Read Chipaya JUAN 4 Bible Online

JUAN 4 - Chipaya bible

JUAN 4

¹Ni Jesusaki tama thaxintanakchiś khisñi śiśśićha ni fariseo źoñinakaki, niźaśa Juanźkiśtan tshanti wawtisatćha

²(xalla ni wawtisñiki anataćha Jesusa, ans nïź thaxintanakaź wawtisatćha).

³Neqhśtan Jesusaki ni kintu śiśku, Judea yoqkiśtan Galilea yoqa kuttichićha.

⁴Xalla ni oqhś jikhśkiśiki Samaria yoqa nuźupan watśtantaćha.

⁵Xalla nuź oqhkan ni Samaria yoqkiś tshi Sicar khita watha irantichićha, ni Jacobuki nïź machh Joseźkiś tshi yoqa thächitaćha xalla ni źkatitaćha.

⁶Xalla nikhutaćha ni Jacobź tujki. Neqhśtan Jesusaki jikhśkiś oqhkan añcha ötchi ni tujkiś julśićha. Niźaśa ni oraki taypuru waxitaćha.

⁷Neqhśtan nïź thaxintanakaź luli ni watha qhayi oqhtan,

⁸tsha Samaria źon qhaś kowi thonchinćha, neqhśtan Jesusaki näkiś khichićha: — Qhaś onalla.

⁹Neqhśtan na Samaritan yoqchiś źonki nïźkiś qhäśinćha: — ¿Amki judiu źoñimla qhaźtikiśtan wethkiśtan qhaś mayxo? Werhki Samaritan yoqchiś źonla. Niźaśa ni judiu źoñinakźtan Samaritan źoñinakźtan ana parliñitaćha.

¹⁰Neqhśtan Jesusaki näkiś qhäśićha: — Amki ni Yöś qhaś thäñim śiśasaź nïki, xalla nïki amkiśtanź qhaś mayćha, niźaśa amki nïźkiśtanam mayasaź nïki, xalla nïki źethñi qhaś amkiś thäsaćha.

¹¹Na mätaq źonki nïźkiś khichinćha: — Tata, amki qhaś kowśxapa ana ćhhulchiśamla, niźaśa ti tujki añcha qosićha: ¿Xaqsikiśtanam wethkiś źethñi qhaś thäsaxo?

¹²Wethnaka achchi Jacob ephki ti tuj wethnakalta ekanchićha, ni pachataćha teqhśtan likhñiki niźaśa nïź matinakami niźaśa nïź uywanakami teqhśtan likhñiśaqaśtaćha. ¿Amki nïźkiśtan tshantim khes qhaźtataxo?

¹³Jesusaki näkiś qhäśićha: — Thappacha ti tuj qhaśkiśtan likhñi źoñinakaki, wiltaź qhaś pekakićha.

¹⁴Niźaśa ni weriź thäta qhaś likhñi źoñiki, anaź iya wilta qhaś pekakićha. Xalla ni weriź thäta qhaśki ni źoñźkiś tshi qhaś xalśuriźtaqaś khekićha niźaśa wiñay źetchiś khekićha.

¹⁵Neqhśtan na źonki Jesusiźkiś khichinćha: — Tata, wethkiś ni qhaśkiśtanź thälla, neqhśtan werhki ana qhaś pekñi khiśxapa niźaśa ana iya ti tujkin qhaś kowi thonśxapa.

¹⁶Jesusaki näkiś khichićha: — Am luktaqa qhawźka, neqhśtan teqśim thonakićha.

¹⁷Neqhśtan na mätaq źonki qhäśinćha: — Ana luktaqchiśtćha. Jesusaki näkiś khichićha: — Waliqam ana lukchiśtćha khićha;

¹⁸niźaśa amki taxśnuku luktaqchiśamtaćha, niźaśa anś ni amtan źelhñi źoñiki anaćha am luktaqa. Ni amiź chïtaki werarapan chïchamćha.

¹⁹Xalla ti nonźku na mätaq źonki ni Jesusiźkiś khichinćha: — Tata, werhki Yöśkiśtan chïñiźtaqal am nayućha.

²⁰Niźaśa wethnaka achchi ephnakaki ti kurkiś Yöśkin amtiñitaćha, xaśiki anćhukki khinćhukćha Jerusalén wathaćha Yöśkin amtiś yoqaki.

²¹Neqhśtan Jesusaki näkiś qhäśićha: — Werh kiriya kullaka, anćhukalta tshi thuñiź irantiźkićha ana Jerusalén watha oqźku niźaśa ana ti kuru thonźku Yöśkin amtiś khekićha.

²²Niźaśa anćhukki samaritanunaka anaź śiśśa ćhhulkiśtanqaź amtićhani; ans werhnakki śiśućha ćhhulkiśtanqat amtućhani; niźaśa ni liwrïśki ni judiu źoñinakźkiźtanź thonćha.

²³Niźaśa ni orakiź irantiźkićha, xaśiki ni cheqpacha amtiñinakaki werar Ephź Espirituź amtakićha, niźaśa ni Ephki ni amtiñinakaź qhurćha ni amtaxu.

²⁴Yöśki Espiritućha, niźaśa nïźkiś amtiñinakaki niźtaśaqaś werar Animuźtan amtiśtanćha.

²⁵Neqhśtan na mätaq źonki nïźkiś khichinćha: — Werhki Mesías thonakeqpan khiwćha (Criśtu khitaśaqaśśa nïki); niźaśa nïki thonźku thappacha ćhhultaqinaka wethnakakiś thaxźnakićha.

²⁶Neqhśtan Jesusaki näkiś khichićha: — Werhćha nïtki, niźaśa werhpachal amtan parlućha.

