Read Chipaya GÁLATAS 4 Bible Online

GÁLATAS 4 - Chipaya bible

GÁLATAS 4

¹Werhki xalla til chïś pekućha: Xalla ni pata tanśñiki iya qoltaźlax nïki, ni źoñź manta päñiźkiś anapanź wakiśićha, niźaśa thappacha ni ćhhultaqinakaki cheqpacha nïźtakama khenami.

²Niźaśa nïź ćhhultaqinaka irpiñi źoñinaka źelhćha, xalla nïź eph nïźkiś wakiśi ćhhultaqinaka t'aqśinśkama.

³Ućhumnakatanki xalla niźta irataź watćha: Ućhumnakaź qoltalla khenaki, ućhumnakki ti yoq qamañkiś irpitićhumtaćha.

⁴Xalla ni thuñiź irantiźkitanaki Yöśki nïź Machh kuchanźkichićha, xalla nïki ni Moisés lïxaru qamkan tsha mätaq źonakźtan mathtaćha,

⁵ućhumnak ni lïxaru qamñinaka liwrïśxapa, neqhśtan ućhumnakakiś Yöś mati khisqatśxapa.

⁶Neqhśtan ućhumnakki nïź matinakćhumćha, niźaśa Yöśki nïź Machh Espíritu ućhumnaka quśkiś kuchanźkichićha; xalla ni Espirutuki tuź chïćha: “¡Abbá! ¡Tatay!”

⁷Xalla nuź amki anaź źoñź manta päñam, ans amki Yöś matimćha; xalla nuź nïź mati khikanaki nïź pata tanśñi śaqam khekićha.

⁸Niźaśa tuki anćhuk ima Yöś paxan, anćhukki ni źoñiź päta yöś manta päkan qamiñćhuktaćha.

⁹Niźaśa anćhukki anśiki Yöś paxchinćhukćha, ans śuma chïkuki, Yöśśa anćhuk paxchiki, ¿anćhukki qhaźtikiśtan wilta ni źoñiź päta yöśnakźkin kephś pekxo, ni yöśnakaki t'aqhir aś upala niźaśa ana śuma pätanakala, qhaźtikiśtanam ninakź manta päś pekya?

¹⁰Niźaśa anćhukki ni thuñinaka waqaychinćhukćha, jïśnaka, watanaka qaninćhukćha...

¹¹¡Werhki añchal llakt'aśućha, ni weriź anćhukakiś thaxintanakaki inapanqat khe khiwćha!

¹²Jilanaka, werhki anćhuk rokt'ućha: Anćhukki werh irataź khella, niźaśa werhki anćhuk irata khissinćha. Niźaśa anćhukki ana ćhhulumi wethtan ana śumanaka pächinćhukćha.

¹³Niźaśa anćhukkiź śiśśa, weriź tuki anćhukakiś ni Yöś śuma kintu maśinkanaki werhki tshi konkiśl t'aqhiśatućha.

¹⁴Xalla ni konaki anćhukata tshi llakiźtaqaśtaćha, anćhukki weriź niźta konchiś khen ana werh iñarchinćhukćha niźaśa anapan werh xaqurpayś pekchinćhukćha, ans anćhukki tshi tsewkta anjilaźtaqaś werh tanśinćhukćha, ¡ni Jesucriśtuźtaqaś!

¹⁵¿Xalla ni anćhukaź chiptanaka qhaź khissitaxo? Werhki anćhuka tukatul chiyasaćha, anćhukki tïź attasaź nïki, anćhuka perśun źhukimiź wethkiś thäśxapa apaqźtasaćha.

¹⁶¿Xalla ni weriź cheqpacha chïtikiśtan, werhki anćhuka moq'u khissinqaya?

¹⁷Xalla ni źoñinakaki anćhukakiśtan añchaź juśhupäćha, ans ni źoñinakź juśhupäśki anaćha śumanaka. Xalla ni źoñinakź pektanakaki anćhuk wethnakakiśtan t'aqś pekćha, neqhśtan anćhuk ni źoñinakźkiś quś thäxu.

¹⁸Niźaśa añcha walićha ni śuma źoñinaka juśhupäśki śuma quśtanaki; xalla tïki wiñayapanx khila ana wethtan khikanqaś.

¹⁹Weth q'ay matinaka, werhki wiltal ni mathś konźtan t'aqhiśućha, niźaśa ni Criśtuź thü anćhukakiś luśhkamal t'aqhiśaćha.

²⁰¡Xanqax werhki anśpacha anćhukatan khiwćhaxa, neqhśtan yaqhanakkiśtanź palt'asaćha, niźaśa werhki anćhukakiśtan anal qhaź khiyi atućha!

²¹Anćhukki tshïź chiyalla, xalla ni lï patxparu qamś pekñinaka: ¿Anćhukki anapan ni lï chïñi nonśinćhuk qhaźtataxo?

²²Xalla neqhśiki tuź khićha, Abrahamki pukultan okhalchiśtaćha: Tshïki tsha manta päyin źonakiśtan, tshïki perśun thunakiśtan, na thunki liwri źontaćha.

²³Xalla ni manta päyin źona matiki xañćhiźkama mathtataćha; ans na liwri thunaź mathta matiki Yöś ninakźkiś taqu onźtakama watax khitataćha.

²⁴Xalla ti kintuki ućhumnakalta tshi näsqatś taquźtaqaś wakiśasaćha; xalla ni pukultan mätaqanakaki piśk t'aqaźtaqaśśa: Tshäki ni Sinaí kurkiśtanćha, ni Agarki niwkhtanź thonćha, xalla na źonki ni manta päñinakź mäpan khita khekićha.

²⁵Niźaśa ni Agarki ni Sinaí kurkiśtanź thonćha, ni Sinaiki Arabia yoqkiśśa niźaśa xaśiki Jerusalén wath yoqkiśśa, thappacha ti źoñinakaki ninakź okhalźtanpacha lïxarupanź qamćha tshi manta päñi źoñiźtaqaś.

²⁶Ans ni tsewkta Jerusalén wathaki liwrïćha, niźaśa ućhumnakki nïź matinakćhumćha.

²⁷Xalla ni Yöś śuma kintu khjirtikiśiki tuź khićha: “Machur mätaqa kuntintuź khekićha, niźaśa amki ana okhalchiśśamćha; niźaśa amki añcha chipa qhawa, amki anam śiśśa ni mathś kona. Niźaśa na xaytiti mätaqki, na luktaqchiś źonakiśtan tshanti okhalchiś khekićha.”

²⁸Jilanaka, anćhukki Isaacźtaqaśśa: Niźaśa anćhukki Yöś śuma kintu onźta okhal ćhukćha.

²⁹Neqhśtan ni xañchiźkama mathtaki, ni Espirituźkistan mathta tanśxapa qhurchićha, anśiki niźtaśaqaś watćha.

³⁰¿Ni Yöś śuma kintu khjirtikiśki qhaźtkhexo? Ni khjirtikiśiki tuź khićha: “Na manta päyin źonki machhtanpacha chhetqata, xalla na źoñź manta päyin źona matiki anaź ni liwri źona matźtan ni pata tanźnasaćha.”

³¹Jilanaka ućhumnakki anaź na źoñź manta päyin matinakćhumki, ans na liwri źona matinakćhumćha.