Read Chipaya JUAN 13 Bible Online

JUAN 13 - Chipaya bible

JUAN 13

¹Ima Paśku phiśta irantiźkan Jesusaki ti yoqa ekku nïź Ephźtan akhs thuñi irantiźkichi śiśśićha. Niźaśa nïki ti yoq źoñinaka nïźkiś kirïchinaka oqśipanćha, niźaśa tukuśinskama oqśipanćha.

²Niźaśa Simunź machh Judas Iscariotź quśkiś Saxraki luśhśitaćha,

³Niźaśa Jesusaki Yöśkiśtan thonñi śiśatćha niźaśa nïź Yöś Ephźkin kephśmi,

⁴niźaśa ni ćhheri lulhśkiśtan tshitsku nïź irś śhoqźku, tshi źhujś pañu aptiźku killśićha.

⁵Neqhśtan Jesusaki qhaś tshi puriñkiś alźku nïź thaxintanakź qhxocha axwźiñi qallantichićha, niźaśa nïź tshästa źhujś pañźtan źhujźinchićha.

⁶Ni Simón Piruki nïź qhxocha axwźinak khen, nïki Jesusiźkiś khichićha: — Tata, ¿amki weth qhxocham axwźinakiya?

⁷Jesusaki nïźkiś qhäśićha: — Añś ti weriź pätaki anam näśa, xalla neqhśtanam amki näśnakićha.

⁸Neqhśtan Piruki Jesusiźkiś khichićha: — ¡Anapan amkiś weth qhxocha axwsqatasaćha! Jesusaki qhäśićha: — Werhki anal am qhxocha axwźinasaź nïki, amki anam wethkiś wakiśiñi khekićha.

⁹Neqhśtan Simón Piruki Jesusiźkiś khichićha: — ¡Tata, niźtaki anaź weth qhxochaqaś axwźinalla, niźaśa weth qharanakami niźaśa weth achamiź axwźinalla!

¹⁰Xalla neqhśtan Jesusaki nïźkiś qhäśićha: — Ni uśhka axunchiki anaź wilta axunś wakiśićha nïź qhxochaqaśśa axunchukaki, niźaśa nïki thappacha źkayićha. Niźaśa anćhukki źkayićha, qhaźta ana thappachami.

¹¹Jesusaki khichićha: “Anćhukki anaź thappacha źkayikama”, niźaśa Jesusaki śiśatćha jëkit ni millk'untaćhaxa.

¹²Neqhśtan Jesusaki ninakź qhxochanaka axwźiñi źerźku, nïź irś irźku miśkiś julśićha, neqhśtan ninakźkiś khichićha: — ¿Anćhukki ti weriź pätaź näśqaya?

¹³Niźaśa anćhukki wethkiś thaxiñi khinćhukćha niźaśa wethkiś Tata khinćhukćha, werhpanśaćha anćhukki waliqaź chïćha.

¹⁴Niźaśa werh Thaxiñi Tatki, anćhuka qhxocha axwźinchinćha, anćhukki niźtaśaqaś anćhukpora anćhuka qhxocha axwźinastanćha.

¹⁵Niźaśa werhki anćhukakiś thëśinćha, anćhuk weriź päta irata päxu.

¹⁶Niźaśa cheqpachal khiwćha ana xaqhsilta uywitami nïź tuyñuźkiśtan tshanti khesaćha, niźaśa anaź xaqhsilta kuchanźkitami nïź kuchanźkiñiźkiśtan tshanti khesaćha.

¹⁷Niźaśa ti ćhhultaqinakaź anćhuk katoqakiź nïki, anćhukki añcha waliź khekićha.

¹⁸“Werhki anal thappacha anćhukakiśtan chiyućha; niźaśa weril ni weriź illśta źoñinaka śiśućha. Niźaśa ni khjirtaki watśtanpanćha: ‘Niźaśa ni wethtan chika lulhñiki, wethtan moq'u khissićha.’

¹⁹Niźaśa añśtan chiyućha ima tinaka watan, niźaśa ninakaź watan anćhukki werh kiriyakićha.

²⁰Niźaśa cheqpachal khiwćha xalla ni weriź kuchanźkita tanśñiki, werhśaqaś tanźa; niźaśa ni werh tanśñiki, niźtaśaqaś ni werh kuchanźkiñi tanźa.”

