Read Chipaya LUCAS 4 Bible Online

LUCAS 4 - Chipaya bible

LUCAS 4

¹Jesusaki Jordán pujkiśtan Espíritu Santu śhipi kuttichićha, ni Espirituki Jesusa ch'eqti yoqa chhichchićha.

²Xalla ni ch'eqti yoqkin źelhchićha paqhpik qhalu thuñi, xalla nuź źelanaki ni Saxraki Jesusa ujkiś thxotsqatś pekchićha. Niźaśa ni thuñiran anapan lulhchićha neqhśtan Jesusaki ćhheri eksqatchićha.

³Neqhśtan ni Saxraki Jesusiźkiś khichićha: — Cheqpacha Yöś Matimźlax nïki, amki ti maśkiś chiya t'anta tukaxu.

⁴Jesusaki nïźkiś qhäśićha: — Khjirta Yöś śuma kintu tuź khićha: ‘Źoñinakaki anaź t'antiźtanqaś źetasaćha.’ Yöś taqućha cheqanaki.

⁵Xalla neqhśtan ni Saxraki Jesusa chhichchićha tshi paqh kur puntikin, xalla nikhu thëśićha tshi upakamalla thappacha ti yoqkiś źelhñi chawkh wathanaka,

⁶Saxraki ni Jesusiźkiś khichićha: — Werhki thapa ti aśi niźaśa ti wath paqhinaka thäsaćha. Tinakaki wethkiś thätaćha, werhki jëkhźkiś thäśpekkul thäsaćha.

⁷Niźaśa amki killśkum werh amtakiź nïki, thappacha amtakamaź khekićha.

⁸Jesusaki Saxriźkiś qhäśićha: — Saxra wethkiśtan saraqa, Yöś śuma kintu khjirtaki tuź khićha: ‘Amki Yöś alaxa amta, niźaśa nïź thü alaxa aynaqa.’

⁹Neqhśtan ni Saxraki Jesusa Jerusalén watha chhichchićha, xalla nikhu timlu phurnikin yawqatchićha neqhśtan Jesusiźkiś khichićha: — Cheqpacha Yöś Matimźlax nïki, teqhśtanpacha qossuk thxotsna;

¹⁰ni Yöś śuma kintu khjirtaki khićha: ‘Yöśki nïź anjilanaka kuchanźkaćhan am cheqśñi niźaśa am tshithsiñi.

¹¹Niźaśa ninakaki ninakź qharźtan am waytaćhan, xalla neqhśtan am qhxocha ana maśkiś śhoxritsnaxu.’

¹²Jesusaki Saxriźkiś qhäśićha: — Yöś śuma kintu khjirtaki nuźuśaqaś khićha: ‘Ana am Yöś Tata ujkiś thxotś peka.’

¹³Neqhśtan ni Saxraki Jesusa ujkiś thxotśñi ana iya atchićha, neqhśtan ni Saxraki Jesuskiśtan tshi qhaźtapacha saraqchićha.

¹⁴Jesusaki Galilea watha Espíritu Santu śhipi niźaśa ni aśśiś kephźkichićha, niźaśa thapa ni Galilea yoq muytata nïźkiśtan parlatćha.

¹⁵Niźaśa ni Jesusaki thapa akhs qhuyaran thaxnatćha, niźaśa thapa źoñinakaź ni aynaqatćha.

¹⁶Neqhśtan Jesusaki nïź paqta Nazaret watha oqhchićha. Neqhśtan ni śawatu jejś thuñkiś nïź usa xaru ni akhs qhuya luśhśićha, neqhśtan Yöś śuma kintu lïśxapa tshitsićha.

¹⁷Neqhśtan ni Jesusiźkiś ni Yöśkiśtan chïñi Isaías khjirta liwru liyaxu chhalźtaćha, neqhśtan ni liwru khetźku wathchićha ni khjirta:

¹⁸“Ni Yöś Espirituki weth juntuñćha, niźaśa werhki ni t'aqhir źoñinakźkin śuma taqunaka chhichaxu uchśtaćha; niźaśa źkayi quśśiś khisqattaćha, ni t'aqhir źoñinakźkin ni Yöś śuma kintu maśnaxu; niźaśa werhki ni tanta źoñinakźkin liwri kuchśnaxu maśna khitaćha, niźaśa ni śur źoñinaka cherqatax khitaćha; niźaśa ni ćhhaxwta źoñinaka liwri kuchśxapa;

¹⁹niźaśa Yöś śuma wata maśinśxapa.”

²⁰Neqhśtan Jesusaki ni liwru phukźku akhs qhuya cheqśñi śakśtiźkiś thächićha, neqhśtan nuźkiś julśićha niźaśa thapa neqhś źelhñi źoñinakaki nïź qhutñi cheqźtapachataćha.

²¹Neqhśtan Jesusaki parli qallantichićha tuź khikan: — Töx pacha ti khjirta Yöś śuma kintu anćhukaź nonźnan kumlissićha.

²²Neqhśtan thappacha ni źoñinakaki ni Jesusaź añcha śuma chïtikiśtan iśpantatćha niźaśa ninakpora pewksaskan parlatćha: — ¿Tïki anax Joseź matiya?

²³Jesusaki ninakźkiś qhäśićha: — Anćhukki wethkiś ana payśnaqźkuź ti piśkkin oqhñi tawqźtan chiyaćhani: ‘Qullñi, perśunpacha qullaśalla.’ Niźaśa anćhukki wethkiś iyaśaqaś chiyakićha: ‘Ni Cafarnaumkin päta nonśinćha, xaśiki ti perśun yoqkiśśaqaś pälla.’

