Read Chipaya JUAN 7 Bible Online

JUAN 7 - Chipaya bible

JUAN 7

¹Xalla neqhśtan Jesusaki Galilea yoqaran oqhlayatćha. Niźaśa ana ni judea yoqkiś oqhlayś pekchićha, ni judiu źoñinakaź ni konśxapa qhuran.

²Neqhśtan ni judiu źoñinakź śhujlla qhuyś phiśta waxillaź irantiźkatćha,

³niźaśa nïź laqhnakaki nïźkiś khichićha: — Amki ana teqhś ekla judea yoqa oqa, niźaśa ni am apśñinakaki xalla nikhu ni amiź pätanaka śaqax cherla.

⁴Niźaśa tshi paxta khiś pekñiki anaź xamaśit ćhhultaqinaka päsaćha. Amki waxim tiźtanaka päla thapa ti źoñinakź tukkiś pälla.

⁵Nuź chïkuki nïź laqhnakaki anaź nïźkiś kiriyatćha.

⁶Neqhśtan Jesusaki ninakźkiś khichićha: — Weth oraki imaź irantiźkićha, niźaśa anćhukaltaki ćhhul orami thakśtapanqaśśa.

⁷Niźaśa ni ana Yöś kirïchi źoñinakaki anaź anćhuk ćhhaxwasaćha; ans ni źoñinakaki werh ćhhaxwćha, niźaśa werhki ni ana śuma päñi źoñinakź ujnaka qhanal khiwćha.

⁸Niźaśa anćhukqaź ni phiśta oqa, werhki anal oqaćha; niźaśa weth oraki imaź irantiźkićha.

⁹Xalla ti chïźku Jesusaki Galilea wathkiś eklichićha.

¹⁰Neqhśtan nïź laqhnakaź oqhtan, Jesusaki xamaśit ni phiśta oqhchićha.

¹¹Neqhśtan ni judiu źoñinakaki ni phiśtikiś qhuraćha tuź khikan: — ¿Xaqsikint khes ni źoñixo?

¹²Niźaśa ni tama źoñinakaki añcha nïźkiśtan parlatćha: Yaqhapa źoñinakaki khetćha: “Nïki añcha śuma źoñićha”; niźaśa yaqhapa źoñinakaśaqaś khetćha: “Nïki ana śumaćha źoñi millk'untiñićha.”

¹³Niźaśa ni judiu źoñinakaki Jesusiźkiśtan ana qhanakama parlatćha, ni judiu chawkh jilirinaka eqhsku.

¹⁴Neqhśtan ni Jesusaki phiśta taypi khisnan Timlukiś luśhku thaxni qallantichićha.

¹⁵Neqhśtan ni judiu źoñinakaki iśpantichi, tuź khetćha: — ¿Ana isturiyźku xaqhnuź añcha tiźtanaka ti śiśxo?

¹⁶Jesusaki ninakźkiś qhäśićha: — Weth thaxinśki anaź wethta, ans ni werh kuchanźkiñiźtaćha.

¹⁷Niźaśa xaqhsiltat Yöś quśkama päśpekćhaxa xalla nïki, weth thaxinś paxasaćha Yöśkiśtan thonćhaxa uśh weth quśkamat pawućhaxa.

¹⁸Xalla ni perśun quśkiśtan chïñi źoñiki, ni źoñinaka ni mintaxuqaś chïćha; xalla ni kuchanźkiñiź śuma taqu qhurñiki werarapanź chïćha, niźaśa nïźkiśiki anaź toskar taquki źelhćha.

¹⁹“¿Moisesaki anax anćhukakiś werar lï thächixo? Neqhśtan anćhukki anapan ni lï kaśśinćhukćha. ¿Qhaźtikiśtanź werh konś pekxo?”

²⁰Neqhśtan ni źoñinakaki nïźkiś qhäśićha: — ¡Amki anaśum yenqhaź tantamqaya! ¿Jëkit am konś pekxo?

²¹Neqhśtan Jesusaki ninakźkiś qhäśićha: — Ni weriź śinta milajrulla ni jejś thuñkiś pätikiśtan, anćhukki thappachaź iśpantićha.

²²Niźaśa Moiseski anćhukakiś chïchićha ni źoñi chimpiś usa waqaychaxu, (xalla tïki anaź Moiseskiśtan thonatćha ans ni achchi ephnakźkiśtanź thonatćha), niźaśa anćhukki ni wawź qhxeśqi źerañi xañchilla śhapinćhukćha ni śawatumi.

²³Niźaśa anćhukki ana ni Moisés lï aqślayku ni śawatu jejś thuñkiśimi ni źoñi chimpiś päyinćhukćha, ¿qhaźtikiśtanź wethxapa źaxwxo ni śawatu jejś thuñkiś tshi lä źoñi liwjpacha nïź konkiśtan ćhhetintikiśtanxo?

²⁴Niźaśa anćhukki anaź ni źoñź chercherkiśtanqaś juchjiptaya. Niźaśa źoñi juchjiptaykuki cheqpacha juchjiptaya.

²⁵Neqhśtan yaqhap Jerusalén wathchiś źoñinakaki pewksasi qallantichićha: — ¿Anax ti źoñi konśxapa qhurtaxo?

²⁶Niźaśa xalla neqhśiki qhanaruź parlićha, neqhśtan anaź jëkhmi qhaźkhićha. ¿Ni jilirinakaki ti źoñi paxchex khesaya cheqpacha Mesías khikan?

²⁷Niźaśa ti źoñi xaqhsiktan thonchiźlaxa xalla ni śiśućha werhnakki; niźaśa ni Mesías thonanaki anaź jëkhmi xaqhsiktan thonchi śiśakićha.

