Read Chipaya HECHOS 9 Bible Online

HECHOS 9 - Chipaya bible

HECHOS 9

¹Xalla ni Sauluki ni Yöśkin kirïchi źoñinaka anaź konś thajwayi apatatatćha. Xalla niźtikiśtan ni Sauluki ni timlu chawkh jilirinaka irpiñiźkin oqhchićha,

²xalla ni jilirźkiśtan tshi tanś papila maychićha, ni Damasco wathź akhs qhuyanakkin ni ew jikhśkiś oqhñi źoñinaka qhuri oqśxapa, luktaqa khiñi niźaśa mätaqa khiñi tanźku Jerusalén watha chhichśxapa.

³Xalla neqhśtan ni Damasco chawkh watha keźu khisnan, ana pinsan tsewkta yoqkiśtan tshi thonñi qhanaki nïź muytata llijwtaychićha.

⁴Neqhśtan Sauluki yoqkiś thxotsićha, niźaśa tshi xora nïźkiś chïźkiñi nonśićha, tuź khikan: “Saulo, Saulo, ¿qhaźtikiśtan am werh qhurya?”

⁵Sauluki pewkśićha: “¿Tata, amki jëkimtaxo?” Xalla ni xoraki nïźkiś qhäśićha: “Werhki Jesustćha, amki jëkim qhurćhaxa xalla nïtćha werhki.

⁶Niźaśa ni Sauluki muspa eqhskan niźaśa phutinkan khichićha: — Tata, ¿qhaźkiñim werh pekxo? Neqhśtan ni Yöśki nïźkiś khichićha. Źäźna, ni chawkh watha oqa; xalla nikhum amki śiśakićha ni am päśnakaki.”

⁷Niźaśa ni Sauluźtan oqhñi źoñinakaki ni xora nonźku añcha tsukhchitaćha, ans ninakaki ana jëkhmi cherchićha.

⁸Neqhśtan Sauluki yoqkiśtan źäśićha; niźaśa nïź źhuki khetźku ana wira cheri atchićha. Xalla neqhśtan nïź maśinakaki ni qharku tanźku Damasco watha chhichchićha.

⁹Niźaśa ni wathkiś nïki, chheph max ana lulhchi niźaśa ana likhchi źelhchićha.

¹⁰Niźaśa ni Damasco wathkiśiki tshi Yöśkin kirïchi Ananías khita źoñi qamatćha, neqhśtan Yöśki nïźkiś qhanan thensićha, niźaśa nïźkiś khichićha: “¡Ananías!” Xalla nïki qhäśićha: “Tata, werhki teqhśitćha.”

¹¹Neqhśtan ni Yöśki nïźkiś khichićha: “Źäźna ni śoq'u khita kalli oqa, niźaśa ni Judas qhuykiś pewkźnakićha, tshi Tarso wathchiś źoñi Saulu khita. Xalla nïki mayiśićha,

¹²niźaśa Sauluki qhanan cherchićha Ananías khita źoñi, niźaśa ni źoñiki nïźkiś luśhku nïź qharźtan nïźkiś lanqśićha, xalla ni Saulu wilta cheraxu.”

¹³Xalla ni nonźku Ananiaski khichićha: “Tata, wakchi źoñinakaćha ni źoñźkiśtan wethkiś maśśiki, niźaśa ni Jerusalén wathkiś ni am źkayi quśśiś źoñinakźkiś nïź thapa ana walinaka pätikiśtanami śiśśinćha.

¹⁴Xaśiki teqhś thonchićha, ni timlu chawkh jilirinaka irpiñiźkiśtan tshi papilchiś, niźaśa thappacha ni am thü aynaqñi źoñinaka tanźku chhichśxapa.”

¹⁵Xalla neqhśtan Yöśki nïźkiś khichićha: “Amki oqa, werhki ni źoñi illśinpanćha wethkiśtan ni yaqha wathchiś źoñinakźkiś parlaxu, niźaśa ninakź reyinakźkiśimi, niźaśa ni Israel źoñinakźkiśimi.

