Read Chipaya LUCAS 8 Bible Online

LUCAS 8 - Chipaya bible

LUCAS 8

¹Neqhśtan wiruñ Jesusaki wakchi watharan niźaśa xochiran oqhlaychićha, Yöś śuma kintu maśmaśkan niźaśa Yöś irpiś wathkiśtan parlikan, niźaśa nïź qhalu piśkchiś apuśtulanakaki nïź qhutźnatćha,

²niźaśa tshi qhaźultan mätaqanaka źelatćha nïź ñexw yenqhinakźkiśtan niźaśa konkiśtan ćhhetintanaka. Ninakźkiśtan Mariy oqatćha näki Magdalen khititaćha, täkiśtan towqu anaśum yenqhanakaz ulantqalćha;

³niźaśa Juaniki Cuza khita źoñź thuntaćha, nïki ni Herodeskiś t'oquñi yanapñitaćha; niźaśa Susani, niźaśa tshi qhaźultan mätaqanakaki ninakź źelinśallźtan Jesusa yanapñitaćha.

⁴Neqhśtan thapa watha nakźkiśtan Jesusa cheri thonchićha, niźaśa tama źoñinaka akhskichiź khen, neqhśtan Jesusaki ti kintu kint'ichićha:

⁵“Tshi śqala ćhhakhñi źoñiki nïź muju ćhhaki thonchićha, niźaśa ćhhakhkanaki tshi qhaź mujuki jikhśkiś thxotsićha, niźaśa ni mujuki thekantaćha neqhśtan weźlanakaź ni lulhchiki.

⁶Tshi qhaźu mujunakaśti źhaxw yoqaran thxotsićha; neqhśtan ni mujuki śarchićha niźaśa awi ana źelan qhonchićha.

⁷Niźaśa tshi qhaźu mujunakaśti ch'ap yoqaran thxotsićha; niźaśa ch'apźtan ch'ali jekźkichićha, neqhśtan ni ch'apinakaki uphsqatchićha.

⁸Xalla neqhśtan tshi qhaźu mujunakaki śuma yoqkiś thxotsićha; niźaśa paqźku śuma ćhheri poqchićha, tshi mujkiśtan tshiwatha ćhheri. Jesusaki xalla ti khichićha niźaśa wilta thapa aśtan chïchićha: “¡Khunchiśnakakix nonźla!”

⁹Neqhśtan nïź thaxintanakaki Jesusiźkiś pewkśićha, tuź khikan; ni śqal kintu qhaźt khixo.

¹⁰Jesusaki qhäśićha: “Anćhukakiś Yöś irpiś watha paxqatćha, ni yaqha źoñinakźkiśti ni kintukiśtanqaś chiyućha, ninakaki cherkanpachami ana cherchiźtaqaś khekićha, niźaśa nonźkumi ana nonśiźtaqaś khekićha.

¹¹“Xalla tuź khićha ni kintuki: Ni mujuki Yöś taqućha;

¹²xalla ni jikhśkiś thxotsi mujunakaki Yöś śuma kintu nonśñi irataćha, xalla neqhśtan Saxraki thonźku ninakź quśkiśtan qhañćha niźaśa ana kaśaxu niźaśa ana liwrïta khexu.

¹³Xalla ni maśkiś thxotsi mujunakaki, Yöś taquź tanźa niźaśa nonźa śuma quśtan xalla niźta irataćha ni źoñinakaki, xalla ninakaki ana qos śep'ichiśtaqaśśa; tshi upakamallaqaś kaśśa xalla ni llakiź thonanaki kephsa.

¹⁴Xalla ni ch'apiran thxotsi mujunakaki ni Yöś śuma kintu nonśñi irataćha, xalla neqhśtan śumat śumat perśun ćhhultaqinakkiśqaś quś thäćha, niźaśa ni źelinchiś khiś pekćha, niźaśa ti yoq śuma qamañanakaqaś pekćha, niźtikiśtan anaź ćhherćha.

