Read Chipaya 1 CORINTIOS 8 Bible Online

1 CORINTIOS 8 - Chipaya bible

1 CORINTIOS 8

¹Xaśiki ni źoñiź päta yöśnakźkin wilana thxotśnakaki watchićha. Xalla ni chïtaki werarapanćha: Thappacha ućhumnakki werar śiśnakchiśśa; niźaśa ni śiśnakaki mitaź khisqatćha, ans ni oqśki ni Yöś kirïchi jilanakźkiś aśiź yapśinćha.

²Niźaśa yaqhapaki paxućha khićhax nïki, ni źoñiki xaqhnuź paxśtantaźlaxa, xalla ni anaź paxćha.

³Xalla ni Yöś cheqpacha pekñiki, Yöśki ni źoñiź paxćha.

⁴Niźaśa ni źoñiź päta yöśnakźkin thxotta wilan ćhheri lulhśmi ućhumnakki śumaź śiśśa, ni źoñiź päta yöśnakaki ti yoqkiś ana walurchiśśa, ans śinta Yöśqaś źelhćha.

⁵Niźaśa ni tsewkta pachkin niźaśa ti yoqkiś ni yöśnaka khita źelhćha, (xalla niźtikiśtan wakchi yöśnaka niźaśa mallkunaka źelhćha),

⁶Niźaśa ućhunnakaltaki anaź yaqha Yöś źelhćha ans śinta Yöśqaś źelhćha, niźaśa thappacha ni ćhhultaqinakaki Ephźkiśtan thonñikamaćha, niźaśa ućhunnakmi nïź khen źelhćha. Niźaśa tshi Tataqaś źelhćha, niźaśa ni Jesucriśtuź khen thapa ćhhultaqinaka źelhćha niźaśa ućhumnakmi.

⁷Niźaśa anaź thappacha źoñinakaki ni werara paxćha. Niźaśa yaqhapanakaki ni źoñiź päta yöś amtiś śiśśićha, niźaśa tirapan ni źoñinakaki ni źoñiź päta yöśkin thxottaqa khikan lulhćha; ans ni źoñź quśki iya wawapanćha, xalla niźtikiśtan ujchiś khissa.

⁸Xalla ni ućhumnaka Yöśtan qamśxapaki, ni ćhheri lulhkumi ana ni ćhheri lulhkumi, anaź tshan khjusa uśh tshanti ana śumkiś ućhumnak thxotźnasaćha.

⁹Niźaśa ni anćhuka liwri qamañkiśtanź kuytaśa, ni liwri qamañaź khen anćhukki ni upa quśśiś jilanaka ujkiś thxotsqatasaćha.

¹⁰Niźaśa amki ti ćhhultaqinaka śiśkanpacha, ni źoñiź päta yöśkin uchśta wilana lulim julźnasaź nïki, neqhśtan tshi upa quśśiś jilaki am cherźku niźtaśaqaś ni źoñiź päta yöśkin thxotta wilan ćhheri lulhśxapa amkiś julźinźkasaćha.

¹¹Xalla nuź amki am quśkiś śiśkanpacha, ni am upa quśśiś jila apt'ićha, xalla ni Criśtuki nïźkiśtanśaqaś tikhśićha.

¹²Niźaśa anćhukki nuź päkuki ni upa quśśiś jilanakaź ujkiś thxotźa, niźaśa ninakź quś upa quśqatćha, neqhśtan anćhukpachaź Criśtuź tukkiś uj päćha.

¹³Xalla niźtikiśtan werhki ni ćhheriź khen, weth jila ujkiś thxotsqatućhax nïki, werhki anal iya ni chhiświ lulasaćha, ni weth jila ana iya ujkiś thxotsnaxu.