Read Chipaya JUAN 16 Bible Online

JUAN 16 - Chipaya bible

JUAN 16

¹“Anćhukakiś ana aqacha thensnaxu, neqhśtan anćhukakiś ti ćhhultaqinakal chiyućha.

²Niźaśa anćhukki ni akhs qhuykiśtan chhetqattaź khekićha, xalla nuź khenaki ni oraź jak'achkakićha, xaqhsilta źoñit, źoñi konaćhaxa xalla nïki Yöś tukatuźqaś khekićha.

³Niźaśa ni źoñinakaki ana weth Eph paxźku niźaśa ana werh paxźku niźtanaka päkićha.

⁴Neqhśtan anćhukakiś niźtanaka watan anćhukki khuñśnakićha, ni weriź anćhukakiś tukitan chïtanaka.

⁵Niźaśa xaśiki werhki werh kuchanźkiñiźkinl oqaćha, niźaśa xaqhsit werh oqaćhaxa, anćhukakiśtan anaź xaqhsiltami werh pewkźa.

⁶Anchukki weriź tinaka chïtikiśtan llakita khissinćhukćha.

⁷Niźaśa werhki anćhukakiś cheqpachal chiyućha: Anćhukaltaki weth oqhśki waliź khesaćha, niźaśa werh anal oqasaź nïki ni thurt'iźiñiki anćhukakiś anaź thonasaćha; ans werh oqasaź nïki werhki ni thurt'iźiñi kuchanźkasaćha.

⁸Niźaśa ni thurt'iźiñiź thontanaki, xalla nïki ti yoq źoñinakźkiś qhanakamaź thëźnakićha, jëkhźlax ujchiś źoñi niźaśa xaqhnuź ni śoq'u jikhśmi źelhćhaxa, niźaśa ni Yöś juchjiptayśmi.

⁹Niźaśa xaqhsilta źoñiźlax ujchiś nïki, ana wethkiś kirïñićha;

¹⁰neqhśtan anćhukki ni śoq'u jikhśkiśtan näśnakićha, niźaśa werhki xaqhsikin weth Eph źelhćhaxa xalla nikhul oqaćha, neqhśtan anćhukki anaź iya werh cherakićha.

¹¹Niźaśa jëkit ni Yöś kaśtiku tanźnaćhaxa, xalla nïki ti yoqa irpiñićha niźaśa nïki juchjiptaytaćha.

¹²“Niźaśa wethtaki anćhukakiś tshanti chïś źelhćha, niźaśa anśiki anćhukki anaź katoqi atasaćha.

¹³Xalla ni cheqpach Espirituź thontanaki, nïź anćhuk cheqpachkiś irpakićha; xalla nïki anaź perśun quśkiśtan chiyakićha, ans thappacha nïź nonźtanaka chiyakićha niźaśa ni thonñi ćhhultaqinakźkiśtanami śiśqatakićha.

¹⁴Niźaśa nïź weth aśi thëźnakićha, niźaśa nïki wethkiśtanź tanźnakićha neqhśtan anćhukakiś śiśqatakićha.

¹⁵Niźaśa thappacha weth Ephźtaki wethtaśaqaśśa; xalla niźtikiśtan werhki khichinćha ni Espirituki wethkiśtan tanźnakićha neqhśtan anćhukakiś śiśqatakićha.

¹⁶“Tshi jejatan anćhukki anaź iya werh cherakićha, neqhśtan upakiźtan anćhukki wiltaź werh cherakićha.”

¹⁷Neqhśtan nïź thaxintanakaki ninakpora pewksassićha: — Tïki ućhumnakakiś tuź khićha, tshi jejatan anaź iya werh cherakiź khićha, neqhśtan upakiźtan wiltaź werh cherakiź khila, niźaśa weth Ephźkin oqućha khićha. ¿Tïki niwkhtan qhaźt khexo?

