LUCAS 21 Bible Online

LUCAS 21 - Chipaya bible

LUCAS 21

¹Jesusaki cheratćha ni źelinchiś źoñinaka ni kajunkiś päś uchñi,

²niźaśa tsha t'aqhir źew źon cherchićha, na źonki piśk chur päśalla uchatćha.

³Neqhśtan Jesusaki khichićha: — Cheqpachal chiyućha Ta t'aqhir źew źonki, thapatiźkiśtan jila uchchinćha;

⁴Ni źelinchiś źoñinakaki ninakź źethñilkiśtan uchcha, xalla na źew źonśti näźa t'aqhir qamañkiśtan thappacha uchchinćha näźa qamśkiśtan.

⁵Yeqhap źoñinakaki ni timlukiśtan parlatćha, niźaśa ni añcha k'achha chukźta maśnakźkiśtan, niźaśa ni thapaman ćhhultaqi onanta tshi ofrentaźtaqaś.

⁶— Jesusaki ninakźkiś khichićha śumpacha cherźna, tshi nöxiki ni thuñiź thonakićha thappacha tïki palhtaź khekićha niźaśa anaź maś tawqaraśśimi eklakićha.

⁷Neqhśtan ninakaki Jesusiźkiś pewkśićha: — Thaxiñi, ¿ćhhul orat ti timlu palhta khekixo? ¿Niźaśa ćhhul chimput źelakixo ti ćhhultaqinaka watś źkati?

⁸Jesusaki qhäśićha: “Anćhukki kuytaśakićha, ana millk'untita khiśxapa. Xalla niźtikiśtan wakchi weth thükiś źoñinaka thonakićha tuź khikan: ‘Werhćha Mesías khititki’, niźaśa ‘anśićha ti pachaki.’ Xalla niźtikiśtan ana ninaka apźnakićha.

⁹Neqhśtan anćhukki kir kintu, niźaśa ch'axmi kintu śiśakićha, anaź anćhukki tsukakićha, tinakaki tukipan watśtanćha; ti yoqa tukuśinski anaź ni orpacha khekićha.”

¹⁰Jesusaki tira palxaychićha: “Tshi nacionaki yaqha nacionźtanź talsnakićha, niźaśa tshi reynuki yaqha reynuźtanź talsnakićha.

¹¹Niźaśa yoqaki cheqhnakićha niźaśa phomsnakićha, niźaśa mach'anakaź watakićha, niźaśaqaś konanakaź thonakićha niźaśa t'aqhiś źelakićha, niźaśa tsewkta pachkin chimpunakaź thensnakićha.

¹²“Xalla tinaka ima watan, anćhukki tantaź khekićha niźaśa qhurtaź khekićha. Niźaśa akhs qhuya chhichtaź khekićha juchjiptayśxapa, niźaśa karsilkiś chawkhtaź khekićha niźaśa anćhukki irpiñi reynakźkin weth thüź khen chhichtaź khekićha.

¹³Xalla neqhśi anćhukalta wethkiśtan maśinś źelakićha.

¹⁴Xalla ni oraki anaź anćhukki pinsakićha ćhhulu chïś khenami, niźaśa perśunpachkiśtan thurt'iśxapami,

¹⁵weril ćhhulu chïśkiśtanami yanapźkaćha niźaśa śiśñi quśmi thäźkaćha, ni amtan moq'uśñi źoñinakaki anaź chhayi atakićha niźaśa anaź thurt'imi atakićha ana ćhhulkiśimi.

¹⁶Anćhuka mä ephpacha niźaśa jilanakpacha niźaśa qhuy źoñinakpacha niźaśaqaś am maśinakpachaź am thäkićha niźaśa yaqhapanakaki anćhukakiśtan kontaź khekićha,

¹⁷Niźaśa thappacha ti yoqkiś źelhñi źoñinakaki, weth taquź khen anćhuk ćhhaxwtaź khekićha;

¹⁸xalla neqhśtan anćhuka ach charaki anaź qatakićha śintallami.

¹⁹¡Anćhukki liwrïta khiśxapaki, thup quśśiś khekićha!

