Read Chipaya HECHOS 6 Bible Online

HECHOS 6 - Chipaya bible

HECHOS 6

¹Niźaśa ni pachaki Yöśkin kirïñi źoñinakaki walxaź yapatćha, neqhśtan ni griego taqu chïñi źoñinakaki, ni hebreo taqu chïñi źoñinakźxapa chuchchićha, tuź khikan, ni griego źew mataqanakźkiśiki anaź ni śapuru toxśinś luli śuma toxźinćha.

²Neqhśtan ni qhalu piśkchiś thaxintanakaki, thappacha ni Yöś kirïchi źoñinaka akhśićha, neqhśtan ninakźkiś khichićha: — Wethnakataki anaź wali khesaćha ni Yöś śuma taqu parli apatatśki, neqhśtan ni ćhheri toxśkiś quśtäśxapa.

³Niźaśa jilanaka, anćhukakiśtan towqu śuma źoñinakaź illśna, niźaśa Espíritu Santu śhipi, neqhśtan ninakźkiś ti ćhheri toxśinś lanqśnaka thäśxapa.

⁴Niźaśa werhnakki tirapanl Yöśkin mayiśaćha, niźaśa ni Yöś śuma taqu parlikan.

⁵Niźaśa thappacha ni źoñinakaki munñikamataćha, neqhśtan ninakaki Esteban illśićha, nïki śuma quśśiś źoñitaćha niźaśa Espíritu Santu śhipitaćha, niźaśa Felipiźtan, Procoroźtan, Nicanorźtan, Timonźtan, Parmenastan, niźaśa ni Nicolastan, neqhśtan tshïsuñaki Antioquía wathkiśtantaćha, nïki tuki ni judiu źoñinakźkiś khisqalćha.

⁶Neqhśtan ni illta źoñinaka ni apostulanakźkin chhichchićha, xalla neqhśtan ni apuśtulanakaki śapamayni ninakź achjuntuñ qharźtan lanźku Yöśkin mayiśichićha.

⁷Neqhśtan ni Yöś śuma taquki chhijpsnatćha ni Jerusalén wathkiś, niźaśa Yöś kirïchi źoñinakaki añchaź yapatćha. Niźaśa muspa ni timlu jilirinakami Yöśkin kirïchićha.

⁸Estebanki Yöś aśi śhipitaćha niźaśa nïź yanaptataćha, ni źoñinakźkiś chimpunaka niźaśa milajrunka thëźnatćha.

⁹Neqhśtan yaqhapa źoñinakaki ni akhs qhuykiś liwri kuchśta źoñinakaki niźaśa yaqhapa Cirene źoñinakźtan, niźaśa Alejandría źoñinakźtan niźaśa Cilicia źoñinakźtan niźaśa ni Asia yoqkiśtan źoñinakźtan chika, xalla ti źoñinakaki ni Estebanźtan ch'ayi qallantichićha.

¹⁰Neqhśtan ninakaki ana xaqhsiltami atipi atchićha, xalla ni Estebanki ni Espíritu Santuź thäta śiśnakźtanź chiyatćha.

¹¹Xalla neqhśtan tshi qhaźultan źoñinakźkiś pakchićha, tuź chiyaxu; ti Estebanki Yöśxapa moq'u chïchićha niźaśa Moisesxapa moq'u chïchićha xalla nuź chiyaxu thaxśićha, niźaśa werhnakpacha nonśintki.

¹²Xalla ni orpacha ninakaki ni wathchiś źoñinaka aphthapchićha, niźaśa ni wath qamchi ephnaka niźaśa ni lï utt'ayñinaka; xalla neqhśtan Esteban tanźku ni parliś qhuya chhichchićha.

¹³Neqhśtan toskara chïñi cherñi źoñinaka qhurchićha, neqhśtan ni źoñinakaki tuź khichićha: — Ti źoñiki ti źkayi Timluźxapa niźaśa ni lïźxapa tirapanź chïćha.

¹⁴Niźaśa werhnakki ni Nazaret wathchiś Jesusiźkiśtan chïñi nonśinćha, nïki ni Timlu palhźnaź khichićha, niźaśa Moisés ekta usanaka turkaź khichićha.

¹⁵Xalla neqhśtan ni jilirinakaki niźaśa thappacha neqhś julśi źelhñi źoñinakaki, ni Esteban cherśićha, niźaśa nïź yukhki tshi anjilź yukhźtaqaś cherśićha.