Read Chipaya JUAN 5 Bible Online

JUAN 5 - Chipaya bible

JUAN 5

¹Ni judiu źoñinakź phiśta irantiźkitan, niźaśa Jesusaki Jerusalén watha kephchićha.

²Jerusalén wathkiś ni üśi luśh śana khitataćha, xalla ni źkati tshi ćhaka źelatćha, hebreo tawqkiśtan Betzatá khita, xalla nïki taxśnuku śanchiśtaćha.

³Xalla neqhśi wakchi lä źoñinaka źelatćha śuranaka, kojunaka, niźaśa śuchunaka, ninakaki ni qhaś qisñi thewźnatćha.

⁴Niźaśa aźqtan aźqtan ni ćhakkiś tshi anjila śhujźkiñitaćha neqhśtan ni qhaśki qisñitaćha, ni qhaś qistan tuki thxotsñi źoñiki nïź ćhhul konkiśtanami źethñitaćha.

⁵Xalla neqhśi tshi chheph qhalu ocho wata läkhichi źoñi źelatćha.

⁶Niźaśa Jesusaki ni lä źoñi aphchi cherźku, niźaśa nïź aźqa wata lä ñakñi śiśku nïźkiś pewkśićha: — ¿Amki źethśim pekya?

⁷Ni lä źoñiki nïźkiś qhäśićha: — Tata, anaź jëkhmi werh ti ćhakkiś thxotśñi źelhćha ni qhaś qisanaki. Śapa luśhpektaki yaqhaqaź weth tuki luśhśa.

⁸Neqhśtan Jesusaki nïźkiś khichićha: — Niźaśa źäźna, am pirsata waytiźku oqa.

⁹Xalla ni orapacha ni lä źoñiki źethchi khissićha, nïź pirsata waytiźku oqhlayi qallantichićha. Ni nöxiki śawatu jejś thuñi taćha,

¹⁰neqhśtan ni judiu źoñinakaki ni ćhhetinta źoñźkiś khichićha: — Töxiki jejś thuñi śawatućha; amki anam ni pirsata xöxöwasaćha.

¹¹Xalla ni źoñiki ninakźkiś qhäśićha: — Xalla ni werh ćhhetiñi źoñiki wethkiś khichićha: ‘Am pirsata waytiźku oqa.’

¹²Neqhśtan ninakaki pewkśićha: — ¿Jëkhpan ni amkiś nuź khichixo: ‘Ni am pirsata waytiźku oqa khikanxo’?

¹³Niźaśa ni źoñiki anaź śiśatćha jëkhźlax ni ćhhetinchi, neqhśtan Jesusaki neqhś źelhñi źoñinakźkiśtan qatchićha.

¹⁴Xalla neqhśtan Jesusaki Timlukiś ni źoñźtan śalźku nïźkiś tuź khichićha: — Niźaśa amki źetchamćha, xaśiki nonźna anam iya uj päkićha ana wilta tshanti niźtikiś thxotsxapa.

¹⁵Neqhśtan Jesusa ni ćhhetiñi śiśku oqhchićha, niźaśa ni judiu źoñinakźkiś maś maśśićha,

¹⁶Neqhśtan ni Jesusaź niźtanaka śawatu päñiź khen, ni judiu źoñinakaki Jesusa qhuratćha konśxapa,

¹⁷xalla neqhśtan Jesusaki ninakźkiś khichićha: — Weth Ephki tiraź lanqźa, niźaśaqaś werhki lanqźnućha.

¹⁸Neqhśtan Jesusaki ni śawatu jejś thuñkiś ana lanqś lanqźtikiśtan, niźaśa Yöśki weth perśun Ephćha khichiśaqaśśa niźaśa Yöś irataź khïkhićha, xalla niźtikiśtan ni judiu źoñinakaki Jesusa konśpekatćha.

¹⁹Neqhśtan Jesusaki ninakźkiś khichićha: “Cheqpachal khiwćha ni źoñź Matiki anaź perśunpacha ćhhulumi päyi atasaćha, ans ni Epiź pätanaka päćha. Niźaśa thapa Epiź pätanakaki, niźtaśaqaś nïź Machhki päćha.

²⁰Niźaśa ni Ephki nïź Machh q'ächićha, neqhśtan nïź päyinakaź nïźkiś thëźa; niźaśa tshanti paqh ćhhultaqinakaź anćhukakiś thëźnakićha niźaśa anćhukki iśpantakićha.

²¹Niźaśa ni Ephki tikhśinakźkiśtanź jakatatsqatźku źeti thäćha, xalla niźtaśaqaś nïź Machhki xaqhsiltaqat pekćhani xalla nïźkiś źeti thäćha.

²²Niźaśa ni Ephki anaź jëkhmi juchjiptayćha, ans nïź Machhkiś thächićha ni juchjiptayś aśi,

²³niźaśa thappacha ni Machh amtiśtanćha xaqhnuź Eph amtiślaxa xalla niźtaśaqaś. Xalla ni Machh ana amtiñiki ni kuchanźkiñi Eph anaśaqaś amtićha.

