Read Chipaya ROMANOS 4 Bible Online

ROMANOS 4 - Chipaya bible

ROMANOS 4

¹Neqhśtan, ¿ućhumnaka achchi eph Abrahamki kanchiqaya?

²Niźaśa Abrahamki źkayi quśśiś paxtaź khitasaź nïki, niźaśa nïź pätanakźkiśtanami, nïki ni ayt'aś wakiśtasaćha, ans ana ni Yöś tukkiśiki.

³Niźaśa ni Yöś śuma kintu khjirtikiśiki, tuź khićha: “Abrahamki Yöś kirïchićha, xalla niźtikiśtan Yöśki ni Abraham qanchićha, niźaśa Yöśki źkayi quśśiś paxchićha.”

⁴Niźaśa xaśiki yaqhapanakaki lanqźnasaź nïki, ni pakaki anaź tshi onantaźtaqaś thäsaćha, ans tshi wakiśiñiźtaqaś thäkićha.

⁵Niźaśa ni ujchiś źoñi Yöśkin kiriyanaki Yöśki ni źoñi źkayi quśśiś khisqatćha, Yöśki nïź thapa quśśiś khen źkayi quśśiśśa khićha, ni Yöśta ana ćhhulu śuma pächi khenami.

⁶Niźaśa Davidpachaćha chïchiki, añcha walićha ni Yöś źkayi quśśiśamćha khita źoñiki, ni źoñi Yöśta ana ćhhulu pächi khenami.

⁷Davidki tuź khichićha: “¡Añcha walićha, ni Yöś pertunta źoñinakaki, niźaśa ninakź ana śuma pätanakźkiśtan pertuntaćha, niźaśa ninakź ujki ana juśhupätaź watćha!

⁸¡Añcha walićha, ni źoñinakź uj Yöśiź ana juśhupätaki!”

⁹¿Xalla ti khjirtaki ni chimputa źoñinakźkinqaś khesaya, uśh ni ana chimputa źoñinakźkin śaqaź khesaxa? Ućhumnakki khitaćha, Yöśki ni Abrahamź thapa quś tanśićha, źkayi quśśiś paxśxapa.

¹⁰¿Niźaśa nïki xaqhnuź paxtataya? ¿Ni Abrahamź chimpitikiśtanqaya uśh ima chimpanxa? Anaź ni chimpukan ans ima chimpikan paxtaćha.

¹¹Neqhśtan Abrahamki chimputaćha, xalla ni chimpuki tshi k'anaźtaqaśtaćha ni Abraham thapa quśśiś khen Yöśki ni źkayi quśśiś paxtqalćha. Xalla niźtikiśtan ni Abrahamki thappacha ni thapa quśśiś źoñinakź eph khissićha, qhaźta ana chimputa źoñinakźkiśtanami; xalla nuź Yöśki ni źoñinakami źkayi quśśiś paxćha.

¹²Niźaśa Abrahamki ni chimputa źoñinakź ephśaqaśśa, ni Abraham ima chimpita khikan thapa quśśitaćha, niźaśa ućhumnakki ni oqiśaqaś oqhćha.

¹³Niźaśa Yöśki Abrahamźkiś niźaśa nïźkiśtan oqhñinakźkiś taqu onśićha, ninakaki ti yoqa tshi thätapataźtaqaś tanźnax khitaćha; xalla ti taqu onźtaki anataćha ni lïxaru kumlisnax khitaki, ans ni thapa quśkiśtan juchjiptayś wataxkhitaćha.

¹⁴Niźaśa ni pata tanśñi źoñinakaki ni lïxarupanź qamćha, neqhśtan ni thapa quśśiś khiśki ana wakiśiñiź khissa, neqhśtan ni Yöś śuma kintu onźtaki ana aśśiś khisnasaćha.

¹⁵Niźaśa ni lïki kaśtikuź śhikćha; ans xaqhsikin ni lï ana źelhćha nïki, ni lïxapa anaź uj źelhćha.

¹⁶Niźaśa ni Abrahamźkiś taqu onźtaki, thappacha nïźkiśtan oqhñi źoñinakaki ni taqu waqaychiśtanćha, niźaśa Yöśki ninakźkiśtan ana ćhhul pakami maychićha, ans Yöśki thappacha nïźkiś tasñinakźkiś taqu onśićha. Xalla ni taqu onźtaki anaćha ni lïxaru qamñinakźta, ans thappacha ni thapa quśśiś kirïñinakaki ni Abrahamźtaqaśśa. Xalla niźtikiśtan ni Abrahamki thappacha ućhumnaka ephź khissa,

¹⁷xalla ni khjirtikiśiki, tuź khićha: “Werhki am wakchi chawkh watanakź eph khisqatchinćha.” Niźaśa Abrahamki ti Yöś kirïchićha, niźaśa ni Yöśśa ni tikhśi źoñinakźkiś źeti thäñiki, niźaśa nïćha ni ana źelhñi ćhhultaqinaka päñiki.

¹⁸Niźaśa abrahamźtaki ana atchukaź khisnatćha, neqhśtan Abrahamki Yöśkin kirïźku p'eqtichi atchuka khissićha, xalla nuź Abrahamki. “Wakchi chawkh wathanakź eph khissićha”, xalla ni Yöś nïźkiś chïtakama: “Xalla tiźtaź ni amkiśtan oqhñinaka khekićha.”

¹⁹Niźaśa ni Abrahamź thapa quśki ana ch'uñurtichićha, qhaźta tshi tshiwatha watchiś khiskanami, niźaśa ni Abrahamki Saratanpacha tikhśmayaćha ućhumnakki khikan näśnatćha, niźaśa ninakaki tshi uśhśiś khiśxapaki suti omchipantaćha.

²⁰Niźaśa Abrahamki anapan teqenaśśićha, niźaśa Yöś nïźkiś taqu onśiź khen anapan payśnaqchićha, ans Abrahamki tshanti thapa quśtan khissićha. Niźaśa Yöś thü aynaqchićha,

²¹niźaśa Abrahamki cheqpacha ni Yöśki nïź aśtan nïźkiś taqu onźta kumlisqatakiqa khetćha.

²²Xalla niźtikiśtan Yöśki nïź quś tanchipanćha, niźaśa źkayi quśśiś paxchićha.

²³Xalla ti Yöśiź tanźtaki, anataćha ni Abrahamźkiśtan alaxa khjirtaki;

²⁴xalla ni khjirtikiśiki ućhumnakkiśtanśaqaś khjirtataćha. Niźaśa Yöśki ućhumnaka thapa quśśaqaś paxćha, xalla ni ućhum Jesús Tata jakatatsqatñiźkiś kiriyakiź nïki.

²⁵Ni Yöś Eph ni Jesusa ućhumnaka ujkiśtan tikhźnaxu thächićha, xalla nïki ućhumnak źkayi quśśiś khexu jakatatchićha.