Read Chipaya JUAN 9 Bible Online

JUAN 9 - Chipaya bible

JUAN 9

¹Niźaśa Jesusaki neqhśtan ulanźku oqhkan mathtikiśtanpacha tshi śur źoñi cherchićha.

²Neqhśtan nïź thaxintanakaki nïźkiś pewkśićha: — Thaxiñi, ¿ti źoñi qhaźtikiśtan śura mathtataxo? ¿Tïź mä ephź ujkiśtanqay, uśh tïź perśun ujkiśtanxa?

³Jesusaki ninakźkiś qhäśićha: — Anaź nïź perśun ujkiśtan niźaśa añćha nïź mä ephź ujkiśtanami; ans nïźkiś Yöś aśi thëźnax khitaćha.

⁴Niźaśa ni werh kuchanźkiñiź päyinaka thuñ qhankiś päś wakiśićha; niźaśa wën khisnanaki anaź jëkhmi lanqźa.

⁵Niźaśa werhki ti yoqkiś khikanaki, ti źoñinakź qhantćha.

⁶Xalla nuź chïźku Jesusaki llawsa yoqkiś thjutśićha, neqhśtan thjutta llawsiźtan ni phila patźku ni śur źoñź źhukkiś thxalźinchićha.

⁷Neqhśtan Jesusaki nïźkiś khichićha: — Amki ni Siloé xalśur ćhakkin axunźka (xalla ni Siloeki tuź khićha: “Kuchanźkita”). Neqhśtan ni śuraki xalla nikhu oqhźku axwśićha, xalla neqhśtan kephźkikan cherñi khissićha.

⁸Niźaśa nïź qhuy źkati khiñi źoñinakami niźaśa ni tuki cherchinakami tomanqśi cherñitaćha, neqhśtan ninakpora pewksasatćha, tuź khikan: — ¿Anax tïki ni tomanqśxapa julhśñitaya?

⁹Neqhśtan yaqhapanakaki tuź khetćha: — Jë ti panśaćha. Niźaśa yaqhapanakaki khetćha: — Anaćha ni źoñi tïki, ni khewk khichimiźlani. Niźaśa ni źoñipachaź khetćha: — Jë werhtćha.

¹⁰Xalla neqhśtan nïźkiś pewkśićha: — ¿Xaqnuźum am xaśiki cherxo?

¹¹Neqhśtan nïki ninakźkiś qhäśićha: — Xalla ni Jesusa khita źoñiki phila patźku weth źhukkiś thxalźinchićha, neqhśtan wethkiś khichićha: ‘Ni Siloé khita xalśur ćhakkin oqźku axwźka.’ Neqhśtan werhki nikhu oqźku, niźaśa weriź ni qhaśtan axwźtan cherñi khissinćha.

¹²Neqhśtan nïźkiś pewkśićha: — ¿Ni źoñi xaqhsikintaxo? Nïki ninakźkiś khichićha: — Werhki anal śiśućha.

¹³Xalla ni Jesusaź phila patźku ni śur źoñi ćhhetinta thuñiki śawatutaćha,

¹⁴xalla niźtikiśtan ni fariseonakźkin ni ćhhetinta śura chhichchićha,

¹⁵Neqhśtan ninakaki nïźkiś pewkśićha, amki xaqnuźupan cherñi khissamtaxo. Nïki ninakźkiś qhäśićha: — Weth źhukkiś phila pattiźtan thxalźinchićha, neqhśtan werhki axunźku cherñi khissinćha.

¹⁶Niźaśa yaqhap fariseo źoñinakaki khichićha: — Xalla ti pächiki anaź Yöśkiśtan khesaćha, xalla nïki anaź śawatu kaśśa. Niźaśa yaqhapanakaśti tuź khetćha: — ¿Xaqnuźupan tiźta chimpunaka niźaśa milajrunaka päsaxo, nïki ujchiś źoñila? Neqhśtan ninakpora t'aqsićha,

¹⁷neqhśtan wilta ni ćhhetinta śurźkiś pewkśićha: — Xaśiki am cherñi khisqatchila, ¿nïźkiśtan xaqnuźum khexo? Neqhśtan nïki qhäśićha: — Werhkil khiwćha Yöśkiśtan chïñićha.

¹⁸Ni śur źoñiź cheran ni judiu źoñinakaki ana ni śura kiriyatćha, niźtikiśtan ninakaki nïź mä eph qhawźinchićha

¹⁹niźaśa ninakźkiś pewkśićha: — ¿Tïki am machhqaya? Niźaśa anćhukki khićha tïki śurapan mathtaćha, ¿xaśiki xaqnuźupant cherxo?

