Read Chipaya ROMANOS 5 Bible Online

ROMANOS 5 - Chipaya bible

ROMANOS 5

¹Niźaśa Yöśki ućhumnak źkayi quśśiś khisqatchićha, ućhumnakki ni Jesucriśtuź khen ni Yöśtan añcha śuma qamañchiśćhumćha.

²Niźaśa ućhumnakki ni Criśtuź khen Yöśkin thapa quśtan makhatitaćha, niźaśa ućhumnakki nïź oqśñiź khen añchaź chipakićha ućhumnakki thurt'itapanćha, neqhśtan ućhumnakki ni Yöś thonñi aśkiś wakiśiźku añchaź chipakićha.

³Ućhumnakki anaź tïkiśtanqaś chipakićha, ans ućhumnakki ni t'aqhiśiśkiśtanśaqaś chipakićha; niźaśa ni t'aqhiśiśki ućhumnak tshan thupi quśśiś khisqatćha ni llakinaka mutśxapa,

⁴niźaśa ti thup quśki ućhumnak illśta wakiśqatćha, xalla nuź illśta wakiśiźkuki ućhunnakaltaki liwrïtaź khekićha.

⁵Xalla ti ućhumnakalta śuma thonñiki anaź ućhumnak q'otćha, xalla ni Yöśśa ni Espíritu Santuź qharkiśtan ućhumnaka quś nïź oqśñi quśtan śhipźinchiki, niźaśa nïćha ućhumnakakiś thächiki.

⁶Niźaśa tuki ućhunnakpacha anapantaćha liwrïsukaki, neqhśtan Criśtuki ućhumnaka ujkiśtan tikhśićha.

⁷Niźaśa yaqha źoñźkiśtan tikhśki ch'amaź khesaćha. Anapan tshi źkayi quśśiś źoñźkiśtanami; kunamit yaqhap źoñiki tshi śuma päñi źoñźkiśtan tikhś pekćhani.

⁸Niźaśa Yöśki ućhumnak pekkuź yanźa, qhaźta ućhumnak ujchiś khenami, niźaśa Criśtuki ućhumnaka layku tikhśićha.

⁹Xaśiki Criśtuź ućhumnakkiśtan tikhźtikiśtan Yöśki ućhumnak źkayi quśśiś khisqatchićha, neqhśtan ućhumnakki ni tukuśiñi t'aqhiśiśkiśtan Criśtuź khen liwrïta khekićha.

¹⁰Niźaśa ućhumnakki Yöśtan moq'u khikanaki, ni Yöśpachaź nïź Machh tikhźtikiśtan ućhumnakatan śumansićha, xalla niźtikiśtan ućhumnakki nïź źetchiś khen liwrïta khekićha, xaśiki ućhumnakki ni Criśtuźtan śumanstaćha.

¹¹Niźaśa anaćha tiqaś, ans ućhumnakki ni Jesucriśtu Tataź khen ni Yöśkiśtanź chipćha, niźaśa ućhumnakki ni Criśtuź khen Yöśtan śumans tanźtaćha.

¹²Xalla nuź tshi źoñźkiśtanqaś ni uj päśki ti yoqkiś luśhśićha, niźaśa ni ujkiśtan ni tikhśki źelhćha, niźaśa thappacha źoñinakaź uj pächiź khen ni tikhśki thapatiźkiś thonchićha.

¹³Niźaśa ima ni lï źelan ni uj päśki ti yoqkiśpan źelatćha; niźaśa ima ni lï źelan ni ujnakaki anaćha qanta.

¹⁴Ans ni Adanźkiśtan Moiseskama źoñinakaź uj pätikiśtan ni tikhśki źelhchipanćha, niźaśa ti źoñinakaź päta ujnakaki anataćha ćhhul lï moq'umi ni pachaki ni lïki anaź źelatćha, niźtaśaqaś Adanki uj pächićha, niźaśa ni Adanki ni uśhka thonñi iratataćha.

¹⁵Niźaśa ni Adanź uj pätanakaki ni Yöś ućhumnakakiś onantiźtan anaź tupi atasaćha. Niźaśa tshi źoñiź uj päñiź khen wakchi źoñinaka tikhśićha; ans ni Yöś ućhumnakakiś onanchitaki tshi źoñźkiśtanqaś ana pakśuñ onanźkitaćha, niźaśa Jesucriśtućha thapatiźkiśtan tshan paqhiki niźaśa nïki thapatiźta añcha śumaćha.

¹⁶Niźaśa tshi źoñiź päta ujki anaź ni Yöś onanchita tupi atasaćha, niźaśa tshi ujkiśqaś ujchiśpan khitaćha; ans ni Yöś onanchitaki ni źoñiź päta ujnakkiśtan źkayi quśśiś khisqatćha.

¹⁷Niźaśa ni tikhśki tshi źoñiź uj päñiź khen tshi pakaźtaqaś ni tikhśki źelhchipanćha, ans Jesucriśtuki ućhunnakź tanźa niźaśa ućhumnakki ni wiñay źetchiś khekićha. Niźaśa Yöśki ućhumnak pekćha, niźaśa ućhumnak tanśićha ana pakśuñ.

¹⁸Xalla nuź ni Adanź ujki, thapa źoñinaka uj ujchiśpanćha khisqatchićha, xalla nuźuśaqaś ni Jesucriśtuź źkayi quśki thapa źoñinaka źkayi quśśiś khisqatchićha, niźaśa ninaka wiñay źetchiź khexo.

¹⁹Niźaśa tshi źoñiź ana kaśñiź khen, wakchi źoñinakaki ujchiś khitaćha; xalla niźtaśaqaś tshi źoñi kaśku wakchi źoñinakaki źkayi quśśiś khitaź khekićha.

²⁰Niźaśa ni lïki ni ujnaka yapaxu thonchićha; neqhśtan ni uj päśnaka yaptikiśtanaki, Yöśki tshanti oqśñi quśśiś khissićha.

²¹Xalla nuź ni ujki tikhśxapa źelhchićha, xalla niźtaśaqaś ni Yöś oqśñi quśki ućhumnak źkayi quśśiś khisqatćha niźaśa ućhunnakakiś Jesucriśtuź qharkiśtan wiñay źetiź thäćha.