Read Chipaya JUAN 6 Bible Online

JUAN 6 - Chipaya bible

JUAN 6

¹Xalla teqhśtan Jesusaki Galilea qotź nawkhtuñtan oqhchićha, ni qotaki Tiberias khitaśaqaśtaćha.

²Niźaśa ni lä źoñinaka ćhhetiñi cherźku niźaśa chimpunaka cherźku tama źoñinaka ni apśićha.

³Neqhśtan Jesusaki tshi kuru yawchićha xalla neqhśi nïź thaxintanakźtan julśićha.

⁴Niźaśa ni judiu źoñinakź Paśku phiśta waxillataćha.

⁵Neqhśtan Jesusaki ni tama źoñinaka apźkiñi cherźku, Felipźkiś khichićha: — ¿Ti tama źoñinaka thäśxapa xaqhsikiśtanź t'anta qhayakiya?

⁶Xalla ni Jesusaki ni Felipe yanśxapaqaś nuź chiyatćha, niźaśa Jesusapachaź ćhhulu päćhaxa ni źoñinakźtan xalla ni śiśatćha.

⁷Neqhśtan Felipiki nïźkiś qhäśićha: — Niźaśa piśkwatha thuñi lanqźta päśtan t'anta qhaytaki, anaź śapamayniźkiś tshi qhaźtakamallami wakasaćha.

⁸Ni thaxintanakźkiśtan Andrés khita Simón Piruź jilaki Jesusiźkiś khichićha:

⁹— Teqhś tshi uśha taxśnuku śiwat t'antichiś niźaśa piśk ch'iśśiś źelhćha; xaśiki, ¿qhaźt ti tama źoñinakźkiś wakasaxo?

¹⁰Neqhśtan Jesusaki qhäśićha: — Thappacha ti źoñinaka julsqata. Niźaśa ni yoqaki añcha paśtu yoqataćha, xalla neqhśi taxśnukuqhalu watha źoñinaka julśićha.

¹¹Neqhśtan Jesusaki t'anta tanźku Yöśkin sparakiź khichićha, niźaśa neqhś julśi źelhñi źoñinakźkiś toxźinchićha. Neqhśtan niźtaśaqaś thappacha ni ch'iś toxźinchićha ninakź pektakama.

¹²Neqhśtan ni źoñinakaź chheqhtan, Jesusaki nïź thaxintanakźkiś khichićha: — Ni źethchinaka aptaśka ana inaru pasnaxu.

¹³Niźaśa ninakaki śiwat t'anta źetchinaka aptaśku, qhalu piśkchiś kanaśta śhipchićha.

¹⁴Niźaśa ni źoñinakaki ni Jesusaź päta cherźku khichićha: — Cheqpacha ni Yöśkiśtan chïñi ti yoqkiś thonax khitapantala, xalla nïla tïki.

¹⁵Neqhśtan ni źoñinakaki Jesusa ana khiñi ana khiñi rey thulś pekatćha, xalla ni näśku Jesusaki ninakźkiśtan saraqchićha śina khisxapa wilta paqh kuru yawchićha.

¹⁶Jesusiź thaxintanakaki thuñiź qattan qotqhutñi śhujchićha,

¹⁷Niźaśa ninakaki tshi walsikiś luśhku ni qota qaqi qallantichićha Cafarnaúm qhutñi; ni oraki sumchitaćha niźaśa Jesusaki imaź kephźkatćha.

¹⁸Xalla nuź ninakaź qaqan ni thamiź khen, ni qotqhaśki muspa lhxoqhi tshithchićha.

¹⁹Niźaśa ninakaź tshi tupu sqoluk jilanchiś oqan, ninakaki Jesusa cherchićha qhaś juntuñ ninakź walsi qhutñi thonñi, neqhśtan ninakaki eqhsićha.

²⁰Neqhśtan Jesusaki ninakźkiś khichićha: — Werhćha anćhukki anaź tsuka.

²¹Xalla neqhśtan ninakaki thapa quśtan ni walsikiś tanśićha, neqhśtan ninakaki xaqhsikint oqatćhaxa xalla nikhu oralla ni qhoñ yoqa irantichićha.

²²Neqhśtan ni qotź nawkhtuñtan eklichi źoñinakaki xaqataźu näśićha, xalla neqhś śintalla źelhñi walsikiś ni thaxintanakaki oqht, niźaśa ni Jesusaki ana ni thaxintanakźtan ni walsikiś oqht.

²³Neqhśtan Tiberias chawkh wathkiśtan yaqha walsanaka irantiźkichićha, xalla nïki Yöśkin sparakiź khiźku t'anta lulhta yoq źkatitaćha.

²⁴Neqhśtan Jesusa niźaśa nïź thaxintanaka ana źelhñi nayźku, ni źoñinakaki ni walsanakkiź luśhku Cafarnaúm Jesusa qhuri oqhchićha.

²⁵Niźaśa ninaka qotź nawkhtuñtan irantiźku, Jesusa śalchićha neqhśtan nïźkiś pewkśićha: — Thaxiñi, ¿ćhhul ora teqhś thonchamtaxo?

