Read Chipaya ROMANOS 12 Bible Online

ROMANOS 12 - Chipaya bible

ROMANOS 12

¹Niźaśa jilanaka werhki anćhuk Yöś oqśñiź khen rokt'ućha, niźaśa anćhukki perśun quś Yöśkin thälla tshi źethñi wilanaźtaqaś, niźaśa źkayi Yöś pekchuka. Xalla tïćha cheqpacha Yöśkin amtiśki.

²Niźaśa anćhukki anaź ni anśta qamañxaru qama; ans anćhukki ni anćhuka amtiśnakaź turka xalla nuź anćhukki anćhuka qamaña turkasaćha niźaśa anćhukki Yöś amtanakaź paxasaćha, xalla nïki śumaćha niźaśa walićha niźaśa ch'uwaćha.

³Niźaśa Yöśki nïź oqśñi quśtan wethkiś thächićha, thappacha anćhukakiś til khiwćha anćhukki anaź perśunpachkiśtan jilakama pinsa. Ans anćhukki ima ćhhuluź khen śumaź pinsa, ni Yöś anćhukaź thapa quśśiś khen onanchita patxparu.

⁴Niźaśa ućhumnaka xañchiki wakchi qisqisñinakchiśśa, thappacha ni qisqisñinakaki anaź tshi xapaqaś wakiśićha,

⁵Niźaśa ućhumnakki qhaźta tamami, Criśtuźtan tshi xañchichiśćhumćha niźaśa ućhumnakki porapat tshi quśśiśćhumćha tshi xañchiź qisqisñiźtaqaś.

⁶Yöśki ućhumnakakiś thapamana onanchiźkichićha, nïź śapamayniźkiś thäś pektakama. Niźaśa Yöśki ućhumnakakiś nïźkiśtan chïś onanchichiźlax nïki, ućhumnaka thapa quśkiśtan xamaź chïlalla;

⁷Niźaśa ućhumnakakiś yaqha źoñinakź manta päxu onanchiźkitaźlax nïki, śumapan manta päla. Niźaśa ni Yöś śuma kintu thaxinś onanchita tanśiźlax nïki, ni thaxinśkinpanx quś thäla;

⁸Niźaśa ni yaqha źoñinaka p'eqintayś onanchita tanśiźlax nïki, ni źoñiki ni p'eqintayśkiśpanx quś thäla. Niźaśa ni onanñiki llanu quśtanx thäla; niźaśa ni irpiś jiliri tanśiki, nïź irpiśkiś añcha śumanakax päla; niźaśa ni t'aqhir źoñinakźkiś yanapñiki, thapa quśtanx päla.

⁹Niźaśa anćhukki porapat thapa quśtanź pekasa. Niźaśa anćhukki ni ana śumanakaź ćhhaxwa, ans ni śumanakkinź quś thä.

¹⁰Niźaśa anćhukki tshi jilaśullkaźtaqaś thapa quśtan pekasa, anćhukkama yanapaskan niźaśa anćhukpora oqsaskan.

¹¹Niźaśa anćhukki walxa khïkhichiź khe anaź qhena khe, niźaśa Yöś Tatźkin thapa quśtan manta pä.

¹²Niźaśa anćhukalta śuma thonñiź khen kuntintuź qama; niźaśa ni t'aqhiśnaka thapa aśtanź awanta; niźaśa anapan ni Yöśkin mayiśiś apatata.

¹³Niźaśa anćhuka źelinśnakźkiśtan ni Yöś kirïchi t'aqhir jilanakźkiś ona; niźaśa anćhukakiś thonśñi źoñinaka śumapanź qhawźna.

¹⁴Niźaśa anćhuk tanśxapa qhurñi źoñinakźkiś yanapa. Niźaśa anćhukki ninakźtaxapa Yöśkiśtan mayna.

¹⁵Niźaśa anćhukki ni kuntintu khiñi jilanakźtan chipźnakićha, niźaśa anćhukki ni qäñinakźtan chikaź qäkićha.

¹⁶Niźaśa anćhukki porapat añcha śuma quś phiyaź qama. Anapanź mita quśśiś khe, ans anćhukki ni amu quśśiś jilanakźtan chika khisna. Niźaśa anćhukki anaź śiśñi khïkhiya.

¹⁷Niźaśa anćhukatan moq'u päñiźkiś anaź niźta iratapacha thepunśki. Niźaśa anćhukki thapatiź tukkiś śumanakapanź thëźna.

¹⁸Niźaśa anćhukaź attakama thapa źoñinakźtan śumapanź qama.

¹⁹Weth q'ay jilanaka, anaź anćhukpacha moq'u tanasa, ans ni Yöś juchjiptayax khe; xalla ni Yöś śuma kintu khjirtaki tuź khićha: “Xalla tuź khićha ni Yöś Tataki wethtaćha ni juchjiptayśki niźaśa weril ninakźkiś pakaćha.”

²⁰“Niźaśa amtan moq'u khiñi źoñiki ćhherit eksqatćhax nïki, nïźkiś ćhheri ona; niźaśa ni źoñiki qhaśt pekćhax nïki, ni źoñźkiś qhaś ona; xalla nuź amki ni źoñź yukh aśañpanti lhokh k'ururu khisqatakićha.”

²¹Niźaśa amki ni ana walinakźkiś ana atipsqata, ans amki ni ana walinaka śumźtan atipa.