Read Chipaya 1 CORINTIOS 4 Bible Online

1 CORINTIOS 4 - Chipaya bible

1 CORINTIOS 4

¹Anćhukki werhnak Criśtu yanapiñiźtaqaś nayśtanćha, niźaśa nïź xamaśit amtitanaka thaxinśxapaki.

²Xaśiki ni Yöś kirïchi jilanaka irpiñiź peksa, xalla ninakaki śapamyni śuma quśśiś khiśtanćha.

³Niźaśa anćhuk werh juchjiptayasaź nïki niźaśa ti yoqkiś juchjiptayñi jilirinakami anal juśhu pawućha. Niźaśa anal werhpachami juchjiptayućha.

⁴Niźaśa werhki anal ana śumanaka päta khuñućha, xalla nuź khikuki werhki anaćha ujkiśtan liwritki. Yöśpanqaź werh juchjiptayasaćha.

⁵Xalla niźtikiśtan anćhukki ima ni thuñiź irantiźkan anaź juchjiptaya; niźaśa anćhukki thewźna ni Tataki thonźku ni qhankinź jesakićha añś ni sumchikiś khiñinakaki, niźaśa śapamayniź quśkiś pinsitanaka paxśxapa. Xalla neqhśtan Yöśki śapamayniźkiś wakiśiñi śumanakaź thäkićha.

⁶Jilanaka, werhki ti ćhhultaqinakźkiśtan anćhukakiś wakiśiñixapal palxayućha, niźaśa ni Apolo niźaśa werhpacha tshi näśqatś taquźtaqaśśa. Anćhukki wethnakakiśtan ti näśqatś taqunakźkiśtan katoqaxu chiyućha, niźaśa ni khjirtikiśtan ana tshiqhutñi qhxeśaxu, niźaśa ana jëkh źoñimi mita khexu, niźaśa ana ti źoñi walićha khikan oqhlayaxu.

⁷Niźaśa, ¿jëkit anćhukakiś ni yaqha źoñinakźkiśtan śuma źoñimćha khexo? ¿Yöśki ćhhulu amkiś ana thächitaxo? Niźaśa ni Yöśki amkiś thächiźlax nïki, ¿qhaźtikiśtanam amki perśunpacha katuśichiźtaqaś chïxo?

⁸Niźaśa anćhukki źelinchiś źoñinakćhukćha, niźaśa anćhukki ćhhulu päśpekkuź päsaćha, niźaśa anćhukki tshi irpiñiźtaqaś ana wethnakaź yanapta khiśpekćha. ¡Xanqaź anćhukki cheqpacha irpiñi jiliri kheki, neqhśtan werhnakki anćhuka irpiśkiś wakiśiñiśaqaś kheki!

⁹Ans werhnak apuśtulanaka Yöśki werhnak wirkin uchchiźtaqaś nayućha, tshi ujchiś źoñi konś khitaźtaqaś. Werhnakki ti yoq źoñinakaź cheqźta khiskiś thonchinćha, ni anjilanakźkiś niźaśa ti źoñinakźkiśimi.

¹⁰Niźaśa werhnakki Criśtuź khen sumsuźtaqaś naytaćha; niźaśa anćhukśti Criśtuź oqśñiź khen muspa śiśñi źoñi naytaćha. Niźaśa werhnakki aś up źoñinaktćha, ans anćhukki walxa aśśiśćhukćha. Niźaśa werhnakki ćhhaxwtitćha, ans anćhukśti rispittaćha.

¹¹Niźaśa werhnakki ti orakama ćhherźqharal pasnućha, niźaśa qhaśkiśtanami niźaśa śkitkiśtanami; niźaśa źoñinakaki werhnakź śhoxrichcha, werhnakki ana perśun źelhś qhuychiśtćha

¹²niźaśa werhnakki perśun qharźtan lanqźkan añchal oćhućha. Ni werhnak ćhhaxwñi źoñinakźkiśiki werhnakki śuma taqunakźtan qhäśnućha; niźaśa werhnakki qhurtitćha, niźtami werhnakki thurt'ućha.

¹³Niźaśa ni źoñinakaki werhnakź ar arćha, werhnakśti śumal qhäśnućha. Niźaśa ni źoñinakaki ti yoq khuchinakaźtaqaś werhnak nayćha, niźaśa ni źoñinaka aqniźtaqaś ti orakama werhnak nayćha.

¹⁴Niźaśa werhki anal anćhuk aśaxu ti taqunaka khjirźkućha, ans anćhukakiś thaxśkiśxapa tshi wethnaka matiźtaqaś, niźaśa werhki anćhuk pekućha.

¹⁵Niźaśa anćhuk Yöś kirïchi jilanaka qhaluqhalu watha thaxiñinakchiśmeq khe, anćhuka ephnakaki anaćha tama. Ans anćhuka ephki werhtćha, niźaśa werhtćha anćhukakiś ni Yöś śuma kintu thaxinchinki, xalla niźtikiśtan anćhukki ni Criśtu Jesusiźkiś kirïchinćhukćha.

¹⁶Xalla nuź werhki anćhuk rokt'ućha, ni weth näśqatś taqu tira waqaychaxu.

¹⁷Xalla niźtikiśtan werhki Timoteo anćhukakin kuchanźkichinćha, nïki weth quśpekaćha niźaśa Yöś Tatźkin thapa quśśiś machhcha. Xalla nïź anćhukakiś khuñsqatakićha weriź ni Criśtu Jesusiźkin kirïta qamañkiśtan, xalla nïćha thapa weriź ni Yöś kirïchi jilanakźkiś thaxinkan wattaki.

¹⁸Niźaśa anćhukakiśtan tshi qhaźultan perśunpachkiś tassa, werh anćhukakin ana iya thonśñi thonakeq khikan;

¹⁹Niźaśa ni Yöś munasaź nïki, werhki waxillal anćhukakin thonśñi thonaćha. Xalla neqhśtan werhki anćhuk cheraćha xalla ni perśunpachkiś tasñinakaki, niźaśa ni mita chïchiñi źoñinakmi.

²⁰Xalla ni Yöś irpiś wathaki anaź parlanakaqaś, ans aśkiśtanćha.

²¹¿Anćhukki ćhhuluź pekxo: Werhki anćhuk xwatślaqi oqhñiź pekya, uśh śuma quśtan anćhuk thonźkiñiź pekxa?