Read Chipaya LUCAS 23 Bible Online

LUCAS 23 - Chipaya bible

LUCAS 23

¹Thappacha ni źoñinakaki oqhchićha, niźaśa Jesusa Pilatuźkin chhichku.

²Nïź tukkiśpacha nïź uj thxotunchićha, tuź khikan: — Xalla ti źoñi tanchinćha ućhum chawkh wathkiś ch'axmi pän. Tïki khićha anaź taśa thäsaćha ni Cesarźkiśiki, niźaśa tïki thurt'ićha werhćha Mesías khikan, reytćha khićha.

³Neqhśtan Pilatuki pewkśićha: — ¿Amki ti judiunakź Reyimqaya? — Jesusaki qhäśićha, — amim chïćha.

⁴Neqhśtan Pilatuki ni timlu chawkh jilirinakźkiś niźaśa ni źoñinakźkiś khichićha: — Anal ti źoñźkiś ćhhul ujmi waćhućha, ujchiś thotśxapaki.

⁵Xalla ni źoñinakaki wilta chïchićha juq'an aśtan: — Ti źoñiki ch'axmiź päćha tïź thaxinśtiźtan thapa ni wathqhutñik. Galilea khita wathkiśtan qallantiźkichićha, xaśiki ti Judea khita wathkiś tiraź thaxinćha.

⁶Xalla ni nonźku Pilatuki pewkśićha, ti źoñiki Galilea wathchiśqay.

⁷Neqhśtan Jesusa ni Herodes irpiś yoqkiśtan śiśku, xalla ni Herodeskin kuchanchićha ni Herodeski nïpacha Jerusalén wathkiśtaćha.

⁸Herodeski Jesusa cherźku añcha chipchićha khissićha, xalla nïki tukitanpacha añcha Jesusa cherś pekataćha, niźaśa nïźkiśtan kintunaka parliñi nonchićha niźaśa tshi milajru päñi tewźnatćha.

⁹Ni Herodeski walxa pewkśićha, neqhśtan Jesusaki ana tshïmi qhäśićha:

¹⁰Xalla nikhuśaqaśtaćha ni timlu chawkh jilirinaka niźaśa ni lï utt'ayñinaka, ninakaki sutipan Jesusa ujchiś khisqatś pekatćha.

¹¹Xalla neqhśtan Herodes nïź śultatunakźtan, Jesusa iñarśxapa tshi reyźtaqaś ni śuma śkiti thutśśićha ćhhaxwkuqaś. Neqhśtan Herodeski wilta Pilatuźkin kuchanchićha.

¹²Ni nöxiki Pilatuźtan Herodestan munaśiñi maśi khissićha, ninakaki nïź tukiki moq'u qamñitaćha.

¹³Pilatuki ni timlu chawkh jilirinaka akhśićha, niźaśa wath jilirinaka,

¹⁴niźaśa ninakźkiś khichićha: — Anćhukki wethkiś ti źoñi śhikchinćhukćha tuź khikan, ti źoñiki ti wathkiś ch'axmiź päćha; werhki anćhuka tukkiś pewkśinla, niźaśa ana ćhhul ujmi tïźkiś wathchinćha, anćhukki ćhhulkiśtanpan ujkiś thxotśpekxo.

¹⁵Ana ni Herodesmi tïź uj wathchićha, neqhśtan ućhhunakakin thepunźkichićha. Śiśśa anćhukki ti źoñiki ana ujpächićha anaź tikhś wakiśićha.

¹⁶Niźaśa xwatqatźku kuchnaćha.

¹⁷Pilatuki ni phiśtikiś tshi ujchiś źoñi kuchśñipantaćha, ni źoñinakź quś wali khiśxapa.

¹⁸Xalla neqhśtan thappacha ni źoñinakaki qhawi qallantichićha: — ¡Ti źoñikix tikhźla! ¡Barrabás kuchśinźka!