²⁸Xalla ni chïñinaka nonźku Jesusaki ni Timlukiś thaxinkan qhana chïchićha: — ¡Niźtaki anćhukki xaqhsikiśtan werh thonchi śiśani! Ans werhki anaź weth quśkama thonchinki, niźaśa anćhukki ni werh kuchanźkiñi anaź paxćha, xalla nïki cheqpachapanćha.

²⁹Xalla ni werh kuchanźkiñi werhkil paxućha xalla nïźkiśtan thonućha.

³⁰Neqhśtan ninakaki tanśpekatćha, ni tanś ora ima irantiźkan anaź xaqhsiltami tanśi atchićha.

³¹Neqhśtan tama źoñinaka nïźkiś kirïchićha, niźaśa tuź khetćha: — Mesías thontanaki, ¿ti źoñźkiśtan tshanti anaź tshan milajrunaka päsaćha?

³²Ni fariseonakaki ni źoñinaka Jesusiźkiśtan chïñi nonźku; neqhśtan ninakaki ni timlu cheqan chawkh jilirinakźtan, Jesusa tanźkaxu timlu cheqśñi śultatunaka kuchanchićha.

³³Neqhśtan Jesusaki khichićha: — Werhki anćhukatan tshi qhaźtallaqaś źelaćha, neqhśtan werhki werh kuchanźkiñiźkinl kuttaćha.

³⁴Niźaśa anćhukki werh qhurakićha, neqhśtan anćhukki anaź werh waćhakićha, niźaśa xaqhsikin werh źelaćhaxa xalla nikhu anćhukki anaź oqi atasaćha.

³⁵Xalla neqhśtan ni judiu źoñinakaki ninakpora pewksasi qallantichićha: — ¿Ti źoñiki xaqhsipan oqasaxo, ućhumnak ana wathśxapaxo? ¿Ni griego źoñinakź wathkin wichansi judiu źoñinakźkin niźaśa ni griego źoñinakźkiś thaxni oqasaya?

³⁶Niźaśa tuź khichićha ‘anćhukki werh qhurakićha, neqhśtan anćhukki anaź werh waćhasaćha, niźaśa xaqhsikin werh źelaćhaxa xalla nikhu anćhukki anaź oqi atasaćha, ¿xalla ti chïtaki qhaźpan khexo?’

³⁷Xalla ni phiśti tukuśinskiś ni chawkh thuñkiś, Jesusaki tshitsku phurhpacha chïchićha tuź khikan: — Xaqhsilta źoñit qhaś pekćhaxa, wethkin thona niźaśa likhźna.

³⁸Xalla ni wethkiś kirïñiki nïź tuśhkiśtanaki źethñi qhaś ulnakićha, xalla nuź khićha ni khjirtikiśiki.

³⁹Jesusaki nuź chïkanaki Espirituźkiśtanź chiyatćha, xalla nïźkiś kirïñi źoñinakaki Espíritu Santuź tanźnakićha; niźaśa Jesusa ima tikhźnan niźaśa ana tsewkta yoqa oqan, xalla ni Espirituki imaź thonatćha.

⁴⁰Neqhśtan ni tama źoñinakźkiśtan ni chïtanaka nonźku, tshi qhaźultan źoñinakaki khichićha: — Tïki cheqpacha Yöśkiśtan chïñićha.

⁴¹Niźaśa yaqhapaśti tuź khetćha: — Tïćha ni Mesiaski. Niźaśa yaqhapanakaśti tuź khetćha: — Mesiaski anaź Galilea yoqkiśtan thonasaćha.

⁴²Xalla ni khjirtaki khićha, ni Mesiaski rey Davidź oqhñikiśtan thonakićha, niźaśa Belén qolta wathkiśtan thonakićha niźaśa ni Davidź wathkiśtan.

⁴³Ni Jesusaź khen ni źoñinakaki t'aqsićha.

⁴⁴Neqhśtan yaqhapanakaki Jesusa tanś pekatćha, niźaśa ana xaqhsiltami tanśñi atchićha.

⁴⁵Ni timlu cheqśñi śultatunakaki ni fariseonakźkin niźaśa timlu chawkh jilirinakźkin kephchićha, neqhśtan ninakźkiś pewkśićha: — ¿Qhaźtikiśtan ni Jesusa ana śhikchinćhuktaxo?

⁴⁶Neqhśtan ni śultatunakaki qhäśićha: — ¡Anapanź xaqhsilta źoñimi niźta chïchiki!

⁴⁷Neqhśtan ni fariseo źoñinakaki khichićha: — ¿Niźaśa anćhukmi millk'untis qatchinćhukćha?

⁴⁸¿Xaqhsilta ućhumnaka irpiñi chawkh jilirit nïźkiś kirïchixo, uśh fariseo źoñinakźkiśtax nïźkiś kirïchi?

⁴⁹Xalla ni Jesusiźkiś kirïchi źoñinakaki anaź Moisés lï paxćha, xalla niźtikiśtan Yöśki ninaka kaśtikakićha.

⁵⁰Neqhśtan Nicodemo fariseonakźkiśtan tshi wën Jesusa cherśñi oqhchiki, ninakźkiś khichićha:

⁵¹— Ima nonźkanaki niźaśa nïź pätanaka ana śiśku, ućhum lïkiśiki anaź ujchiśśamćha khesaćha.

⁵²Neqhśtan ninakaki qhäśićha: — ¿Amki Galileo źoñimśaqaśqaya? Niźaśa amki ni khjirtanaka cherźna, Galilea yoqchiś źoñinakaki anapan Yöśkiśtan chïñi ulanchiki.

⁵³Xalla neqhśtan ni źoñinakaki śapamayni perśun qhuya oqhchićha.