Read Chipaya LUCAS 9 Bible Online

LUCAS 9 - Chipaya bible

LUCAS 9

¹Jesusaki nïź qhalu piśkchiś thaxintanaka akhśićha, neqhśtan ninakźkiś aśi niźaśa jiliri thächićha ni thapaman anaśum yenqhanaka chhetqataxu, niźaśa lä źoñinaka qullśxapa.

²Neqhśtan ninaka kuchanchićha Yöś irpiś watha maśinźkaxu niźaśa lä źoñinaka ćhhetinźkaxu.

³Jesusaki ninakźkiś khichićha: — Anćhukki jikhśxapa anaź ćhhulumi chhichakićha: Ana athsmi, ana źaqkelśmi, ana t'antami, ana päśmi, niźaśa ana turkśiś śkitimi.

⁴Niźaśa anćhukki xaqhsi qhuykiś irantiźkumi xalla ni qhuykiś eklakićha, ni qhuykiśtan oqhśkama.

⁵Yeqhap wathkiś anaź anćhuk tanśpekakiź nïki, ni wathkiśtan ulna niźaśa qhxochkiś skatchi phila tsath tsathsnakićha, xalla ninakźkiś maśta khiśxapa ninakź uj tshi nöx chimpuźtaqaś khekićha.

⁶Neqhśtan ninakaki oqhchićha, niźaśa thapa ni xochinakqhutñi Yöś śuma kintu maś maśkan niźaśa lä źoñinaka ćhhetinkan.

⁷Herodeski paqhpik t'aqtikiś irpiñiki thappacha ni Jesusiź päta watñi kintunaka nonśićha; neqhśtan ana xaqhnuź pinsi atatćha, yaqhapanakaki Juanćha jakatatchi khetćha,

⁸Yaqhapanakaśti Elías Yöśkiśtan chïñićha jekźkichiki khetćha, niźaśa yaqhap źoñinakaki yaqhap tukita Yöśkiśtan chïñinakźkiśtan jakatatchila khetćha.

⁹Niźaśa ni Herodeski khichićha: — Werh pachaćha kuchanchinki Juanź acha potźkaxu. ¿Jëkhpan ti khesaxo, jëkhźkiśtan añcha ćhhultaqi kint'itanaka nonźnoxo? Xalla neqhśtan Herodeski Jesusa cherśpan pekatćha.

¹⁰Jesusiź thaxintanakaki kuttiźku Jesusiźkiś lijw kint'ichićha ninakaź pätanaka. Neqhśtan Jesusaki yaqha ch'eqti yoqa ninaka chhichku Betsaida khita wath źkati oqhchićha.

¹¹Neqhśtan ni źoñinakaki Jesusa oqhchi śiśku nïź wirkiś saraqchićha. Jesusaki ninaka tanśićha niźaśa Yöś irpiś wathkiśtan chïźinchićha, niźaśa lä źoñinaka ćhhetinchićha.

¹²Maxña qaq ora khistan, Jesusiźkiś nïź qhalu piśkchiś thaxintanakaki makhatźkichićha neqhśtan nïźkiś khichićha: — Ti źoñinaka kuchśna, jejśñi oqaxu niźaśa luli qhurźkaxu ni xochqhutñi niźaśa ni keźu ćhhakhś yoq qhutñi, ti yoqkiśiki anaź ćhhulumi źelhćha.

¹³Jesusaki ninakźkiś khichićha: — Anćhuk luli thälla. Ninakaki qhäśićha: — Anaź wethnakaltaki chamchilla źelhćha, taxśnuku t'anta niźaśa piśk ch'iśllaqaś źelhćha, kunamim am pinsićhani werhnak qhayi oqaxu thapa ti tama źoñinakźta.