²⁰Neqhśtan nïź mä ephki qhäśićha: — Werhnakki ti śiśućha tïki wethnaka matipanćha, niźaśa tïki śurapan mathtaćha.

²¹Niźaśa werhnakki anal śiśućha xaqhnuźuqat cherćhani, niźaśa werhnakki anal śiśućha jëkhqat ti cherñi khisqatćhani. Anćhukki tïqaź pewkźnani; tïki źoñ oqkiś thonchićha tïpachaź chiyasaćha.

²²Niźaśa nïź mä ephki eqhskuqaś nuź chïchićha, ni judiu źoñinakaki ni Jesusa Mesías khita paxñi, ni akhs qhuykiśtan chhetqatś palt'ichitaćha.

²³Neqhśtan nïź mä ephki nuź khichićha: “Tïqaź pewkźnani, tïki źoñ oqkiś thonchićha.”

²⁴Niźaśa ni judiu źoñinakaki wilta ni ćhhetinta śur źoñi qhawsqatchićha, niźaśa nïźkiś khichićha: — Yöś tukkiś cheqpachaź maśnalla. Werhnakki ti źoñi ujchiś śiśućha.

²⁵Neqhśtan nïki ninakźkiś qhäśićha: — Ni źoñi ujchiś uśh ana ujchiś anal śiśućha. Ans werhki śiśućha, werhki śurtaćha xaśikil cherućha.

²⁶Neqhśtan wilta nïźkiś pewkśićha: — ¿Qhaź am khichitaxo? ¿Xaqhnuź am źhuki ćhhetinśxapa pächitaxo?

²⁷Nïki ninakźkiś qhäśićha: — Waxa anćhukakiś chïchinla, anćhukki anaź werh kaśśa. ¿Qhaźtikiśtanź wilta chïñi pekxo? ¿Niźaśa anćhukśaqaś ni apś pekqaya?

²⁸Neqhśtan nïźkiś ar arźku khichićha: — Amki ni źoñź thaxintapanim khećhani; niźaśa werhnakki Moisés thaxintal khećha.

²⁹Niźaśa werhnakki Moiseskiś Yöś palxaychi śiśućha, niźaśa ni źoñźkiśtan anal śiśućha xaqhsikiśtanqaś thonchiźlani.

³⁰Neqhśtan ni źoñiki ninakźkiś qhäśićha: — ¡Tïki añcha tshematala! Anćhukki anaź śiśśa xaqhsikiśtan ulanchi, niźaśa wethkiśiki weth źhuki cherqatchićha.

³¹Niźaśa ućhumnakki śiśśa Yöśki ni ujchiśnaka anaź nonźa; niźaśa Yöśki nïź quśkama oqhñinaka niźaśa ni amtiñinakźkiś nonśñićha.

³²Niźaśa ana tshi śura mathta źoñź źhuki ćhhetinta kintu nonśtaćha.

³³Niźaśa ti źoñiki anaź Yöśkiśtan thonasaź nïki, anaź ćhhulumi päyi atasaćha.

³⁴Neqhśtan ninakaki ni źoñźkiś khichićha: — Amki uj śhipi mathtamćha, ¿xaśiki wethnakakiś thaxinśim pekqaya? Neqhśtan ninakaki ni źoñi ni akhs qhuykiśtan chhetqatchićha.

³⁵Jesusaki ni śur źoñi chhetqatta kintu nonchićha; neqhśtan ni źoñźtan śalźku nïźkiś pewkśićha: — ¿Amki ni źoñź Machhkiśim kirïqaya?

³⁶Ni źoñiki nïźkiś khichićha: — Tata, amki wethkiś chiyalla jëkhpan ni źoñixo, neqhśtan werhki nïźkiś kiriyasala.

³⁷Jesusaki nïźkiś qhäśićha: — Jëkhźtanam parlićhaxa xalla nïki werhtćha, niźaśa amki cherchamćha.

³⁸Neqhśtan ni źoñiki Jesusiź tukkiś killśku khichićha: — Tata, kiriyućha.

³⁹Neqhśtan Jesusaki nïźkiś khichićha: — Werhki ti źoñinaka juchjiptayśxapa thonchinćha, niźaśa ni śuranaka cheraxu, niźaśa ni cherñi źoñinaka śura khisnaxu.

⁴⁰Neqhśtan yaqhap fariseo źoñinaka nïźtan chika źelatćha, xalla ni nonźku nïźkiś pewkśićha. — ¿Werhnakki śur źoñinakaźtaqaś khesaxo?

⁴¹Jesusaki ninakźkiś qhäśićha: — Anćhukki śuraź khitasaź nïki, ni anćhuka ujkiśtan anaź ujchiś khitasaćha. Niźaśa anćhukki cherućha khićha xaśiki ujchiśćhukćha.