Read Chipaya HECHOS 25 Bible Online

HECHOS 25 - Chipaya bible

HECHOS 25

¹Neqhśtan ni Festo jiliriki ni yoqkiś irpiñi jiliri tanśñi thonchićha, neqhśtan chheph maxkiśtan nïki Cesarea wathkiśtan Jerusalén watha oqhchićha.

²Xalla ni wathkiś ni timlu jilirinakaki niźaśa ni judiu cheqan źoñinakami, tinakaki Pawlu kijchićha.

³Niźaśa ni źoñinakaki ni Festo jiliri rokt'ichićha, ni Pawlu Jerusalén watha thonqataxu. Niźaśa ninakź amtaki ni jikhśkiś thonan konqatśxapataćha.

⁴Neqhśtan Festuki ninakźkiś qhäśićha, ni Pawluki Cesarea wathkiś tirapan chawkhta źelakićha, niźaśa ni pachaź ni tshi qhaź maxkiśtan Cesarea watha oqhś pekatćha.

⁵Neqhśtan ninakźkiś khichićha: — Xalla niźtikiśtan anćhuka jilirinakaki wethtan chika Cesarea watha oqhśtanćha, niźaśa ni źoñiki uj pächiźlax nïki, anćhukki niwkhpacha ujchiś jestanćha.

⁶Niźaśa ni Festo jiliriki ni Jerusalén wathkiś śiman jila źelhchićha, xalla neqhśtan Cesarea watha kephchićha. Neqhśtan xaqataźupacha nïź juchjiptayś julśkiś julśićha, neqhśtan Pawlu qhawźkax khichićha.

⁷Niźaśa ni Pawluź luśhtan, ni Jerusalén wathkiśtan thonchi judiu źoñinakaki, Pawluźkin makhatchićha, neqhśtan ninakaki thapa anawal ćhhultaqinakkiśtan ni Pawlu kijchićha, niźaśa ninakaki Pawluź uj anapan jesi atchićha.

⁸Niźaśa ni Pawluki perśunpacha thurt'atćha, tuź khikan: — Werhki anapan ćhhul ujmi pächinćha, ni judiu źoñinakź lïxapami, niźaśa ana ni timluxapami niźaśa ana ni roman irpiñi jilirźxapami.

⁹Neqhśtan ni Festuki ni judiu źoñinakź pekta khiśxapa, Pawlu pewkśićha: — ¿Amki Jerusalén watham oqasaya? Werhki ni am ujkiśtan nakhul juchjiptayasaćha.

¹⁰Neqhśtan Pawluki qhäśićha: — Werhki ni roman irpiñiź juchjiptayś qharkiśtćha, xalla neqhśi werhki juchjiptayta khiśtanćha. Anćhukki śumaź śiśśa werhki anapan ni judiu źoñinakźta ana wali pächinćha.

¹¹Niźaśa werhki tshi anawal uj pächinźlax nïki, xalla ni ujkiśtan konta khiś wakiśućhax nïki, werhki anal tikhśmi jiwjatućha; niźaśa anat ćhhulumi werara źelhćhax nïki, ni anćhukaź wethkiś uj thxotantikiśtan, anaź jëkhmi werh ninakźkiś thäsaćha. Niźaśa werhki khiwćha ni irpiñipachax werh juchjiptayla.

¹²Neqhśtan Festuki nïź jilir maśinakkiś pewkśićha, neqhśtan Pawluźkiś khichićha: — Niźaśa amki ni irpiñi jilirźkin juchjiptayta khiś maychamćha, xaśiki ni irpiñiźkinam oqakićha.

¹³Neqhśtan tshi qhaź maxkiśtan ni irpiñi Agripaki niźaśa Berenice kullakatan Cesarea watha oqhchićha, ni Festo jiliri tsäni.