¹⁶Niźaśa werhki nïźkiś thëźnaćha, nïki weth thükiśtan añchaź t'akhiśhakićha.”

¹⁷Neqhśtan Ananiaski xaqhsikin Saulu źelatćhaxa xalla ni qhuya oqhchićha. Niźaśa ni qhuya luśhku ni Sauluźkiś qharźtan lanśićha, niźaśa nïźkiś khichićha: — Saulu jila, xalla ni amiź ni jikhśkiś thonan amkiś thensi Jesús Tataki, werh kuchanźkichićha am wilta cheraxu, niźaśa amki ni Espíritu Santu śhipi eklaxu.

¹⁸Neqhśtan ni orapacha ni Sauluź źhukkiśtan tshi ch'iś qhxapaźtaqaś thotsićha, xalla neqhśtan nïź źhukiki cherñi khissićha. Niźaśa ni Sauluki tshitsićha neqhśtan ni orapacha wawtistaćha.

¹⁹Xalla neqhśtan ni Sauluki lulhźku aśi tanśićha, niźaśa ni Yöś kirïchi źoñinakźtan ni Damasco wathkiś tshi qhaź max eklichićha.

²⁰Xalla neqhśtan ni Sauluki ni akhs qhuyaran, Jesusaki Yöś Matipanćha khikan maśiñi qallantichićha.

²¹Niźaśa thappacha ni nonśñi źoñinakaki teqa khissićha, niźaśa tuź khetćha: — ¿Anax tïki ni Jerusalén wathkiś ni Jesusiź thü aynaqñinaka qhurkan oqhlayñitaxo? ¿Niźaśa anax tïki perśunpacha ti Damasco watha thonchiya ni Yöś kirïchi źoñinaka tanźku ni timlu chawkh jilirinakźkiś thäśxapa?

²²Niźaśa Sauluki tshanti tshanti Espíritu Santuź aśśiś khisnatćha, niźaśa ni Jesusa Mesiassa khikan chiyatćha, xalla neqhśtan ni Damasco wathkiś qamñi judiu źoñinakaki muspaysnatćha.

²³Neqhśtan tshi qhaź maxkiśtan, ni judiu źoñinakaki ninakkama Saulu konśxapa palt'ichićha,

²⁴neqhśtan ni Sauluki ni śiśśićha. Niźaśa ni źoñinakaki wëntiźtan maxiñtiźtan ni chawkh wathkiśtan ulanś śankiś ni konśxapa thewźnatćha,

²⁵neqhśtan ni thaxintanakaki ni Saulu tshi paqh kanaśtikiś yäźku ni chawkh watha muytata pirqita uyukiśtan tshi wën śhujunchićha.

²⁶Xalla neqhśtan Sauluki Jerusalén watha irantiźku, ni Yöśkin kirïchi źoñinakźtan akhs pekchićha; ans ni źoñinakaki thappacha ni eqhsnatćha, xalla ni kirïchinakaki ni Saulu ana Yöś kirïchiźtaqaś nayatćha.

²⁷Ans ni Bernabeki ni Saulu chhichśku ni apuśtulanaka nïźkiś thëśićha. Neqhśtan ni Sauluź ni jikhśkiś Yöś cherta kint'ichićha, niźaśa ni Yöśki nïźkiś palxaytqalćha, neqhśtan ni Sauluki ni Damasco wathkiś ni Jesusiźkiśtan thapa quśtan maśinqalćha.

²⁸Xalla nuź ni Sauluki ni Jerusalén wathkiś eklichićha, niźaśa ninakźtan chika oqhlaychićha; ni Yöśkiśtan thapa quśtan parlikan,

²⁹niźaśa ni griego chïñi judiu źoñinakaźtan chiyassićha niźaśa parlichićha, xalla ti źoñinakaśti ni Saulu konś pekatćha.