²⁷Xalla nuź khen nïź thaxintanakaki irantiźkichićha, Jesusaź na źonatan parlan ninakaki iśpantichićha. Niźaśa ninakźkiśtan ana jëkhmi pewkśñi atchićha ćhhulkiśtanqat na źonatan parlatćhani.

²⁸Neqhśtan na źonki näźa qhaś kowś śhikhaña ekku watha oqhchinćha, ni źoñinakźkin maśñi:

²⁹— Oqhla ni źoñiź cherźkila, ni źoñiki weriź chïtanaka thappacha qhäśićha. ¿Anax nïki ni Mesías khesaya?

³⁰Neqhśtan ni wathkiśtan ni źoñinakaki oqhchićha, Jesusa xaqhsikintaźlaxa xalla nikhu.

³¹Ima ni źoñinakaź thonan nïź thaxintanakaki nïźkiś rokchićha: — Thaxiñi, tshi qhaźtallameqaś lulhźnalla.

³²Neqhśtan Jesusaki ninakźkiś khichićha: — Wethtaki yaqha luliź źelhćha, anćhukki anaź ni luli paxćha.

³³Neqhśtan nïź thaxintanakaki ninakporaź pewksasatćha: — ¿Tïźta luli śhikantax khesaya?

³⁴Xalla neqhśtan Jesusaki ninakźkiś khichićha: — Xalla ni weth luliki, ni werh kuchanźkiñiź quśkama päśtanćha niźaśa nïź lanqśnaka źerśtanćha.

³⁵Niźaśa anćhukki khićha: ‘Paqhpik jïś phalhtićha ni śqala axśkinaki’; niźaśa werhki khiwćha ni śqal yoqa cherźna ni śqalaki axśuka welhśićha.

³⁶Xalla ni śqala lanqśñi źoñiki pakaź tanźnakićha, niźaśa ni axźta ćhheriki wiñay źeti xapaćha, niźaśa ni ćhhakhñi źoñiki ni axśñi źoñźtan chikapachaź chipakićha.

³⁷Ni śuma chïtaki, tuź khićha: ‘Yaqhapanakaki ćhhakhćha, niźaśa yaqhapanakaśti axźa.’

³⁸Niźaśa werhki axśñi anćhuk kuchanchinćha ana anćhukaź lanqźtikiś; niźaśa yaqha źoñinakaćha ni lanqśiki, niźaśa anćhukki ninakź lanqźtikiś luśhśinćhukćha.

³⁹Neqhśtan wakchi ni Samaria yoqchiś źoñinakaki Jesusiźkiś kirïchićha, na źonaź tuź chïtikiśtan: “Weriź chïtanakaki thappacha qhäśićha.”

⁴⁰Xalla neqhśtan ni Samaria yoqchiś źoñinakaki Jesusiźkiś rokt'ichićha ninakźtan qamt'axu. Neqhśtan Jesusaki pukmax ninakźtan qamt'ichićha,

⁴¹niźaśa wakchi źoñinaka nïź taqu nonźku nïźkiś kirïchićha.

⁴²Niźaśa na źonakiś khichićha: — Werhnakki anal amiź chïtaqaś kiriyućha, ans werhnak pachaź ni chïñi nonśinki niźaśa nïćha ti yoq źoñinaka liwrïñiki.

⁴³Jesusaki puk maxkiśtan ni Samaria yoqkiśtan Galilea watha oqhchićha.

⁴⁴Niźaśa Jesusapachaź chïchiki, nïź perśun wathkiś ni Yöśkiśtan chïñinaka ana tanśñićha.

⁴⁵Neqhśtan Galilea watha irantitan, ni Galilea źoñinakaki Jesusa thapa quśtan tanśićha, niźaśa ni źoñinakaki Jerusalén Paśku phiśtaśaqaś oqht xalla nikhu ni Jesusiź thapa pätanaka chertqalćha.

⁴⁶Neqhśtan Caná qolta watha Galilea yoqa kephchićha, xalla ni qhaś winu tukqattaź nikhu. Xalla ni Cafarnaúm wathkiś tshi reyź chawkh śultatź machh läkhichitaćha.

⁴⁷Neqhśtan Jesusaź Judekiśtan Galilea watha thontan, ni chawkh śultatuki Jesusa thonchi śiśku ni rokt'i oqhchićha, nïź qhuya thonźkaxu niźaśa nïź machh ćhhetinźinaxu, niźaśa nïź machhki tikhś maya läkhichitaćha.

⁴⁸Jesusaki nïźkiś qhäśićha: — Ana ni chimpunaka niźaśa milajrunaka cherźku, anćhukki anaź kirïtasaćha.

⁴⁹Neqhśtan ni chawkh śultatuki ni Jesusiźkiś khichićha: — Tata, ima weth machh tikhźnan thonźkalla.

⁵⁰Neqhśtan Jesusaki nïźkiś khichićha: — Am qhuya kepa; niźaśa am machhki źetćha. Neqhśtan ni źoñiki Jesusiź chïta kirïźku kephchićha.

⁵¹Niźaśa nïź qhuya kepan, nïź uywitanakaki ni śali thonchićha tuź khikan: — ¡Am machhki źetćha!

⁵²Neqhśtan ni chawkh śultatuki pewkśićha ćhhul ora weth machh upalla khissitaxo, niźaśa ninakaki qhäśićha: — Śeśku taypuruź thoqźtan nïź ćh'ulhñi konaki apaltissićha.

⁵³Neqhśtan ni läź ephki khuñśićha ni Jesusiź chïta ora: “Am machhki źetćha”; neqhśtan nïmi nïź qhuy źoñinakami thappacha Jesusiźkiś kirïchićha.

⁵⁴Xalla tïźtan piśk wilta ni chimpu thëśićha, ni Judeakiśtan Galilea oqhkan.