Read Chipaya ROMANOS 9 Bible Online

ROMANOS 9 - Chipaya bible

ROMANOS 9

¹Werhki Criśtu kirïchi źoñiźta weraral chiyućha, niźaśa anal toskara chiyućha. Niźaśa weth quśki ni Espíritu Santuź irpitaćha, xalla nïki weriź chïta werarapanćha khićha:

²Werhki añcha chawkh llakchiśtćha, niźaśa weth quśkiśiki tirapanź tshi ujźtaqaś aqćha,

³niźaśa werhpachal ni Criśtuźkiśtan t'aqsi ni ujkiś thxotta khiśpekućha, xalla nuź werhki ni weth jilanaka yanapi atasaćha ninakaki weth qhuy źoñinakaćha.

⁴Xalla tinakaki Israelźkiśtan oqhñinakaćha, niźaśa Yöśki tinaka nïź matiźtaqaś uywichićha. Niźaśa Yöśki nïź aśtan ninakźtanpan źelhchićha, xalla ni Moisés lïmi niźaśa ni amtiśnakami niźaśa ni taqu onźtanakami Yöśśa thächiki.

⁵Xalla tinakaki ućhumnaka achchi ephnakźkiśtan oqhñinakaćha; xalla ninakź xañchikiśtan Mesiaski thonchićha, xalla nïki Yöśśa thappacha ti ćhhultaqinakźkiśtan, wiñayxapa nïź thüki aynaqtapanx khila. Xalla nuźox khila.

⁶Niźaśa Yöś ni Israelźkiś onźta taqunaka ana aqsix khila, ans anaćha thappacha ni Israel wathkiś qamñi źoñinakaki Israel źoñipan.

⁷Niźaśa anaćha thappacha ni Abrahamźkiśtan oqhñinakaki, ans Yöś ni Abrahamźkiś khitqalćha: “Amkiśtan oqhñinakaki Isaacźkiśtanź thonakićha.”

⁸Xalla tïki ućhumnakź näsqatćha anaź jëkhmi Yöś mati, ans Yöś Abrahamźkiś taqu onśñiź khen ninakaki Yöś mati khitaćha.

⁹Xalla tïćha ni Yöś Abrahamźkiś taqu onźtaki: “Werhki ti thuñiran thonaćha, neqhśtan Sarki tshi machhchiś khekićha.”

¹⁰Xalla tïki anaćha thapa. Na Rebeca pukultan machhnakaki tshi ephchiśtaćha, xalla nïki ućhumnaka achchi Isaac ephćha,

¹¹Yöśki Rebecakiś maśinchićha ima tinaka mathtaź khen tinakaki ana ćhhulumi pächitaćha, niźaśa śuma pän ana śuma pänmi: “Ni jilir machhki nïź laqhź manta päñiź khekićha.”

¹²Xalla tinakźkiśtanaki ni khjirtikiśśaqaś tuź khićha: “Werhki Jacob añcha pekchinćha ans Esauki ćhhaxwchinćha.”

¹³Xalla nuź ni Yöś quś pektakama ni illśtaki kumlissićha, niźaśa ninakaź uj pätanaka ana juśhu päźku, xalla nuź nïź pekta źoñinaka qhawźnasaćha.

¹⁴¿Xalla niźtikiśtan ućhumnakki Yöś ana źkayi quśśiśaź khekiya? ¡Anaź nuź khesaćha!

¹⁵Yöśki Moiseskiś khichićha, tuź khikan: “Werhki jëkhźkiś oqśpekkul oqźnaćha, niźaśa jëkhźkiś yanapś pekkul yanapaćha.”

¹⁶Xalla niźtikiśtan anaź źoñiź pektakama khesaćha niźaśa anaź Yöśkiśtan saraqñi źoñiź pektakamami khesaćha, ans Yöś oqśñi quśkamaź khekićha.

¹⁷Xalla ni Yöś śuma kintu khjirtikiśiki, Yöśki ni Egiptu reyźkiś tuź khićha: “Werhćha am rey uchchintki weth aśi amkiś thëśxapa niźaśa weth thü thappacha ti yoqkiś źelhñi źoñinakźkiś maśinta khexu.”