²⁴Niźaśa Jesusaki tirapan palxaychićha, tuź khikan: — Weraral chiyućha tshi Yöś kuchanźkita chïñiki anaź śuma tanźta khesaćha perśun yoqkiśiki.

²⁵Ni Elías Yöśkiśtan chïñiź ni pachaki, Israel wathkiś cheqpacha wakchi źew mätaqanaka źelatćha, xalla ni pachaki chheph wata tirśuchiś ana wira chijinchićha, neqhśtan ni yoqaran ana ćhheri źelatćha niźaśa ni wathkiśiki mach'a watchićha;

²⁶xalla neqhśtan Eliaski ana kuchantaćha ni Israel źew mätaqanakźkin, ans Eliaski tsha źewakin kuchantaćha Sarepta khita wathchiś, Sidón chawkh wath keźu.

²⁷Niźtaśaqaś ni Eliseoź Yöśkiśtan chïñiź ni pachaki, ni Israel wathkiś wakchi moqhchi xañchichiś länaka źelatćha, ninakźkiśtan ana xaqhsiltami ćhhetintaćha, ans Eliceoki Naamán alaxa ćhhetinchićha nïki Siria wathchiś źoñitaćha.

²⁸Xalla nuź chïta nonźku thappacha ni akhs qhuykiś źelhñi źoñinakaki źaxwchićha.

²⁹Neqhśtan tshitsku Jesusa ni wathkiśtan chhichchićha, niźaśa ni kuru źerañi aqhkin ni wathaki qhuytataćha, xalla neqhśtan qossuk thxotśkiśxapa.

³⁰Neqhśtan ni Jesusaki ninakź taypi watchićha, neqhśtan tira oqhchićha.

³¹Neqhśtan Jesusaki oqhchićha Cafarnaúm watha Galilea yoqkin, neqhśi śawatu jejś thuñkiś źoñinaka thaxinchićha.

³²Ni Jesusaki tshi jiliriźtaqaś chiyatćha, xalla nuź ninakźkiś thaxintikiśtan ni źoñinakaki añcha iśpantichićha.

³³Niźaśa ni akhs qhuykiś tshi anaśum yenqha uśh yenqhaź tanta źoñi źelatćha, ni źoñiki thapa aśtan qhawchićha, tuź khikan:

³⁴— ¡Werhnakź eka! Jesusa Nazaret wathchiś źoñi, ¿qhaźtikiśtanam wethnakakiś mitiśxo? ¿Werhnak aqi thonchamqaya? Werhki am paxućha amki śuma źkayi quśśiś Yöś Matimpanćha.

³⁵Neqhśtan Jesusaki ni anaśum yenqha ujśićha, tuź khikan: — ¡Ch'uj źela, ti źoñźkiśtan ulna! Neqhśtan ni anaśum yenqhaki ni źoñi yoqkiś thxotchićha thapa ni źoñinakź tukkiś, neqhśtan ni źoñźkiśtan ulanchićha ana ćhhulumi śhoxrichku.

³⁶Neqhśtan thappacha ni źoñinakaki tsukhchićha, niźaśa ninakpora parlasatćha: — ¿Ćhhul taqunakat tïxo? Thapa jilir aśtan ti źoñiki ni yenqhamiź ulnaxu kuchanćha. ¡Niźaśa ni yenqhaśti ulanćha!

³⁷Neqhśtan ni Jesusiźxapa thappacha ni yoqanak qhutñi parlatćha.

³⁸Neqhśtan Jesusaki ni akhs qhuykiśtan ulanźku, Simunź qhuya luśhśićha ni Simunź axmuś mäki ćh'ulhñi konkiś añcha läkhichintaćha, neqhśtan ninakaki na źonakiśtan Jesusiźkiś rokt'ichićha.

³⁹Neqhśtan Jesusaki na lä źonakiś chutxatźku ni ćh'ulhñi kona ujśićha, ni konaki ni orapacha saraqchićha, neqhśtan na źonki źäźku ninakź manta päyi qallantichinćha.

⁴⁰Thuñiź qattan śeślaqa, ni źoñinakaki Jesusiźkin thapaman lä źoñinaka śhikchićha; neqhśtan Jesusaki ni źoñinaka śapamayni qharźtan lanźku ćhhetinchićha.

⁴¹Niźaśa wakchi länakźkiśtan anaśum yenqhanakaki ulanchićha qhawkan, tuź khikan: — ¡Amki Yöś Matimćha! Neqhśtan ni Jesusaki anaśum yenqhanaka ujźnatćha niźaśa ana chïqatatćha, ni Mesías śiśatćha ni anaśum yenqhanakaki.

⁴²Neqhśtan Jesusaki qhanźkan ni wathź thiya ulanchićha tshi ch'eqti yoqa, ni źoñinakaki Jesusa qhurchićha niźaśa xaqhsikintaźlaxa Jesusa xalla nikhu irantichićha, neqhśtan ni źoñinakaki ni Jesusa ćhhelinś pekatćha ana oqaxu.

⁴³Neqhśtan Jesusaki ninakźkiś khichićha: — Werhki tiźtaśaqaś yaqha wathanakźkin maśinśtanćha ti Yöś śuma irpiś wath kintunaka, nïxapa werhki kuchanźkititćha.

⁴⁴Xalla nuź Jesusaki ni Galilea akhs qhuyaran, ni Yöś śuma kintu parlikan oqhlaychićha.