Read Chipaya LUCAS 24 Bible Online

LUCAS 24 - Chipaya bible

LUCAS 24

¹Xalla ni śimana qallantiñi thuñkiśiki, ni mätaqanakaki wentan Jesusiź puyi cherśñi oqhchićha, niźaśa ni śuma xeq'itatñi thakśta qullanaka chhichku.

²Xalla ni puyi irantiźku ni paqh maśtan chawkhźta puyiki qisqatta śalchićha;

³niźaśa luśhku ana Jesusiź xañchi wathchićha.

⁴Neqhśtan ana xaqnuźkin khiyi atatćha, jejatanalla pukultan źoñinaka ninakźtan chika tshittsi cherśićha, llijñi śkiti kuthchi.

⁵Niźaśa añcha eqhsku ni mätaqanakaki yoqkiś pokt'ichićha; xalla neqhśtan ni źoñinakaki ninakźkiś khichićha: — ¿Ni źethñi źoñi qhaźtikiśtan anćhuk tikhśinakźkiś qhurxo?

⁶Nïki jakatatchićha, anaź teqśiki źelhćha. Galilekin źelhkan anćhukakiś chïta khuñśnalla:

⁷Ni źoñź Matiki ujchiś źoñinakź qharkiś thäta khiśpantaćha, niźaśa kuruśhkiś ch'awkta khiśpantaćha niźaśa chheph maxkiśtanaki jakatatśpantaćha.

⁸Neqhśtan ni mätaqanakaki Jesusiź chïta taqunaka khuñśićha,

⁹Niźaśa ni puykiśtan kephźku thappacha ni chertanaka kint'ićha, ni qhalu tshichiś thaxintanakaźkiś niźaśa thapa yaqha źoñinakźkiśimi.

¹⁰Xalla ni kintu Jesusiź thaxintanakźkin chhichñi mätaqanakaki tinakataćha, María Magdalentaćha, Juanitaćha, Santiaguź mä Mariy khitiśaqaśtaćha, niźaśa iya yaqha mätaqanakźtan.

¹¹Xalla ni Jesusiź thaxintanakaki, ni mätaqanakaź chïta tshi toskarkintuź taqaś naychićha, niźaśa anaśinta kiriyatćha.

¹²Neqhśtan Piruki puyi cherśñi śathchićha; niźaśa irantiźku qhullchuk cherśićha neqhśi pañuqaś cherśićha. Neqhśtan niźta wattikiśtan iśpantichi qhuya kuttichićha.

¹³Ni nöxpacha pukultan Jesusa apśñi źoñinaka, Emaús xoch jikhśkiś oqatćha, tshi piśk tupu jilchiś taćha ni Jerusalén wathkiśtan.

¹⁴Ninakaki thapa ni watchinakźkiśtan parlikan oqatćha.

¹⁵Ninakaź nuź parlan niźaśa ch'ärasan Jesusapachaź źkatźinźkichiki, neqhśtan ninakźtan chika oqhchićha.

¹⁶Xalla ninakź źhukiki ana paxñi khisqattataćha, ana paxaxu.

¹⁷Neqhśtan Jesusaki ninaka pewkśićha: — ¿Ćhhulkiśtanź anćhuk ti jikhśkiś oqkan parlixo? Ni źoñinakaki llakita t'ukśićha,

¹⁸niźaśa tshisuña ninakźkiśtan Cleofás khitaki qhäśićha: — ¿Am alaxaqay ni yaqha wathchiś źoñi, ni Jerusalén wathkiś ti nöxiran watchinaka ana naychi?

¹⁹Ni Jesusaki tira pewkśićha: — ¿Ćhhulu watchitaxo? Ninakaki khichićha: — Tshi Jesusa Nazaret wathchiś źoñi źelatćha, nïki Yöś kuchanźkita chïñitaćha niźaśa milajrunaka nïź aśtan pächićha niźaśa śuma taqchiśtaćha Yöś tukkiś, niźaśa thapa wathanakź tukkiśimi;

²⁰niźaśa ni timlu chawkh jilirinakźtan niźaśa wethnaka jilirinakźtan, kuruśhkiś ch'awkta tikhźnaxu thächićha.

²¹Werhnakki pinsatućha ni źoñiź Israel watha liwriyakeq khetućha. Xaśiki ti wattaki chhephmaxź wax khissa.

²²Tshi qhaźultan wethnakatan źelhñi mätaqanakaki werhnak tsukunchićha, ninakaki puyi cheri wentan oqhchićha,

²³niźaśa ana ni tikhśi xañchi wathźku qhuya kephźkichićha. Niźaśa ninakaki kint'ichićha tshi piśk anjilanaka thensikićha niźaśa ni anjilanakaki chïtqalćha Jesusaki źetćha khikan.

²⁴Xalla neqhśtan wethnaka maśinakźkiśtan puyi cheri oqhchićha, niźaśa ni mätaqanakaź chïtakama śalqalćha, xalla ni Jesusaki ana cherqalćha.

²⁵Neqhśtan Jesusaki khichićha: — ¡Anćhukki ana näśninćhukćha, niźaśa choxru quśśiśćhukpanćha ni Yöś kuchanźkita chïñinakaź chïta ana uri kirïinćhukćha!

²⁶¿Anćhukki anaź śiśatqhaźtataxo? Ni Mesías ima tsewkta yoqa oqhkan t'aqhiśiśpantaćha neqhśtan irpiśxapa.

²⁷Xalla neqhśtan ni źoñiki thaxni qallantichićha nïźkiśtan, thappacha ni Moisés khjirta liwruź kiśtanpacha, niźaśa Yöś kuchanźkita chïñinakaź khjirtanakkiśtanami.

