Read Chipaya JUAN 17 Bible Online

JUAN 17 - Chipaya bible

JUAN 17

¹Xalla neqhśtan ti ćhhultaqinaka chïźku, Jesusaki tsewkchuk cherźku tuź khichićha: “Tatay, ni oraki irantiźkichićha: Am Machh aśi thëźnalla niźaśa ni am Machhki am aśi thëźnakićha.

²Niźaśa amki ni am Machh tshi jiliri uchchamćha, thappacha ti źoñinakźkiś wiñay źeti thäśxapa, ti amiź uchśta źoñinakźkiś.

³Niźaśa xalla ni wiñay qamañaki, ti źoñinaka am paxaxućha niźaśa ni śinta cheqan Yöś paxaxućha, niźaśa ni Jesucriśtu amiź kuchanźkitaćha.

⁴“Niźaśa werhki ti yoqkiś am aśi thëśinćha, niźaśa amiź wethkiś thäta lanqś źerśinćha.

⁵Xaśiki Tatay amtan chikapacha werh khisqatalla, niźaśa ima ti yoqa źelan werhki amtan chika khikan werhki chawkh aśśiś taćha xalla nïź thälla.

⁶“Niźaśa xalla ti yoqkiś źelhñi źoñinakźkiśtan amki illśamćha neqhśtan wethkiś thächamćha, niźaśa werhki ninakźkiś śiśqatchinćha amkiśtan. Niźaśa ninakaki amta taćha amćha wethkiś thächamki, niźaśa ninakaki am taqunaka kaśśićha.

⁷Niźaśa xaśiki ninakaki thappacha ni ćhhultaqinaka amkiśtan thonñi śiśśićha;

⁸niźaśa ni amiź thäta śuma taqunaka ninakźkiś śiśqatchinćha, niźaśa ninakaki katoqchićha. Niźaśa ninakaki werh cheqpachapan amkiśtan thonñi paxchićha, niźaśa ninakaki am werh kuchanźkichi kirïchićha.

⁹“Niźaśa werhki ninakźkiśtan rokt'iźinućha, niźaśa anal ni ana Yöśkin kirïchi źoñinakźta rokt'ućha; ans ni amiź wethkiś thäta źoñinakźtal rokt'ućha, niźaśa ni źoñinakaki amtaćha.

¹⁰Niźaśa thappacha wethtanakaki amtaćha, niźaśa ni amtanakaki wethtaśaqaśśa; niźaśa weth aśiki ninakźkiś cherchukaćha.

¹¹“Niźaśa werhki anal iya ti yoqkiś źelaćha, niźaśa weriź amkin oqan ninakaki tirapan ti yoqkiś źelakićha. Źkayi quśśiś Tatay ni amiź wethkiś thäta źoñinaka am thükiś śhoxwalla, niźaśa ućhumnak irata tshi quśśiś khexo.

¹²Niźaśa werhki ti yoqkiś ninakźtan chika khikanaki ninaka kuytintaćha, niźaśa werhki ni amiź wethkiś thäta źoñinaka am thü aśtan tshïtsinchintaćha. Niźaśa ninakźkiśtan anaź xaqhsiltami qatchiki, ans tshïsuñaki qataxkhitapantaćha, xalla nuź ni khjirti patxparu watax khitapantaćha.

¹³“Xaśiki werhki am źelhś nikhul oqućha; niźaśa iya ti yoqkiś źelhkan ti ćhhultaqinaka chiyućha, xalla neqhśtan ninakaki weth chipś irata ninakź quśki phiya khexo.

¹⁴Niźaśa werhki ni am śuma taqunaka thächinćha, niźaśa ti źoñinakaki ninaka ćhhaxwchićha, niźaśa ninakaki anaź ti yoqchiś źoñinaka, niźaśa werhmi anaź ti yoqchiś źoñtki.

¹⁵Niźaśa werhki anal ninaka ti yoqkiśtan jesaxu mayućha, ans ni Saxriźkiśtan tshïtsinax khiwćha.

¹⁶Niźaśa werhki anaź ti yoqchiś źoñtki, niźaśa tinakami anaź ti yoqchiś źoñinaka.

¹⁷Niźaśa amki cheqpacha ninaka źkayi quśśiś khisqatalla; niźaśa am taquki cheqpachapanćha.

¹⁸Niźaśa amki xaqhnuź werh ti yoq źoñinakźkin kuchanźkichamźlaxa, xalla niźtaśaqaś werhki ninaka ti źoñinakźkin kuchnućha.

¹⁹Niźaśa werhki ninakaź khen perśunpacha źkayi quśśiś khisnućha, niźaśa ninakami werarkiś źkayi quśśiś khisnaxu.

²⁰“Niźaśa amkiś anal ninakźtaqaś rokt'ućha, ans ninakaź Yöś śuma kintu palxayta nonźku ni uśhka wethkiś kirïñinakźtaśaqaś rokt'ućha.

²¹Niźaśa thappacha tshi quśśiś khexo; niźaśa am weth Eph wethkiśamćha, niźaśa werhki amkiśtćha, niźaśa ućhumnakatan ninakaki tshi quśśiśx khila, neqhśtan ti yoq źoñinaka am werh kuchanźkichi kiriyaxu.

²²Neqhśtan werhki ni amiź wethkiś thäta aśi ninakźkiśśaqaś thächićha, niźaśa ninakaki tshi quśśiśpan khexo, ućhumnaka irata tshi quśśiś khexo:

²³Niźaśa werhki ninakźkiśtćha niźaśa amki wethkiśamćha, neqhśtan cheqpacha thappacha tshi quśśiś khexo, xalla nuź ti źoñinaka am werh kuchanźkichi śiśaxu, niźaśa amki ninaka oqśñi niźtaśaqaś amki werh oqśñi śiśaxu.

²⁴“Tatay, ni amiź wethkiś thäta źoñinaka xaqhsikin werh źelaćhaxa, xalla nikhuśaqaś ninakaki wethtanx źelhla, niźaśa ni amiź wethkiś thäta aśi cheraxu; niźaśa ima ti yoqa thulźkan amki werh pekchampanćha.

²⁵Ch'uwa quśśiś Tatay, ti źoñinakaki anaź am paxchićha, ans werhki am paxchinćha, niźaśa tinakami am werh kuchanźkichi śiśśićha.

²⁶Niźaśa werhki am thü śiśqatchinćha niźaśa tirapan śiśqataćha, niźaśa ni amiź wethkiś oqźtaki niźtaśaqaś tinakźkiś khila niźaśa werhki ninakźkiśx khiwla.”