Read Chipaya JUAN 8 Bible Online

JUAN 8 - Chipaya bible

JUAN 8

¹Xalla neqhśtan Jesusaki Olivu khita turu oqhchićha.

²Neqhśtan xaqataźu qhanźkan Jesusaki Timlu kephchićha. Niźaśa źoñinakaki nïźkiś makhatźkichićha, neqhśtan Jesusaki neqhś julźku ninakźkiś thaxni qallantichićha.

³Neqhśtan ni lï utt'ayñinaka niźaśa ni fariseo źoñinakźtan tsha źon chhichchićha, ninakaki na źon iź iźñi tanqalćha. Neqhśtan ni źoñinakź taypikiś na źon tshitsqatchićha.

⁴Neqhśtan Jesusiźkiś khichićha: — Thaxiñi, ta źonki yaqha źoñźtan iźñipacha tanchinćha.

⁵Niźaśa ni Moisés lïkiśiki tuź khićha, xalla tiźta päñi mätaqanakaki maśtan ćhakhxawi konakićha, ¿xaśiki am qhaźum khexo?

⁶Ni źoñinakaki Jesusa ujkiś thxotśxapa nuź pewkśićha, xalla neqhśtan ujchiśamćha khiśxapa. Neqhśtan Jesusaki yoqkiś pokt'iźku yoqkiś nïź lok'anźtan khjiri qallantichićha.

⁷Neqhśtan ni źoñinakaź tira ni pewknan, Jesusaki ninakźqhutñi cherźku khichićha: — Anćhukakiśtan ana ujchiś źoñix, ta źonakiś tuki maśtan ćhäki qallantila.

⁸Neqhśtan Jesusaki wilta yoqqhutñik kolźku tira khjirchićha.

⁹Xalla ti nonźku ni źoñinakaki perśun quśkiś näśku nïźxaru nïźxaru oqi qallantichićha, chawkh źoñinakaćha oqi qallantichiki niźaśa tho thowanakźkiś źerśićha. Neqhśtan Jesusaki na źonatanqaś neqhś eklichićha.

¹⁰Neqhśtan Jesusaki na źonaqhutñi cherźku khichićha: — Kullaka, ¿xaqhsikin ninakaxo? ¿Ana xaqhsiltami am ujchiśśa khichiqaya?

¹¹Neqhśtan na źonki qhäśinćha: — Tata, anaź jëkhmi Jesusaki näkiś khichićha: — Werhmi anal amkiś ujchiśamćha khiyi atasaćha; xaśiki amki oqa niźaśa anam iya uj päkićha.

¹²Neqhśtan Jesusaki wilta ni źoñinakźqhutñi oqhchićha, niźaśa ninakźkiś tuź khikan: — Werhki ti źoñinakź qhanćha; xalla ni werh apśñiki anaź sumchi laqhkiś oqhlayakićha, ans qhan źetchiś khekićha.

¹³Niźaśa ni fariseo źoñinakaki nïźkiś khichićha: — Amki am tukatum ti źoñinakźkiś thaxinćha: Ti amiź thaxintaki anaź wakiśićha.

¹⁴Neqhśtan Jesusaki ninakźkiś qhäśićha: — Qhaźtami werhpachamil weth tukaku thaxnuchiya, xalla ti weriź thaxintaki wakiśićha. Niźaśa weril śiśućha xaqhsikiśtan thonchinźlaxa niźaśa xaqhsit oqućhaxa; niźaśa anćhukśti anaź śiśśa.

¹⁵Niźaśa anćhukki źoñź quś xaruź juchjiptayćha. Niźaśa werhki anal jëkhmi juchjiptayućha.

¹⁶Niźaśa werh juchjiptaytaki werarkiśtanpanćha, niźaśa anal werh śina juchjiptayućha, ans werh kuchanźkiñi Ephźtan juchjiptayućha.

¹⁷Niźaśa anćhuka lïkiśiki tuź khjirtaćha, pukultan cherñi źoñinaka tshïqat chïćhax nïki wakiśićha.

¹⁸Niźaśa werhpachaćha weth tukatu cherinki, niźaśa werh kuchanźkiñi Ephćha tshi cherñiki.

¹⁹Neqhśtan nïźkiś pewkśićha: — ¿Am Eph xaqhsikintaxo? Jesusaki ninakźkiś qhäśićha: — Anćhukki anaź werh paxćha, niźaśa weth Ephmi anaź paxćha; niźaśa anćhukki werh paxasaź nïki weth Ephśaqaś paxasaćha.

²⁰Jesusaki ni Timlukiś thaxinkan ni ofrenda thäś kajunanakiśtan tinaka chïchićha, niźaśa anaź jëkhmi ni tanchiki, niźaśa ni tanś oraki imaśitaćha.

