Read Chipaya ROMANOS 2 Bible Online

ROMANOS 2 - Chipaya bible

ROMANOS 2

¹Xalla niźtikiśtan ćhhuluź chëchi źoñimi anaź pertunta khesaćha. Amki yaqha źoñi juchjiptaykuki perśunpacham ujkiś thxotsa, niźaśa amki ni yaqha źoñinaka päñi cherźku, niźta iratam päćhan kunamini.

²Ans ućhumnakki śumaź śiśśa Yöśki cheqpacha werarkiśtan juchjiptayakićha, xalla ni uj päñinakaki ujchiśpan khitaź khekićha.

³Niźaśa am ni yaqha źoñinaka juchjiptayñamki niźaśa ni yaqha źoñinaka päta irata päñamki, amki ni Yöś juchjiptayśkiśtan anapanim atipasaćha.

⁴Niźaśa amki ni ana miransñi Yöś śuma oqśñi quś ćhhaxwñamćha, Yöśki añcha paśinśichśa niźaśa thewśñićha, xalla tinaka amki anam näśa niźaśa ni Yöś śuma oqśñi quś am nïźkin kirïsqatćha.

⁵Ans am choxru quśśiś źoñimki niźaśa ana ni Yöśkin kirïś pekchamćha, amki perśunpacham ujnaka akhćha, xalla ni juchjiptayś thuñkiśiki Yöśpachaź am cheqpacha ujchiśamćha khekićha

⁶niźaśa śapamayniźkiś pätikiśtanxama paktaź khekićha.

⁷Xalla ni Yöś aśi niźaśa śumanaka qhurñiźkiśiki wiñay źeti thätaź khekićha, niźaśa ana tikhśñiź khekićha, tinakaki tirapan ni śumanaka päkan thurt'ichićha.

⁸Ans ana śuma päñinakaki kaśtiktaź khekićha, niźaśa ni werar taqxapa moq'uśñinakami, niźaśa ninakaki ni ana śumanakź tukatućha.

⁹Niźaśa thappacha ni ana walinaka päñi źoñinakźtaki ana wal llakinakaź watakićha niźaśa ninakaki t'aqhiśakićha, tinakaki tuki ni judiu źoñinakźkiś watakićha, niźaśa ni ana judiu źoñinakźkiśimi tinakaki watakićha.

¹⁰Neqhśtan Yöśki thappacha ni śumanaka päñi jilanakźkiś nïź aśiź thäkićha, niźaśa ninakaki śuma qamaña thätaź khekićha, niźaśa tukkinaki ni judiu źoñinakźkiś thäkićha, niźtaśaqaś ni ana judiu źoñinakźkiśimi thätaź khekićha.

¹¹Xalla ni Yöśki ana źoñi phalźkuź juchjiptayćha.

¹²Niźaśa thappacha ni Moisés lï ana paxźku uj pächiźlax nïki, ana ni lïxaruśaqaś thatanta khekićha; niźaśa ni Moisés lï paxkanpacha uj pächiźlax nïki, ni lï patxparu juchjiptaytaź khekićha.

¹³Niźaśa ni lï nonśñinakaki Yöś tukkiś anaćha źkayi quśśiś, ans ni lï kaśñinakaćha źkayi quśśiśki cherźta khekićha.

¹⁴Niźaśa ni ana judiu źoñinakaki Yöś lïź kaśśa, ninakaki ni lï anaź paxćha, niźaśa ninakpachaź näśa ćhhuluźlax śumanaka päś niźaśa ana śumanaka päśnakami,

¹⁵niźaśa ninakaki ninakź qamaña niźaśa ninakź quśkiś ni lï khjirtanakaź thëźa. Niźaśa ninakź perśun quś qhanakama thëźa, niźaśa ninakź pinsitanaka ninaka ujkiś thxotźnaćhax uśh ninaka liwriyaćhaxa

¹⁶Xalla ni juchjiptayś thuñkiśiki Yöśki ni Jesucriśtuź qharkiśtan thappacha źoñinakaź xamaśit pinsitanakami juchjiptaytaź khekićha, xalla ti weriź Yöś śuma kintu maśintakama.

¹⁷Niźaśa amki judiu źoñimćha, niźaśa amki ni Moisés lïkiś tasñamćha, niźaśa werhki Yöśśiśtćha khikanam ayt'aśya.

¹⁸Niźaśa amki ni Yöś śuma quś paxćha, niźaśa ni lïź am śuma päś ćhhultaqi illsqatćha.

¹⁹Niźaśa amki ni śur źoñinaka irpatam nayqaya, niźaśa ni sumchikiś oqhlayñi źoñinakźkiś qhanchukam nayqaya;

²⁰amki ćhhulkiśtanam ni sumsu źoñinakźkiś thaxźnasaxo niźaśa ni upa śiśñinakźkiśim thaxźnasaya, niźaśa amtaki ni lï niźaśa ni śumanaka ana śumanaka phalś źelhćha.

²¹Niźaśa amki yaqha źoñim thaxinćhax nïki, ¿qhaźtikiśtanam ana perśunpacha tshanti katoqxo? Niźaśa anaćha źoñinakźtaki khiś khikanam maśinćhax nïki, ¿qhaźtikiśtanam ampacha khiźxo?

²²Niźaśa amki anaćha źoñź mätaqźtan źelhśkim khićhax nïki, ¿qhaźtikiśtanam ampacha yaqha mätaqźtan źelhxo? Niźaśa amki ni źoñiź päta yöśnakam iñarćhax nïki, ¿qhaźtikiśtanam ni timlu ćhhultaqinaka khiźxo?

²³Niźaśa amki ni lïm ayt'aśśa, ans amki anam ni Yöś kaśśa xalla niźtikiśtan Yöśim ćhhaxwćha.

²⁴Xalla niźtikiśtan ni khjirtaki, tuź khićha: “Ni ana Yöś kirïchi źoñinakaki anćhukaź khen Yöś moq'uź chïćha.”

²⁵Xalla tïki chïtapanćha, yaqhap źoñinakaki chimpisqatźku anaź ni lïkama qamakiź nïki, ni chimpisqattaki anaź ćhhulxapami wakiśićha; ni źoñiki anapan chimpisqatchiźtaqaśśa.

²⁶Niźaśa ni ana chimputa źoñiki lïxarupan qamćhax nïki, ni źoñiki chimputaźtaqaś khekićha ana chimputa khenami.

²⁷Xalla ni lïxaru qamñi źoñiki, niźaśa nïź xañchikiś ana chimputa khenami, ni chimputa ni lï ana kaśñi źoñi juchjiptayakićha.

²⁸Niźaśa judiu źoñimźlax nïki, anaź xañchiź śawktanqaś khiśki, niźaśa chimputamźlax nïki, anaź xañchikiź śawktanqaś thëśki.

²⁹Xalla ni werar judiu źoñiki qostampachaź thëźa, niźaśa nïki chimputaźlax nïki nïź quśkiśpan źelhćha: Xalla tinakaki anaź khjirta lïkiśtanpan khesaćha, ans ućhumnaka quśkiśtan khiśtanćha, thappacha tinakaki anaź źoñiź wakisqatta khiśtanki ans Yöś wakisqatta khiśtanćha.