¹⁵Xalla ni śuma yoqkiś ćhhakta mujunakaki, śuma quśśiś źoñinakaćha, niźaśa iyawpacha kaśñićha Yöś śuma kintu nonśxapa, niźaśa thurt'ichipanź qamćha neqhśtan śuma panź poqćha.

¹⁶“Anaź jëkhmi michaki thëśnasaćha ćhhulźtan meqaś wëśxapaki, niźaśa aphś qostan nonśxapami, ananax micha nonśkiśpanź nonśa ni luśhkiñi źoñinaka qhana cheraxu.

¹⁷Nuźuśaqaś anaź ćhhulu śhoxźtaki źelhćha, śhoxtanakaki wathźtapanqaś khekićha, niźaśa anaź ana śiśtanakaki źelhćha ni ana śiśtanakaki śiśtaqaś khekićha.

¹⁸“Xaśiki śumpacha nonźna, Jëkhź lax źelinchiś nïźkiś tshallanti thätaź khekićha; ni ana ćhhulchiśki, nïź qoluk źelinś pektallami qhañtaź khekićha.”

¹⁹Neqhśtan Jesusiź mäki nïźkin nïź laqhnakźtan thonchinćha, niźaśa añcha tama źoñiź khen ana makhati atchinćha.

²⁰Tshi suñaki Jesusiźkiś maśśićha: — Am mäki am laqhnakźtan ti śanku źelhćha, niźaśa am cherśpekćha.

²¹Jesusaki qhäśićha: — Yöś śuma kintu nonśñi źoñinaka niźaśa ni Yöś śuma kintu xaru qamñinaka, xalla nïćha weth mäki niźaśa weth laqhnakami.

²²Tshi nöx Jesusaki nïź thaxintanakźtan walsikiś luśhśićha, neqhśtan ninakźkiś khichićha: — Ućhumnakki ti qotź nawkhtuñtanź oqhla. Neqhśtan ninakaki saraqchićha,

²³neqhśtan ni qota qaqan Jesusaki thxaxchićha. Xalla nuź ni qotkiś qaqan, ni qotkiśiki añcha aśśiś thami thonchićha, niźaśa ni walsaki qhaś śhipsñi qallantichićha neqhśtan qhaśkiś qatśmayataćha ninakaki.

²⁴Neqhśtan ninakaki Jesusa źini oqhchićha, tuź khikan: — ¡Thaxiñi! ¡Thaxiñi! ¡Ućhumnakki qhaśkiś qatśmayaćha! Neqhśtan Jesusaki źäźku ni thamźkiś niźaśa ni qhaś lhxoqźkiź ujśićha, neqhśtan thappacha tshorhchićha niźaśa ch'ujpachataćha.

²⁵Xalla neqhśtan Jesusaki nïź thaxintanakaźkiś khichićha: — ¿Anćhuka quś qhaź khissita? Xalla ninakaki tsukhchi iśpantichi, ninakpora pewksasatćha: — ¿Jëkhpan tïxo, niźaśa ni thamimi qhaś lhxoqimiź ujźa niźaśa ninakaki tïź kaśśa?

²⁶Niźtami ninakaki, Gerasa khita yoqa qotź nawkhtuñtan Galilea wathź tukkin irantichićha.

²⁷Neqhśtan Jesusaź yokkiś śhujźtan tshi saxraź tanta źoñi, ni wathkiśtan ulanźkichićha, neqhśtan Jesusiźkiś makhatźkichićha. Xalla ni źoñiki tukitanpacha ana śkiti kuthñitaćha niźaśa ana perśun qhuykiś qamñitaćha kampasantukiśqaś qamñitaćha.

²⁸Jesusa cherźku, ni źoñiki nïź tukkiś qhawkan killśipacha thxotsićha: — ¡Jesusa ana wethkiś mitiśa, tsewkta pach Yöś Mati! ¡Amkiś rokt'ućha ana werh llaki thälla!

