Read Chipaya 2 CORINTIOS 8 Bible Online

2 CORINTIOS 8 - Chipaya bible

2 CORINTIOS 8

¹Xaśiki jilanaka, werhnakki anćhukakiś kint'iśl pekućha, ni Macedonia wathchiś Yöś kirïchi jilanakźkiś xaqhnuź ni Yöś oqś thëźćhaxa.

²Xalla ti Yöś kirïchi jilanakaki muspa llakinaka watchićha, xaśiki ninakaki añcha k'achhaź qamćha; xalla ti jilanakaki añcha t'aqhirićha, ans tinakaki Yöśkin tshi źelinchiś źoñinakaźtaqaś ofrenda thächićha.

³Werhki anćhuk cherchinćha, anćhukki perśun quśkiśtan anćhuka źelinśkiśtan xama ofrenda thächinćhukćha, niźaśa ni anćhukaź attikiśtan tshanti thächinćhukćha. Niźaśa anćhukaź quś pektakama.

⁴Niźaśa werhnakki amkiś rokt'aśućha, werhnakki ni Yöś kirïchi jilanakźkinśaqaś onanś pekućha.

⁵Neqhśtan ninakaki muspa taź thächićha ana werhnakaź pinsita, niźaśa ninakaki perśunpacha Yöś Tatźkin thächićha, niźaśa ninakaki tukkin Yöś Tatźkin thächićha nïxaru wethnakakinaki, xalla nïki Yöś munañpa pächićha.

⁶Xalla niźtikiśtan werhnakki ni Titu rokt'ichinćha, anćhukakiśtan ni anćhukaź thapa quśtan ramtanaka juntapaxu, xalla ni Titupachataćha aźqalla ni junthapi qallantichiki.

⁷Niźaśa anćhukki thapatiźkiśtan tshanti śumapanćha: Ni thapa quśkiśtanaki, niźaśa ni añcha śuma taqunakźkiśtanami, niźaśa ni śiśnakźkiśtanami, niźaśa manta päśkiśtanami tshanti śumapanćha, ni wethnakakiśtan yateqźkuki, niźaśa anćhukki ti oqś qamañkiś śumapan ulanśtanćha.

⁸Werhki anćhukakiś anal ni päxupan chiyućha; ans ni yaqha źoñinaka nuź päxu chiyućha, niźaśa anćhuka oqśki thapa quśtan päta thëźta khiśxapaćha.

⁹Niźaśa anćhukki ni ućhumnaka Jesucriśtu Tataź oqśñi quś paxćha, ni Jesusaki źelinchiś khikanpacha ućhumnak oqźku t'aqhiri khissićha, niźaśa ućhumnakki nïź t'aqhiri qamtikiśtan muspa źelinchiś khisnax khitaćha.

¹⁰Niźaśa werhki anćhukata wali khexu ti ćhhultaqinakkiśtan chiyućha. Niźaśa ewiki anćhuktaćha ni tuki ofrenda thäśkiśiki, niźaśa anćhukki thapa quśtanpan pächinćhukćha.

¹¹Xaśiki anćhukki anćhukaź attakamalla ni tuki thapa quśtan rami qallantita źerźnalla, anćhukki nuź päś khichinkukpantaćha.

¹²Niźaśa xaqhsilta jilat ofrenda thäś pekćhax nïki, Yöś Ephki nïź attakamalla thäta ofrendaź tanźa. Niźaśa Yöśki thapa quśtan thätaź pekćha.

¹³Werhki anal yaqha jilanaka yanapźku anćhukki t'aqhiri khisñi pekućha; ans thappacha tshikumul pekućha.

¹⁴Xaśiki anćhukaltaki ni jilanakźta ana źelhñinaka źelhćha; niźaśa tshi nöxiki anćhukalta ana źelhñiki ninakźtaki źelakićha, xalla nuź anćhukki tshikumuź khekićha.

¹⁵Xalla ni Yöś śuma kintu khjirtikiśiki, tuź khićha: “Ni muspa taź axśiźkiśiki ana źethchićha, niźaśa ni qolukulla axśñiźkiśiki anaśaqaś upsićha.”

¹⁶Ni Yöśki ni Tituź quś anćhukakiśtan śhulźinqalćha, niźaśa werhki anćhukakiśtan añchal llakt'aśutaćha xalla niźta irata, neqhśtan werhki Yöśkin sparakiź khiwćha.

¹⁷Niźaśa ni Tituki ni weriź chïźinta katoqchićha, niźaśa nïpachaź anćhukatan añcha śalś pekćha, xaśiki ni Tituki nïź perśun quśkiśtanź anćhuk cherśñiź oqhćha.

¹⁸Niźaśa werhki Tituźtan chika tshi jilal kuchanźkućha, xalla ti Yöś kirïchi jilźkiśtanaki thapa Yöś kirïchi jilanakaki añcha śumaćha khikan parliñićha, niźaśa ti jilaki ni Yöś śuma kintuź tukatu lanqśićha.

¹⁹Niźaśa ni Yöś kirïchi jilanakaź ni jila illśiki wethnakatan oqhlayaxuki, niźaśa ni t'aqhir jilanaźkin ni ofrenda onanśxapa chhichaxu, thappacha tinakaki Yöśtaxapal pawućha niźaśa wethnaka oqśñi quś thëśxapa.

²⁰Niźaśa werhnakki anal jëkhmi wethnaka moq'u oqhñi pekućha, ti chawkh onanśnaka ramthaptikiśtanaki,

²¹xalla nuź werhnakki śumapanl päś pekućha, ana ni Yöś tukkiśqaś niźaśa ti źoñinakź tukkiśimi.

²²Niźaśa ninakźtan chika tshi wethnaka jilaśaqaś anćhukakin kuchanźkućha, niźaśa ti jilaki wethnakakiś añcha śuma quś thëśićha, xaśiki ti jilaki tshantiź päś pekćha niźaśa anćhukakinź tassa.

²³Xalla ni Tituźkiśtanaki werhki anćhukakiś khesaćha, ni Tituki weth maśićha niźaśa nïki wethtan chika lanqśñićha anćhukaltaxapa. Niźaśa ni pukultan jilanakaki ni Yöś kirïchi jilanakź kuchantaćha, niźaśa ninakaki Yöś thü aynaqñinakaćha.

²⁴Niźaśa anćhukki ni Yöś kirïchi jilanaka śiśaxu thëźna, ninakaki cheqpachapan anćhuk pekćha niźaśa anćhukatan khikanaki kuntintupan khekićha.