Read Chipaya 1 CORINTIOS 16 Bible Online

1 CORINTIOS 16 - Chipaya bible

1 CORINTIOS 16

¹Anćhukki ni Yöś kirïchi jilanakźkiś yanapśxapa ramt'akićha, anćhukki weriź ni Galacia yoqkin Yöś kirïchi jilanakźkiś chïźintakamaź päkićha.

²Niźaśa śapa tuminkuki anćhukki śapa mayni tshi qhaźtallami anćhuka kantaxamkiśtan t'aqśtantaćha, niźaśa anćhukki ni śhoxśtanćha ni weriź thontan ana wilta ramśxapa.

³Neqhśtan weriź thontan, werhki ni anćhukaź illśta źoñinaka Jerusalén wathal kuchnaćha, ni anćhukaź ramthapta päśnakźtan niźaśa anćhukaź khjirta kartiźtanl kuchnaćha.

⁴Niźaśa werh oqhchukaź khekiź nïki, ninakaki wethtanź oqakićha.

⁵Werhki ni weth oqhśkiśiki Macedonia yoqa nuź wathśtanćha; neqhśtan Macedonia yoqkiśtan Corinto wathal irantaćha.

⁶Neqhśtan werhki anćhukatan tshi qhaźtapacha ekliś atućha, uśh nït thappacha ni awtipacha nikhu eklaćhaxa; neqhśtan wiruñ werh oqhś khenaki anćhukki werh yanapasaćha.

⁷Niźaśa werhki, anćhuk anśiki anal watkanqaś cherśpekućha, ans tshi qhaźtapacha anćhukatan źelhś pekućha, Yöś nuź munasaź nïki;

⁸Niźaśa werhki ni Éfeso wathkiś ni Pentecostés thuñikamal eklaćha,

⁹niźaśa ni weth lanqś śanaki piśkkiśtan piśk khethsićha, niźaśa ni wethtan moq'u źoñinakaki tamaćha.

¹⁰Niźaśa anćhukki Timoteoź irantiźkitan, Timoteoź quś kuntintupanź khisqatakićha, xalla nïki werh irata Yöśtaxapa lanqśñiśaqaśśa.

¹¹Niźaśa anćhukakiśtan anax xaqhsiltami ni Timoteo iñarakićha; ans anćhukki nïź oqhśkiś thapa quśtanź yanapakićha, xalla ni Timoteo werh cherśñi thonaxu, niźaśa werhki Yöś kirïchi jilanakźtan chikal thewźnućha.

¹²Ans werhki ni Apolo jilźkiśiki añcha rokt'ichinćha, ni Yöś kirïchi jilanakźtan anćhukakin thonśñi oqaxu, niźaśa ni Apoluki anśiki ana oqhś pekchićha. Niźaśa nïki ćhhul ora oqhśpekkut oqaćhani.

¹³Niźaśa anćhukki naynayi niźaśa thapa quśtanpaź khekićha. Niźaśa anćhukki Criśtuźkiś tassi thapa quśtanpanź khekićha.

¹⁴Niźaśa anćhuk ćhhulu päkumi, thapa quśtanpanź päkićha.

¹⁵Niźaśa jilanaka anćhukki śiśśa, ni Acaya yoqkiśtanaki ni Estéfanas qhuy źoñinakaćha tuki Yöśkin kirïchiki, neqhśtan ninakaki ni Yöś kirïchi jilanakźkiś thapa quśtan manta pächićha.

¹⁶Niźaśa anćhuk jilanaka ni Estéfanas irata päñi źoñinaka irataź khekićha, niźaśa thappacha ni yanapñinaka niźaśa Yöśta lanqśñinaka irataź khella.

¹⁷Werhki ni Estéfanas thontikiśtan añchal chipchinćha, niźaśa ni Fortunato, Acaico, tinakaki anćhukaź ana źelan anćhukakiśtan thejźinchićha.

¹⁸Ninakaki werh quś phiya khisqatchićha, niźaśa anćhukakiśimi. Niźaśa anćhukki ninaka thapa quśtanź nonźna.

¹⁹Niźaśa ni Asia yoqkiś źelhñi Yöś kirïchi jilanakaki anćhukakin tsänźkićha. Niźaśa Áquila niźaśa Prisca niźaśa ninakź qhuykiś akhsñi Yöś kirïchi jilanakaki Yöś Tatź thükiś anćhukakinśaqaś tsänźkićha.

²⁰Niźaśa anćhukki thappacha ni Yöś kirïchi jilanakaź tsänźkita tanźna. Niźaśa anćhukki anćhukkamaź tshi śuma chhulśñillźtanź chhulsasakićha.

²¹Werh Pawlutki, anćhukakin ti tsäntal perśun qharźtan khjirźkućha.

²²Niźaśa xaqhsilta źoñit ana Yöś pekćhax nïki, ¡xalla ni Yöś kaśtikuki ni źoñźkiśx thonla! ¡Ućhunnaka Yöś Tata thonalla!

²³Niźaśa ni Jesús Tataki anćhukakiś nïź oqśñi quśx thäźkila.

²⁴Niźaśa weth oqśñi quśki Jesucriśtuź thükiś anćhukatanpanćha, xalla nuźox khila.