²¹Jesusaki wilta ninakźkiś khichićha: — Werhkil oqućha, niźaśa anćhukki werh qhurakićha, xalla neqhśtan anćhukki anćhuka ujkiśtan tikhźnakićha. Xaqhsikin werh oqaćhaxa, anćhukki xalla nikhu anaź oqi atasaćha.

²²Neqhśtan ni judiu źoñinakaki khichićha: — ¿Xalla tïki perśunpacha tikhś pinsiqaya, xalla neqhśtan ućhumnakki ana tïźkin oqi atasaćha khiya?

²³Niźaśa Jesusaki ninakźkiś khichićha: — Anćhukki ti qostićhukćha, niźaśa werhki tsewktitćha; niźaśa anćhukki ti yoq źoñćhukćha, niźaśa werhki anaćha ti yoqchiś źoñtki.

²⁴Xalla neqhśtan anćhukakiś khichinćha, anćhukki anćhuka ujkiśtan tikhźnakićha; niźaśa anćhukki anaź wethkiś kiriyakiź nïki, anćhukki anćhuka ujkiśtan tikhźnakićha.

²⁵Neqhśtan ninakaki nïźkiś pewkśićha: — ¿Amki jëkimtaxo? Jesusaki ninakźkiś qhäśićha: — Tukintanpacha anćhukakiś chïchïnćha.

²⁶Niźaśa wethtaki anćhukakiś wakchiź chïśnaka źelhćha, niźaśa anćhuka ujkiśtan juchjiptayśmi, xalla ni werh kuchanźkiñiki cheqpachapanź chïćha, niźaśa werhki nïźkiśtan nonźku ti źoñinakźkiś chiyućha.

²⁷Xalla ni źoñinakaki anaź nïź Ephźkiśtan chïñi näśnatćha.

²⁸Xalla neqhśtan Jesusaki ninakźkiś khichićha: — Anćhukaź ni źoñź Mati kuruśhkiś ch'awkwan, xalla neqhśtan anćhukki werh paxakićha, niźaśa werhki anal weth quśkama pawućha; niźaśa weth Epiź thaxintaqaś chiyućha.

²⁹Xalla ni werh kuchanźkichiki wethtan chikapachaćha; niźaśa weth Ephki ana werh śinalla ekñićha, niźaśa werhki nïź quś pekapan päyinćha.

³⁰Jesusaź nuź chïtikiśtan, tama źoñinakaki nïźkiś kirïchićha.

³¹Neqhśtan Jesusaki nïźkiś kirïchi, judiu źoñinakźkiś khichićha: — Niźaśa anćhukki ti weth tawqkiś cheqpachapanź thurt'akiź nïki, anćhukki cheqpachapan weth thaxintanaka khekićha;

³²niźaśa anćhukki cheqpachaź paxakićha, niźaśa ni cheqpachaki anćhuk liwriyakićha.

³³Neqhśtan ninakaki Jesusiźkiś qhäśićha: — Werhnakki Abrahamźkiśtan oqinćha, niźaśa werhnakki anapan xaqhsiltiź qharkiś źelhchinćha; ¿xaqnuźum amki liwriź khekićha khexo?

³⁴Jesusaki ninakźkiś khichićha: — Cheqpachal khiwćha thappacha ni uj päñinakaki ujź attanakaćha.

³⁵Niźaśa tshi uywitaki anaź tshi qhuy źoñinakźtan tira źelasaćha; niźaśa tshi perśun matiki qhuy źoñinakźtan tirapanź źelakićha.

³⁶Xalla ni Machh anćhuk liwriyakiź nïki, anćhukki cheqpacha liwriź khekićha.

³⁷Niźaśa werhki anćhuk śiśućha Abrahamźkiśtan oqhñi; niźaśa anćhukki ni weth taqu ana nonźinźku werh konś pekćha.

³⁸Niźaśa werhki weth Epiź thëźtal chiyućha; niźtaśaqaś anćhukki ni Ephźkiśtan nonźta päkićha.

³⁹Neqhśtan ninakaki khichićha: — ¡Abrahamćha wethnaka ephki! Jesusaki ninakźkiś khichićha: — Anćhukki Abrahamź matiź khesaź nïki, Abrahamź pätanakaź päsaćha.

⁴⁰Niźaśa werhki ni Yöś wethkiś thaxinta cheqpacha anćhukakiś chïchïnćha, niźaśa anćhukki werh konś pekćha. ¡Abrahamki anapan niźtanaka pächićha!

⁴¹Niźaśa anćhukki anćhuka ephź päyinaka xalla niźta irataź päćha. Ninakaki Jesusiźkiś khichićha: — ¡Werhnakki anaćha iźiwir mä ephźkiśtan oqinki; niźaśa werhnakki tshi Ephchiśtćha, xalla nïki Yöśśa!

