Read Chipaya ROMANOS 15 Bible Online

ROMANOS 15 - Chipaya bible

ROMANOS 15

¹Niźaśa ućhumnak thapa quśśiś khiñinakaki ni upa quśśiś jilanakź quś awantiśtanćha, ana ućhunkamaqaś chipś wakiśićha.

²Niźaśa thappacha ućhumnakki ućhumnaka źoñ maśinaka chipqatś wakiśićha, niźaśa ninakźtaxapa śumanaka päś wakiśićha niźaśa śapamayniź paqś pekśtanćha.

³Niźaśa ni Criśtuki anapan perśunpacha chipś qhurchićha, niźaśa ni Criśtuźkiśtan ni Yöś śuma kintu khjirtaki watchićha: “Amkiś ar arñi źoñź taqunakaki wethkiś thonchićha.”

⁴Niźaśa tuki khjirta Yöś taqunakaki, ućhumnaka thaxinśxapa khjirtataćha, niźaśa ućhumki paśinśichś qamśxapa niźaśa ni Khjirta patxparu ućhumnakki ni uśhka thonñi tanźnasaćha.

⁵Niźaśa Yöśśa ućhumnak qiśhñiki niźaśa nïćha paśinśich quśśiśki, niźaśa nïx anćhukakiśimi śuma qamaxu yanapila, xaqhnuź ni Jesucriśtu qamćhaxa xalla niźta irata,

⁶thappacha ućhumnakki tshi xorchiś Yöśkin aynaqś wakiśićha, niźaśa ućhumnaka Jesucriśtu Tatź Ephźkinami.

⁷Niźaśa anćhukki porapatź quśsasalla, xaqhnuź ni Criśtu anćhuk tanśiźlaxa xalla niźta irata, xalla ni Yöś wathźtaxapa.

⁸Niźaśa werhkil khiwćha, ni Criśtuki ni judiu źoñinakź manta päyi thonchićha, xalla ni Yöś cheqpacha chïta thëśxapa, niźaśa ućhumnaka achchi ephnaźkiś taqu onźta kumliśxapa.

⁹Niźaśa Yöś oqśñiź khen, Jesucriśtuki ni ana judiu źoñinaka Yöśkin aynaqaxuśaqaś thonchićha, xalla ni Yöś śuma kintu khjirtikiśiki tuź khićha: “Xalla niźtikiśtan werhki ni ana Yöś kirïchi wathanakźkiśtan am thü aynaqaćha, niźaśa am thükiś wirsunakal itsnaćha.”

¹⁰Xalla ni yaqhikiś Yöś śuma kintu khjirtaki tuź khićha: “¡Ni Yöś kirïchi jilanakźtan, chawkh wathanakaź chipa!”

¹¹Niźaśa Yöś śuma kintu khjirtikiśiki tuźśaqaś khićha: “Chawkh wathanaka niźaśa thapa źoñinaka ¡Yöś thü aynaqakićha!”

¹²Niźaśa ni Isaiaski tuź khikan khjirchiśaqaśśa: “Jus śep'aki śarakićha, xalla nïki ni chawkh wathanaka irpiśxapa źäźnakićha, neqhśtan ni wathanakaki nïźkiś tasnakićha.”

¹³Yöśśa ni śuma thonñi thäñiki, niźaśa nïźkiś thapa quśśiśnakźkiś nïki śuma chipa qamś qamañax thäla, niźaśa anćhukakiś ni Espíritu Santuź aśtan ni śuma thonñinakax śhipźinla.

¹⁴Weth q'ay jilanaka, werhki añcha kuntintutćha anćhukaź śuma khen niźaśa muspa śiśñi quśśiś khen, niźaśa anćhukki anćhukpora thaxsasinćhukpanćha;

¹⁵ans werhki ti kartikiś qhanakama tshi qhaź ćhhultaqkiśtan khjirźkichinćha, anćhuk anapan thatźnaxu. Yöśśa nïź śuma quśtan wethkiś ti khjirax khichiki,

¹⁶ni Jesucriśtuźkin manta pätikiśtan, niźaśa ni ana judiu źoñinakźta añcha waliśaqaśśa. Xalla ni apuśtul lanqśki ni Yöś śuma kintunaka maśinśa, xalla ni ana judiu źoñinaka Yöśta añcha walipan khexu, niźaśa ninakaki ni Espíritu Santuź źkayi khisqatta khiśtanćha.

