Read Chipaya JUAN 3 Bible Online

JUAN 3 - Chipaya bible

JUAN 3

¹Niźaśa Nicodemo khita tshi fariseo źoñi źelatćha, ni Nicodemuki cheqantaćha ni judiu źoñinakźkiśtan.

²Ti źoñiki wën Jesusa thonśñi oqhchićha tuź khikan: — Thaxiñi, Yöś am kuchanźkichi wethnakakiś thaxnaxu śiśućha, niźaśa anaź jëkhmi amiź päta milajru päyi atasaćha, niźaśa Yöś anaź nïźtan khesaź nïki.

³Neqhśtan Jesusaki ninakźkiś khichićha: — Cheqpachal khiwćha, xaqhsilta źoñit ana wilta mathta khećhax nïki, anaź ni Yöś irpiś watha cherasaćha.

⁴Neqhśtan Nicodemuki Jesusiźkiś pewkśićha: — ¿Xaqnuźupan tshi chawkh źoñiki wilta mathta khesaxo? ¿Niźaśa xaqhnuź mä phuchhkiś luśhasaxo wilta mathta khiśxapaxo?

⁵Jesusaki nïźkiś qhäśićha: — Cheqpachal khiwćha, ni Espíritu niźaśa ni qhaśkiśtan ana mathtaki, anaź ni Yöś irpiś wathkiś luśhasaćha.

⁶Niźaśa źoñźkiśtan mathtaki źoñipanćha; niźaśa Espirituźkiśtan mathtaki espiritupanćha.

⁷Niźaśa amki weriź chïtikiśtan ana tsuka: ‘Thappacha wilta mathta khiśtanćha.’

⁸Niźaśa ni thamiki xaqhsikiśtan phujśpekkuź phujćha, niźaśa nïź xora nonźkumi anam śiśśa xaqhsikiśtan thonćhaxa xalla ni thamiki, niźaśa anćhukki anaź śiśśa xaqhsit oqhćhaxa niźaśa xaqhsikiśtan thonćhaxa. Xalla niźtaśaqaśśa ni Espirituźkiśtan mathta źoñinakaki.

⁹Neqhśtan Nicodemuki wilta pewkśićha: — ¿Xaqnuźupan ti khesaxo?

¹⁰Jesusaki nïźkiś qhäśićha: — ¿Amki Israel źoñinaka thaxiñamla, anam ti ćhhultaqinaka śiśqhaźtataxo?

¹¹Cheqpachal khiwćha werhnakki werhnakaź śiśtanaka palxaychinćha, niźaśa werhnakki cherinćha werhnakaź chertanakkiśtan; niźaśa anćhukki anapanź kirïćha ni werhnakaź chïtanaka.

¹²Niźaśa werhki ti yoq ćhhultaqkiśtan palxayan amki anam kirïćha, ¿xaqnuźum kiriyakexo ni tsewkta ćhhultaqkiśtan palxayanxu?

¹³“Niźaśa anaź jëkhmi ni tsewkta yoqkin yawchiki, ans ni tsewkta yoqkiśtan śhujźkichiqaś yawchiki, xalla nïki ni źoñź Matićha.

¹⁴Niźaśa Moisesaki ni ch'eqti yoqkin ni śqora tshi tuñkiś waytichićha, xalla niźtaśaqaś ni źoñź Matiki waytita khiś wakiśićha,

¹⁵Niźaśa thappacha nïźkiś kirïchi źoñinakaki anaź qatakićha, ans tshanti wiñay źeti thätaź khekićha.

¹⁶“Niźaśa Yöśki ti yoqkiś źelhñi źoñinaka oqśićha, neqhśtan nïź śinta machhlla kuchanźkichićha, thappacha nïźkiś kirïchinakaki ana tikhźnaxu, ans tshanti wiñay źeti thätaź khekićha.

¹⁷Niźaśa Yöśki nïź Machh ti yoqkiś qamñi źoñinakźkin kuchanźkichićha ti yoqkiś qamñi źoñinaka ana ujkiś thxotsnaxu, ans nïź khen ti yoqkiś źelhñi źoñinaka liwrïta khiśxapa.