²⁶Jesusaki ninakźkiś khichićha: — Anćhukakiś cheqpachal khiwćha, anćhukki chheqi lulhchinćhukćha xalla neqhśtanź werh qhurćha, ans anćhukki ana ni chimpunaka katoqchinćhukćha.

²⁷Niźaśa anćhukki ni miransñi ćhherkiśtan ana lanqźna, ans ni wiñaya thurñi ćhherxapa lanqźna, xalla nïki ni źoñź Matiź thäkićha, niźaśa Yöś Ephki nïźkiś chimpichićha.

²⁸Neqhśtan ni źoñinakaki Jesusiźkiś pewkśićha: — ¿Ni Yöś śuma kintu parliśxapa werhnakki ćhhulut päśt wakiśasaxo?

²⁹Jesusaki ninakźkiś qhäśićha: — Yöśki nïź kuchanźkita źoñźkiśqaś kirïñi pekćha, nïćha ni päś wakiśiñiki.

³⁰Neqhśtan ni źoñinakaki Jesusiźkiś pewkśićha: — ¿Amki wethnakakiś ćhhul chimpum theźnas, werhnakki xalla ni cherźku amkiś kiriyasaćha? ¿Ćhhulut am luraśiśnakaxo?

³¹Wethnaka achchi ephnakaki ni ch'eqti yoqkin maná lulhchićha, xalla ni khjirtaki tuź khićha: ‘Tsewkta yoqkiśtan t'anta lulhqatchićha.’

³²Neqhśtan Jesusaki ninakźkiś qhäśićha: — Anćhukakiś cheqpachal khiwćha, Moisesaki anaćha ni tsewkta yoq t'anta thächiki, ans weth Ephćha ni werar tsewkta yoq t'anta thäñiki.

³³Xalla ni Yöś t'antaki ni tsewkta yoqkiśtan śhujźkichićha, niźaśa nïćha ti źoñinakźkiś źeti thäñiki.

³⁴Neqhśtan ninakaki nïźkiś maychićha: — Tata, wethnakakiś ni t'antapanź thälla.

³⁵Neqhśtan Jesusaki ninakźkiś khichićha: — Werhtćha ni źetchiś t'antitki. Xalla ni wethkin thonñiki anaź wira ćhheri eksqatakićha; niźaśa ni wethkiś kirïñiki anaź wira qhaś pekakićha.

³⁶Niźaśa werhki anćhukakiś chïchinla, anćhukki werh cherźkumi anapanź werh kirïćha.

³⁷Niźaśa thappacha weth Epiź wethkiś thätaki wethkiśpanź thonakićha, niźaśa ni wethkiś thonñiki anal śawnku chhetqataćha.

³⁸Niźaśa werhki anaź weth quśkama päyi ni tsewkta yoqkiśtan śhujźkichin, ans werh kuchanźkiñi Ephź quśkama päyi thonchinćha.

³⁹Xalla ni thapa quśtan Epiź werh kuchanźkitaki, niźaśa nïź wethkiś thätaki anal thatnaćha, ans ni tukuśiñi thuñkiś jakatatakićha.

⁴⁰Xalla tïćha ni werh kuchanźkiñiź quś pekaki, thappacha ni Yöś Mati cherśñinaka niźaśa nïźkiś kirïñinaka wiñay źetchiś khekićha; niźaśa werhki ni tukuśiñi thuñkiśiki jakatatsqattaćha.

⁴¹Niźaśa ni Jesusaki thurt'ichićha: “Werhtćha ni tsewkta yoqkiśtan śhujźkichi t'antitki.” Xalla neqhśtan ni judiu źoñinakaki Jesusiźxapa chuchchićha:

⁴²Niźaśa tuź khikan: — ¿Anax ti Jesusaki ni Joseź machhxo? Niźaśa ućhumnakki tïź mä ephź paxla. ¿Qhaźt tïśti ni tsewkta yoqkiśtan śhujźkichinćha khesaxo?

⁴³Neqhśtan Jesusaki ninakźkiś khichićha: — Ni chuchiź apatata.

⁴⁴Niźaśa ni werh kuchanźkiñi Epiź ana śhikanaki, anaź jëkhmi wethkin thonasaćha, niźaśa werhki ni tukuśiñi thuñkiśiki jakatatsqattaćha.

⁴⁵Xalla ni Yöśkiśtan chïñinakaź khjirtaki tuź khićha: ‘Yöśki thapatiźkiś thaxźnakićha.’ Niźaśa ni Ephźkiśtan thappacha nonśñi źoñinaka niźaśa nïźkiśtan katoqiñinakaki wethkinź thonćha.

⁴⁶“Niźaśa anaź xaqhsiltami ni Eph cherchiki; xalla ni Yöśkiśtan thonñiqaś ni Eph cherchiki.

⁴⁷Xaśiki anćhukakiś cheqpachal khiwćha, xalla ni wethkiś kirïñiki wiñay źetchiśśa.

⁴⁸Niźaśa werhtćha ni źeti thäyin t'antitki.