¹⁷Niźaśa werhki Jesucriśtuź thü aynaqś wakiśućha, niźaśa weriź Yöśkin manta pätikiśtanami,

¹⁸niźaśa werhki anal ćhhulkiśtanami chïchïś pekućha, ans ni Criśtuź wethkiś ni ana judiu źoñinakźkin maśnakhitaqaśl maśnućha, xalla tïki tawqźtan niźaśa pätanakźtan chïźinućha,

¹⁹niźaśa ni Yöś Espirituź aśtan chawkh chimpunaka milajrunaka thëśinćha. Xalla tuź werhki ni Criśtuź śuma kintu maśmaśñi źerśinćha, niźaśa ni Jerusalén wathkiśtan qallantichinćha thapa ni yoqqhutñi niźaśa ni Iliria yoqakama maśinchinćha.

²⁰Niźaśa werhki tuki ni Criśtuźkiśtan anapan nonśñi yoqaran ni Yöś śuma kintu maśinchinćha, niźaśa ni yaqha źoñinakaź thulźtikiś ana qhuyśxapa,

²¹ans ni Khjirti patxparu pächinćha: “Ni Yöśkiśtan anapan kintu nonñi źoñinakaki śiśakićha; niźaśa ni Yöśkiśtan anapan nonśi źoñinakaki nïźkiśtan kintu nonakićha.”

²²Xalla tiźtikiśtan werhki anćhuk cherśñi ana thoni atchinćha, niźaśa werhki qhaźwilta anćhukakin oqhś pekaytućha.

²³Xaśiki werhki ti yoqaran weth lanqś źerśinćha, niźaśa werhki aźqa watkiśtanpacha anćhuk thonśkiśpan pekućha,

²⁴niźaśa werhki ni España oqhkanl anćhukakiś thonźnasaćha. Xalla nuź ućhunnakki añcha śumaź śalźnasaćha qhaźta tshi upakamallami, neqhśtan anćhukki ni weth oqhś jikhśkiś yanapt'asaćha.

²⁵Werhki anśiki Jerusalén wathal oqućha, ni Yöś kirïchi jilanaka yanapi.

²⁶Niźaśa ni Macedonia wathchiś jilanakaki niźaśa ni Acaya wathchiś jilanakami, ti jilanakaki ni Jerusalén wathchiś Yöś kirïchi t'aqhir jilanakźkin onanś amtichićha wethkiś apayśxapa.

²⁷Xalla nuź ninakaki ninakź quś pektakama pächićha, cheqpacha tïki nuź päśpan wakiśatćha, xalla nuź ni Yöś kirïchi judiu jilanakaki ni Yöś taqunaka ni ana judiu źoñinakźtan toxassićha, xalla niźtaśaqaś ni ana judiu źoñinakaki ni judiu źoñinakźkiś ninakź źelinś toxunśtanćha.

²⁸Xalla nuź werhki ti źerźku niźaśa ni ramtanaka ni jilanakźkiś thäźku, Españal thonaćha, neqhśtan nuź oqhkan anćhuk thonźkul wataćha.

²⁹Niźaśa weriź anćhukakin oqhtanaki thappacha ućhunnakki Criśtuź śuma kintunakźtan añcha khjusaź paqakićha, xalla tïki cheqpachapanź khekićha.

³⁰Jilanaka werhki ni ućhumnaka Jesucriśtu tatź thükiś niźaśa Espíritu Santuź thükiś anćhuk rokt'ućha, anćhukki wethkiśtan walxaź Yöśkin mayiśakićha.

³¹Niźaśa anćhukki werh ni ana Yöś kirïchi judiu źoñinakźkiśta liwrïta khiśxapa, Yöśkin mayiśakićha, niźaśa ni weriź ni Jerusalén jilanakźkin yanapiś chhichśta śuma tanźtax khila.

³²Xalla nuź werhki Yöś pektakama anćhukakin irantiźkaki, niźaśa werhki anćhuk śumapan cheraki niźaśa anćhukatan jejźnasaćha.

³³Niźaśa ni śuma qamañchiś Yöśki thappacha anćhukatan khila. Xalla nuźux khila.