²⁹Jesusaki nïź quśkiś khitqalćha, niźaśa ni źoñźkiśtan ni yenqha ulnaxu kuchantqalćha. Niźaśa qhaź wilta ni źoñi tantqalćha ni anaśum yenqhaki; neqhśtan ni źoñinakaki qhaźwilta ni Saxraź tanta źoñi tanźku nïź thaxintami jir karinźtan ćhelhqalćha ana atipsqatśxapa, ni źoñiki qhoqśñipanqaśtaćha niźaśa ni anaśum yenqhaki ni źoñi ch'eqti yoqkinpan chhichñitaćha.

³⁰Neqhśtan Jesusaki ni źoñi pewkśićha: — ¿Ćhhul thüchiśśam amxo? Niźaśa nïki qhäśićha: — Weth thüki tama khitaćha. Tama ni źoñźkiś luśhñiź khen, xalla nuź khichićha ni anaśum yenqhanakaki,

³¹Ni anaśum yenqhanakaki Jesusiźkiś rokt'ichićha ana ni tuj phetqhutñi kuchśnaxu.

³²Xalla ni yoqkiś tama kuchinaka kurkiś lulhkan źelatćha; ni yenqhanakaki Jesusiźkiś rokt'ichićha ni kuchinakźkiś luśhqataxu, neqhśtan Jesusaki amtaqaśśa khichićha.

³³Neqhśtan ni anaśum yenqhanakaki ni źoñźkiśtan ulanchićha, neqhśtan ni kuchinakźkiś luśhśićha, neqhśtan ni kuchinakaki qotqhutñi aqharanqhutñipacha śhukhuntichićha, xalla nikhu thxotsku tikhśićha.

³⁴Ni kuchi ichñi awatirinakaki niźta watchi cherźku, tsukaña śathchićha ni wathkiś źelhñi źoñinakźkin maś maśñi, niźaśa xochuñ źelhñi źoñinakźkin maś maśñi.

³⁵Ni źoñinakaki ni watchi cheri ulanźkichićha, neqhśtan xaqhsikintaźlax Jesusa xalla nikhu irantiźkichićha, ni anaśum yenqhanakaki ni źoñźkiśtan ulanqalćha, ni źoñiki Jesusiź qhxochkiś julśi źelatćha niźaśa śkitimi śuma kuthchi; neqhśtan ni źoñinakaki añcha eqhsićha.

³⁶Niźaśa ni ćhhetiñi cherchi źoñinakaki, ni anaśum yenqhaź tanta źoñi xaqhnuź ćhhetintataźlaxa xalla ni kint'ichićha.

³⁷Neqhśtan thappacha ni Gadara khita yoqchiś źoñinakaki, Jesusa rokt'i qallantichićha ni yoqkiśtan Jesusa oqaxu, ni źoñinakaki añchaź eqhsnatćha. Neqhśtan Jesusaki walsikiś luśhku oqhchićha.

³⁸Ni anaśum yenqhanaka chhetqatźinta źoñiki, Jesusiźkiś rokt'ichićha nïźtan chika chhichaxu, xalla neqhśtan Jesusaki ana munchićha eklax khichićha, tuź khikan:

³⁹— Am qhuya oqa, niźaśa thappacha kint'iźta xaqhnuź Yöś amtan pächiźlax xalla ninaka. Neqhśtan ni źoñiki oqhchićha xalla niźaśa kint'ichićha thappacha ni watharan ni Jesusa nïźkiś pätanaka.

⁴⁰Xalla neqhśtan Jesusa qotź nawkhtuñtan kephtan, ni źoñinakaki añcha chipa Jesusa tanśićha niźaśa thappacha ninakaki thewźnatćha.