¹⁴Niźaśa ninakaki xalla nikhu tshi qhaź max qamchićha, neqhśtan ni Festo jiliriki ni Pawluźkiśtan ni irpiñiźkiś kint'ichićha, tuź khikan: — Xalla teqśi tshi tanata źoñi, Félix ekta źelhćha.

¹⁵Niźaśa weriź ni Jerusalén wathkiś źelan, ni timlu chawkh jilirinakaki niźaśa ni judiu qamchi ephnakami, tinakaki wethkiś ti Pawlu kijchićha, niźaśa kontax khila khichićha.

¹⁶Neqhśtan werhki ninakźkiś qhäśinćha, xalla ni roman jilirinakaki anapan xaqhsilta źoñimi konqatś ussiśśa, ima ni kijñi źoñźtan qhanaraskuki, niźaśa nïź ujkiśtan thurt'iśxapaki.

¹⁷Xalla niźtikiśtan ninakaź teqhś thontan, werhki anapan en enchinćha, ans xaqataźupacha ni juchjiptayś julśkiś julśinćha, neqhśtan ni źoñi qhawsqatchinćha.

¹⁸Niźaśa nïźtan ćhhaxwqatñi źoñinakaki thonźku anapan nïźtan ch'ärassićha, niźaśa anapan weriź pinsita ujnakami thëśñi atchićha.

¹⁹Niźaśa ninakaki nïź moq'u tshillaqaź chiyatćha, ninakź yöś amtiś uskiśtanqaś chïchićha, niźaśa tshi tikhśi Jesús thükiśtan chïchićha, niźaśa ni pawluki khićha źetćha ni źoñiki.

²⁰Niźaśa werhki ti kijkiśtan anapan qhaźkhiyi atchinćha, neqhśtan Pawlu pewkśinćha Jerusalén watham oqasay khikan, niźaśa ti ćhhultaqkiśtan juchjiptayta khiśxapa.

²¹Ans nïpachaćhaź ni irpiñi chawkh jiliriź juchjiptayta khiś maychiki, neqhśtan werhki ni Cesarźkin kuchanśkama chawkhta źelax khichinćha.

²²Neqhśtan ni Agripaki ni Festuźkiś khichićha: — Werhśaqal ti źoñi nonś pekućha. Neqhśtan Festuki nïźkiś qhäśićha: — Amki xaqawenśpacham nonźnakićha.

²³Neqhśtan xaqataźupacha Agripźtan niźaśa Berenisatan thonźku ni paqh qhuykiś añcha thapa quś śuśhśicha, niźaśa ni śultat chawkh jilirinakźtan chika, niźaśa ni wathchiś cheqan źoñinakźtan. Neqhśtan Festuki ni Pawlu qhawsqatchićha,

²⁴neqhśtan khichićha: — Irpiñi Agripa, niźaśa wethnakatan teqhś akhsi tatanaka: Xalla teqhśićha ti źoñiki. Thappacha ni judiu źoñinakaki wethkiś ti źoñi ujchiśśa khikan śhikchićha, niźaśa ni Jerusalén wathkin niźaśa ti Cesarea wathkiś, niźaśa ninakaki ti źoñi kontax khila khikan qhawkan chïćha;

²⁵Niźaśa wethkiśiki ti źoñiki anapanź konta khiś uj pächiki. Ans tïpachaćha ni irpiñi Cesarźkiś juchjiptayta khiś maychiki, neqhśtan werhki nïźkin kuchanś quś thutśinćha.

²⁶Niźaśa wethtaki anaź qhanakama khjirś uj źelhćha, xalla ni irpiñi Cesarźkinaki ti Pawluźkiśtanaki, neqhśtan anćhukakiśl śhikućha, niźaśa am qharkiś irpiñi Agripa, xalla ti pekunźku wethtaki tshi qhaźtallami khjirś źelasaćha.

²⁷Niźaśa wethkiśiki tshi tanta źoñi ana ujchiś kuchanśki, anal śuma nayućha.