¹⁴Xalla ni źoñinakaki tshi taxśnukuqhalu watha luktaqanakataćha. Xalla neqhśtan Jesusaki khichićha nïź thaxintanakaźkiś: — Ni źoñinaka t'aqa t'aqa taxśnukuqhalukiśtan taxśnukuqhalu julsqata.

¹⁵Ninakaki kaśśićha niźaśa thappacha ni źoñinaka julsqatchićha.

¹⁶Neqhśtan Jesusaki ni taxśnuku t'anta niźaśa piśk ch'iś nïź qharkiś tanźku, tsewchuk cherźku Yöśkin sparakiź khichićha, neqhśtan ćh'alhźku nïź thaxintanakaźkiś thächićha ni źoñinakźkiś toxźinaxu.

¹⁷Neqhśtan thappacha ni źoñinakaki chheqañkama lulhchićha, neqhśtan ni źethchinaka qhalu piśkchiś kanaśta aptaśśićha.

¹⁸Tshi nöxi Jesusaki śinalla Yöśkin mayiśatćha, xalla nïź thaxintanakaki nïźtan chikapachataćha. Neqhśtan nïź thaxintanakaźkiś pewkśićha: — ¿Ti źoñinaka wethkiśtan qhaźt khixo?

¹⁹Ninakaki qhäśićha: — Yaqhap źoñinakaki Juan Wawtistaćha khićha, yaqhapaśti Eliassa khićha, niźaśa yaqhapanakaki yaqha tukita Yöśkiśtan chïñiźl jakatatchini khićha.

²⁰— Neqhśtan Jesusaki ninakźkiś pewkśićha. Niźaśa anćhukśti, ¿jëkhćha werh khexo? Neqhśtan Piruki qhäśićha: — Amki Mesías Yöś kuchanźkitamćha.

²¹Xalla ni Jesusaki ninakźkiś śumpacha chïchićha ana ti jëkhźkiśimi chiyaxu.

²²Neqhśtan Jesusaki ninakźkiś khichićha: — Ni źoñź Matiki añchaź t'aqhiśakićha, niźaśa ćhhaxwtaź khekićha, ni wath qamchi ephnakźkiś, timlu jilirinakźkiś, judiu lï utt'ayñinakźkiśimi, neqhśtan kontaśaqaś khekićha, neqhśtan chheph maxkiśtan jakatatakićha.

²³Wiruñ thapatiźkiś khichićha: — Xaqhsilta źoñit weth thaxinta khiśpekćhax nïki, nïź perśun qamaña thatśtanćha, neqhśtan śapuru perśun kuruśha quźna niźaśa werh apźka.

²⁴Thapa perśun qamaña liwrïś pekñiki apt'akićha; niźaśa weriź khen thappacha nïź qamaña apt'iñiki, xalla tïki liwrïtaź khekićha.

²⁵¿Źoñinakźtaki inapanqaś ti yoqa qhutupacha kantami khesaćha, niźaśa perśunpacha apt'akićha ni źoñipachaź qatakićha?

²⁶Niźaśa xaqhsilta źoñit wethkiśtan aśaćhaxa niźaśa weth tawqkiśtan, niźtaśaqaś źoñź Matiki ni źoñi nakźkiśtan aśakićha, ćhhul orat nïź aśtan thonaćhaxa niźaśa nïź ephź aśtan niźaśa nïź źkay quśśiś anjilanakźtanami.

²⁷Cheqpachal chiyućha tshi qhaźultan teqhś źelhñi źoñinakźkiśtan anaź tikhźnakićha, ima Yöś irpiś watha cherkanaki.

²⁸Ni qaśku tshi towqu thuñkiśtan, Jesusaki mayiśiśxapa tshi kuru yawchićha Piruźtan, Santiaguźtan, Juanźtan qhutźta.

