Read Chipaya ROMANOS 6 Bible Online

ROMANOS 6 - Chipaya bible

ROMANOS 6

¹¿Neqhśtan ućhumnakki qhaźćhumź khekixo? ¿Ućhumnakki tirapanź uj päkiya, ni Yöś tshanti ućhumnak oqźnaxu?

²¡Anaź nuź khesaćha! Ućhumnakki uj päñiźkhen tikhźtaćha; ¿xaqnuźupan ućhumnakki tira ni uj päkan qamasaxo?

³¿Anćhukki anaź śiśqaya? Ućhumnakki wawtiskan Jesucriśtuźtan śalźkuki, nïź tikhśkiś chika khistaćha.

⁴Niźaśa ućhumnakki wawtisku ni Criśtuźtan thatźtaćha, niźaśa ućhumnakki jakatatsqatta khiśxapa tikhźtaćha niźaśa tshi ew qamañkiś źethśxapa, xalla niźtaśaqaś ni Criśtuki ni Yöś aśtan jakatatsqattaćha.

⁵Niźaśa ućhumnakki ni Criśtuź tikhśkiś chika khistaźlax nïki, niźtaśaqaś nïźtan chika nïź jakatatśkiś khislalla.

⁶Xalla tïki qhanaćha; tuki ućhumnakki ujchiśćhumtaćha, xalla ni Criśtuź kuruśhkiś tikhźnan ućhumnakki niźtan chika tikhźtaśaqaśśa. Xaśiki ni uj päśnakaki anaź ućhumnak irpićha.

⁷Xalla ni tikhśñi źoñiki, nïź ujkiśtan liwriź eklićha.

⁸Niźaśa ućhumnakki Criśtuźtan tikhźtaźlax nïki, ućhumnakki Criśtuźtan qamśxapa nïźkiś tastanćha.

⁹Niźaśa ućhumnakki śiśśa ni Criśtu jakatatźkuki anaź wilta tikhźnakićha. Niźaśa ni tikhśki ni Jesusiźkiś ana aśśiśśa.

¹⁰Niźaśa Criśtuki nuź tikhźkuki ni ujnakźkiśtan tshiqaś tikhśićha; ans nuź źethkuki Yöśtaxapaź źethćha.

¹¹Xalla nuźuśaqaś anćhukki ni ujkiśtan tikhśiźtaqaś khekićha, niźaśa ućhumnakki Yöśtaxapaź źethćha, niźaśa ni Jesucriśtuźtan chika.

¹²Niźaśa anćhukki anaź ni anćhuka tikhśñi xañchikiś tira uj päkićha, niźaśa anćhukki anaź anćhuka xañchiź pektakama oqa.

¹³Niźaśa anćhukki ni anćhuka xañchi anaź ni uj päśnakkiś thäkićha, xalla nïki tshi uj päś lurañaźtaqaś khesaćha. Ans anćhukki Yöśkinź ni anćhuka quś thä, tshi źoñi tikhźku qamśxapa jakatatchiźtaqaśśa, niźaśa anćhuka xañchi Yöś źkayi luraña khiśxapa thäkićha.

¹⁴Xalla nuź ni uj päśki anćhukakiś ana aśśiś khekićha, niźaśa anćhukki anaź ni lïxaru qamćha, ans anćhukki Yöś quśkamaź qamćha.

¹⁵¿Neqhśtan ćhhulutaxo? ¿Niźaśa ućhumnakki anaćha ni lïxaru qamćha khikan tiraź uj päkiya, ans Yöś quśkamaćha śaqaś khekiya? ¡Anaź nuź khesaćha!

¹⁶Niźaśa anćhukki śumaź śiśśa, anćhuk tshi tuyñuźkiś manta päśxapa makhatasaź nïki, anćhukki ni tuyñu kaśku nïź manta päñipanź khekićha. Xalla tïki nuźupanćha, niźaśa anćhuk ni uj päśkiś kaśasaź nïki, xalla ni ujki tikhśkinpanź chhichcha, niźaśa Yöś kaśkuśti śuma qamañkiś khekićha.

¹⁷Niźaśa tuki anćhukki ni ujź attataćha. Neqhśtan anćhukki thapa quśtan ni anćhukakiś Yöś śuma kintu thaxintanaka katoqchinćhukćha, xalla niźtikiśtan werhki Yöśkin sparakiź khiwćha.

¹⁸Neqhśtan anćhukki ni ujź attikiśtan liwrïta khisku, ni juchjiptayś manta päśkiś luśhśinćhukćha.

¹⁹(Werhki źoñinakźta näśukal chiyućha, niźaśa anćhukki ana thup quśśiś khikan anaź ti ćhhultaqinaka śumpacha katoqi atćha.) Xalla nuź anćhukki tukiki ni anćhuka xañchi ni ana śuma päśnakkiś thächinćhukćha, niźaśa ni anćhuka ana śum quś ana śuma päśxapa thächinćhukćha, xaśiki niźtaśaqaś anćhukki ni anćhuka xañchi ni juchjiptayś manta päśkiś thälla, xalla ni źkayi qamañchiś khiśxapaki.

²⁰Niźaśa anćhuk tira ni ujź atta qamkanaki, anćhukki ni Yöś juchjiptayś anaź paxatćha;

²¹¿neqhśtan anćhukki ćhhulu wali pächinćhuktaxo? Xaśiki anćhukki ni ćhhultaqinakźkiśtanź aśśa, ni ujnakaki tikhśkinpanź chhichcha.

²²Xaśiki anćhukki ni ujź attikiśtan liwrićhukćha, niźaśa anćhukki Yöś manta päśkiś luśhśinćhukćha. Xalla tinakaki añcha walićha, niźaśa śuma qamañaćha neqhśtan tukuśinskinaki wiñay źetchiś khekićha.

²³Ni tikhśki uj päta pakaćha, ans ni Yöś onanchiźkitaki wiñay źetićha ni ućhumnaka Jesucriśtu Tatźtanaki.