Read Chipaya ROMANOS 14 Bible Online

ROMANOS 14 - Chipaya bible

ROMANOS 14

¹Anćhukki ni upa quśśiś jila thapa quśtan tanźna, niźaśa ni jilźtan ana chiyasa.

²Niźaśa yaqhapanakaki thapamana lulhś pinsićha, xalla ni upa quśśiśnakaśti ch'oxñi chhañinakaqaź lulhćha.

³Xalla ni thapamana lulhñi źoñiki, ni ana thapamana lulhñi źoñinaka ana iñarśtanćha; niźaśa ni ana thapamana lulhñi źoñiki, ni thapamana lulhñi źoñi anaśaqaś iñarśtanćha, Yöśki ninaka ana iñiśiźku tanśićha.

⁴¿Amki jëkimta, ni yaqha źoñź manta päñiźxapa chuchśxapa? Ni manta päñi źoñiki śumameqax khila uśh ana śumameqax khila, xalla nïki nïź perśun tuyñuź ćhhultaqićha. Yöś Tataki ni źoñi yanapśxapa walxa aśśiśśa, neqhśtan ni źoñiki śuma khitaź khekićha.

⁵Niźaśa yaqhapanakaki tshi thuñiqaź añcha wakiśqatćha, niźaśa yaqhapanakaśti ni thuñiki tshiqaśśaź khićha. Neqhśtan śapamayni ninakaź pinsitaki cheqpacha khiśtanćha.

⁶Xalla ni Yöś Tata amtiśxapa khikan tshi thuñi t'aqśñi źoñiki, ni thuñkiśpanź kumlićha. Niźaśa ni Yöś Tata amtiśxapa thapamana lulhchi źoñiki, Yöśkinpanź sparakiź khićha; xalla ni Yöś Tata amtiśxapa ana thapamana lulhñi źoñiśti, anaź lulhćha niźtaśaqaś Yöśkin sparakiź khićha.

⁷Niźaśa thappacha ućhumnakkiśtan anaź perśunaltaxapa źethćha, niźaśa anaź perśunaltaxapa tikhźa.

⁸Niźaśa ućhumnakki źethćhax nïki, Yöś Tatźtaxapaź źethćha; niźaśa ućhumnakki tikhźnakiź nïki, Yöś Tatźtaxapaź tikhźnakićha. Niźaśa ućhumnakki źethkanami tikhźkumi Yöś Tatźtićhumćha.

⁹Criśtuki xalla nïxapa tikhźku jakatatchićha: Niźaśa Criśtuki tikhśinakź Yöśśa niźaśa źethñi źoñinakź Yöśśa.

¹⁰¿Qhaźtikiśtanam am jilźxapa chuchxo? ¿Niźaśa amki qhaźtikiśtanam am jila ćhhaxwxo? Thappacha ućhumnakki Yöś tukkiś thenstanćha nïź juchjiptayta khiśxapa.

¹¹Xalla ni Yöś śuma kintu khjirtikiśiki tuź khićha: “Yöś Tataki, tuź khićha; werhki weth źetkiśtanl taqu onźnućha, niźaśa thappacha źoñinakaki weth tukkiś killśnakićha niźaśa thappacha Yöś thü aynaqakićha.”

¹²Xalla nuź ućhumnakki śapamayni ućhunnakaź pätanaka Yöśkin maśtanćha.

¹³Xalla niźtikiśtan ućhumnakki anapan porapat ćhhaxwqatastanćha. Ans ućhumnakki ućhumnaka jila kullakinaka ana ujkiś thxotsnax khiśtanćha, niźaśa ninakź quśmi ana upaquśhqatśtanćha.

¹⁴Niźaśa werhkil khiwćha, ni Jesús Tatźkiś kirïchi jilanakź quśkiśiki anaź ana walinaka źelasaćha; niźaśa yaqhapanakaki tshi ćhhultaqi ana źkayićha khesaź nïki, xalla nïźtaxapaź ni ana źkayi khekićha.

¹⁵Niźaśa amiź lulan am jilaki ćhhaxwtaźuqaś nayćhax nïki, amki anam ni źoñi oqś śiśśa. ¡Anax ni am ćhheriź khen ni Criśtu jëkiź khen tikhśita xalla ni anax qatla!

¹⁶Niźaśa Criśtuź anćhukakiś śumanaka thätikiśtan, anaź ana śumanaka parlisqata.

¹⁷Niźaśa ni Yöś irpiś watha luśhki, anaź ni lulhźkupan likhźkupan luśhasaćha, ans śuma qamkan niźaśa ni Espíritu Santu ućhumnakakiś onanźkitaź khen ućhumnakki kuntintu khiś wakiśićha.

¹⁸Xalla tuź Criśtuźkin manta päñi jilaki Yöśki ni jilźtan añcha kuntintućha, niźaśa ni jilaki źoñinakaź yanźtaćha.

¹⁹Xalla neqhśtan ućhumnakki śuma qamañaź qhurla, niźaśa śapamayniź paqś munla.

²⁰Niźaśa ni ćhheriź khen, Yöś päta ćhhultaqinaka ana thatna. Cheqpacha ni ćhherinakaki źkayikamaćha; xalla ni yaqha źoñi ujkiś thxotsqaś lulhśa ana waliki.

²¹Niźaśa chhiświ lulhśki anaź wali khesaćha, niźaśa awarinti likhśmi anaćha wali, niźaśa am jila ujkiś thxotsqatñinaka lulhś anaź wali khesaćha.

²²Xalla ni am thapa quśki Yöś tukkiś perśunpacha waqaycha. ¡Añcha walićha ni Yöś liwrïta jilanakaki niźaśa perśunpacha ana ujkiś thxotsñinakaki!

²³Xalla ni lulhśkiśtan teqenaśñiki ujchiś khitaćha, xalla ni źoñiki anaź thapa quśtan päćha; niźaśa thappacha ana thapa quśtan pätanakaki ujćha.