¹⁹Ni Barrabaski tshi ch'axmi ni chawkh wathkiś pätikiśtan, niźaśa tshi źoñi kontikiśtan karsilkiś makhtataćha.

²⁰Pilatuki Jesusa kuch pekatćha, neqhśtan ni źoñinakźkiś tshïźtan chïchićha;

²¹neqhśtan ni źoñinakaki tshallanti qhawchićha, tuź khikan: — ¡Kuruśhkiś ch'awkźna! ¡Kuruśhkiś ch'awkźna!

²²Pilatuki chheph wiltikiś tshïźtan chïchićha: — ¿Ćhhulu ana walipan pächi tïxo? Werhki anal tïźkiś ćhhul ujmi waćhućha konta khiśxapaki. Neqhśtan xwatźku liwril kuchnaćha.

²³Xalla ni źoñinakaki tirapan qhawchićha, kuruśhkiś ch'awkka khikan; niźaśa añcha qhawźku ni źoñinakaki niźaśa ni timlu jilirinaka ninakź pektakama atchićha.

²⁴Neqhśtan Pilatuki ninakaź maytakama iyawkhichićha;

²⁵niźaśa ni ch'axmikiś źoñi konchi niźaśa ni źoñinakaź illśta źoñi liwri kuchśićha, neqhśtan Jesusa ni źoñinakź quśkama thächićha.

²⁶Ni Jesusa kuruśhkiś ch'awkśxapa chhichan, Cirene wathchiś Simuna tshitsqatchićha xochkiśtan kephźkan, nïźkiś kuruśha thuśśićha Jesusiź wirkiś oqaxu.

²⁷Tama źoñinaka niźaśa tama mätaqanaka, qäkan niźaśa qhawkan Jesusiźkiśtan llakita apźnatćha.

²⁸Neqhśtan Jesusaki ninakźqhutñi cherźku khichićha: — Jerusalén wathchiś mätaqanaka, anaź wethkiśtan qä, perśunpachkiśtan niźaśa anćhuka okhalźkiśtan qä.

²⁹Tshi thuñiź thonakićha xalla neqhś anćhukki khekićha: ‘Añcha walićha ni machur mätaqanakaki niźaśa ni ana mathñi mätanaqami niźaśa ana okhalchiśnakami.’

³⁰Xalla neqhśtan źoñinakaki ni kurunakźkiś chï qallantakićha: ‘¡Wethnaka juntuñ thxotska!’ Niźaśa ni kur qaqkiś: ‘¡Werhnak śhoxźna!’

³¹Xalla tuź ni ch'oxñi źupkiś päćha, ¿qhaźt khisnak ni qhonchi źupxo?

³²Pukultan ujchiś źoñinaka chhichchiśaqaśśa, Jesusiźtan chika kuruśhkiś ch'awkśxapa.

³³Xalla nuź ni t'oxlu yoqa irantiźku, xalla nikhu Jesusa kuruśhkiś ch'awkchićha niźaśa ni pukultan ujchiś źoñinakźtan, tshïki nïź źewqhuttan niźaśa tshïsuñaki nïź śqarqhuttan.

³⁴Jesusaki khichićha: “Tatay, ti ujchiś źoñinakźtan śumansna, tinakaki anaź śiśśa ćhhulut päćhax xalla ninaka.” Niźaśa ni śultatunakaki Jesusiź śkitkiś surtiyassićha ninakkama ni śkiti toxśxapa.

³⁵Xalla neqhśi tama źoñinakaki cheqźnatćha; niźaśa ni chawkh jilirinakaki Jesusa iñaratćha, tuź khikan: — Tïki yaqha źoñinaka liwrïchićha, xaśiki perśunpachax liwrïslalla, niźaśa cheqpacha Yöś illśta Mesiaslax nïki.

³⁶Xalla ni śultatunakaki niźtaśaqaś Jesusa iñaratćha. Jesusiźkin makhatźku k'allku winu tirinchićha,

³⁷tuź khikan: — ¡Amki judiu źoñinakź Reyimźlax nïki, perśunpacha liwrïsnalla!