²⁴“Niźaśa cheqpachal khiwćha ni weth taqu nonśñinakaki niźaśa ni werh kuchanźkiñiźkiś kirïñiki wiñay źetchiś khekićha; niźaśa ana ujchiś khekićha, neqhśtan ni tikhśkiśtan źetkin watchićha.

²⁵Niźaśa cheqpachal khiwćha ni orakiź thonćha niźaśa anśićha ni oraki, xalla neqhśtan ni tikhśinakaki ni Yöś Machh xoraź nonźnakićha; niźaśa ni nonśñinakaki źetakićha.

²⁶Niźaśa ni Ephki perśunpacha źetchiśśa, niźtaśaqaś nïź Machhkiś perśunpachkiś źetchiś thächićha,

²⁷niźaśa źoñź Matiź khen ni juchjiptayś jiliri thätaćha.

²⁸Niźaśa anćhukki anaź tinaka iśpantakićha, xalla ni oraki waxź irantiźkakićha thappacha ni tikhśinakaki nïź xoraź nonźnakićha

²⁹niźaśa ni śuma pächi źoñinakaki ninakź puykiśtanź ulnakićha, neqhśtan jakatatakićha źetchiś khiśxapa; niźaśa ni ana śuma pächi źoñinaklaki jakatatakićha ujkiś thxotta khiśxapa.

³⁰“Niźaśa werhki anal weth quśkama päyi atasaćha. Werhki weth Epiź chïtakama juchjiptayućha niźaśa weth juchjiptayśki cheqpachaćha, niźaśa anal weth quśkama oqućha ans werh kuchanźkiñi Ephź quśkamal oqućha,

³¹niźaśa werhki weth tukatul chiyasaź nïki, ni weriź chïtaki anaź cheqpacha khesaćha.

³²Niźaśa yaqhaź wethtukatu chïñiki źelhćha, niźaśa ni weth tukatu chïñiź chïtaki cheqpachapanćha.

³³Niźaśa anćhukki Juanźkin pewkśñi kuchanchinćhukćha, niźaśa nïki cheqpachś tukatu chïchićha.

³⁴Niźaśa werhki anal yaqha źoñinakaź chïta katoqućha. Niźaśa werhki anćhuk liwrïta khiśxapal chiyućha.

³⁵Neqhśtan ni Juanki tshi michaźtaqaś qhanatćha, niźaśa anćhukki tshi qolukuqaś nïź qhankiś chipśpekchinćhukćha.

³⁶Niźaśa wethtaki źelhćha Juanźkiśtan tshanti weth tukatu chïñi. Niźaśa Ephki nïź luraśiśnaka wethkiś thächićha, ni chïtakama wataxu, niźaśa weriź päta ćhhultaqinakaki wethkiśtanź thëźa, niźaśa Ephki werh kuchanźkichićha.

³⁷Niźaśa ni Ephki werh kuchanźkichićha, weth tukatu maś maśnaxu niźaśa anćhukki ana cherchinćhukćha, niźaśa nïź xorami anapan nonśinćhukćha,

³⁸Niźaśa anćhukki anaź nïź taqumi katoqićha, niźaśa anćhukki anaź ni Epiź kuchanźkita kirïćha.

³⁹Niźaśa anćhukki ni khjirtanaka śuma owallat śiśpekćha, xalla neqhśi anćhukki ni wiñay źeti śalśpekćha; niźaśa ninakaź wethkiśtan palxayñiki.

⁴⁰Niźaśa anćhukki anaź wethkin thonśpekćha ni źetchiś khiśxapaki.

⁴¹“Werhki ni źoñinakź qhana anal tanźnasaćha.

⁴²Niźaśa werhki anćhuk paxućha anćhukki ana Yöś irata oqśñi quśśiśćhukćha.

⁴³Niźaśa werhki weth Ephź thükiś thonchinćha, neqhśtan anćhukki anaź werh tanśpekćha; niźaśa yaqhaź perśun thükiś thonasaź nïki anćhukki nïź tanźnasaćha.

⁴⁴Niźaśa anćhukporaź aynaqassa, neqhśtan anćhukki anaź ni cheqpacha thonñi Yöś aśi qhurćha. ¿Xaqnuźupan anćhuk kiriyasaxo?

⁴⁵Niźaśa werhki anal weth Ephź tukkiś anćhuk kijaćha; xalla ni Moisespachaćha lï kijñiki, niźaśa anćhukki nïź khjirtikiś quś thächinćhukćha.

⁴⁶Niźaśa anćhukki Moisés lïkiś kiriyasaź nïki wethkiśśaqaś kiriyasaćha, niźaśa Moiseski wethkiśtan khjirchićha.

⁴⁷Anćhukki ni Moisés khjirta anaź kirïćha, ¿xaqhnuź anćhukki weriź chïta kiriyakexo?”