Read Chipaya ROMANOS 13 Bible Online

ROMANOS 13 - Chipaya bible

ROMANOS 13

¹Thappacha źoñinakaki, jiliri utt'ayta źoñinaka kaś wakiśićha. Ans anaź ana Yöś uchśta jiliriki źelhćha, ni źelhñi jilirinakaki Yöś uchśta kamaćha.

²Xalla ni Yöśiś uchśta jiliri ana kaśñi źoñiki, ni Yöś uchśtiź moq'uź päćha. Niźaśa ni ana kaśñi źoñinakaki kaśtiktaź khekićha;

³niźaśa ni irpiñi jilirinakaki ni śuma päñi źoñinaka anaź tsukhnasaćha, ans ni ana wali päñi źoñinakaź tsukhnakićha. ¿Amki ni jiliri ana eqhskum qamś pekya? Amki śumapan qama neqhśtan ni jiliriki am śuma źoñimćhaź khekićha,

⁴Xalla ni jiliriki Yöś manta päñiśaqaśśa am layku. Niźaśa amki ana walinakam päkiź nïki, neqhśtan amki eqhstantaćha; xalla ni jiliriki anapanź inapampa nïź paqh kuchillu śhikasaćha, xalla ni jiliriki Yöś manta päñipanćha niźaśa ni ana wali päñi źoñinaka kaśtikśxapaki tuź pachaćha.

⁵Xalla niźtikiśtan ućhumnakki jiliri kaś wakiśićha, ana ni ana kaśtikta khiśxapaqaś, ans tshi śuma źoñiźta päśtanćha.

⁶Xalla niźtikiśtan anćhukki taśaź pakćha; xalla ni jilirinakaki Yöś manta päñićha, niźaśa ninakaki neqhśipanź quś thäćha.

⁷Niźaśa anćhuka qaxanakaki thappacha phxoqś wakiśićha. Niźaśa anćhukki yoqa qaxaźlax nïki, yoqźtanśaqaś phxoqa; niźaśa anćhukki taśa qaxaźlax nïki, taśaśaqaś phxoqa; niźaśa xaqhsiltiźkiś ana tsänchinćhukźlax nïki tsäna; niźaśa xaqhsiltiźkiś ana q'ächinćhukźlax nïki, ni źoñi q'ächa.

⁸Niźaśa anćhukki ni porapat oqsaskiśtan, anapanź jëkhźkiśimi qaxa ekla; niźaśa ni thapa źoñ maśinaka oqśñiźlax nïki, thappacha ni lïkiś chïtanaka kumlichićha.

⁹Yöś lïnakaki tuź khićha: “Ana iźiwiri khe, ana kona, ana khiźna, ana śmaśa”; xalla ti lïnakźtan niźaśa iya ni yaqha źelhñi lïnakźtan tshiqaśśa: “Amki źoñ maśinaka perśunpachkiśtaqaś oqźna.”

¹⁰Xalla ni źoñi oqśñi źoñiki, anaź ni źoñ maśinakźta ana śuma päćha; xalla ni Yöś lïki ni źoñi oqśnakkiś thappacha kumlissa.

¹¹Niźaśa anćhukki ti pachkiś qamkan thappacha tinaka näśna, niźaśa ućhunnakaltaki thxaxi wathś oraki irantiźkichićha. Xalla ni ućhumnak liwrïñi taquki ni qallantiśkiśtan tshan keźućha, ni ućhunnakaź Yöś tawqkiś kirïtanaki.

¹²Xalla ni wënkiź watćha, niźaśa ni maxinkiź irantiźkićha; xalla niźtikiśtan ućhumnakki ni sumchikiś päś ćhhultaqinakaź apatatćha, niźaśa ućhumnakki qhankiś khisla, niźaśa tshi śultatu nïź xwatśnakźtan wakiyaśñi irataźtaqaśśa.

¹³Niźaśa ućhumnakki thuñ qhankiśtaqaś lanqźla. Niźaśa ućhumnakki anaź ni tomśnakiś oqhlayla, niźaśa ana ni likiranmi mitiśa, niźaśa ana ni anawalinakkiśimi niźaśa ana ni quśkama oqhlayśkiśimi, niźaśa ni q'iw źoñinakźtan ana parla niźaśa ni ćhhaxwqatñi źoñinakźkiśimi ana mitiśla.

¹⁴Ans anćhukki Jesucriśtuźkiśtanź kuthźna, niźaśa anćhuka xañchiź pektakama oqa.