¹⁸Niźaśa Yöśki jëkhźkiś oqś pekkuź oqźa, niźaśa jëkhźkiś choxru quśśiś khisqatś pekćhaxa xalla nïźkiś choxru quśśiś khisqatćha.

¹⁹Niźaśa amki wethkiś khekićha: “Niźta ujchiś khikanpacha, ¿Yöśki ćhhulkiśtan źoñźkiś ujchiśśa khesaya? Niźaśa anaź jëkhmi Yöś amtaki aqi atasaćha.”

²⁰Niźaśa amki, ¿jëkimta Yöśkiśtan qaxa mayśxapaxo? ¿Ni lhok maśkaki ni päñiźkiś tuź chiyasaya: “Amki qhaźtikiśtan werh tiźta pächamtaxo?”

²¹Xalla ni lhok maśka päñi źoñiź xaqhnuź päś pekkumi ni lhokkiśtanki päsaćha, niźaśa ni lhokkiśtanpacha tshi ana inapampa xöxöś maśka päsaćha, niźaśa tshi maśkaki thapa źoñinakź xöxöśxapa päsaćha.

²²Niźaśa Yöśki ni ujchiś źoñinaka kaśtikśxapa niźaśa nïź aśi thëśxapa, ni kaśtikta khiś wakiśñi źoñinaka niźaśa ni ana śumkin oqhñi źoñinaka, añcha chawkh paśinśiźtan awantichićha.

²³Xalla ni orapacha Yöśki nïź chawkh aśi ućhumnakakiś paxqatś pekchićha, niźaśa nïki añcha ućhumnak oqśićha, xalla neqhśtan ućhumnak nïźkin wakiśiñi khitaćha.

²⁴Niźaśa Yöśki ni judiu źoñinakźkiśtan ućhumnak qhawśićha, niźaśa yaqhapanakaki ana judiu źoñinakźkiśtanśaqaś qhawźtaćha.

²⁵Xalla ni Oseas liwrukiśiki tuź khićha: “Xalla ni ana weth wathataźlax nïki ninakaki weth wathal thüsqataćha; xalla ni ana pekta źoñinakaki pektaź khekićha.

²⁶Xalla ni chïta yoqkiśpachaki tuź khichićha: ‘Anćhukki anaź weth wathćhukki’, xalla ninakaki źethñi Yöś mati khitaź khekićha.”

²⁷Niźaśa Isaiaski ni israelit źoñinakźkiśtan, tuź khichićha: “Ni Isrelźkiśtan oqhñi źoñinakaki tshi qot philaź taqaś meqax khila, ninakźkiśtan tshi qhaźultanqaś liwrïta khekićha,

²⁸niźaśa Yöś chïta taquki thappacha ti yoqkiś waxillaź kumlisnakićha.”

²⁹Niźaśa tuki ni Isaiaspacha tuź khikan chïtqalćha: “Niźaśa ni chawkh aśśiś Yöśki anaź ućhumnakkiśtan oqhñi ektasaź nïki, ućhumnakki anśpacha ni Sodoma Gomorra irataź pastasaćha.”

³⁰¿Ućhumnakki tïźkiś qhaźkhikanź khekixo? Yöśki thapa quśśiś khen ni ana Yöś kirïchi źoñinaka źkayi quśśiś khisqatchićha, xalla ti źoñinakaki anaź ni juchjiptayś qhuratćha.

³¹Ans ni israelit lï patxparu qamñi źoñinakaki, anapan liwrïsñi atchićha.

³²¿Qhaźtikiśtan niźtaxo? Xalla ti źoñinakaki anataćha thapa quśtan, ans tinakaki tinakź quśkamaqaź pätćha. Xalla niźtikiśtan tinakaki ni “texś maśkiś texchićha”

³³Niźaśa ni khjirtikiśiki tuźśaqaś khićha: “Werhki ni Jerusalén wathkiś texchuk maśl nonźinaćha, anćhukki ni maśkiś texakićha; niźaśa ni maśkiś tasñi źoñiki, anaź aqta khekićha.”