Read Chipaya HECHOS 3 Bible Online

HECHOS 3 - Chipaya bible

HECHOS 3

¹Tshi nöxiki Piruźtan Juanźtan śeśike mayiśiś ora Timlukin mayiśi oqhchićha.

²Xalla nikhu ni Timlukiś tshi nïź mathtikiśtanpacha śuch źoñi źelatćha, xalla ni śuchuki śapuru ni Timlu chhichñitaćha niźaśa ni Hermosa khita śankiś nonśpantaćha, neqhśtan neqhś luśhñinakźkiśtan tomanqźnaxu.

³Neqhśtan ni śuch źoñiki, ni Piruźtan Juanźtan Timlu wax luśhñi cherźku ninakźkiśtan päś tomanqśićha.

⁴Neqhśtan ninakaki sutpacha ni źoñi cherźku, Piruki nïźkiś khichićha: — Werhnak cherźka.

⁵Neqhśtan ni źoñiki ninaka sutpacha cherśićha, wethkiś ćhhulullameqat onä khikan pinsikan.

⁶Xalla neqhśtan Piruki nïźkiś khichićha: — Wethtaki anaź päś źelhćha niźaśa anaź qorimi źelhćha, ans wethta źelhñil amkiś thäćha: Jesucriśtu Nazaretź thükiś, tshitsku oqa.

⁷Xalla nuź chïźku Piruki ni źoñź źewqharku tanźku tshitsqatchićha, neqhśtan ni orapacha ni źoñź spömi thupi khissićha niźaśa nïź qhxoch moqumi.

⁸Neqhśtan ni śuch źoñiki tshi layśku tshitsićha niźaśa oqhlayi qallantichićha; xalla neqhśtan ninakźtan chika Timlu luśhśićha, niźaśa Yöś alt'ikan perśun qhxochśtan oqhkan niźaśa lay laykan luśhśićha.

⁹Neqhśtan thappacha ni źoñinakaki ni źoñi Yöśkin alt'ikan oqhlayñi cherchićha,

¹⁰niźaśa ni źoñinakaki añcha tsukhchi eqhsnatćha ni źoñiź źettikiśtan, niźaśa ninakaki ni źoñi paxatćha, nïki ni Timlu śankiś tomanqźkan źelhñitaćha, xalla ni Hermosa khita śankiś.

¹¹Xalla ni śuchkiśtan ćhhetinta źoñiki, Piruźkiśtan Juanźkiśtan anaź ayatćha. Neqhśtan thappacha ni źoñinakaki iśpantichićha, xaqhsikin ninaka źelatćhaxa xalla ni Salomonź oqhlayś Timlukin śathchićha.

¹²Neqhśtan Piruki xalla ni cherźku, ninakźkiś tuź khichićha: “¿Israel źoñinaka qhaźtikiśtan anćhuk añcha iśpantixo? ¿Niźaśa qhaźtikiśtanź werhnak ti źoñi ćhhetinchiźtaqaś cherźxo, niźaśa wethnaka perśun aśtan ćhhetinchiźtaqaś nayxo?

¹³Niźaśa ni Abrahamki, Isaacmi niźaśa Jacobumi Yöśkin alt'iñitaćha, niźaśa ućhumnaka achchi ephnakami Yöśkin alt'iñitaćha, xalla ni Yöśpachaćha ućhumnakkin Jesusa kuchanźkichiki Mesías khita, niźaśa anćhukki ni Jesusa jilirinakźkin thächinćhukćha, neqhśtan Pilatuź kuchś khistikiśtan anćhukki ana iyawkhichinćhukćha.

¹⁴Niźaśa Jesusaki Yöśpan kaśñitaćha niźaśa śumanakapan päñitaćha, ans anćhukśti ana pekchinćhukćha, niźaśa anćhukki Pilatuźkiś tshi źoñi konñi liwri kuchśnaxu maychinćhukćha.

¹⁵Xalla nuź anćhukki ućhumnak ni źetkin chhichñi konchinćhukćha. Ans Yöśki jakatatsqatchićha, neqhśtan werhnakćha tinakźkiśtan cherintki.

¹⁶Niźaśa werhnakki Jesusiź aśkiś tasnućha, niźaśa ni Jesusaź ni śuch źoñi aśi tansqatchiki, niźaśa nïćha ni cheqpachapan ćhhetinchiki, neqhśtan thappacha anćhukki cherćha.

¹⁷“Niźaśa Israel jilanaka, anćhukki niźaśa anćhuka jilirinakami ana näśku ni Jesusa konchinćhukćha.

¹⁸Xalla ni Yöśki ni Yöśkiśtan chïñinakź atkiśtan tuki maśinqalćha, xalla ni Mesiaski tikhśpantaćha.

¹⁹Xalla niźtikiśtan anćhukki Yöśkinź qhutźka niźaśa nïźkiś kiriya, niźaśa ni anćhuka ujnakźkiśtan ćhhujźinaxu, neqhśtan nïki anćhukakiś śuma aśiź thäkićha

²⁰xalla neqhśtan anćhukakiś Jesús Mesías khita kuchanźkakićha, niźaśa nïki tukitanpacha illśtapantaćha anćhukakin kuchanźkiśxapa.

²¹Anśiki Jesusaki tsewkta yoqkiś ekliśpanćha, ni Yöś nïź ew ćhhultaqinaka uchśkama. Xalla tïki ni źkayi quśśiś Yöśkiśtan chïñinakaki xaqhsi tuki chïtqalćha.

²²Niźaśa Moisesaki ućhumnaka achchi ephnakźkiś maśinchićha: ‘Xalla ni ućhum Yöś Tataki ućhum jilanakźkiśtan tshi Yöśkiśtan chïñi ulansqatakićha werh irata. Niźaśa anćhukki nïź chïtakamaź kaśakićha,

²³Xalla ni Yöśkiśtan chïñi thappacha ana kaśñi źoñinakaki, ni wathkiśtan chhetqattaź khekićha.’

²⁴“Niźaśa Samuelźkiśtan jëkhchuk, thappacha ni Yöśkiśtan chïñinakaki ti thuñkiśtan maśinchipanćha.

²⁵Niźaśa ućhumnakki Yöśkiśtan chïñinakź matićhumćha, niźaśa Yöśki ućhumnaka ephnakźtan palt'itqalćha, Abrahamźkiś tuź khikan: ‘Am matinakźkiśtan thappacha ti yoq chawkh wathchiś źoñinaka yanapakićha.’

²⁶Niźaśa Yöśki nïź Mati jakatatsqatźku, tuki anćhukakin kuchanźkichićha anćhuk yanapśxapa, neqhśtan anćhuk ana iya uj päxu.”