¹⁸“Niźaśa ni Yöś Machhkiś kirïñi źoñiki anaź ujchiś khesaćha; xalla ni ana kirïñi źoñiki ujchiśpan khekićha, niźaśa ni Yöś śinta Machhkiś ana kirïtikiśtan.

¹⁹Niźaśa ni ana kirïñi źoñinakaki ujchiś khitapanćha, ninakaź ana śumanaka pätikiśtan, niźaśa ni źoñinakaki ni qhana ti yoqkiś thontikiśtan anapan pekchićha, ans ni qhankiśtan sumchi laqhapan pekchićha.

²⁰Niźaśa thappacha ni ana śuma päñi źoñinakaki ni qhanapanź ćhhaxwćha, niźaśa ninakaki anapanź ni qhankiś makhatś pekćha, niźaśa ninakaź päta ujnaka ana thëźta khiśxapa.

²¹Xalla ni śumanaka päñi źoñiki qhankinź makhatćha, niźaśa nïź pätanakaki Yöś quśkama päta therźnaxu.”

²²Xalla neqhśtan Jesusaki nïź thaxintanakźtan judea yoqa oqhchićha, xalla nikhu tshi qhaź max nïź thaxintanakźtanpacha wawtiskan źelatćha.

²³Niźtaśaqaś Juanki wawtisatćha ni Enonkin Salim keźu, xalla nikhuki taź qhaś źelatćha; niźaśa xalla nikhu oqhñi źoñinakaki wawtistataćha.

²⁴Xalla tinakaki ima Juan karsilkiś makan watchićha.

²⁵Neqhśtan tshi qhaźultan Juanź thaxintanakźkiśtan, judiu źoñinakźtan ch'ärassićha ni źkayi quśśiś khisqatś uskiśtan,

²⁶niźaśa Juanźkin chï oqhchićha: — Thaxiñi, ni Jordán pujź nawkchaqtan amtan chika źelhñi źoñźkiśtan amki chïchamla; xaśiki ni źoñiki wawtissa niźaśa thappacha źoñinakaki nïźkinź oqhćha.

²⁷Juanki ninakźkiś qhäśićha: — Yöś anaź nïźkiś thäsaź nïki, anaź jëkhmi ćhhulchiś khesaćha,

²⁸Anćhukpachaćha werh chïñi nonśinćhukki, qhanakama tuź khichinćha: ‘Werhki anaćha Mesiastki’, ans nïź tukkiś kuchanźkititćha.

²⁹Niźaśa ni śalś phiśtikiśiki xalla ni turchiśiki thowaćha; xalla neqhś źelhñi ni thowź maśiki nonźa, xalla nuź chïñi nonźku añchaź chipćha. Xalla niźtaśaqaś werhki añcha quś phiyaćha.

³⁰Niźaśa nïki cheqan paqś wakiśićha, niźaśa werhki upśtanćha.

³¹“Xalla ni tsewkta yoqkiśtan thonñi źoñiki nïćha thappacha ti źoñinakźkiśtan tshanti cheqanaki. Ti yoqkiś źelhñi źoñinakaki ti yoq ćhhultaqinakźkiśtapanź parlićha. Xalla ni tsewkta yoqkiśtan thonñi źoñiki nïćha thapa ti źoñinakźkiśtan cheqanaki,

³²neqhśtan nïź chertanaka niźaśa nïź nonźtanaka maśinćha; niźaśa anaź jëkhmi nïź chïtanaka katoqćha.

³³Xalla nïź maśinta katokiñi źoñiki, xalla ni źoñiki Yöśki weraraćha khićha;

³⁴xaqhsilta źoñiźlax Yöś kuchanźkita nïki, Yöś taqunakapanź parlićha, niźaśa Yöśki nïźkiś nïź Espíritu ana mirañaź thäćha.

³⁵Neqhśtan ni Ephki nïź Machh q'ächićha, niźaśa thappacha ni ćhhultaqinakźkiś irpiś aśi thächićha.

³⁶Xalla ni Machhkiś kirïchi źoñiki wiñaya źetchiś khekićha; niźaśa ana ni Machhkiś kirïñi źoñiki ana ni źeti cherakićha, ans Yöś źaxwaź nïźkiśiki khekićha.”