⁴⁹Xalla ni ch'eqti yoqkin anćhuka achchi ephnakaki maná lulhchićha, niźaśa nuź lulhźkupachami tikhśićha;

⁵⁰Niźaśa werhki ni tsewkta yoqkiśtan śhujźkiñi t'antikiśtan chiyućha, niźaśa xaqhsiltat ti t'antikiśtan lulaćhaxa anaź tikhźnasaćha.

⁵¹Werhtćha ni tsewkta yoqkiśtan śhujźkichi źethñi t'antitki; niźaśa xaqhsiltat ti t'antikiśtan lulaćhax nïki wiñayaź źetakićha. Ni weriź thäś khita t'antaki weth xañchićha. Niźaśa werhki ti źoñinakź źetxapal thäćha.”

⁵²Neqhśtan ni judiu źoñinakaki ninakpora ch'ärassićha tuź khikan: — ¿Xaqnuźt tïki tïź perśun xañchi ućhumnakakiś lulhśxapa thäsaxo?

⁵³Neqhśtan Jesusaki ninakźkiś khichićha: — Cheqpachal khiwćha anćhuk anaź ni źoñź Matź xañchi lulakiź nïki, niźaśa anaź nïź lhokhmi likakiź nïki, anćhukki ana źetchiś khekićha.

⁵⁴Niźaśa weth xañchi lulhñiki niźaśa weth lhokh likhñiki wiñaya źetchiśśa; niźaśa werhki ni tukuśiñi thuñkiś jakatatsqattaćha.

⁵⁵Niźaśa weth xañchiki cheqan ćhherićha, niźaśa weth lhokhki cheqan likhśa.

⁵⁶Niźaśa ni weth xañchi lulhñiki niźaśa weth lhokh likhñiki, wethtan chikapachaź qamćha, niźaśa werhki nïźtan chikapachal qamućha.

⁵⁷Niźaśa ni werh kuchanźkiñi Ephki źetchiśśa, niźaśa werhki nïź khen źetućha, niźtaśaqaś ni wethkiśtan lulhñiki weriź khen źetakićha.

⁵⁸Xalla tïćha ni tsewkta yoqkiśtan śhujźkichi t'antaki. Xalla ti t'antaki anaź ni anćhuka achchi ephnakaź maná t'anta lulhta irataki, ni t'anta lulhźku ninakaki tikhśićha; niźaśa ti t'antikiśtan lulhñiki wiñayaź źetakićha.

⁵⁹Jesusaki ni Cafarnaúm akhs qhuykiś ti ćhhultaqinaka thaxinchićha.

⁶⁰Xalla ti thaxintanaka nonźku wakchi ni Jesusa apśñi źoñinakaki tuź khichićha: — Xalla tïź chïta taqunakaki añcha ch'amaćha; ¿jëkit ti nonźnasaxo?

⁶¹Neqhśtan Jesusaki nïź thaxintanaka chuchñi nayźku, ninakźkiś pewkśićha: — ¿Ti chïta anćhukakiś ćhhaxwqatqaya?

⁶²¿Ni źoñź Mati tuki xaqhsikintaźlaxa xalla nikhu yawñi cherźku, anćhukki qhaźźa khesaxo?

⁶³Niźaśa ni Espiritućha źeti thäñiki; xalla ni źoñiź thätaki anaź ćhhulxapami wakiśićha. Niźaśa ni weriź chïta taqunakaki Espiritućha niźaśa źetićha.

⁶⁴Xalla teqhś anćhukakiśtan ana kirïñi źoñiź źelhćha. Niźaśa Jesusaki tukitanpacha śiśatćha xaqhsilta źoñinaka ana nïźkiś kiriyaćhaxa, niźaśa jëkhtaźlax ni millk'untiñimi.

⁶⁵Neqhśtan Jesusaki wilta khichićha: — Xalla niźtikiśtan anćhukakiś chïchïnćha anaź jëkhmi wethkin thonasaćha, anaźlax weth Epiź qhawźta nïki.

⁶⁶Xalla neqhśtan ni Jesusa apśñi thaxintanakaki ana iya Jesusa apśićha, niźaśa ana iya niźtan oqhlayatćha.

⁶⁷Neqhśtan Jesusaki nïź qhalu piśkchiś thaxintanakźkiś pewkśićha: — ¿Anćhukśaqaś saraqś pekya?

⁶⁸Neqhśtan Simón Piruki nïźkiś qhäśićha: — Tata, ¿werhnakki jëkhźkint oqasaxo? Amki wiñay źetchiś taqunakchiśśamćha.

⁶⁹Niźaśa werhnakki amkiś kirïchinćha, niźaśa am śiśućha amki Criśtumćha źethñi Yöś Matimćha.

⁷⁰Jesusaki ninakźkiś qhäśićha: — ¿Werhki anax anćhuk qhalu piśkchiś illśinxo? Niźaśa anćhukakiśtan tshïsuñaki saxraćha.

⁷¹Xalla nuź chïkuki Jesusaki Judas Iscarioti Simunź machhkiśtanź chiyatćha, nïtaćha Jesusa millk'untiñiki, niźaśa nïki qhalu piśkchiś thaxintanakźkiśtantaćha.