Read Chipaya 1 CORINTIOS 13 Bible Online

1 CORINTIOS 13 - Chipaya bible

1 CORINTIOS 13

¹Niźaśa werhki źoñinakź chïś taqunakal chiyasaź niźaśa anjilanakź chïś taqunakamil chiyasaćha, ans werhki ana oqśniñźlax nïki, werhki tshi lächi jiruźtaqaśtćha niźaśa tshi źhaxr kampanaźtaqaśtćha.

²Niźaśa werhki Yöśkiśtan chiyax khititźlax nïki, niźaśa werhki ni Yöś xamaśit amtitanaka śiśućhax nïki, niźaśa thappacha ti ćhhultaqinaka śiśkumi, niźaśa werhki tshi kuru qisqatś quśśiśtćhalax nïki, ans werhki ana oqśniñźlax nïki, werhki anaź ćhhulumit.

³Niźaśa werhki weth qamanaka ni t'aqhir źoñinakźkiś toxźinkumi, niźaśa werhki weth perśun xañchil ujźnaxu thäsaź nïmi, niźaśa werhki ana oqśniñźlax nïki, xalla tinaka pätaki wethtaki ana ćhhulumi wakiśićha.

⁴Xalla ni oqśñi quśśiś źoñiki awantiñi quśśiśśa, ana ćhhaxwqatñi quśśiśśa, niźaśa ana mit quśśiśśa.

⁵Niźaśa ana ćhhulumi ana wali päñićha, niźaśa ana źoñźta qhxortipaśñićha, niźaśa ana perśunpacha śhoxritsñićha, niźaśa anapan ćhhulkiśtanami źaxwchi źelhñićha;

⁶niźaśa anaź ni ana śumanakkiśtan chipśki, ans werarkiśtanpanź kuntintu khiśki.

⁷Niźaśa śuma oqśñi quśśiś khiśki thappacha ćhhultaqinakkiśtan t'aqhiśiśpanćha, amki thappacha ninaka kiriya, niźaśa thappacha thewźna, niźaśa thappacha awanta.

⁸Niźaśa ni oqśñi quśki anaź wira qatakićha, ans ni Yöśkiśtan chïñi jilanakakiź qatakićha, niźaśa ni taqunakamiź qatakićha, niźaśa ti yoqkiś śiśtanakami anaź wakiśakićha.

⁹Niźaśa ti śiśtanakami niźaśa Yöśkiśtan chïtanakami, niźaśa ti anś śiśta ćhhultaqinakaki anaź qhanakama.

¹⁰Niźaśa ćhhul orat Yöś thonaćhaxa xalla ni oraź ni ana śum ćhhultaqinakaki qatakićha.

¹¹Werhki uśha khikanaki chïchintaćha niźaśa pinsintaćha niźaśa parlintaćha tshi uśhaźtaqaś; niźaśa chawk źoñi khiskuki, ni uśha khikan qamtanakaki wirkin ekchinćha.

¹²Anśiki ućhumnakki ni Yöś anaź qhanakama cherćha, tshi śur ispijukiśtaqaś; ans tshi nöxiki ni Yöśtan yukhporaź chersasakićha. Anś weth quśki anaź śuma ni Yöś paxćha, niźaśa werhki tshi nöxiki śumpachal ni paxaćha, xalla ni Yöś xaqhnuź werh paxchiźlax xalla nuź.

¹³Niźaśa chheph ćhhultaqinakaź cheqan źelhćha: Ni thapa quśtan khiś, niźaśa ni śuma thonñi cheqś, niźaśa ni źoñi oqś; xalla ni chhephkiśtanaki tshan cheqanaki ni źoñi oqśa.