²⁸Xalla ni qolta watha irantiźku, ni źoñiki tira watñi źoñiźtaqaśtaćha.

²⁹Xalla ni pukultan źoñinakaki ni źoñi rokchićha eklaxu, tuź khikan: — Wethnakatan eklalla śeśillaź khissa. Thuñi waxź qatćha. Ni źoñiki ninakźtan luśhśićha ekliśxapa.

³⁰Niźaśa ninakźtan miśkiś julźku, nïź qharkiś t'anta tanźku Yöśkin sparakiź khichićha, neqhśtan ni t'anta ćh'alhźku ninakźkiś thächićha.

³¹Nuź khen, ninakaki paxñuź khichićha ninakź źhuki khetźintaźtaqaś, neqhśtan Jesusa śumpacha paxchićha; xalla ni Jesusaki ninakź tukkiśtan qatchićha.

³²Neqhśtan ninakaki ninakpora parlassićha: — ¡Ućhumnakatan jikhśkiś thonan nïź palxayan niźaśa ni khjirtanaka khetźku ućhumnakakiś thaxnan, ućhumnaka tuśhi añcha qhaqhatćha!

³³Neqhśtan ninakaki ni orapacha Jerusalén watha kephchićha, xalla nikhu śalchićha ni qhalu tshichiś Jesusiź thaxintanaka niźaśa ninakź maśinakźtan akhsi.

³⁴Neqhś źelhñi źoñinakaki ni pukultanźkiś khichićha: — Cheqpacha ni Jesusaki jakatatchićha, niźaśa Piruźkiś thensi śaqaśśa.

³⁵Neqhśtan ni pukultan źoñinakaki ninakźkiś kint'ichićha, ćhhulu watćhaxa ninakź jikhśkiś, niźaśa xaqhnuź Jesusa paxtćhaxa ni t'anta ćh'alhźnan.

³⁶Xalla ni pukultan tira kint'an, Jesusaki ninakź taypikiś thensićha, niźaśa tsänchićha tuź khikan: — Anćhukakiś śuma orax khila.

³⁷Neqhśtan ninakaki añcha tsukhchi teqa khissićha, niźaśa tshi animu cheruźkä khikan pinsatćha.

³⁸Xalla ni Jesusaki ninakźkiś khichićha: — ¿Qhaźtikiśtan anćhuk tsukhxo? ¿Qhaźtikiśtan anćhuka quśkiś teqenaśxo?

³⁹Niźaśa weth qhara weth qhxocha cherźna. Werhpachaćha werh lanźna niźaśa cherźna; tshi animuki ana xañchichiśśa niźaśa ana tsjijchiśśa, anćhukki cherćha wethtaki źelhćha.

⁴⁰Niźaśa xalla nuź chïkan, nïź qhara niźaśa nïź qhxocha thëśićha.

⁴¹Xalla ni źoñinakaki quś phiya śaqaśkhisnatćha niźtami anapanź kiriyatćha, neqhśtan muspaysi khissiźkhen Jesusaki pewkśićha: — ¿Anćhukata ćhhul lulit teqhś źelhxo?

⁴²Neqhśtan ninakaki tshi taru ch'iś kanka thächićha, niźaśa tshi phalt'i misk'iźtan,

⁴³neqhśtan Jesusaki ni onanta tanśićha niźaśa ninakaź cheran lulhchićha.

⁴⁴Neqhśtan Jesusaki ninakźkiś khichićha: — Xalla tïćha weriź anćhukakiś maśinta taqunakaki anćhukatan chika źelhkanaki, tïki watśpantaćha thapa ti wethkiśtan, ni Moisés lïkiś khjirtanakami, niźaśa ni Yöś kuchanźkita chïñinakź liwrukiśimi niźaśa Salmu khjirtikiśimi.

⁴⁵Neqhśtan ninakź śiś achaki khetźintaćha ni khjirtanaka näśnaxu.

⁴⁶Niźaśa ninakźkiś khichićha: — Tuź khjirtaćha ni Mesiaski tikhśpantaćha, niźaśa tikhśikiśtan chheph maxkhiśtan jakatatśpanćha,

⁴⁷Jerusalén wathkiśtan qallantiśtanćha, niźaśa nïź thükiś thapa chawkh wathkhutñi maśinta khiśtanćha Yöśkin kiriyaxu, niźaśa nïź Yöśkin kiriyakiź nïki ninakź ujkiśtan pertunta khiśxapa,

⁴⁸anćhukki thapa ti ćhhultaqinakźkiśtan cherchinćhukćha, niźaśa anćhukki maśinśtanćha.

⁴⁹Niźaśa werhki weth epiź wethkiś taqu onźta, anćhukakiś kuchanźkaćha. Niźaśa anćhukki Jerusalén chawkh wathkiś eklakićha, tsewktan thonñi Yöś aśi tanśkama.

⁵⁰Neqhśtan Jesusaki Jerusalén chawkh wathkiśtan nïź thaxinta źoñinaka jessićha Betania khita qolta wathkin, neqhśtan nïź qhara wäźku khichićha, Yöś anćhukakiś yanapila.

⁵¹Niźaśa nuź yanapila chïkanpacha, ninakźkiśtan t'aqsićha niźaśa tsewkchukpacha chhichtaćha.

⁵²Xalla ninakaki Yöśkin amtiźku, Jerusalén watha añcha chipa kephchićha.

⁵³Niźaśa ninakaki śapuru Timlukin oqatćha Yöś thü aynaqi niźaśa Yöś yanapila khikan, xalla nuźox khila.