Read Chipaya LUCAS 5 Bible Online

LUCAS 5 - Chipaya bible

LUCAS 5

¹Tshi nöx Genesaret khita qot atkiś Jesusaki źelatćha, neqhś źelan tama źoñinakaki thonchićha niźaśa Yöś śuma kintu nonśxapa Jesusiźkiś añcha ts'akasatćha.

²Neqhśtan Jesusaki piśk lächi walsa cherchićha ni qot atkiś. Ni ch'iś tanñi źoñinakaki ni walsikiśtan ninakź kakuna axwni śhujchitaćha.

³Neqhśtan Jesusaki Simunź walsikiś luśhśićha, neqhśtan nïź tuyñuźkiś maychićha tshi qolukulla qotqhutñi luśhaxo. Xalla neqhśtan ni walsikiś julźku neqhśtanpacha ni źoñinakźkiś thaxni qallantichićha.

⁴Neqhśtan ni źoñinakźkiś thaxni źerźku, Simunźkiś khichićha: — Ti walsa chhicha qot mora, xalla nikhu ni anćhuka ch'iś tanś mallanaka thxotźka ch'iś tanśxapa.

⁵Simunaki ni Jesusiźkiś qhäśićha: — Thaxiñi, werhnakki wenpaqara lanqśinćha ana śinta tanchinćha; niźtaki amiź kuchnanaki ti mallanakal thxotźkaćha.

⁶Neqhśtan nuź thxotźtikiśtan taź ch'iś xowśićha, niźaśa ninakź mallamiź xwarsnatćha.

⁷Neqhśtan ninakaki ninakź maśinakźkin qharźtan wilśićha, niźaśa ninaka yanapi thonaxu, ninakź maśinakaki yaqha walsikintaćha. Neqhśtan ninakaki oqhchićha neqhśtan ni piśk walsanaka śhipśićha ni walsanakaki qhaśkiś wax qatśmayataćha.

⁸Xalla ni cherźku, Simón Piruki Jesusiź tukkiś killśićha tuź khikan: — ¡Tata wethkiśtan saraqa, werhki ujchiś źoñćha!

⁹Xalla ni Simunaki niźaśa nïź maśinakami tsukhchitaćha ni taź ch'iś tanźku.

¹⁰Niźaśa ni Santiaguźtan Juanźtan Zebedeoź machhnakataćha ninakaki Simunź maśinakataćha. Jesusaki Simunźkiś khichićha: — Ana eqhsna; teqhśtantikchuk źoñi tanñim khekićha.

¹¹Neqhśtan ni walsanaka yoqkin chhichchićha niźaśa thappacha ekku Jesusiźtan oqhchićha.

¹²Tshi nöxiki Jesusaź tshi wathkiś źelan, Jesusiźkiś thonchićha tshi moqhchi xañchichiś läkhichi źoñi; Jesusa cherźku yoqkiś pukt'ichićha xalla neqhśtan Jesusiźkiś rokt'ichićha: — Tata, amki pekćhax nïki atasaćha weth konkiśtan źhujźinalla.

¹³Jesusaki ni źoñi qharźtan lanśićha, tuź khikan: — Pekućha. ¡Xaśiki źhujtamćha! Ni orpacha ni lä źoñźkiśtan ni moqhś konaki saraqchićha,

¹⁴Neqhśtan Jesusaki ni źoñi kuchanchićha: — Ana jëkhźkiśimi maśnakićha; timlu jilirźkinqaś thëźka niźaśa am ćhhetintikiśtan ofrenda chhichku oqa Moisés chïtakama pä, ni timlu jilirinaka śiśaxu.

¹⁵Xalla neqhśtan Jesusiź pätanaka tshallanti śiśta khissićha, niźaśa thapa źoñinakaki akhsnatćha nïź taqu nonśxapa niźaśa ninakź konkiśtan ćhhetinta khiśxapa.

¹⁶Xalla ni Jesusaki ch'eqti yoqa mayiśiśxapa saraqñitaćha.

¹⁷Tshi nöx Jesusaki thaxnatćha, xalla ni Jesusaź thaxnan tshi qhaź fariseonakaki niran julśitaqalćha niźaśa judiu lï utt'ayñinakami, niźaśa thapa ni Galilea xochirantan niźaśa Judea yoqkiśtan niźaśa Jerusalén watkiśtan thonqalćha. Niźaśa ni Yöś aśiki Jesusiźkiśtaćha neqhśtan ni länaka ćhhetinchićha.

¹⁸Neqhśtan tshi qhaź źoñinakaki tshi śuch źoñi śhikchićha pirsatkiś kallchi. Neqhśtan ninakaki ni qhuykiś makhś pekatćha niźaśa Jesusiź tukkiś nonś pekatćha,

¹⁹tama źoñinakaź khen ana xaqhsikiśtanami maki atchićha; neqhśtan qhuya yawźku tsewktan ni qhuchśtan qhuyta qhuya axźku ni phetkiśtan ni śuch źoñi śhujunchićha tshi pirsatkiś tama źoñinakź taypikiś Jesusiź tukkiś.