⁴¹Neqhśtan tshi Jairo khita źoñi thonchićha, ni Jairuki ni akhs qhuy chawkh jiliritaćha. Ti źoñiki Jesusiź qhxoch tukkiś killśku rokt'ichićha nïź qhuykin thonźkaxu,

⁴²ni Jairuki śinta matallchiśtaćha näki tshi qhalu piśkchiś watchiśtaćha, näki uśhki tikhśmaya läkhichintaćha. Jesusiź Jairuźtan oqan tama źoñinaka añcha ts'akaskan apźnatćha.

⁴³Ni źoñinakźkiśtan tsha lä źon oqatćha, na źonki qhalu piśkchiś wata lhokh thawqs konkiś lä źelatćha, niźaśa ni qullñinakźkiś thappacha t'upśinćha näźa źelinśnaka niźaśa ana ninakaki na źon ćhhetni atchićha.

⁴⁴Na źonki Jesusiź wirqhuttan makhatchinćha niźaśa nïź irś atalla lanśinćha, ni orapacha ni lhokh thawsñiki ćhawqchićha.

⁴⁵Neqhśtan Jesusaki pewkśićha: — ¿Jëkhpan werh lanźkichexo? Thappacha ninakaki ana maśatćha, neqhśtan Piruki khichićha: — Thaxiñi, ti źoñinakaki thapaqhuttan am tewkźkila niźaśa tarhsla. Niźaśa amki pewkźa: ‘¿Jëkh pan werh lanśexo?’ Khićha.

⁴⁶Xalla neqhśtan Jesusaki ana quś nonchićha: — Tshïsuña werh lanśićha, werhki naychinćha wethkiśtan weth aśi ulanñi.

⁴⁷Neqhśtan na źonki Jesusa cherźku ana śhoxśñi atchinćha, neqhśtan kharkatkan Jesusiź qhxochkiś killśinćha, thappacha ni źoñinakź tukkiś maśśinćha qhaźtikiśtan nuź lanśintaźlax, neqhśtan ni orapacha źethqalćha.

⁴⁸Jesusaki näkiś khichićha: — Kullaka, am Yöśkin thapa quśśiś khen ćhhetintamćha. Xaśiki thilhapacha oqa.

⁴⁹Jesusaź na źonakź chiyan tshi źoñiki thonchićha, ni źoñiki ni akhs qhuy chawkh jilirkiś khichićha. — Am uśhki tikhśinćha, ana iya ti Thaxiñiźtan parla.

⁵⁰Neqhśtan Jesusaki ni chïñi nonźku Jairuźkiś khichićha: — Ana amki eqhsna niźaśa Yöśkin thapa quśśiś khe, neqhśtan am uśhki źethchi khekićha.

⁵¹Neqhśtan Jairuź qhuya irantiźku, Jesusaki ana jëkhmi qhuykiś luśhqatchićha, Piruźtan, Jacobuźtan, Juanźtan, na uśha mä ephźtan xalla ninaka alaxaqaś luśhqatchićha.

⁵²Thappacha ni źoñinakaki na uśhakiśtan irakipskan qätćha, neqhśtan Jesusaki ninakźkiś khichićha: — Anaź qä, ta uśhki anaćha tikhśiñ, ans ta uśhkil thxaxćha.

⁵³Thappacha ni źoñinkaki Jesusa thassićha, ninakaki na uśh tikhśi śiśatćha.

⁵⁴Neqhśtan Jesusaki na uśha qhara tanźinźku, phurhpacha chïchićha tuź khikan: — ¡Uśhalli, źäźna!

⁵⁵Neqhśtan na uśhki jakatatchinćha; niźaśa ni orapacha źäśinćha, neqhśtan Jesusaki ćhheri thäźnax khichićha.

⁵⁶Neqhśtan na uśha mä ephki añcha iśpantichitaćha; neqhśtan Jesusaki iwxt'ichićha ti wattanaka ana jëkhźkiśimi kint'axu.