⁴²Neqhśtan Jesusaki ninakźkiś qhäśićha: — Niźaśa anćhuka ephki cheqpacha Yöś khesaź nïki, anćhukki werh oqźnasaćha, niźaśa werhki Yöśkiśtan ulanźku teqhś thonchinćha. Niźaśa werhki anaź weth quśkiśtan thonchinki, ans Yöśśa werh kuchanźkichiki.

⁴³¿Anćhukki qhaźtikiśtanź weriź chïtanaka ana näśxo? Niźaśa anćhukki qhaźtikiśtan anaź weth taqu nonźxo.

⁴⁴Anćhuka ephki Saxraćha; niźaśa anćhukki nïź pektakamaź päś pekćha, niźaśa ni Saxraki tukitanpacha źoñi konñipantaćha niźaśa cheqpachkiś anapan waqaychichićha, niźaśa anapan werara chïñićha. Niźaśa toskara chïkuki nïźkiśtan śumaźtaqaś chïćha; xalla nïki toskarapanćha niźaśa nïki toskarź ephćha.

⁴⁵Niźaśa werhki anćhukakiś cheqpachapan chiyućha, anćhukśti anaź werh kirïćha.

⁴⁶¿Xaqhsilta anćhukakiźtan weth uj thëźnasaxo? Niźaśa werhki werarapan chïnćha, ¿qhaźtikiśtan anćhukki ana werh kirïxo?

⁴⁷Niźaśa ni Yöśtan khiñiki, Yöś taqunakapanź nonźa; niźaśa anćhukki anaź Yöśtan, xalla neqhśtan anćhukki anaź nonś pekćha.

⁴⁸Neqhśtan ni judiu źoñinakaki Jesusiźkiś khichićha: — Werhnakki amkiś yaqha wathchiś źoñi, niźaśa anaśum yenqhaź tanta khikuki waliqaś chïchïnćha.

⁴⁹Jesusaki ninakźkiś qhäśićha: — Werhki ana ćhhul anaśum yenqhichiśtćha. Niźaśa werhki weth Ephźkiśtan śumanakal pawućha; ans anćhukki werh ćhhaxwćha.

⁵⁰Niźaśa werhki anal źoñinakaź aynaqtakhiś pekućha; tshi źoñiź ni qhurćha niźaśa nïź ni juchjiptayakićha.

⁵¹Niźaśa cheqpachal khiwćha xaqhsilta źoñit weth taqu kaśaćhaxa, xalla nïki anaź tikhźnakićha.

⁵²Neqhśtan ni judiu źoñinakaki Jesusiźkiś qhäśićha: — Xaśiki werhnakki quś źetchinćha amki anaśum yenqhaź tantam panqalala. Niźaśa Abrahamki niźaśa ni Yöśkiśtan chïñi źoñinaka thappacha tikhśićha, niźaśa amki khićha: ‘Xaqhsilta źoñit weth taqu kaśaćhaxa, xalla nïki anaź tikhźnakićha.’

⁵³¿Niźaśa amki wethnaka Abraham ephźkiśtan tshantim khesqhaźtataxo? Abrahammi tikhśićha niźaśa ni Yöśkiśtan chïñinakami tikhśiśaqaśśa. ¿Amśti ćhhul źoñipanim khesaxo?

⁵⁴Jesusaki ninakźkiś qhäśićha: — Niźaśa werhki perśunpachal aynaqasaź nïki, ni weriź aynaqta anaź wakiśasaćha. Xalla ni werh aynaqñiki weth Ephćha, niźaśa anćhukki nïźkiśpacha weth Yöśśa khićha.

⁵⁵Niźaśa anćhukki anaź ni paxćha, weril ans paxućha; niźaśa werhki anal paxućha khesaź nïki, anćhuk irata toskaral khesaćha. Niźaśa werhki cheqpachapan paxućha niźaśa nïź taqunaka kaśinćha.

⁵⁶Niźaśa anćhuka achchi Abraham ephki, ni weth thuñi cherśxapa chipchićha; niźaśa nïki cherchićha neqhśtan añcha chipchi khissićha.

⁵⁷Neqhśtan ni judiunakaki Jesusiźkiś khichićha: — Amki ima ni taxśnuku qhalu watchiśśamćha, ¿niźaśa amki Abraham cherchinćham khila?

⁵⁸Neqhśtan Jesusaki ninakźkiś qhäśićha: — Cheqpachal khiwćha werhki Abrahamź tukitanpacha źelućha.

⁵⁹Xalla neqhśtan ni źoñinakaki Jesusa ćhakhśxapa maś tanśićha; niźaśa Jesusaki ni Timlukiśtan śhoxśaka ninakź taypi ulanchićha.