Read Chipaya JUAN 20 Bible Online

JUAN 20 - Chipaya bible

JUAN 20

¹Xalla ni śimana qallantiñi thuñkiśiki, María Magdalenki iya chharhpu chharhpu Jesusiź puyi oqhchinćha, xalla ni oraki iya sumchitaćha; niźaśa näki ni puyi chawkhta maś qisqatta cherśinćha.

²Neqhśtan näki śatipariju oqhchinćha, ni Simón Piruźkin niźaśa ni tshi Jesusiź añcha pekta qhara qhxochkin, niźaśa ninankaźkiś khichinćha: — ¡Ni puykiśtan Jesusiź xañchi chhichchićha, niźaśa werhnakki anal śiśućha xaqhsikinqaś chichchiźlani!

³Neqhśtan Piruźtan tshi thaxintiźtan ulanźku Jesusiź puyi oqhchićha.

⁴Niźaśa ninakaki pukultan chika śatipariju oqhchićha; xalla ni tshïsuñaki Piruźkiśtan tshanti śathchićha, niźaśa tuki ni puyi irantichićha.

⁵Niźaśa kolźku cherśićha, xalla neqhśi ni Jesusiź xañchi thelhźta pañunakaqaś cherchićha, ans nïki ana luśhśićha.

⁶Neqhśtan nïź wirkiśpacha, Simón Piruki ni puykiś luśhlaqi irantiźkichićha. Niźaśa nïmi ni jerźinta pañunakaqaś cherśićha;

⁷niźaśa ni Jesusiź acha jerźinta pañuki yaqhikin otźta źelatćha, ana ni xañchi jerźinta pañunakźtan chika.

⁸Neqhśtan tuki ni puyi irantiźkichiki thaxintaki luśhkichiśaqaśśa, niźaśa nïki ni watchinaka cherchiśaqaśśa, xalla neqhśtan kirïchićha.

⁹Niźaśa ninakaki ni khjirtikiś chïñi anaź näśnatqalćha, niźaśa nïki jakatatśpantaćha.

¹⁰Xalla neqhśtan ni thaxintanakaki, ninakź qhuya kephchićha.

¹¹Neqhśtan Mariyki ni puyiź śawnktan eklichinćha, niźaśa añcha qäkan; xalla nuź qäkan ni puy qhullchuk kolźku cherśinćha,

¹²neqhśtan näki pukultan anjilanaka chiw śkiti kuthchi cherchinćha, ni Jesusiź xañchi xaqhsikiśtaźlaxa xalla neqhśi julśi; niźaśa tshïki achqhuttan niźaśa tshïsuñaki qhxochqhuttan.

¹³Neqhśtan ni anjilanakaki näkiś pewkśićha: — Kullaka, ¿qhaźtikiśtanam qäxo? Näki ninakźkiś qhäśinćha: — Nëśa weth Tata chhichchićha, niźaśa anal śiśućha xaqhsikinqaś chichchiźlani.

¹⁴Xalla nuź chïźku näki acha waytichinćha, neqhśtan xalla neqhśi Jesusaqaś cherśiñćha, neqhśtan näki ana Jesusa paxchinćha.

¹⁵Neqhśtan Jesusaki näkiś pewkśićha: — Kullaka, ¿qhaźtikiśtanam qäxo? ¿Niźaśa jëkim qhurxo? Niźaśa näki ni phxaqallanaka cheqśñiźkä khikan pinsichinćha, neqhśtan nïźkiś khichinćha: — Tata, amki ni xañchi chhichchamźlax nïki, wethkiś maśnalla xaqhsikin chhichchamtaxo, niźaśa werhki ni qhuril oqasaćha.

¹⁶Neqhśtan Jesusaki näkiś khichićha: — ¡María! Näki nïź qhutñi cherźku khichinćha: — ¡Rabuni! (Ti taquki khićha: “Thaxiñi”).

¹⁷Neqhśtan Jesusaki näkiś khichićha: — Anaź werh tshitsina, niźaśa werhki imal weth Ephźkin akhsñi oqućha. Niźaśa amki oqa ni weth jilanakźkin maśka, niźaśa werhki ni weth Ephźtan akhskaćha, niźaśa anćhuka Ephźtan, niźaśa ni weth Yöśtan, niźaśa nïki anćhuka Yöśśaqaśśa.