¹⁸‘¿Ni jejapacha chïkuśti qhaźt khiy tïxo?’ Ućhumnakki anaź näśa ćhhulkiśtanqat chïćhani.

¹⁹Neqhśtan ninaka ćhhulkiśtanqat pewkś pekatćhani Jesusaki xalla ni näśićha, neqhśtan ninakźkiś khichićha: — Werhki anćhukakiś khichinćha tshi jejapachkiśtan anćhukki anaź iya werh cherakićha, neqhśtan upakiźtan anćhukki wiltaź werh cherakićha. ¿Anćhukki xalla tïź pewksasya?

²⁰Niźaśa anćhukakiś cheqpachal khiwćha, anćhukki qäkićha niźaśa llakitaź khekićha, ans ti yoq źoñinakaki añchaź chipakićha. Niźaśa anćhuk añcha llakita khikanaki, ni anćhuka llakiki chipśkinź kephsnakićha.

²¹Niźaśa tsha mätaq źon mathś orkiśiki añcha xañchi miśqatćha; xalla ni wawaź ulantan añcha chipa ni miśñimiź nonsa, niźaśa ti yoqkiś tshi lukmach wawa mathtaź khen.

²²Niźtaśaqaś anćhukki anś llakiśhićha, niźaśa werhki anćhuk cherśñil kephźkaćha neqhśtan anćhuka quśki añchaź chipakićha, niźaśa ni chipśki anaź jëkhmi qhañasaćha.

²³“Niźaśa anćhukki ni thuñkiś anaź werh pewkźnakićha. Anćhukakiś cheqpachal khiwćha weth thükiś anćhukaź weth Ephźkiśtan maytaki thätaź khekićha.

²⁴Niźaśa anćhukki anśkama anapan weth thükiś ćhhulumi maychinćhukćha; niźaśa anćhukki źmaya neqhśtan tanźnakićha, niźaśa ni anćhuka quś thapa khexo.

²⁵“Werhki anćhukakiś ti näś taqunakźkiśtan chïchïnćha; niźaśa werhki anal iya ti näsqatś taqunakźkiśtan chiyaćha xalla ni orakiź irantiźkićha, ans ni Ephźkiśtan qhanakamal chiyaćha.

²⁶Niźaśa tshi nöxiki anćhukki weth thükiś mayakićha; niźaśa werhki anal anćhukata ni Ephźkin rokt'aćha khiwćha.

²⁷Niźaśa ni Ephpachaź anćhuk pekćha. Niźaśa anćhukaź werh pekan nïki anćhuk pekćha, niźaśa anćhukki werh Yöśkiśtan thonñi kirïchinćhukćha.

²⁸Niźaśa werhki ni Ephź tukkiśtan ulanźkichinćha ti yoq źoñinakźkin, niźaśa xaśiki ni Ephźkin kephśxapa ti yoq źoñinaka ekku.”

²⁹Neqhśtan nïź thaxintanakaki khichićha: — Amki xaśiki qhanakamam chïćha, ana ni näś taqunakźkiśtan.

³⁰Niźaśa xaśiki werhnak näśinćha amki thappacha ćhhultaqinakam śiśśa, niźaśa anam jëkhmi amkiś pewkśñi pekćha. Xalla niźtikiśtan werhnakki Yöśkiśtan am thonchi kiriyućha.

³¹Jesusaki ninakźkiś qhäśićha: — ¿Anćhukki xaśikiź kiriya?

³²Xaśiki ni oraź irantiźkićha, niźaśa anśićha ni oraki, neqhśtan anćhuka quś kamaź lewakićha niźaśa werh śinallaź ekakićha. Ans werhki anaź śina ni Ephki wethtanćha.

³³Niźaśa werhki ti ćhhultaqinaka anćhukakiś chiyućha anćhuk wethtan śuma quś waćhaxu. Niźaśa anćhukki ti yoqkiś t'aqhiśakićha, niźaśa anćhukki thup quśśiś khekićha: Niźaśa werhki ti ujnaka atipchinćha.