Read Chipaya 2 CORINTIOS 2 Bible Online

2 CORINTIOS 2 - Chipaya bible

2 CORINTIOS 2

¹Xalla niźtikiśtan werhki anćhuk ana llakiśhaxu ana wilta thonś quś thutśinćha.

²Niźaśa werhki anćhukakiś llakil thäsaź nïki, ¿jëkit werh quśnasaxo? Anćhukpanqaź werh quśnasaćha.

³Xalla niźtikiśtan werhki anćhukakin nuźupan khjirchinćha, anćhuk ana wethkiś llaki thäxu, ans anćhukki werh kuntintu khisqatśtantaćha. Werhki śiśatućha anćhukki wethtan añcha kuntintuź khitasaćha.

⁴Xalla ti karta anćhukakin khjirkanaki añcha llakiśhśinćha niźaśa thjutupaśśinćha niźaśa qächinpanćha. Ans werhki anćhuk ana llakiśhaxu khjirchinćha, ans anćhuk weth oqśñi quś näśnaxu khjirchinćha.

⁵Niźaśa yaqhapanakaki werh llaki thächićha, xalla ni źoñiki anaź werh alaxa llakisqatchiki ans thappacha anćhukakiś tshi qhaźta llakisqatchiśaqaśśa. “Xalla tïkil khiwćha ana añcha jilt'ayśxapa.”

⁶Niźaśa anćhukakiśtan jilamanqhaki ni źoñi kaśtikchinćhukćha, xalla ni kaśtiktaki nuźuqax khila.

⁷Niźaśa anćhukki xaśiki ni źoñźtan pertunaśtanćha niźaśa ni źoñi yanapśtanćha, ana ni źoñi añcha upaquśhaxu.

⁸Xalla niźtikiśtan anćhukakiś rokt'aśućha, wilta anćhuka oqśñi quś thëźna.

⁹Niźaśa werhki tuki ti ćhhultaqkiśtan khjirźkichinćha, anćhuka quś yanśxapa niźaśa anćhuk weriź thaxinta kaśata uśh ana kaśata xalla ni śiśxapa.

¹⁰Niźaśa anćhukki pertunćhax nïki, werhśaqal pertunućha; niźaśa werhki anćhukakiśtanśaqaś Criśtuź tukkiś pertunchinćha, pertunś źelanaki.

¹¹Xalla nuź ni Saxraki ućhunnakakiśtan anaź qhxortipaśakićha, niźaśa ućhumnakki ni Saxriź ana śum päśnakaź śiśśa.

¹²Weriź ni Criśtuź śuma kintunaka maśinśxapa ni Tróade chawkh watha irantitan, wethkiś Yöś Tatźtaxapa lanqś śana khetskichićha.

¹³Niźaśa ni weth qos quśki ni Tito jila ana śalźku anataćha phiya. Xalla niźtikiśtan werhki ninakźkiśtan jalhtiźku Macedonia watha oqhchinćha.

¹⁴Niźaśa ućhumnakki Yöśkin sparakiź khiś wakiśićha, xalla nïćha ni Criśtuź jikhśkiś ućhum chhichñiki, niźaśa wethnakakiśtan nïź śuma taqu śiśqatćha, xalla ni śuma taquki thapa qhutñiź wichansa tshi śuma samanaźtaqaś.

¹⁵Niźaśa werhnakki Criśtuź Yöśkin tshi inśiñśu t'asta jeq'itanñiźtaqaśtćha, xalla tïki thapaqhutñiź wichansa ni liwrïsñi źoñźkiśimi, ana liwrïsñi źoñźkiśimi.

¹⁶Xalla ni apt'iñi źoñinakźkiśiki ti inśiñśuki tshi tikhś jeq'itatñiźtaqaśśa, ans ni liwrïsñinakźkiśiki, añcha śuma źeti thäñi jeq'itatñićha. ¿Xalla tixapa jëkhpan thaxintaxo?

¹⁷Niźaśa werhnakki ni Yöś śuma tawqźtan anal kankan oqhlayućha, yaqhapanakaki xalla nuź päñićha; ans werhnakśti Yöś tukkiś śuma quśtanpanl palxayućha, werhnakki nïź kuchanźkititpanćha niźaśa ućhumnakki Criśtuźtan chikapanź khekićha.