²⁹Xalla nuź mayiśan Jesusiź chercheriki kephsićha, niźaśa nïź śkitiki chiw lexu khissićha añcha llijñi;

³⁰neqhśtan pukultan źoñinaka Jesusiźtan parlikan thensićha. Tinakaki Moisestan Elías tantaćha,

³¹ninakaki tshi añcha k'achha qhankiśtaćha, niźaśa ninakaki Jesusa xaqnuźt tikhźnaćhaxa ni Jerusalén wathkiś nïź palt'atćha, niźaśa nïź jakatatśkiśtan niźaśa tsewkta pacha oqhśkiśtan.

³²Neqhśtan Piruki nïź maśinakźtan añchaź thxaxi pasnatćha, xalla niźtami źelhchićha ana thxaxźku, niźaśa Jesusiź qhana cherchićha ni pukultan źoñinaka nïźtan chikapacha.

³³Neqhśtan Jesusiźkiśtan ni pukultan źoñinaka wax oqhśmayaź khen, Piruki khichićha: — Thaxiñi, ¡añcha walićha ućhumnakki teqśiki! Chheph śhujllaź qhuyśla ućhumnakalta: Tshïki amta, tshïki Moisesta niźaśa tshïki Eliasta. Xalla ni Piruki ana śiśatćha ćhhuluqat chiyatćhani.

³⁴Xalla nuź Piruź chiyan ninakźkiś tshiriki śhujźkichićha, ni tshir taypikiś khisku ninakaki eqhsnatćha.

³⁵Neqhśtan ni tshirkiśtan tshi xora chïźkichićha, tuź khikan: “Tïćha weth q'ay Machhki, ti illśinpanćha: Anćhukki tïź nonźna.”

³⁶Ni xora nonźnan Jesusaki śinalla eklichićha. Ans ninakaki quśkiś śhoxchićha ninakaź chertanaka, neqhśtanpacha anapan jëkhźkiśmi maśśićha.

³⁷Neqhśtan xaqataźpacha kurkiśtan śhujźkan, tama źoñinaka Jesusa śali oqhchićha.

³⁸Neqhśtan tshi ni źoñinakźkiśtan Jesusiźkiś phurhpacha chïchićha: — Thaxiñi, am rokt'ućha weth śinta machhllaź cherźinźkalla;

³⁹xalla nïki yenqhaź tantaćha, ni yenqhakiź qhawqatćha, t'ukqatćha niźaśa atkiśtan ćh'utu jupoqsqatćha. Neqhśtan śhoxritsa niźaśa anapanź śkitimi kuchś pekćha.

⁴⁰Niźaśa werhki am thaxintanakźkiś rokt'ichinćha ni yenqha chhetqatźinaxu, xalla ninakaki anapan atchićha.

⁴¹Jesusaki qhäśićha: — ¡Ä ana Yöśkin quśśiś źoñi niźaśa q'oturara! ¿Ćhhul orakamat anćhukatan źelaki niźaśa t'aqhiśaki? Am uśha teqhś śhikźkalla.

⁴²Neqhśtan ni uśhaź Jesusiźkin makhatan ni anaśum yenqhaki yoqkiś ni uśha thxotchićha, niźaśa wilta t'ukqatchićha; xalla neqhśtan Jesusaki ni yenqha ujśićha, niźaśa ni uśha ćhhetinźku nïź ephźkiś thächićha.

⁴³Neqhśtan thappacha ni źoñinakaki ni Yöś paqh aśi cherźku iśpantichićha. Neqhśtan ni źoñinaka Jesusiź pätikiśtan muspa chipan, ni Jesusaki nïź thaxintanakaźkiś khichićha:

⁴⁴— Ti śumpacha nonźna niźaśa ana thatźnakićha: Ni źoñź Matiki źoñinakź qharkiś thätaź khekićha.

⁴⁵Xalla ninakaki anaź näśnatćha ni Jesusa chïñi, imaśipan khetźinatćha ninakź näśxapa niźaśa katoqśnakami; niźaśa ninakaki Jesusaź chïta taqu thaxźnaxupan khićhaxa xalla ni pewkś eqhsnatćha.