²⁰Neqhśtan Jesusaki ninaka thapa quśśiś nayźku, ni lä źoñźkiś khichićha: — Jila, am ujnakaki pertuntaź khekićha.

²¹Neqhśtan ni judiu lï utt'ayñinakźtan fariseonakźtan pinsi qallantichićha: “¿Jëkh pan ti źoñixo niźta Yöś ana eqhsku ar arxo? Yöśpanqaś ujnakaki pertunasaćha.”

²²Neqhśtan Jesusaki ninakaź pinsita näśićha, niźaśa ninakźkiś pewkśićha: — ¿Qhaźtikiśtan anćhuk niźta pinsexo?

²³¿Ćhhulut tshan phaśila chïś khesaxo: ‘Am ujnakaki pertuntaćha khikan’, uśh tuź chiyasax ‘źäźku niźaśa oqa’?

²⁴Niźaśa werhki anćhukakiś thëźnaćha ni źoñź Matiki ti yoqkiś jilirićha niźaśa źoñinakź ujnakkiśtan pertunśxapami: Neqhśtan ni śuch źoñźkiś khichićha: — Amkiś chiyućha, źäźna am pirsata waytiźku am qhuya oqa.

²⁵Ni orapacha ni śuch źoñiki tshitsićha thappacha ni źoñinakaź cheran, nïź aphźta pirsata tanźku Yöś thü aynaqkan nïź qhuya oqhchićha.

²⁶Thappacha ni źoñinakaki iśpantichićha niźaśa Yöś thü aynaqi qallantichićha niźaśa añcha eqhskan khichićha: — Ućhumnakki töx thuñiki añcha k'achha cherchinćhumćha.

²⁷Xalla neqhśtan Jesusaki ulanźku cherśićha ni Romźta taśa mayñi. Nïki Leví khitataćha, taśa mayś julśkiś julśi źelatćha. Jesusaki nïźkiś khichićha: — Werh apźka.

²⁸Neqhśtan Leviki tshitsićha taśa mayś lanqś apatatźku, Jesusiźtan chika oqhchićha.

²⁹Neqhśtan Jesusiźtan phiśta päśxapa, Leviki perśun qhuykiś śuma ćhheri thakśićha. Ćhheri lulhkan Jesusaki taśa mayñinakźtan niźaśa yaqha ujchiś źoñinakźtan chika julśi źelatćha.

³⁰Xalla ni cherźku, fariseo źoñinaka niźaśa judiu lï utt'ayñi źoñinakźtan, xalla tinakaki Jesusiź thaxintanakźkiś chuchi qallantichićha, tuź khikan: — ¿Anćhuk qhaźtikiśtan ni taśa mayñinakźtan niźaśa ni ujchiś źoñinakźtanami ćhheri lulhxo?

³¹Neqhśtan Jesusaki nuź nonźku ninakźkiś qhäśićha, tuź khikan: — Wiw źoñinakaki qullñi źoñi anaź pekasaćha, ans lä źoñinakaź qullñik pekćha.

³²Werhki ana ni źkayi quśśiś źoñinaka qhawśñi thonchinćha, ans werhki ni ujchiś źoñinaka Yöśkin qhutźnaxu thonchinćha.

³³Ni źoñinakaki Jesusiźkiś khichićha: — Juanź thaxintanakźtan niźaśa fariseonakźtan añcha ayunasñićha niźaśa añcha mayiśiñićha, am thaxintanakaśti tirapan qhaś likhñila niźaśa lulhñipanla.

³⁴Jesusaki ninakźkiś qhäśićha: — ¿Qhaźtikiśtan anćhuk ayunasqatasaxo ni śalśkiś maśinta źoñinaka ni śalśñi źoñi anćhukatan źelanpacha?

³⁵Niźaśa ni thuñiki thonakićha neqhśtan ni śalśñi źoñiki qhañtaź khekićha, ni thuñi irantiźkitan anćhukki ayunaśakićha.

³⁶Nuźuśaqaś ninakźkiś tshi kintuźtan kint'ichićha: — Anaź jëkhmi tshi ew śkitkiśtan murasaćha tshi achś śkitkiś rimintasaćha. Nuź päsaźniki ew śkitiź aqakićha; ni ew śkitkiśtan apaqtaki anaź śuma khesaćha ni achś śkitkiśki.

³⁷Niźaśa anaź jëkhmi tshi achś śqiś kewkiś ew winu alźnasaćha; ni ew winuki ni achś śqiś kewiź xwarźnasaćha, neqhśtanaki śqiś kewimi ni winumi apt'akićha.

³⁸Xalla niźtikiśtan ew śqiś kewkiśpanź ni ew winuki alśtanćha.

³⁹Niźaśa ni t'amchi winźtan śiśśiki anaź ew winu pekasaćha, ans khekićha: ‘Ni t'amchi winuź khjusaki.’