³⁰Xalla ni Yöś kirïchi jilanakaki ni konś pekñi nayźku, Saulu Cesarea watha chhichchićha, xalla neqhśtan Tarso watha kuchanchićha.

³¹Neqhśtan ni Yöś kirïchi źoñinakaki thappacha ni judea yoqaran niźaśa Galilea yoqaran niźaśa Samaria yoqaran añcha śumaź qamatćha, niźtaśaqaś ninakaki ni Yöś qamañkiś paqatćha. Niźaśa ninakaki Yöś eqhskan qamatćha ni Espíritu Santuź yanapta, niźaśa ni Yöś kirïchi źoñinakaki tshantiź yapatćha.

³²Niźaśa Piruki ni Yöś kirïchi jilanaka thon thonźnatćha, niźaśa ni Lida khita wathkiś qamñi źkayi quśśiś jilanaka thonśñi oqhchiśaqaśśa.

³³Xalla nikhu tshi Eneas khita źoñźtan śalchićha, ni źoñiki ocho wata aphśkiś śuchunsi źelatćha.

³⁴Piruki nïźkiś khichićha: — Eneas, Jesucriśtuź am ćhhetinćha. Źäźna am aphś śumpacha thakśna. Eneaski ni orapacha źäśićha.

³⁵Niźaśa thappacha ni Lida khita wathkiś qamñinakaki niźaśa ni Sarón yoqkiś qamñinakami ni Eneas źäśñi cherchićha, xalla neqhśtan ninakaki Yöśkin kirïchićha.

³⁶Xalla ni pacha ni Jope khita chawkh wathkiś tsha Tabitá khiti Yöś kirïchin źelatćha; xalla ni Tabitaki ni griego tawqkiśiki khićha Dorkas. Xalla ta źonki näźa qamañkiś śumanaka päkan niźaśa ni t'aqhir źoñinaka oqźtan źelintaćha.

³⁷Xalla ni pacha na Tabitá źonki läkhiźku tikhśinćha. Neqhśtan näźa xañchi axwźku ni tsewkta qhuykin makhźtataćha.

³⁸Niźaśa Lida wathaki Jope keźutaćha, xalla ni Piruki nikhutaćha; neqhśtan ni Yöś kirïchi jilanakaki ni Piru ni wathkin śiśśićha, neqhśtan ni kirïchinakaki pukultan źoñinaka kuchanchićha, tuź chïźkaxu: “Amki ana en enźku Jope thonalla.”

³⁹Neqhśtan Piruki ninakźtan oqhchićha. Niźaśa Piruź irantitan ninakaki xaqhsikintaźlax ni tikhśi xañchi xalla ni qhuya chhichchićha; niźaśa thappacha ni źew mätaqanakaki qäkan Piru muyuntichićha, niźaśa na Tabitá iya źethkan päta śkitinaka niźaśa irś śkitinaka nïźkiś thëśićha.

⁴⁰Neqhśtan Piruki thappacha ninaka ulansqatchićha, niźaśa killśku mayiśichićha; xalla neqhśtan na tikhśiñ cherźku khichićha: — ¡Tabitá, źäźna! Neqhśtan näki źhuki khetźku Piru cherchinćha, neqhśtan näki julśinćha.

⁴¹Xalla neqhśtan ni Piruki näźa qharku tanźku źinśićha; neqhśtan ni Yöś kirïchi źoñinaka niźaśa ni źew mätaqanaka qhawśićha, niźaśa ninakźkiś źethñi thëśićha.

⁴²Xalla tïki thappacha ni Jope chawkh wathkiś śiśśićha, niźaśa wakchi źoñinaka Yöśkin kirïchićha.

⁴³Neqhśtan Piruki ni chawkh wathkiś tshi qhaźmax qamchićha, xalla ni Simón śqiśi kurtiñiź qhuykiś.