⁴⁶Neqhśtan Jesusiź thaxintanakaki ninakpora ch'ärasi qallantichićha, ninakźkiśtan jëkhpan irpiñi kheki khikan.

⁴⁷Jesusaki ninaka pinsiñi nayźku näśićha, neqhśtan tshi uśha qhawźku,

⁴⁸ninakźkiś khichićha: — Xaqhsilta źoñit weth thükiś tshi uśha tanźaxa, ni oraki werhź tanźa; xalla ni werh tanśñiki anaź werh alaxalla tanźa, nïki werh kuchanźkiñi śaqaś tanźa. Jëkhźlax thapatiźkiśtan tshan amu, xalla nïćha tshan paqhiki.

⁴⁹Juanki Jesusiźkiś khichićha: — Thaxiñi, werhnakki cherchinćha tshi źoñi am thükiś anaśum yenqhanaka chhetqatñi; niźaśa ana ućhuntan oqhlayñiź khen, werhnakki ana päx khichinćha.

⁵⁰Jesusaki nïźkiś qhäśićha: — Ana niźta pä, xalla ninakaki anaćha ućhunnakatan moq'u, ućhum maśićha.

⁵¹Neqhśtan Jesusiź wax tsewkta pacha yawś thuñi irantiźkan, Jesusaki thapa quśtan oqhchićha Jerusalén watha.

⁵²Niźaśa nïź thaxintanaka nïź tuki kuchanchićha, ni Samaria khita xochkin tshi thxaxś qhuya qhurźkaxu.

⁵³Xalla ni Samaritan źoñinakaki ana qhawś pekchićha, ninaka Jerusalén wathqhutñik watñi naychićha.

⁵⁴Neqhśtan Santiaguźtan Juanźtan ni thaxintanakaki xalla ni śiśku Jesusiźkiś khichićha: — Yöś tata, ¿am munqay werhnak tsewkta pachkiśtan uj śhujqatñi Elías taqaś, niźaśa ninaka ujkiś xapaxu?

⁵⁵Neqhśtan Jesusaki ninakź qhutñi qhutźku ujśićha, tuź khikan: “Anćhukki anaź śiśśa ćhhul Espirituźkiśtanqaź thonćhani. Niźaśa źoñź Matiki anaćha źoñinakź źeti thatni thonchiki, źoñź Matiki liwrï thonchićha.”

⁵⁶Neqhśtan ninakaki yaqha qolta watha oqhchićha.

⁵⁷Neqhśtan ninankaź jikhśkiś oqhkan tshi źoñiki Jesusiźkiś khichićha: — Tata, amiź xaqhsi oqanami ampanl apźnaćha.

⁵⁸Jesusaki nïźkiś qhäśićha: — Ni qitinakami qarchiśśa niźaśa ni weźlanakami thurchiśśa; xalla ni źoñź Matiśti ana xaqhsiranmi acha nonśllami źelhćha.

⁵⁹Neqhśtan Jesusaki yaqha źoñźkiś khichićha: — Werh apźka. Xalla nïki qhäśićha: — Yöś tata, werh anś weth eph thati oqhqatalla.

⁶⁰Jesusaki nïźkiś qhäśićha: — Ana oqa, ni tikhśi źoñinakaqaś ni tikhśinakaki thatla; amki ni Yöś irpiś watha maś maśka.

⁶¹Neqhśtan yaqha źoñiki Jesusiźkiś khichiśaqaśśa: — Yöś tata, werhki am apś pekućha, werh anś oqhqatalla weth qhuy źoñinakźtan jalhtiśxapa palt'i.

⁶²Jesusaki nïźkiś qhäśićha: — Jëkit qharźtan ni qhullś tanźaxa, niźaśa tira wirqhutñi cheqźaxa, xalla nïki anaź wakiśićha Yöś irpiś wathkiśiki.