Read Chipaya 1 CORINTIOS 9 Bible Online

1 CORINTIOS 9 - Chipaya bible

1 CORINTIOS 9

¹Werhki liwritćha, niźaśa apuśtultćha, niźaśa werhki ni Jesús Tata cherchinćha. Niźaśa anćhukki weriź lanqśñiź khen, anćhukki Criśtuźtićhukćha.

²Niźaśa werhki yaqhapanakźkiśiki anaźlani apuśtulki; ans werhki anćhukakiśtan apuśtultćha, xalla ni anćhukaź Yöś kirïchiź khen werhki cheqpacha apuśtultćha.

³Xalla tïćha ni wethtan ćhhaxwqatñinakźkiś qhäśxapaki:

⁴Niźaśa ućhumnakki ni ćhherinakami niźaśa ni likhśnakami tanś wakiśićha,

⁵niźaśa ućhumnakki tsha Yöś kirïchin thunatan qamasaćha, niźaśa ni yaqha apuśtulanaka qamñi irata, niźaśa ni Yöś Tatź laqhnaka iratami niźaśa Cefas iratami.

⁶¿Uśh wethtan Bernabeźtanqaś werhnakki ana ni Yöś kirïchi jilanakaź manta päta khesaya?

⁷¿Jëkht śultatut perśun suturźtan lanqśñixo? ¿Jëkht perśuna uwa ćhhakhźku ana neqhśtan lulhñixo? ¿Jëkh üśa ichñit ana ni üśi kiśhu lulhñixo?

⁸Niźaśa anćhukki ti ana źoñiź chïtaźtaqaś kiriya, xalla ni Moisés lïkiśimi nuź khićha.

⁹Xalla nïki ni Moisés lï liwrukiś khjirtaki, tuź khićha: “Xalla ni qhxoxñi wak turźkiś ana ñukhźinś wakiśićha.” Xalla tïki khićha ni Yöśki anaź ni wak turunakźkiśtan llakiśhakićha,

¹⁰ans Yöśki ućhumnakkiśtanź llakiśhićha. Xalla ni lïki ućhunnakaź khen khjirtaćha, niźaśa ni yoqataźlax nïki niźaśa ni kula qhxoxñimi, ninakaki ninakź paka tanśxapa ni śqala axśkiś lanqśtanćha.

¹¹Niźaśa werhnakki anćhukakiś Yöś taqunaka ćhhakhchinćha, xalla neqhśtan anćhukakiśtan anaź añcha taź wethnaka lulhśxapa mayś wakiśićha.

¹²Niźaśa yaqhapanakaki ti mayśt źelhćhax nïki, werhnakki tshantil mayasaćha. Ans werhnakki anapan tinaka maychinćha, niźaśa werhnakki thapa tinaka awantichinćha, ni Criśtuź śuma kintunaka ana aqacha päta khexu.

¹³Niźaśa anćhukki śiśśa, ni timlukiś lanqśñinakaki timlukiśtanź qamćha. Xalla ninakaki ni altarkiś ni uywi chhiświ thxotta wilananakaź lulhćha.

¹⁴Niźtaśaqaś ni Yöś Tataki ni Yöś śuma kintu maśiñinakźkiś khichićha, ninakaki ni maśintikiśtanx qamla.

¹⁵Ans werhki anapan ti ćhhultaqinakźkiśtan maychinćha, niźaśa anapan anćhukakiś wethkiś thäxu khjirchinćha. ¡Niźaśa werhki ima ti apuśtul lanqśkiś ana pakta lanqźkan tikhśl pekućha!

¹⁶Niźaśa werhki ti Yöś śuma kintu maśinkanaki, werhki anal ayt'aś wakiśućha; xalla tïki Yöśśa werh nuź maśnax khichiki; ¡ans anal ti Yöś śuma kintu maśnaź nïki, werhki qhaźkhitaqat khećhani!

¹⁷Xalla niźtikiśtan werhki weth quś amtal päsaź nïki, werhki paktal khesaćha; ans werhki Yöś mantital Pawućha, xalla ti päkuki Yöś mantita qiyal kumlućha.

¹⁸Xalla niźtikiśtan ni weth pakaki ni Yöś śuma kintunaka, ana pakśuñ maśinźku añcha kuntintutćha; xalla nïki tuź khićha, xalla ni Yöś śuma kintu maśintikiśtan werhki ana pakta qamśtanpantaćha.

¹⁹Niźaśa werhki anaź jëkiź mantitit, ans werhki thapatiź manta päñi khissinćha, niźaśa tukuśinskinaki werhki Criśtuźta tama źoñinaka kanśtanćha.

²⁰Niźaśa werhki ni judiu źoñinakźtan qamkanaki, tshi judiu źoñiźtaqaś khissinćha, ninaka Yöśkin kirïsqatśxapa; niźaśa ni Moisés lïxaru qamñi źoñinaka Yöśkin kirïsqatśxapa, ans werhpachaćha ti lïxaru khissintki, niźaśa weth qos quśkiśiki werhki anal ni lïxarupan qamućha.

²¹Ans tshi khenaki ni ana Moisés lïxaru qamñi źoñinaka Yöśkin kiriyax khiwćha, niźaśa werhki ninaka irata khissinćha, ans weth qos quśki Yöś lïxarupanćha, niźaśa anśiki werhki Criśtuź lïxarupan qamućha.

²²Niźaśa werhki ni upa quśśiś jilanakźtan qamkanaki, werhki ninaka irata khissinćha, xalla ninaka Yöśkin khiriyaxu. Niźaśa werhki thapa źoñinaka irata khissinćha, tshi qhaźtallami ninaka liwrïta khexu.

²³Niźaśa werhki thappacha tinakaki Yöś śuma kintu layku pawućha, neqhśtan werhki ni Yöśtan chika qamśxapa.

²⁴Niźaśa anćhukkiź śiśśa, tshi śati tupśkiśiki thapaź śathćha, ans śintallaqaś ni pakaki tanźa. Niźta irataź anćhukki śata ni paka tanśxapa.

²⁵Niźaśa ni piluta uśhinś thakśñinakaki, ninakaki ni śhoxrichnakźkiśtanź kuytaśśa. Xalla tinakaki tshi ana thurñi pillu tanśxapaź nuź päćha, ans ućhumnakki tshi ana tukuśiñi pilluź tanźnakićha.

²⁶Niźaśa werhki anal śuraźtaqaś śatućha, niźaśa ana qhara wekśñi źoñiźtaqaś ćhakhźnućha.

²⁷Ans werhki weth xañchil kaśtikućha, niźaśa tsomanchi kaśaxl khiwćha, niźaśa ni yaqha jilanakźkiś thaxinźku, ana werhpacha ana śuma khita khiśxapaki.