²⁰“Ćhhul orat Jerusalén watha śultatuź muyuntita khećhaxa, xalla neqhśtan näśnakićha anćhukki ti yoqa palhta khiśxapaki.

²¹Neqhśtan ni Judea wathkiś khiñinakaki kurqhuñex śhoxźla; niźaśa Jerusalenkiś khiñinakaki ulanla ni chawkh wathkiśtan, niźaśaqaś ni xochuñ khiñinakami anax kephźkila ninakź watha.

²²Xalla tïćha ni t'aqhiśiś thuñiki, xalla ni khjirta patxparu watśtanpanćha.

²³¡Aywira ni ik mätaqanaka niźaśa ni wawa t'ichiñi mätaqanaka! Xalla ti yoqkiś añchaź t'aqhiśakićha niźaśa Yöś źaxwaź thonakićha ti wathźtaki.

²⁴Yeqhap źoñinakaki kuchillźtan kontaź khekićha niźaśa yaqhapanakaśti tanźku yaqha watha chhichtaź khekićha; niźaśa ni ana Yöś kirïñinakaki Jerusalén watha thekźnakićha, xalla neqhśtan ni ana Yöś kirïchi źoñinaka tukuśinskama watśtanćha.

²⁵“Neqhśtan ni thuñkin niźaśa ni jïśkin niźaśaqaś ni wara waranakkinami chimpunaka źelakićha; niźaśa ti yoqkiś źelhñi źoñinaka llakiśhakićha niźaśa muspaysnakićha, niźaśa ni chawkh qot lhxoqi niźaśa ni qota muspa qhawñi nonźku tsukakićha.

²⁶Ti tsewk pachkin aśśiś źelhñi wekźtaź khekićha, neqhśtan ni źoñinakaki pinsakićha ćhhuluqat wataki ti yoqkiś, niźtikiśtan ni tsukhskuqaś mayjiptakićha ti źoñinakaki.

²⁷Neqhśtan cherakićha ni źoñź Mati tshir taypikiś thonñi nïź chawkh aśtan niźaśa k'achha qhankan.

²⁸Xalla ti anawalinaka wati qallantan, anćhukki naynayiź khekićha niźaśa achaź qäźnakićha, niźtikiśtan anćhukki waxipan liwrïta khekićha.”

²⁹Xalla neqhśtan tshi kintuśaqaś kint'ichićha: “Ni jiwus muntiź cherźna niźaśa yaqha muntinakami.

³⁰Xalla ni munti ch'oxi qallantanaki, anćhukkiź nayćha waxillaćha ni qhutñi luśhkinaki.

³¹Niźtaśaqaś anćhukki nayakićha ni anawalinaka watñi, ni oraki waxillaćha ni Yöś irpiś watha thonśki.

³²“Cheqpachal chiyućha ima ti pachkiś qamñi źoñinakaź tikhźnan, ti anawalinakaki watakićha.

³³Ni tsewkta pachami niźaśa ti yoqami watakićha, xalla ni weriź chïta taquki anaź watasaćha.

³⁴“Anćhukki perśunpachkiś kuytaśakićha, niźaśa anćhukki anaź lulinakkiś niźaśa likinakkiś quś thäkićha, niźaśa ana ti qamañ ćhhultaqinakiśimi, ni Yöś thonś thuñkiś ana niźtanaka päñi tansxapaki.

³⁵Thappacha ti yoqkiś źelhñi źoñinakaki tshi chalkiśtaqaś tansnakićha.

³⁶Nay nayiź khe, niźaśa śapuruź mayiśa, ti ana wali t'aqhiśnaka thonñikiśtan atipśxapa, niźaśa ni źoñź Matź tukkiś tshithsi khiśxapa.”

³⁷Jesusaki maxiñ Timlukiś thaxiñitaćha, niźaśa wënaki Olivu khita kurkin oqźku ekliñitaćha.

³⁸Thappacha ni wathchiś źoñinakaki wentan Jesusiź taqu nonśñi ni timlukin oqhñitaćha.