²¹Xalla nuź chïźku Jesusaki añcha upaquśhśi khissićha, neqhśtan qhanakama tuź khichićha: — Werhki cheqpachal khiwćha anćhukakiśtan tshïsuña werh millk'untakićha.

²²Neqhśtan ni thaxintanakaki porapat chersasatćha, niźaśa ana jëkhźkiśtan chïñi śiśku.

²³Niźaśa ni Jesusiź q'ay thaxintaki nïźtan chika julśi lulatćha.

²⁴Neqhśtan ni Simón Piruki, ni qhara qhxochkiś ch'ikśićha Jesusiźkiś pewkźnaxu jëkhźkiśtan chïćhaxa.

²⁵Neqhśtan ni źoñiki Jesusiźkiś tshan makatźku pewkśićha: — Tata, ¿jëkhpan am millk'untakexo?

²⁶Jesusaki nïźkiś qhäśićha: — Werhki t'anta ćhher chuwkiś t'awźkul thäćha, niźaśa jëkhźkiśqat thäćhani xalla nïź nïki khekićha. Neqhśtan ni orapacha Jesusaki t'anta t'awźku ni Judas Simón Iscariotź machhkiś thächićha.

²⁷Neqhśtan ni Judas t'anta tanźtikiśtan, ni Saxraki ni orapacha nïź quśkiś luśhśićha. Neqhśtan Jesusaki nïźkiś khichićha: — Judas ni am amtaki apura pälla.

²⁸Niźaśa neqhś źelhñi źoñinakaki, ni Jesusa ćhhulkiśtanqat chiyatćhani xalla ni ana xaqhsiltami näśićha.

²⁹Niźaśa ni Judas ni päś kelś śhoxñiź khen, yaqhapanakaki pinsichićha ni Jesusa phiśtixapa qhayźkaxu kuchanćhani neqhśtan ni t'aqhir źoñinakźkiś tshi qhaźtallami onanśxapa.

³⁰Neqhśtan ni Judaski ni t'anta tanźku ni orapacha ulanchićha, ni oraki wëntaćha.

³¹Neqhśtan ni Judas ulantikiśtan Jesusaki khichićha: — Xaśiki ni źoñź Matź aśi thëźtaź khekićha, niźaśa ni Yöś aśi nïźkiś thëźta khekićha.

³²Niźaśa ni źoñź Matiki ni Yöś aśiź thëźa, niźtaśaqaś Yöśki nïź aśi thëźnakićha, xalla nïki waxillaź khekićha.

³³Weriź pekta matinaka, werhki anćhukatan anal añcha aźqa źelaćha. Anćhukki werh qhurakićha, xalla ni judiu źoñinakźkiś chïtaśaqal anś anćhukakiś chiyućha: Niźaśa anćhukki xaqhsikin werh oqućhaxa xalla nikhu anaź oqi atasaćha.

³⁴Niźaśa werhki anćhukakiś ti ew lïl thäćha: Niźaśa anćhuk poraź oqsasakićha. Xaqhnuź werh anćhuk oqśinćhalaxa xalla nuźu, nuźuśaqaś anćhukki anćhuk pora oqsastanćha.

³⁵Niźaśa anćhuk poraź oqsasakiź nïki, thappacha ti yoq źoñinakaki weth thaxintanakaźtaqaś paxakićha.

³⁶Neqhśtan Simón Piruki Jesusiźkiś pewkśićha: — Tata, ¿amki xaqhsim oqakixo? — Jesusaki qhäśićha — xaqhsit werh oqućhaxa, xalla nikhu anam werh apśñi atasaćha anśiki; niźaśa amki wiruñam werh apźkakićha.

³⁷Piruki Jesusiźkiś khichićha: — Tata, ¿qhaźtikiśtan werhki ana anś am apśñi atasaxo? ¡Niźaśa werhki am layku weth źetimil thäsaćha!

³⁸Jesusaki nïźkiś qhäśićha: — ¿Cheqpacha amki weth layku am źetim thäsaxo? Werhki cheqpachal amkiś chiyućha, ima wallpaź qhawan amki chhephwiltam werh ana paxñi chiyakićha.