³⁸Niźaśa nïź ach tsektuñ tshi maśiñi acha khjirta źelatćha, niźaśa hebreokiśtan niźaśa latinkiśtan khjirtataćha, xalla ni khjirtaki tuź khetćha: “Xalla tïćha judiunakź reyki.”

³⁹Tshi tshi ni kuruśhkiś ch'awkta ujchiś źoñźkiśtan Jesusa ar archićha: — ¡Amki Mesiyamźlax nïki, perśunpacha liwrïsnalla niźaśa werhnakmi liwriyalla!

⁴⁰Xalla ni tshïsuñki nïź maśi ujśićha, tuź khikan: — ¿Anam Yöś eqhsya, amki niźtaśaqaś kaśtiktala?

⁴¹Ućhumnakki werarkiśtanpanź t'aqhiśi, ućhumnakki anawalinaka pätikiśtanź phxoqćha; xalla ti źoñiśti ana ćhhul uj pächićha.

⁴²Neqhśtan ni źoñiki Jesusiźkiś khichićha: — Jesusa werh khuñśnalla, ćhhul oram am irpi qallantaćhaxa xalla neqhśi.

⁴³Jesusaki qhäśićha: — Cheqpachal chiyućha töx pacha amki wethtanam khekićha ni añcha k'achha wathkin.

⁴⁴Taypurkiśtanpacha śeśikëkama, thappacha ti yoqaki sumchi laqha khissićha.

⁴⁵Ni thuñiki ana qhanñi khissićha, niźaśa ni Timlu pañuki chikatkiś xwarsićha.

⁴⁶Neqhśtan Jesusaki thapa aśtan qhawchićha, tuź khikan: — ¡Tatay, am qharkiś weth animu tanźnalla! Niźaśa ti chïźku tikhśićha.

⁴⁷Neqhśtan ni kapitan Roman śultatuki, Yöś thü aynaqchićha tuź khikan: — Cheqpacha ti źoñiki ana ujchiś, niźaśa źkayi quśśiśtaqalćha.

⁴⁸Thappacha neqhś źelhñi źoñinakaki niźta watñi cherchićha, xalla neqhśtan quś ćhakhkan oqhchićha.

⁴⁹Thappacha ni Jesusiź paxinaka, niźaśa ni Galilekiśtan thonchi mätaqanakami aźkiśtan cheqźnatćha.

⁵⁰Tshi źkayi quśśiś śuma źoñi Jusi khita źelatćha Arimatea wathchiś, tshi judea wathkiśtan. Jusiki ni timlu chawkh jilirinaka irpiñi t'aqkiśtantaćha.

⁵¹Ni Joseki Yöś irpiś wathaśaqaś thewźnatćha, niźaśa tïki anataćha quśtan ni chawkh jilirinaka ni Jesusa nuź pänaki.

⁵²Neqhśtan Pilatuźkin oqhchićha, niźaśa Jesusiź tikhśi xañchi maychićha.

⁵³Neqhśtan ni kuruśhkiśtan śhujunźku, tshi walurchiś pañkiś thelhśićha niźaśa tshi puykiś makhśićha ni puyiki kur aqhkiś phettataćha, xalla neqhśiki ana xaqhsiltami makhtataćha.

⁵⁴Xalla ni werniśki Paśku xapa thakś thuñitaćha, niźaśa waxillataćha ni śawat thuñi qallantiśkin.

⁵⁵Ni Jesusa Galilekiśtanpacha qhutźkichi mätaqanakaki, puyi cherśñi oqhchićha, niźaśa xaqhnuź ni Jesusiź tikhśi xañchi nontataźlax ni śumpacha cherśićha.

⁵⁶Xalla neqhśtan qhuya kephźku, perfuminaka niźaśa śuma xeq'itatñi qullanaka thakśićha. Ni mätaqanakaki ni śawatu jejśićha ninakź lï xaru.