Read Chipaya 2 CORINTIOS 7 Bible Online

2 CORINTIOS 7 - Chipaya bible

2 CORINTIOS 7

¹Jilanaka xalla tinakaćha Yöś ućhumnakakiś taqu onźtaki. Xalla niźtikiśtan ućhumnakki źkayi quśśiś waqaychiśtanpanćha, thapa ni ućhumnak ujkiś thxotśpekñinakźkiśtan, niźaśa ni ućhum xañchikiśtanami niźaśa ni ućhumnaka animuźkiśtanami; niźaśa ućhumnakki ni Yöś eqhskan śuma źkayi quśśiśpanź khiśpekla.

²¡Werhnak anćhuka quśkiś qhawźnalla! Ana jëkhźtanami ana śuma pächinćha; niźaśa ana jëkh źoñimi śhoxritchinćha; niźaśa ana jëkh źoñimi q'otchinćha.

³Xalla tïki anal anćhuk ćhhaxwku chiyućha, niźaśa werhki anćhukakiś ti tshamaxuñpan chïchinla, anćhukki weth quśkiśpanćha, niźaśa anćhukatan chikapacha qamśxapami niźaśa anćhukatan chikapacha tikhśxapami.

⁴Niźaśa werhki anćhukatan qhanakamal parliś pekućha, niźaśa werhki anćhukakiśtan añcha kuntintutćha. Xalla ni t'aqhiśiśkiśtanami werhki añcha kuntintutćha niźaśa p'eqtichinpanćha.

⁵Niźaśa ni Macedonia watha irantiźkitikiśtanpacha werhnakki anapan jejśinćha, ans werhnakki thapa qhutñi ch'amanaka śalchinćha: Niźaśa werhnakki ćhhaxwñiź muyuntitataćha, niźaśa wethnaka qos quśki añchaź eqhsnatćha.

⁶Xalla ni Yöśki ni upaquśhśi jilanaka qiśhñićha, niźaśa ni Tituź thontan werhnak quśśićha.

⁷Niźaśa ana nïź thontikiśtanqaś kuntintuttaćha, ans nïki anćhukakiśtan thapa quśtan p'eqtichitaćha. Tituki wethnakakiś kint'ichićha anćhukki wethnakatan śalś pekćha khila, niźaśa nïki kint'ichiśaqaśśa anćhukki wethkiśtan añchaź llakt'aś khila niźaśa anćhukki wethkiśtan anaź źeli wakćha khila; neqhśtan werhki thappacha tinaka nonźku tshanti chipchinćha.

⁸Niźaśa ni weriź anćhukakin khjirta kartaki anćhuk llakisqatchiźlani, xaśiki werhki ni kartikiśtan añchal llakt'aśućha. Niźaśa werhki anćhukakin ni tuki khjirta karta cherźku añcha quś qächićha, ni kartaki anćhuk tshi upakama llakiśhqatqalćha,

⁹Xaśiki werhki añcha kuntintutćha; ana anćhuk ni kartiźtan llakisqattikiśtanqaś, ans ti llakiśhnakaki anćhuk Yöśkin qhutsqatchićha. Xalla ni llakiśhki Yöś munañpataćha, niźaśa werhnakki anćhukatan anapan ana walinaka pächinćha.

¹⁰Niźaśa ni llakinakaki Yöś munañpakamaćha, xalla ni llakinakaki Yöśkinź kirïsqatćha niźaśa liwrïśxapaź chhichcha, neqhśtan anaź llakiśhki źelhćha. Ans ti yoqkiś qamñi źoñinakź llakiki tikhśkinź chhichcha.

¹¹Niźaśa ni anćhuka llakiśhki Yöś munañpataćha, ¡anćhukkiź cherźna nïki ćhhulu wali pächitaxo! Niźaśa anćhuk cheqpachapan kirïsqatchićha niźaśa wethkiśtan thurt'isqatchićha; niźaśa anćhuk źaxwqatchićha, niźaśa anćhuk eqhsqatchiśaqaśśa. Xalla neqhśtan anchukki werh cherś pekatćha, niźaśa anćhukki werh silchinćhukćha, niźaśa anćhukki ni ujchiś źoñi kaśtikchinćhukćha. Thappacha tinakźtanaki anćhukki ti ćhhultaqinakźkiś ana mitiśñi khissinćha.

¹²Xalla nuź werhki ni karta khjirkanaki, ana ni ćhhaxwñiźkinami niźaśa ana ni ćhhaxwta źoñźkiśimi pinsikan khjirchinćha, ans werhki ni Yöś tukkiś thëźta khexu khjirchinćha, niźaśa anćhukki wethnakakiśtan anaź źeli wakćha.

¹³Xalla tïki ućhumnakalta tshi qiśhñitaćha. Niźaśa ućhumnakki ti qiśhñiźkiśtan tshanti tanźtaćha, niźaśa werhnakki ni Titu kuntintu cherźku añcha chipchinćha; niźaśa anćhukki nïźkiś ew taqunakźtan quśśinćhukćha.

¹⁴Werhki ni Tituźkiś waxa anćhukakiśtan kuntintutćha khikan chïchïnćha, niźaśa werhki ana anaśuma khititćha. Ans werhnakki thappacha cheqpachapan anćhukakiś maśinchinćha, niźaśa werhnakaź ni Tituźkiś chïtakama watchićha: Niźaśa werhnakki anćhukakiśtan añcha kuntintutćha.

¹⁵Niźaśa ni Tituki anćhuk ni kaśñiź khen niźaśa añcha thapa quśtan ni tanśñiź khen, niźaśa ninaka khuñśku Tituki tshantiź anćhuk pekćha.

¹⁶¡Niźaśa werhki anćhukakiś tasku añcha kuntintutćha!