¹⁸Neqhśtan María Magdalenki oqźku ni thaxintanakźkiś kint'ichinćha, ni Jesusa chertanaka, niźaśa ni Jesusiź chïtanakami ninakźkiś kint'ichinćha.

¹⁹Xalla ni śimana qallantiñi thuñ nöx pacha, thuñiź qattan wënxapa, ni thaxintanakaki ninakź qhuy śana chawkhchi akhsitaćha, ni judiu jilirinaka eqhsku. Neqhśtan Jesusaki luśhku ni thaxintanakź taypikiś khisku ninaka tsänchićha, tuź khikan: — ¡Anćhukakiś śuma oraqax khila!

²⁰Xalla nuź tsänźku, nïź qharanaka thëśićha niźaśa nïź ch'illqhuttan. Neqhśtan ninakaki Jesusa cherźku añcha chipchićha.

²¹Xalla neqhśtan Jesusaki wilta ninakźkiś khichićha: — ¡Anćhukakiś śuma orax khila! Xaqhnuź ni Eph werh kuchanźkitćhaxa, xalla nuźuśaqaś werhki anćhuk kuchnućha.

²²Neqhśtan ninakźkiś phujśićha, niźaśa ninakźkiś tuź khichićha: — Anćhukki ti Espíritu Santuź tanźna.

²³Niźaśa anćhukki xaqhsiltiź ujkiśtanqaś śumansnaćhani, ni ujnakaki śumansqattaź khekićha; niźaśa anćhukki xaqhsiltiźkiśqaś ana śumansnaćhani, ninakaki ana śumansqattaź khekićha.

²⁴Tomasaki tshi nïź qhalu piśkchiś thaxintanakźkiśtantaćha, xalla nïki pacha khita śaqaśtaćha, niźaśa ni Jesusaź irantiźkan ni Tomasaki anaź ninakźtan źelatćha.

²⁵Neqhśtan ni yaqha thaxintanakaki nïźkiś khichićha: — Werhnakki Jesusa cherchinćha. Niźaśa Tomasaki ninakźkiś tuź qhäśićha: — Werhki anal ni kalawuź phetta qhara cheraź nïki, niźaśa anal ni phetkiś weth lok'ana luśhqataź nïki niźaśa weth qharami nïź ch'illqhuttan anal luśhqataź nïki, anal kiriyasaćha.

²⁶Neqhśtan ocho thuñkiśtan, ni thaxintanakaki tshi qhuykiś wilta akhsitaćha, niźaśa neqhśi Tomasaki ninakźtantaćha. Niźaśa ninakaki qhuyśana chawkhchitaćha, neqhśtan Jesusaki luśhśićha, niźaśa ninakź taypikiś khisku ninakźkiś tsänchićha tuź khikan: — ¡Anćhukakiś śuma orax khila!

²⁷Neqhśtan Jesusaki Tomaskiś khichićha: — Teqhś am lok'ana śhika niźaśa weth qhara cherźna; niźaśa am qharźtan weth ch'illkhuttan makhźna; niźaśa amki ana, ana kirïñi khe, ans kirïñipan khella.

²⁸Neqhśtan Tomaski thapa quśtan khichićha: — ¡Weth Tata, niźaśa weth Yöś Eph!

²⁹Neqhśtan Jesusaki nïźkiś khichićha: — ¿Amki werh cherźkum kirïqaya? ¡Añcha walićha ni ana cherźku kirïñi źoñinakaki!

³⁰Jesusaki nïź thaxintanakź cheran, yaqha wakchi milajrunaka pächićha, xalla ninakaki anaź ti liwrukiś khjirtaki.

³¹Niźaśa ni Jesusaki Mesiassa nïćha Yöś Matiki, xalla ni anćhuk kiriyaxu khjirtaćha, niźaśa xalla nuź nïźkiś kirïźku, anćhukki nïź thükiś wiñay źetchiś khekićha.